Albisuk buruz burukoan aurrera egin du, eta Zubizarretak egokiera erakutsi du debutean

IRAITZ_ZUBIZARRETA_ETA_JON

Ataunen ostiral arratsean jokatu zen profesionalen pilota jaialdia kirol horrek herrian daukan osasun onaren erakusle izan zen: harmailak ikuslez beteta, kantxan bi pilotari ataundar, bost hilabeteren buruan bi jaialdi antolatzeko prestasuna, eta eskolako neska-mutiko mordoa, zuriz.

Lehen neurketan, Iraitz Zubizarretak lehenengo partida jokatu zuen, profesionalekin. Ibai Zabala berriztarra zuen atzean lagun —urdinez—, eta Iker Arretxe eta Iñaki Etxegoin aurkari. Zubizarreta-Zabalak 22 eta 11 galdu zuten arren, printza dotoreak erakutsi zituen aiarrak. Profesionaletarako hautagaitza serioa aurkeztu du, Auzoetan. Tantoak bukatzeko dohaia badu; ezker gantxoz bikainak egin zituen, baita txokoan dejadaz bat edo beste ere.

Gorriak 8-1 aurreratu ziren; 10-6raino hurbildu ziren urdinak, baina 19-9raino ihes egin zieten gero. Etxegoinek oso ongi jokatu zuen, baita Arretxek ere (8 tanto egin, batere galdu ez). Zabala, bere ohiko mailatik behera jardun zen. Zubizarretak 6 egin eta 6 galdu zituen. Ikusleei txaloak joz irten zen kantxatik.

Albisu, Olaizolarekin

Bigarren neurketan, Banakako Txapelketaren estreinaldia jokatu zuten Jon Ander Albisu sangregorioarrak eta Jose Javier Zabaleta etxarrendarrak. 22 eta 8 irabazi du Albisuk. Aukera txikiena ez zion utzi: 15 tanto egin (atzean 10), eta 2 galdu. 86 pilotakadatan egin ditu 22ak.

Buruz buru, bigarren partida irabazi du Albisuk. Final zortzirenetara igaro da, eta larunbatean Aimar Olaizolaren aurka jokatuko du, Iruñeko Labriten.

Utzi ekarpen bat

*

*

Send this to friend