Goiz hotzeko ferian mikologia atala aspaldi ikusitako aberatsena azaldu da; etxean beratzeko oliba freskoak ere aukeran izan dira; eta landareak, beti bezala aitzindari, udaberriari begira.
Meteorologiarekin lotutako hitzak ikasteko aproposa gertatzen da feria gunea eguraldiak muturretara jotzen duenean batez ere. Bi gradutik gora egitea kosta egin zitzaien Ordizia erdiguneko termometroei. Izotza bota zuen eta tokika egun senti garbi-garbia izan bazen ere,
terrala (Amezketa, Alegia inguruan) edo
lainaidea (Ormaiztegi inguruan) zein bailaretan zen jakin genuen.
«Ondo jantzita sanoa da» zioten batzuk. Naturarekin bat eginda bizimodua aurrera ateratzea zer den badakitenek filosofia ederrarekin hartzen dute.
Produktuei dagokionez, «gure piperrei antzemango zaie, izan ere azken aste hauetan berpiztu eta lore betean zuri-zuri egon dira pipermin landareak» ziren Pepita Aiestarainen Orendaingo Lugarraga baserriko kontuak. Halere, ez da harritzekoa azaroa aurrera doala kontuan hartuta.
Maiatza-ekainari begira
Landare postuetan erreparatuz ia udaberrira begira ez ezik, uda hasiera jomuga dutenak eskaintzen hasi dira: errepollo edo udaberriko aza (8 euroan ehuneko sorta) apiril-maiatzerako prest, edota aza kizkurra, ekainerako.
Mikologia atala aspaldi ikusi dugun bariatuena zen atzo, on-ddo, zizahori, esnegorri, saltsa perretxiko beltz eta urri bezain estimatua den gorringo kilo gutxi batzurekin; garestienak hauek ziren, kiloa 32 euroan.
Oliba freskoaren garaia
Ez da hemen ekoizten, baina makina bat azeituna jaten dugu urtean zehar. Mota asko eskaintzen da astero ferian jateko prest. Garai honetan justu freskoa ere eros daiteke Zaldibiako Maria Luisa Mendizabal eta Vicente Muñozen postuan, kiloa 2,65 euroan. Bezero jakinak dituzte eta galdezka hasita, beratze lana urtero egin ohi dutenen berri segidan bildu dugu. «Gehien dakiena Gus Arana da», esan zigun bere lagun batek. Asteroko feriako bezero den Jose Inazio Romerok, berriz, azaldu digu nola egin ohi duen: «Oso erraza da. Uretan (ahal bada klororik gabekoa) utzi beratzen hilabete bat, 2-3 egunez behin ura aldatuz mikaztasuna kentzeko; ondoren gatz uretan, nahi den espeziak gehituta, beste hilabete t’erdi eduki eta jateko prest daude». Aurten Badajozetik ekarri duten oliba freskoa picolimon motakoa da. Ekarri ohi duten manzanilak baino hezur handiagoa du, eta luzeagoa da, Muñozek kontatu duenez. Ez omen da azeituna urte ona, beraz olioa garestitzea ere ez litzatekeela harritzekoa zioen.