Goierriko Hitza

Txistu doinuekin hasi dituzte Santikutzak Legazpin

Goierriko Hitza — 2026-04-30 20:02:51

Hasi dira Santikutz jaiak. Jendetza bildu da arratsaldean herriko plazan, aurtengo festei hasiera emateko. Aurten Goiz Deia txistulari bandari egokitu zaio udaletxeko balkoitik pregoia egitea, txistu doinuaz lagunduta ondoren. Ondorengo txupinazoarekin lehertu da festa, eta kalean izan du segida jai giroak, erraldoi eta buruhandien ohiko kalejirarekin.

Txupinazo ofizialaren aurretik, gazteek ere egin dute jaiak hasteko ekitaldia Gaztetxean. Suziria bota ondoren, kalejiran jaitsi dira erdialdeko kaleetara.

Jaietako lehen txanpa igandera arte da, eta hurrengo asteburuan Kapela dantzarekin eta Mirandaola egunarekin amaituko dira.

Honela eman diete hasiera txistulariek aurtengo jaiei, Maider Apaolaza eta Iker Azpeitiaren hitzetan:

Arratsaldeon Legazpi!!

Ohituago gaude mikroa beharrean eskuan txistua edukitzera, baina herriko jaien hasiera iragartzeko aukera ez da urtero izaten eta aprobetxatu behar.

Jaiak gaur hasiko ditugun arren, errodajea egina ekartzen dugu batzuk, pasa den astean, beste urte batez, Korosti dantza taldeak antolatzen zuen Oin Puntetan asteburuan parte hartu genuelako. Horretaz gain, lehen aldiz, Gaztetxeak Gazte Festak antolatu zituen. Blusak soinean ekintza guztiek izan zuten arrera ikusita, ziur gaude datozen urteetan ere ekimen honekin jarraituko dutela, bejondeiela!!!

Bueno, eta aurten zer? Ba aurtengorako ere egitarau oparoa prestatu dute bai jai batzordeak, baita Txo!Esnako kideek ere. Txistulariak, urtero bezala egitarau horretako hainbat ekintzetan izango gara; kalejiretan, Olaria eta Ezpata dantza ekitaldian edo datorren astean ospatuko diren Kapela dantza edo Mirandaola egunean adibidez.

Hala ere egitarauak gutxi balio du herritarren parte hartzerik gabe. Bete dezagun Plaza, bete dezagun Azoka eta nola ez, bete ditzagun kaleak. Herritarrok gara festa guztien arima eta muina. Herritarrik gabe ez dago festarik, herritarrik gabe ez dago girorik. Egun zoragarri batzuk ditugu aurretik. Kanta dezagun, dantza dezagun, parte hartu dezagun eta nola ez, ondo pasa eta goza dezagun!!

Ondo pasa dezagun, ondo pasatzen utziz….

Ondo pasa dezagun ondoan daukaguna errespetatuz…

Ondo pasa dezagun, pasatu gabe….bueno…. sobre la martxa….

Bilakatu ditzagun kaleak espazio seguru eta eroso bat guztiontzat eta ospa ditzagun jaiak pozez, arduraz eta elkar zainduz.
Azken finean, bakoitzak bere nota eman dezala guztion artean musika eta armonia sortuz.

Eta gehiegi luzatu gabe mikroa utzi eta txistua hartuko dugu, erraldoiekin batera jaiei bals batekin hasiera emateko. Erraldoiak prest?

Ba besterik gabe, ondo pasa jaiak eta…

GORA LEGAZPI!

GORA SANTIKUTZAK!

GORA EUSKADI TXISTULARI!

Gazteen ongizatea, nahi ez den bakardadea, inklusioa, elikadura jasangarria eta belaunaldi arteko loturak mintzagai, Legazpiko Ongizatearen Plazan

Goierriko Hitza — 2026-03-25 10:00:25

Gazteen ongizatea, nahi ez den bakardadea, ariketa fisikoa, buruko osasuna, teknoadikzioak, elikadura jasangarria, herritar berrien inklusioa eta belaunaldi arteko harremanak Legazpira eramango ditu hilaren 26 eta 27an Gipuzkoako Foru Aldundiak antolatutako Ongizatearen Plazak. Horrela, goiz eta arratsalde, Plazaola parkean, ongizate integralaren inguruko hainbat solasaldi, mahai-inguru eta jarduera parte hartzaile hartuko ditu espazio berritzaile honek, pertsona orok ongi egoteko eta ongi sentitzeko funtsezkoak diren gaiak ardatza hartuta.

“Ongizate integralaren inguruan hitz egiteko eta elkarri entzuteko gune irekia da”, azaldu du Eider Mendozak, Gipuzkoako diputatu nagusiak, zeinek animatu nahi izan dituen legazpiarrak hil honetako azken ostegun eta ostiralean Ongizatearen Plazara gerturatu eta bertan antolatutako ekintzetan parte hartzera. Izan ere, gogoratu duenez, herritarroi eragiten diguten “errealitate eta arazo sozial berriak areagotzen” ari dira gure artean, gazteen ongizatea, nahi ez den bakardadea, adikzio berriak, gipuzkoar berrien integraziorako bideak eta abar.

“Ongi egoteaz aparte, gipuzkoarrak ongi sentitzea nahi dugu. Gipuzkoar guztien ongizate integrala bultzatu nahi dugu, hori da Aldundiaren lehentasun nagusia. Ongizatearen Plazaren bitartez, gai horien guztien inguruko dialogoa eta partaidetza sustatu nahi dugu”, nabarmendu du Mendozak. Hilaren 26 eta 27an egongo da Ongizatearen Plaza Legazpiko Plazaola parkean. Plaza irekia da, herriko hainbat elkarte eta eragileren laguntzarekin antolatu dena. Adin guztietarako pentsatutako jarduerak izango dira, askotariko proposamenekin, hala nola adituekin egindako topaketak, dinamika komunitarioak eta giro hurbil eta abegikorrean egindako kultur jarduerak.

Irekitzeko, Adinberrirekin saioa
Hilaren 27an, ostiralean, Jakoba Errekondo agroekologian adituak ekingo dio eguneko egitarauari goizeko 10:00etan eta, inguruko bi abeltzainen testigantzarekin bat –Legazpiko Agirrezabal baserriko Joseba Andueza eta Urretxuko Agerre baserriko Iñaki Sasieta–, elikadura jasangarriaren garrantziaz arituko da. 11:30etik 13:00etara, berriz, nahi ez den bakardadearen inguruko dinamika bat egingo dute; Ados teatroak bakardadearen inguruan ekoiztutako hiru mikrodokumentalen eskutik, beste horrenbeste herritarren kasu erreal bezain gordinak gertutik ezagutuko ditugu.

Arratsaldean, belaunaldi arteko solasaldia antolatuko dute 18:00etatik 19:00etara, adinetik harago lotzen gaituzten balioak eta esperientziak bilatuz, eta ondoren, 19:00etan LaBbatu batukadaren saio berezia egingo dugu eta pintxo potearekin amaituko dugu jarduna.

Egitarau eta ordutegi osoa hemen:
https://plaza.gipuzkoa.eus/eu/legazpi

Ordiziako Azoka XXI. mendeko ohituretara egokitzeko bidean

Goierriko Hitza — 2025-04-16 10:00:04

Asko dira oraindik Ordiziako Azoka merkataritza erreferentziatzat duten herritarrak. Goierriko nekazari eta abeltzainen topaleku izan ohi zen, eta nekazarien gune bada egun ere, baina azokaren etorkizuna bermatzeko, belaunaldi gazteak bertara erakartzeko, merkatua sustatzeko eta tokikoak saltoki handiekin lehia zuzena egiteko aukera izan dezan, hainbat ekimen egin ditu Ordiziako Udalak azken urteotan, iraunkortasuna lortze aldera. Azkeneko ekimenak izan dira Europako Batasunak eskaintzen dituen Next Generation diru-laguntzetatik azoka eraberritzeko finantzazioa lortzeko udalak egindako apustua. Apustua, eta lorpena. Izan ere, merkatua biziberritzeko lerroan, 1.092.653,29 euroko inbertsioko proiektua aurkeztu zuen, eta proposamen horretarako %80 lortu zuen Europako funtsetatik; beste %20a udalak jarri du.

Adur Ezenarro alkateak azaldu duenez, aurkeztutako aurrekontuaren %97,4 bete da. Inbertsiorik handiena azoka hartzen duen Plaza Nagusiaren berrikuntzarentzat izan da: 796.336,90 euro plaza bera berritzeko; 54.673,41 euro teilatuan panel fotovoltaikoak jartzeko; 7.093,38 euro postuetako mantel edo oihalentzat; 52.004,20 euro espazio osagarrietarako (sukalde mugikorra, informazio puntua eta behin-behineko postuetarako bi modulu berezi); 35.557,52 euro takila adimendunetarako; 18.139,96 euro packaging jasangarrirako; 4.985,20 euro hondakinen kudeaketarako; 14.399 euro transformazio digitalerako (webgunea, Ordiziako Azoka aplikazioa, ikastaroak); 18.097 euro seinale berrientzat; eta 17.933,41 euro wifia ezartzeko.

Ordiziako Azokaren eraldaketa digitalerako eta iraunkorrerako plana: Azoka XXI izan du izena egitasmoak, eta 1512. urtetik asteazkenero egiten den azokaren espazioa fisikoki eraldatzea eta modernizatzea izan dute helburu.

Zozketak erosleentzat
Digitalizazioa gaur egungo ezaugarri nagusienetakoa izanik, azoka digitalizatzeko urratsak egin ditu udalak. Ordiziako Azoka izeneko aplikazioa sortu dute, asteazken goizetan azokara joan ezin duten erosleek, Ordiziako Azokako app-aren bidez azokako ekoizleen fitxetan sartzeko aukera eta whatsapp bidez eskaera modu errazean bideratzeko aukera izateko. Arratsaldez, udaletxeko arkupeetan jarri diren takila adimendunetan jaso dezakete eskaera.

Herriko merkataritza establezimenduetan egindako erosketak ere bertan utzi ahal izango dituzte merkatariek

Aplikazioa deskargatuta, ekoizleen informazioa ikusteko eta haiekin whatsappez edo posta elektronikoz harremanetan jartzeko aukera izango dute herritarrek. Salneurriak ikusi ditzakete bertan, baita azken berriak ere. Azokako istorioak, bideoak, bertako produktuekin egindako errezetak…eta fidelizazio txartela. Asteazkenetan azken hori erabilita, sari bikainak lortzeko aukera izango dute. Izan ere, erabiltzaile guztien artean hilabetero zozketak egingo dituzte; azokan erabiltzeko packaging jasangarria edo sukaldean erabiltzeko tresna desberdinez osatutako loteak zozketatuko dira, eta hiru hilabetean behin produktu ezberdinez osatutako saski bat.

Erosketak nahieran
Udaletxe azpian dauden takila adimendunak dira azokaren eraldaketa digitalean egindako beste urrats garrantzitsua. Takila horien bidez, ez da beharrezkoa izango asteazken goizean Ordizian egotea azokako produktuak erosi ahal izateko, Ordiziako Azokaren aplikazioaren bidez eroslea merkatariarekin zuzenean harremanetan jarriko delako eta azken horrek erosketak armairuetan utziko dizkiolako. Izan ere, udalak egindako hausnarketa estrategikoetan ondorioztatu zuen azoka asteazken goizetan izateak eragina duela erosketan eta hartu-emanean, jende asko ezin delako azokara bertaratu. Gainera, herriko merkatariei ere zabalduko zaie takilen erabilera, azokan ez ezik, herriko merkataritza establezimenduetan egindako erosketak ere bertan utzi ahal izateko.

Hala, bezeroak fidelizatzeko eta bezeroaren eta ekoizlearen arteko harremana zuzena izateko helburua dute ekimen horiek, merkatuaren etorkizuna bermatuz. Azokak eta tokian tokiko merkataritzak iraungo badu, eta lehen sektorearen sustapena bultzatu nahi bada, ezinbestekoa baita azoka bera ere XXI. mendeko herritarren ohituretara egokitzea.

Hiru hamarkada kontsumo kontzientea bultzatuz

Goierriko Hitza — 2024-09-18 11:19:07

Zeraingo azoka ekologikoak 30 urte beteko ditu aurten, eta urtemuga honek mugarri bihurtuko du Gipuzkoan. Orain hiru hamarkada Zerainen antolatu zen lurraldeko lehendabiziko azoka ekologikoa, «bizimodu eta kontsumo kontzienteagoa» bultzatzeko asmoz eta helburuz. Ordutik, azoka aldatuz, handituz joan da, baina ez ditu hasierako oinarriak ahaztu. Datorren igandean, irailak 22, ospatuko da berriz Zerainen azoka ekologikoa Biolurrek, Zerain Dezagun fundazioak, Eko Lurrak eta Biziolak, Zeraingo Udalaren laguntzarekin antolatuta. Azokak itxiko du, hain zuzen, irailaren 10ean hasi zen Goierriko 15. Hamabostaldi Ekologikoa.

Gaur egun, ez da arrotza egiten ekologiaz hitz egitea, eta orokorrean, sinesmen kolektiboan barneratuta dago produktu ekologikoak kontsumitzeak pertsonen osasunean eragin positiboak dituela pentsatzea. Baina, hori ez zen horrela orain 30 urte eta Zeraingo azoka ekologikoak aldaketarako bide hori zabaltzen lagundu zuen.

Merkatu bat baino gehiago

Zeraingo azoka ekologikoak «ingurunearekin harreman osasutsu bat bermatuz eta eredu sozio-produktibo gizatiar eta kalitatezko baten aldeko apustua berretsiz, etorkizunerantz aurrera egiteko apustuari erantzuten dio, eta 30 urte beranduago Goierri osoan erreferente izaten jarraitzen du», azpimarratu dute antolatzaileek.

Apustu horren oinarrian azpimarra egiten diete ekoizleei batetik; eta erosleei, bestetik: «Azoka ekologikoa ez da merkatu bat; ekoizleen eta herritarren arteko topagune bat baizik». Are, azoka jai giroko ekintza bat da, eta oinarrizko landa-tradizioko elementuak ezagutzeko gune bat ere izan da: «Muztioa eskuz egitea, egur-ikatza ekoiztea, arropa errautsetatik garbitzea…». Aldi berean, artisau txikien ekoizpenak osatzen du urtero, azoka.

Aurten, Biolurreko 18 ekoizlek eta beste 13 artisauek jarriko dituzte postuak Zerainen. Gehienak, urteroko hitzordura hutsik egiten ez duten goierritarrak dira. Barazkiak, gaztak, marmeladak, haziak, ogia, fruta… izango dira aukeran, besteren artean, igandean. Artisauen artean ere guztiak goierritarrak dira, baten faltan. Arropa, bitxiak, kosmetika naturala… jarriko dituzte salgaien artean.

Apustu «irmoa»

Azokaren arrakastaren arrazoien artean, «Zeraindarren lankidetza eta borondatezko lana, Zerain Dezagun fundazioaren antolakuntza eta sustapena eta udalaren laguntza» ere azpimarratu dituzte. Azoka «apustu irmoa» dela diote antolatzaileek, pandemiak ere eten ez zuena. Testuinguru hartan, —ekoizle txiki guztientzako une zailak izan ziren— azoka mantentzeko forma sortzaile eta seguruak bilatzearen aldeko apustua egin zen.

Azken 15 urteetan egin den bezala, Zeraingo azoka ekologikoa Goierriko Hamabostaldi Ekologikoaren baitan antolatu da. Osasunaren zaintzaz gain, egitura sozioekonomikoak eta ingurumenak eskaintzen dituzten aukera ezberdinak herritarrei ezagutarazi eta haiekin partekatzea ditu helburu hamabostaldiak.

Amaitzeko, gaur egungo «krisi ekosozialaren testuinguruan, guztion ardura da lurraldea eta komunitatearen zaintza partekatuak izatea, eta bide hori kolektiboki bultzatzea; hori ezinbestekoa da tokiko nekazaritzaren eredu iraunkor bat bultzatzeko, tokiko kontsumo eredu osasuntsu eta iraunkor bat sustatzeko eta gai horien inguruan sentsibilizatzeko», azpimarratu dute. l

Kimikari izateko lanbide heziketa paper eskolan

Goierriko Hitza — 2024-09-13 12:03:18

Kimikaren sektorean lan egin nahi duena Tolosan presta daiteke horretarako, Tolosaldea Lanbide Heziketa Institutuak paper eskolan eskaintzen dituen erdi eta goi mailako zikloetan. Dagoeneko eman daiteke izena, eta urriaren 18ra bitarte egongo da irekita epea. Erdi mailako zikloan kimika instalazioko teknikari izateko prestatzen dituzte ikasleak eta goi mailakoan, berriz, kimika industrialeko goi mailako teknikari izateko.

Ikastetxeko kimikaren arloko Mentxu Aiertza arduradunak azaldu du «harreman estua» dutela papera ekoizteko arloarekin, baina oso zabala dela sektorea: «Produktu askotan daude prozesu kimikoak: plastikoetan, elikagaietan, pinturetan, koletan… Enpresa horietan lan egiteko gure ikasleek dute formakuntzarik egokiena». Gehitu du paperaren inguruko ikasketak ez direla leku askotan topatzen: «Paperaren mundua garai batetik hona asko murriztu da, baina oraindik handia da eskaria. Sektore horretan sartzeko eta asetzeko formakuntza eskaintzen dugu guk».

Elkarlan sare sendoa

Bi ziklo horiek aurretik ere eskaintzen ziren, baina Tolosaldea Lanbide Heziketa Institutuak hartu du garai bateko paper eskola zenaren kudeaketa eta hark eskainiko ditu hemendik aurrera. Aiertzak azaldu du onurak dituela aldaketak: «Tolosaldeak beste ziklo industrial asko ditu: mekatronika, soldadura, galdaragintza… Zentzu horretan, arlo askotako enpresekin ditu kontaktuak, eta sare horrek berak laguntzen digu inguruan txertatzen eta gure burua zein ikasleak ere pixka bat ezagutarazten».

Arduradunak azaldu duenez, lanbide heziketaren sare publikoaren parte dira eta ikasleek «aldaketa gutxi» nabarituko dituzte aurreko egoeratik berrira.

Formakuntza praktikoa

Lanbide heziketako ikasketak oso praktikoak izaten dira, orokorrean, eta metodo bera erabiltzen dute kimikako kurtsoetan ere. Aiertza arduradunaren hitzetan: «Hain zuzen, ziklo horietan ikasleak prestatzen ditugu laborategiko lana —bata zuriz jantzita irudikatzen duguna— aurrera eraman dezaten».

Ez da, ordea, prestakuntza bakarra, mantenu zein produkzio lanerako ere prestatzen baitituzte: «Erreaktore batean lan egin behar badute zer jakin eta kontuan zer hartu behar duten irakasten diegu». Ikasleek prestakuntza zabal horren bitartez eskuratzen dituzte malgutasuna eta aukera lan egiteko bi mundu horietan.

Hari berari tiraka, kimikaren alorreko arduradunak nabarmendu du formakuntza guzti-guztiak «oso praktikoak» direla: «Teoria gutxi izaten da, eta ez dezatela irudi oker bat osatu: ez diegu eskatzen taula periodikoa ikastea. Hori egin ordez, produktu edo prozesu zehatzen bat egiteko eskatzen diegu eta, horrekin, eginaren eginaz barneratzen eta ikasten dituzte, gerora, lantegian edo enpresan baliagarriak izango zaizkien ezagutzak».

Esperientzia zein ibilbide zabala dute Tolosaldea Lanbide Heziketa Institutuan metodologia horren bitartez lan egiten eta formakuntza praktikoa ikasketa prozesuaren erdigunean txertatzen.

«Prozesu naturala»

Lanbide heziketako ikasketetan izena emateari dagokionez, legez, erdi mailako zikloak egiteko Derrigorrezko Bigarren Hezkuntza (DBH) bukatuta eduki behar da eta goi mailakoa egiteko, berriz, bi sarbide daude: lanbide heziketako erdi mailako ziklo bat edo batxilergoa.

Era berean, aipatu behar da erdi mailatik goi mailara pasatzeko lehen proba bat gainditu behar zela; gaur egun, ordea, desagertu egin da proba hori. Aiertzak azaldu duenez: «Batetik bestera pasatzeko prozesua oso naturala da. Ohikoa izaten da erdi mailako ziklo bat egiten duenak, ondoren, goi mailako bat egitea. Eta goi mailako zikloa gainditzeak aukera zabaltzen du unibertsitatean gradu bat egiteko ere».

Ikastetxeko ordezkariak gehitu du, hortik harago, izaten dituztela beste profil bateko ikasleak ere: «Askotan etortzen dira pertsonak, zeinak aurretik beste zerbait ikasi duten eta, agian, sektorez aldatu nahi duten. Horiez gain, badira bere garaian ikasketak ez zituztenak bukatu eta, orain, sektorean sartu nahi dutenak. Gurean guztientzat ditugu ateak zabalduta. Legez, aurretik aipatu ditudan baldintza horiek daude, baina, bestela, oso ikasleria anitza daukagu».

Arduradunak esan duenez, Tolosaldea Lanbide Heziketa Institutuak eskaintzen dituen ziklo gehienak ia beteta daude: «Ia beteta daude kurtso asko, baina ez kimikaren arlokoak. Matrikula irekita dago urriaren 18ra bitarte, baina komenigarriagoa da lehen baino lehen izena ematea eta zikloarekin berehala hastea». Bide beretik, informazio gehiago jaso nahiko lukeenak horretarako aukera izango luke Tolosako paper eskolako bulegoetara bertaratuz, haien telefono zenbakira deituz eta harremanetarako helbide elektronikora idatziz.

Zumarragako Azokako baserritarren nabeak 70 urte bete ditu

Goierriko Hitza — 2024-07-05 11:02:55

Baserritarren Nabearen 70. urteurrenaren ospakizunean, Zumarragak omenaldi hunkigarria egin zien hamarkada askotan merkatu honen arima izan diren azokari guztiei. Ekainaren 27an, 70. urteurrenean, egindako zeremonian hainbat agintari bildu ziren eta Elena Moreno Eusko Jaurlaritzako Merkataritza zuzendariak parte hartu zuen.

Ekitaldia arratsaldeko sei eta erdietan izan zen eta Josune Zarandonaren aurkezpenarekin hasi zen. Ekitaldiaren hasieran, Azokaren irudi historikoak proiektatu ziren, egungo Azokaren kontakizun eta bideo batekin batera, Zumarragako Azokaren iragana eta oraina lotzen zituen giroa sortuz. Mikel Serrano alkateak, Diputazioko, Udalbatzako, Goimeneko, Landaolako eta eskualdeko Turismo eta Merkataritza bulegoetako ordezkariekin batera, Baserrien Nabeak komunitatean duen garrantzia azpimarratu zuen: «Gaur, merkatu honen historia ez ezik, bere jarraipena eta hazkundea ahalbidetu duten guztien ahalegina eta dedikazioa ere ospatzen dugu», adierazi zuen Serranok.

Aintzatespena eta bilakaera

Azoka bizirik mantendu duten baserritarren, ekoizleen eta azokarien lan nekaezina aitortzeko aukera izan zen ekitaldia. Zumarragako Azokan parte hartzen duten guztiei zuzendutako omenaldian diploma eta bereizgarri bereziak eman zitzaizkien. Ekitaldira joan ahal izan ziren baserri eta postuek, hala nola Sagaspe, Kurutzia, Iturriotz, Berroeta, Ori eta Marianori, baita beste beterano batzuei ere, hala nola Rueda, Manuela Bolaños, Roberto y Miriam Ejea, Miguel Ángel Pérez Pintado, Surtidos José, María Aranzazu Mancisidor eta José Luis Rey bertan jaso zituzten. Hala ere, beste guztiei Azokan bertan entregatuko zaie.

Azokaren historia eta modernizazioa

1954an ireki zenetik, Zumarragako bilakaeraren lekuko izan da Baserritarren Nabea. Urteetan zehar, merkatuak jakin izan du aldaketetara egokitzen, bere esentzia tradizionala galdu gabe. 2016an, dinamizazio-proiektu integral bat abiarazi zen, Azoka hiri-ekonomiako proiektu handinahi baten erdigune bihurtu zuena, merkataritza, ostalaritza eta turismoa bezalako sektoreak integratuz.

Modernizazio proiektu honek 5 milioi euroko aurrekontua izan du azken zortzi urteetan, eta Gipuzkoako Foru Aldundiaren, Eusko Jaurlaritzaren eta Next Generation EU funtsen laguntzari esker lortu ahal izan da. Hobekuntzen artean daude nabearen hirigintza-berrikuntza, irisgarritasunaren hobekuntza karga-jasogailu batekin, postuen modernizazioa eta digitalizazioa, eta marka berri baten garapena eta Zumarragako Azokaren webgunea.

Konpromisoa eta esker ona

Mikel Serrano alkateak azokariekiko parte-hartze prozesuaren garrantzia azpimarratu zuen, haien beharrak identifikatu eta beharrezko inbertsioak egiteko aukera eman baitu. «Proiektu hau ez litzateke posible izango zuen guztien laguntzarik gabe, larunbatero Zumarragara zuen produkturik onenarekin eta irribarrerik onenarekin joaten zaretelako», adierazi zuen Serranok.

Santa Isabel jaiak

Ospakizunen barruan, Azokako baserritarrek Santa Isabel jaietako pregoia emateko ohorea izan zuten. Jardunaldiak jarduera ugari izan zituen, besteak beste, liburu baten aurkezpena, Hip Hop festa, buruhandien desfileak, behi futboleko txapelketa, kontzertuak eta dantzaldiak. Elkarteen 56. danborrada jendetsua izan zen oso, 500 parte-hartzailerekin. Baserritarrek danborradaren amaieran bota zuten pregoia.

Zumalakarregi Museoak baserriaren testurak landuko ditu tote poltsak apainduz

Goierriko Hitza — 2024-05-14 00:00:02

Aurten ere, Zumalakarregi museoak Museoen Nazioarteko eguna ospatuko du. Beste urteetan bezala, maiatzaren 18an, museoaren sarrera doakoa izango da eta eraikinaren kanpoan hainbat panel interaktiboa ipiniko dituzte XIX. mendeko pertsonai nagusi batzuk islatuz.

Bestaldetik, arratsalden jarduera berezi bat izango dute museoan bertan.
Kultura haurrei hurbiltzeko asmoz, Ormaiztegiko Iriarte Erdiko baserrian, egun Zumalakarregi museoa, jarriko da arreta eraikin historikoa eta herriaren ondarea izanik, datorren maiatzaren 18an, arratsaldeko 16:30tan hasiko den tailer baten bitartez. Ekimenak 2 orduko iraupena izango du eta bertan baserria eta haren lorategia era ezberdin baten bidez ezagutuko dute etxeko gaztetxoek testura ezberdinak ukituz.

Honetara Zumalakarregi museoaren 35. urteurrena ospatzen dugu, 1989ko maiatzean ireki baitzen. Horrez gain, eraikinaren lorategiak aldaketak jasan ditu azkeneko hilabeteetan, XIX. mendeko lorategien antzeko itxura hartu zezan. Lorategi berri honek dituen testurak familian ezagutzeko ezagutzeko aukera aparta eskaintzen du Zumalakarregi museoak.

Urretxeko Kotoi paperdendako Sandra Rodriguez, animatzaile soziokulturala eta turistikoa, izango da tailer berezi honen dinamizatzailea. Baserria eta lorategian ezagutu dituzten testurak oihalezko poltsa batean islatzeko aukera izango dute parte-hartzaileek pintura erabiz.

Tailerrak 5,5€ balio du eta 6-12 urte bitarteko umeei zuzenduta dago.
Izen ematea ezinbestekoa da mzumalakarregi@gipuzkoa.eus helbide elektronikoan.

Lan eskaintza: bulego komertzialerako ingeniaria

Goierriko Hitza — 2024-02-23 00:00:08

Bulego komertzialerako ingeniaria bilatzen du

Eskatzen duguna:

Ingeniari teknikoa/goi mailakoa eta/edo fabrikazio mekanikoko diseinuko goi mailako gradua
Planoak interpretatzeko gaitasuna
Solid Works, Excel eta Solidedge menperatzea
Hizkuntzak, ingelesa (beste hizkuntza batzuk baloratuko dira; euskara, frantsesa, alemana)
Taldean lan egiteko gaitasuna

Eskaintzen duguna:

Etengabe hazten ari den Europako galdaragintza liderreko kide izatea
Zientzia, espazio eta energia sektoreetan mundu mailako proiektu paregabeak garatzea
Ordainsari eta baldintza erakargarriak
Lan-giro ona
Garapen profesionala

Eginkizunak:

Merkataritza-taldeko kideei laguntzea
Eskaintzak baloratzeko piezakatzeak egitea
Soldadura-kordoiak kalkulatu
Eskaintzak idaztea
Eskaerak irekitzea, abiaraztea eta martxan jartzea
Hornitzaileen kontsultak
Eskaintza konplexuak gidatzea eta prestatzea, gauzatu arte

Kixkurgune ireki dute: etxeko eta betiko jana, Txindoki azpian

Goierriko Hitza — 2024-02-22 13:58:50

Kixkurgune zabalik dago. Zaldibiako Goizane erakineko taberna-jatetxeak gaur ireki ditu ateak, lau urtez itxita egon ostean. Astelehen, astearte, ostegun eta igandeetan 09:00etatik 17:00etara egongo da zabalik eta ostiral eta larunbatetan, 09:00etatik 00:00etara. Astebarruan eguneko menuak emango dituzte eta asteburuetan, karta eta afariak.

Euskal Herriko gastronomia tradizionala du Kixkurgunek ardatz. Horretarako, 0 KMko produktuak erabiliko dituzte: Eusko Label eta Reyno Gourmet zigiludunak, Idiazabal Jatorri Izendapenaren eta Artzain Gazta markaren barruko Mendiko Gaztak… Kalitatea izango da negozio berriaren bereizgarri nagusia.

Halere, ez da jatordu gozo eta oparoak egiteko espazioa bakarrik izango. Taberna zerbitzua ere eskainiko dute, pintxo aukera zabala eta guzti, inguruko herritarrentzat, bisitarientzat eta Aralarko parke naturalean kirola egin eta indarberritu nahi dutenentzat: txirrindulariak, mendizaleak, familiak… Kixkurgune Zaldibiako Olaeta auzoan dago, Goizane eraikinean, Larraitzera bidean, Txindokiren oinean, Aralar Natura Parkearen atarian.

Espazioa berritu egin dute irekierarako: irisgarriagoa eta argiagoa da orain. Etxe-giroa ere handiagoa da.

Denda

Bertan dastatu daitezkeen produktuetako batzuk erosi ere egin ahalko dira. Garai bateko Kixkurguneren salmentarako izaera mantenduz, bertako produktuen ekoizleen denda gisa ere funtzionatuko du.
Goizane eraikineko bulegoen eta bilera gelen eskaintza ere zabalik dago. Nekazari, herritar, elkarte, turismo ekimen, nahiz edozein eratako enpresen eskura dagoen eraikina da.

Foru Aldundiak 2024ko egutegiaren 40.000 ale banatuko ditu Gipuzkoa osoan

Goierriko Hitza — 2023-12-15 13:58:07

Opari itxurako edukiontzi erraldoi bat Gipuzkoa osoan barrena ibiliko da, Gabonetako espiritua zabaltzeko eta Gipuzkoako Foru Aldundiak urtero berariaz antolatzen duen argazki lehiaketako argazkiekin osatutako egutegia banatzeko.

2024ko egutegiaren leloa Gipuzkoa kirolzale da. Kontzeptu horrek balioa eman nahi dio lurraldeak arlo horretan duen jarduerari, Gipuzkoaren kirol espirituan laguntzen duten pertsonak, klubak, federazioak eta taldeak ikusarazteko. Guztira, 479 argazki jaso dira, eta Gipuzkoako Argazkilari Elkarteak hamahiru hautatu ditu: garailea, azalean jartzeko; eta hamabi hilabeteetarako beste argazki bana.

18an eta 19an Goierrin

Abenduaren 13an hasiko dira egutegia banatzen, Donostian, eta, ondoren, abenduaren 23ra arte edukiontzia udalerri hauetan barrena ibiliko da: Errenteria, Irun, Andoain, Tolosa, Beasain, Urretxu, Eibar, Bergara, Azpeitia eta Zarautz. Hain justu ere, Goierrira, abenduaren 18an eta 19an helduko da. Astelehenean Beasaingo Bideluze plazan eta astearten Urretxuko Gernikako Arbola plazan banatuko dira egutegiak, 18:00etatik aurrera.

Goizero, aipatutako egunetik aurrera, opari edukiontzia udalerri horietako erdigunean azalduko da, herritarren artean interesa pizteko, eta 18:00etan zabalduko dute. Ordu horretatik aurrera jaso ahal izango dira egutegiak. Opari edukiontziaren barruan, gainera, Aldundiak testuinguru horretan abian jarri duen kanpaina bat aurkituko dute. Bertan, irribarre egiteko gonbidapena egiten da, eta keinu horrek bakoitzaren osasun psikologikoan dituen onurak aipatzen dira, Zure irribarrea oparirik onena lelopean.

Pablo Perezen irudia, azalera

Pablo Perez urretxuarrak irabazi du Aldundiak egutegia osatzeko egindako argazki lehiaketa eta, ondorioz, haren argazki harrigarria jaso du azalean. Aurtengo lehiaketak gipuzkoarren kirolzaletasuna eta balioak erakustea izan du helburu eta urretxuarraren argazki irabazleak lokaztutako jokalari taldea eta haur bat ditu protagonista.
Irune Berasaluze Gobernantza diputatuak sari banaketa ekitaldian azaldu zuenez, 479 argazki aurkeztu dira lehiaketara, denetariko kirol praktitak eta kirolariak erakusten dituztenak. Eta, hain justu, horixe bilatu dute aurtengo deialdian, Berasaluzeren esanetan: «Gipuzkoarren kirolzaletasuna erakustea, bizimodu aktibo eta osasuntsu baten alde egiten dugun apustuari balioa emanez eta kirolaren bitartez elkarbanatzen duguna ospatuz». Horrekin batera, honako hau gehitu zuen: «Natura da beste protagonista, argazkietan oso ondo ikusten baita gure mendi-itsasoen edertasuna eta horietaz gozatzeko gipuzkoarren zaletasuna, urtaro guztietan».

Pablo Perezekin batera, hauek dira aurtengo lehiaketaren irabazleak: Iñaki Oregi (urtarrila), Lazaro Gonzalez (otsaila), Ander Morea (martxoa), Jose Venegas (apirila), Iosune Negredo (maiatza), Lander Tolosa (ekaina), Carlos Mediavilla (uztaila), Mikel Cavero (abuztua), Arbil Iciar (iraila), Alberto Beloki (urria), Aitor Agirrezabal (azaroa) eta Gurutze Ariznabarreta (abendua). Guztira, 4.000 euro banatu dira saritan, 1.000 euro irabazlearentzat eta 250 euro gainerako 12 aukeratuentzat. Urtero bezala, epaimahaia Gipuzkoako Argazkilaritza Elkarteko kideek eta Aldundiko ordezkariek osatu dute.

40.000 egutegi banatzeko

Ekimen horrekin, Aldundiak 40.000 egutegi banatuko ditu lurralde historiko osoan.
Ildo horretan, gainera, Gipuzkoako Argazkilari Elkarteak Donostiako egoitzan abenduaren 18tik urtarrilaren 5era erakusketa bat izango du ikusgai, egutegiaren edizio honetarako jasotako hogei argazkirik onenekin –San Juan kalea 27–.

Arnasguneetako gazteek haize freskoz sortutako bideo sormenak

Goierriko Hitza — 2023-12-05 00:00:31

Euskararen transmisioaren gotorleku dira euskararen arnasguneak. Urteen poderioz euskararen indargune bilakatuak, belaunaldiz belaunaldi gure hizkuntzaren posizioa defendatu eta altxor hau ondorengoei uzteko konpromisoa hartu dutenak. Arnasgunetzat ditugun 97 udalerrik osatzen dute UEMA Udalerri Euskaldunen Mankomunitatea, eta udalerri hauetako gazteak dira gaur egun euskararen altxorraren zaindari. Garaiak aldatzen doazen heinean aldiz, hizkuntzaren transmisio kanalak aldatuz doaz, eta hori da hain zuzen Arnasetik bideosormen leihaketak aztertu duena, hizkuntzaren transmisio bide berriak.

Bigarren edizio arrakastatsua

Arnasetik sormen lehiaketaren bigarren edizioa helmugara iritsi zen Zarauzko Modelo aretoan antolatutako sari banaketa galan. Euskararen arnasguneetako gazte ugari gerturatu ziren bertara, asteetan zehar egindako hausnarketatik abiatuta egindako lanen emaitza ezagutzeko irrikaz.

Aurreikuspen guztiak gaindituz, lehen edizioan jasotako lan kopurua gainditu, eta kategoria guztiak aintzat hartuz jasotako 112 lanetan jarri da marka berria. Herriei dagokionez hauek guztiak daude ordezkatuta: Tolosa, Azpeitia, Usurbil, Arbizu, Tafalla, Ataun, Aizarna, Aulesti, Bera, Elizondo, Gernika, Atxondo, Orio, Aizarnazabal, Goizueta, Arano, Ituren, Igorre, Zarautz, Azkoitia, Mutriku, Leitza, Anoeta, Doneztebe, Ermua, Oiartzun… Sari banaketa ekitaldia Nahia Sillero aktoreak aurkeztuta egon da, eta besteak beste Deñe musikariaren emanaldiz gozatu ahal izan dute bertaratutakoek. Arnasetik lehiaketan arnasguneetako ikastetxeek hartu dute parte, bai eta arnasguneetako udalerri txikietako ikasleak jasotzen dituzten zenbait ikastetxe handiagok ere. Euskararen arnasguneak euskararen ezagutza eta erabilera maila oso altuak dituzten udalerriak dira. Hizkuntza biziberritzerako funtsezkoak dira, bertan modu naturalean bizi ahal delako, transmisioa ziurtatuta dagoelako eta hizkuntzaren hedapenean laguntzen dutelako.

Arnasetik Arnasa Gara egitasmoak antolatutako lehiaketa izan da. Arnasa Gara 2019an abiatu zuten elkarlanean UEMAk, Nafarroako Gobernuak eta Eusko Jaurlaritzak, euskararen arnasguneak hizkuntzaren bizitasunerako duten garrantzia jendarteratzeko.

Gazteek egin beharrekoak

Lehiaketan hiru kategoria bereizi dira, adinaren arabera. Kategoria bakoitzean erronka bati erantzun behar izan diote.

Lehen Hezkuntzako 5. eta 6. ikasmailetako ikasleen kategorian, formatu librean azaldu behar izan dute (marrazki, olerki, bertso, bideo, abesti…) beraien herria nolakoa den, zer egin daitekeen bertan eta, garrantzitsuena, zergatik den egokia euskara maila hobetzeko. Guztira 34 lan jaso dira kategoria honetan.

Derrigorrezko Bigarren Hezkuntzako 1. eta 2. ikasmailetako ikasleen kategorian, nerabeek beraien herriko esamolde berezienak eta beraien esanahia azaldu umorezko bideo batean. Kategoria honetan 63 lan jaso dira.

Derrigorrezko Bigarren Hezkuntzako 3. eta 4. ikasmailetako ikasleen kategorian, gaztetxoei Nahia Sillero influenzerraren bideo bat eman zaie erreferentzia bezala. Nahia Silleroren bideoa ikusita bideo bat modu sortzailean garatzea izan da beraien egitekoa; euskal kultura, musika eta ekimenak balioan jarriz plan erakargarri bat proposatuz. 15 lan jaso dira kategoria honetan.

Jasangarritasuna eta lidergoa, eskutik hartuta

Goierriko Hitza — 2021-09-23 00:00:00

Gazteak jasangarritasunean he-zi eta lidergoan trebatu. Helburu horrekin sortutako egitasmoa da Gazte Ekoliderrak programa. Kutxa Ekoguneak 2010 eta 2014 urteen artean jarri zuen martxan aurreneko, eta orain Gipuzkoako Foru Aldundiko Ingurumen Sailarekin edizioarekin datoz. 18 eta 30 urte arteko gazteei zuzenduta dago, eta online saioak eta presentzialak uztartzen ditu. Ekoliderrak programaren eskaintza zabaldu egin dute, gainera, Ekoliderrak Zabalean programa berriarekin; bertan, adin guztietako herritarrek parte har dezakete, eta erabat online izango da.

Gazte Ekoliderrak programaren helburu nagusiak jasangarritasunaren eza- gutzan sakontzea, jarduteko ahalduntzea eta kontzientzia eta pentsamendu kritikoa bultzatzea dira. Amaia Otaza programaren arduradunaren esanetan, «gazte asko gerturatu da ingurumen mugimendura eta haien eragina ahalik eta handiena izate aldera» jarri dute proiektua berriz ere abian, lidergoan eta jasangarritasunean oinarritutako hezkuntza programa baten bidez.

Hiru modulo edo ataletan zatituta dago Ekoliderrak programa: Trebatu, Ekin eta Izan. Horien bidez, gaitasunak landu, ideiak garatu eta bakoitzak bere alorrean nola martxan jarri aztertuko dute. Saio teoriko-praktikoak ez ezik, hitzaldietan eta eztabaidetan ere parte hartuko dute, unibertsitateko, erakundeetako, elkarteetako eta tokiko mugimenduetako eragileekin batera.

Ekoantsietatea

Azken urteetan askotan aipatu izan den kontzeptua da ekoantsietatearena. Otazoren ustez, «gazteek orain kontzientzia gehiago dute ingurumen gaietan, begiak ireki dituzte, baina ez dakite oso ondo zer egin dezaketen egoera hori aldatzeko». Klima larrialdiaren egoerak, ordea, «10-15 urteko epean aldaketak behar direla esaten digu, bestela kalteak atzera bueltarik gabekoak» izango direlako.

Askotan, ordea, klima larrialdiak dituen alor guztiak ikusita, gazte horiek «kolapsatu» egiten dira, eta ez dute nondik hasi jakiten. Ekoliderrak proiektu-ak, «bakoitzak bere bide orria izatea» bilatzen du. «Norberak bere alorretik eta gaitasun eremutik nola eragin dezakeen ikusiko dugu, eta bere esparruan martxan jarri ditzakeen ekimenak garatu». Norberaren ezagutzan arakatzetik hasi eta barne motibazioari garrantzia emanez intentzioa eta atentzioa non fokatu erabakiko du ikasle bakoitzak. Aktibismoan, politikan, norbere lanbidean edo gertuko eremuan nola eragin landuko dute.

Eskaintza bikoitza

Aurten bi bide edo modalitatetan banatu dute Ekoliderrak programa. Aurrenekoa, Gazte Ekoliderrak izenekoa, 18-30 urte arteko gazteei zuzenduta dago, eta erabat euskaraz izango da. Zortzi hilabetean zehar 120 orduko formakuntza emango dute, koordinatzaileek, espezialistek eta hainbat adituk gidatuta. Izena emateko epea irailaren 30era artekoa da, eta antolatzaileek sortu duten beka bati esker, %80an finantzatua izango da.

Bigarren aukera bat ere bada: Ekoliderrak Zabalean. Honek 35 orduko iraupena izango du; ez dago parte hartzeko adin mugarik, eta saioak online eta elebitan izango dira. Abendura arte eman daiteke izena, baina urriaren 7rako apuntatzen direnek %25eko laguntza jasoko dute.

Otazoren esanetan, bietan parte hartzen dutenek jasoko dute jasangarritasun eta lidergo arloetako formazioa. Aurreko edizioetan parte hartutako hainbatek «aldaketa momentu bat» izan dela eta «lagundu» egin diela diote. Edizio berri hau aukera ona izango da alor honetan sakondu eta eragin nahi dutenentzat.

EKOLIDERRAK PROGRAMA

Gazte Ekoliderrak

· Iraupena. 30 asteko ibilbidea. 120 ordua, asteko 3 (bataz beste)
· Metodologia. Online-presentzial formakuntza. Aurrez aurreko 3 eginaldi.
· Hizkuntza. Euskaraz.
· Adina: 18 eta 30 urte artean.

Ekoliderrak Zabalean

· Iraupena. 30 asteko ibilbidea. Guztira 35 ordu.
· Metodologia. Online formakuntza, hitzaldiak, ariketak, eztabaidak…
· Hizkuntza. Elebitan.
· Adina. Adin mugarik gabe.

Esnatu amets egiteko gogoz

Goierriko Hitza — 2021-04-19 11:32:37

Udaberriarekin batera, atsedenerako eskaintza berrituta datoz Amets Descanso dendakoak. Atseden ekologikoaren arloan aitzindariak dira, baina batez ere, haien atentzio eta eskaintza pertsonalizatuak egiten ditu berezi.

Amets Descanson pertsona bakoitzaren beharretara egokitutako atseden ekipoak aholkatzen eta eskaintzen dituzte. Izan ere, pertsona bakoitzak gorpuzkera bat eta lo egiteko postura bat ditu, bakoitzak berea, eta berezitasun horietara egokitutako ohea, koltxoia eta burukoa behar ditu. «Ez dago denentzako balio duen formula magiko bat, norberak berea bilatu behar du, eta askok ez dute jakiten nondik jo. Guk horretan laguntzen diegu» azaldu du Amets dendako Gemma Alarcosek.

Azken berrikuntzak

Atseden ekologikorako ekipoetan azken berrikuntzak ekartzen saiatzen dira beti, eta horren erakusgarri da Beasaingo dendako erakusleihoa; Dormiente etxearen azken ohea ere ekarri baitute. Urteak damatzate Alemaniako etxe honekin lan egiten; Amets Descansoren filosofiarekin bat egiteaz gain, kalitate handiko produktuak eskaintzen dituzte.

Horren adibide da Beasainera ekarri duten azken ohea. Berreskuratutako egurrez eginda dago, inolako metalik erabili gabe. Egur oholak, garai bateko teknikak erabiliz lotzen dira elkarri, iltzerik edo bestelako lokailurik erabili gabe. Somierra ere, pertsona bakoitzaren pisuaren, formaren eta lo egiteko posturaren arabera egokitu daiteke, bakoitzaren atsedena neurrira egokituz. Koltxoia, latex natural eta ekologikoarekin eginda dago, eta oheko estalkia, artile eta kotoi organikoarekin.

Etorri eta probatu

Produktu hauek guztiak ezagutzeko, Beasaingo dendara etortzeko gomendioa luzatu dute Amets Descansokoek. Aditu batek gidatu eta asesoratuko ditu, behar duten atsedenerako ekipoa aurkitu eta haien erosketan asmatu dezaten. Hogei urtetik gorako esperientzia dute langintza horretan, eta gertutasuna eta konfiantza eskaintzen dute.