Goierriko Hitza

Txistu doinuekin hasi dituzte Santikutzak Legazpin

Goierriko Hitza — 2026-04-30 20:02:51

Hasi dira Santikutz jaiak. Jendetza bildu da arratsaldean herriko plazan, aurtengo festei hasiera emateko. Aurten Goiz Deia txistulari bandari egokitu zaio udaletxeko balkoitik pregoia egitea, txistu doinuaz lagunduta ondoren. Ondorengo txupinazoarekin lehertu da festa, eta kalean izan du segida jai giroak, erraldoi eta buruhandien ohiko kalejirarekin.

Txupinazo ofizialaren aurretik, gazteek ere egin dute jaiak hasteko ekitaldia Gaztetxean. Suziria bota ondoren, kalejiran jaitsi dira erdialdeko kaleetara.

Jaietako lehen txanpa igandera arte da, eta hurrengo asteburuan Kapela dantzarekin eta Mirandaola egunarekin amaituko dira.

Honela eman diete hasiera txistulariek aurtengo jaiei, Maider Apaolaza eta Iker Azpeitiaren hitzetan:

Arratsaldeon Legazpi!!

Ohituago gaude mikroa beharrean eskuan txistua edukitzera, baina herriko jaien hasiera iragartzeko aukera ez da urtero izaten eta aprobetxatu behar.

Jaiak gaur hasiko ditugun arren, errodajea egina ekartzen dugu batzuk, pasa den astean, beste urte batez, Korosti dantza taldeak antolatzen zuen Oin Puntetan asteburuan parte hartu genuelako. Horretaz gain, lehen aldiz, Gaztetxeak Gazte Festak antolatu zituen. Blusak soinean ekintza guztiek izan zuten arrera ikusita, ziur gaude datozen urteetan ere ekimen honekin jarraituko dutela, bejondeiela!!!

Bueno, eta aurten zer? Ba aurtengorako ere egitarau oparoa prestatu dute bai jai batzordeak, baita Txo!Esnako kideek ere. Txistulariak, urtero bezala egitarau horretako hainbat ekintzetan izango gara; kalejiretan, Olaria eta Ezpata dantza ekitaldian edo datorren astean ospatuko diren Kapela dantza edo Mirandaola egunean adibidez.

Hala ere egitarauak gutxi balio du herritarren parte hartzerik gabe. Bete dezagun Plaza, bete dezagun Azoka eta nola ez, bete ditzagun kaleak. Herritarrok gara festa guztien arima eta muina. Herritarrik gabe ez dago festarik, herritarrik gabe ez dago girorik. Egun zoragarri batzuk ditugu aurretik. Kanta dezagun, dantza dezagun, parte hartu dezagun eta nola ez, ondo pasa eta goza dezagun!!

Ondo pasa dezagun, ondo pasatzen utziz….

Ondo pasa dezagun ondoan daukaguna errespetatuz…

Ondo pasa dezagun, pasatu gabe….bueno…. sobre la martxa….

Bilakatu ditzagun kaleak espazio seguru eta eroso bat guztiontzat eta ospa ditzagun jaiak pozez, arduraz eta elkar zainduz.
Azken finean, bakoitzak bere nota eman dezala guztion artean musika eta armonia sortuz.

Eta gehiegi luzatu gabe mikroa utzi eta txistua hartuko dugu, erraldoiekin batera jaiei bals batekin hasiera emateko. Erraldoiak prest?

Ba besterik gabe, ondo pasa jaiak eta…

GORA LEGAZPI!

GORA SANTIKUTZAK!

GORA EUSKADI TXISTULARI!

Produktu berriek zipriztindu dute abuztuko lehen azoka Ordizian

Goierriko Hitza — 2025-08-06 12:10:37

Udako oporrak direla eta postu batzuk hutsik egon arren, Ordiziako Plaza Nagusiak ez du freskotasunik falta izan gaurko azokan eta ez da oztopo izan berrikuntzak plazaratzeko. Hainbat ekoizlek uzta berria ekarri dute, eta frutak izan dira protagonista nagusiak.

Madaria izan da zalantzarik gabe eguneko izarra. Altzagako Arantxa Lopetegik lehen madariak jarri ditu salgai, tamaina ezberdineko aleekin eta horren araberako prezioekin: kiloa 2 eta 3 euro artean. Sagarrak ere ez dira falta izan, eta “San Inazio” motakoak izan dira oraingoan protagonista. Lopetegik Klaudia aranak ere ekarri ditu, eta fruta mota hori ere ikusgai izan da beste hainbat postutan.

Zeraindik etorritako Iñaki Intxaustik berezitasun bat aurkeztu du: kanpotik gorri ilun eta barrutik berde den aran mota bat, berak “fraide potro” esaten diona. Kiloaren prezioa, 4 euro.

Bestalde, Itsasoko Maria Jesus Oriak sagar berri bat ekarri du, gorria eta zapore leuna duena; ez du zehaztasunik eman barietateari buruz, baina “Fuji” motakoa izan zitekeela esan du. Kiloa 2 eta 3 euro artean.

Frutek lekua kendu diete beste berrikuntza batzuei ere. Babarrun freskoa, edo potxa zuria, ere iritsi dira azokara. Aramako Zurutuza ahizpek ekarri dute eta kiloa 12 euroan jarri dute.

Landareen artean, udazken-negu sasoian ohiko bihurtzen ari diren aleak izan dira ikusgai: azalore koloretsua, eskarolak (liso eta kixkur), txikoria (0,20 euro), atxi eta kale aza (0,30 euro) eta perrexila (0,12 euro).

Azkenik, perretxikoen eskaintza oparoa izan da: 75 kilo ziza hori (kiloa 19-22 euro), 100 kilo onddo (22-25 euro kiloa) eta 3 kilo gorringo, azken hauek albiste berria, kiloa 35 euroan.

Leka, sagar eta baratxuri mota berriak ferian

Goierriko Hitza — 2025-07-23 16:20:14

Kontatzea gustu ematen duen azoka horietakoa izan da gaurko. Eguraldiak asko ez lagundu arren, produktu berri ugari egon zdira. Iritsi orduko «ezertarako balio ez duen giroa da hau, euri zaparrada on bat igualekoa genuke», entzun da. Izan ere, laino eta lanbro eguraldi hau gorrina sartzeko aproposa baita. Halere, landare saltzaileak bizi-bizi aritu dira, eta momentuka ilarak ere sortu dira.

Aire libreko lehen tomatea ekarri du gaur Gabiriko Oñatibi Txikiko Joxe Antoniok Elosegik, 5 euroan kiloa. Azkoitiko Kurutziako tomatea, berriz, izugarri preziatzen du bezeroak, goizean goizetik ilaran jendea ikusten da postu horretan.

Tomatea, bere horretan ona izanik ere, baratxuriarekin nahastu nahi duenarentzat mota berria aurkeztu du Sustrai askeak postuko Natalia Magallanesek: Elefante baratxuria Allium ampeloprasum. Orain arte azokan ikusi gabekoa. Izenak izana izan eta ohikoa baino askoz buru handiagoa du, gustu suabeagoa. «Porruaren antza handiagoa du baratxuriarena baino, tipula moduan jan daiteke», adierazi du. 10 euro kiloak. Baratxuri more eta txuri buruak ere aukeran dira postu ezberdinetan.

Leka mota berriak
Lekak ere poliki ugaritu dira. Maria Jesus Oriak ekarri ditu lehen leka borobil morea eta gorri zapala, lehendik zeuden borobil berdea eta leka zapal arruntaren zerrendan gehitzekoak. 6 eta 10 euro artean kiloa salgai.

Sagarren sasoiari ohiko legez San Joan sagarrak hasiera eman zion. Horiek bukatu eta beste hainbaten aukera izango dugu urte bukaera arte. Joxe Antonio Aizpuruk ekarri du aurtengo bigarren mota.«Sagar gorria esaten diogu guk». Jatorrizko izena jakitea ez da beti erraza eta etxeko betiko izenarekin identifikatzen duten mota franko dugu. Gordina jateko egokia, bizi puntukoa, 3,5 euro kiloak. Aran gorriak eta berdeak ugaritu dira, postu dezentetan eskaintzen dituzte.

Mikologia atala dabil murritz antzean, gaur zizahoriak aukeran, besterik ez, bi perretxiko saltzaileen mahaietan.

Feriako berriak Internetez soilik jaso ahal izango dituzue abuztuan: halere, bertatik bertara azoka bizitzea bezalakorik ez da!

Natalia Magallanes, elefante baratxuria eskuan duela.

Lehen Klaudia arana eta gorri handia

Goierriko Hitza — 2025-07-16 16:31:18

Eskola-opor garaian jendeari goizean mugitzea kostatzen zaion bezalaxe, eguzkiak ere goizeko hamarrak bazituen lainoteria zulatu duenerako. Bezeroak ez ezik, gazte kuadrilla mardula bildu da udaletxe aurrean garai modu horretan: Ateak Ireki programan parte hartzen ari diren diasporako gazteak dira, dagoeneko familietako kideekin, euskara ikastera etorritakoak.

Produktuei erreparatuz, aranak izan dira gaurko nobedadea. Estimazio handiena duen Klaudia arana ekarri du Iñaki Intxausti Zeraingo Mendartekoak, eta Aramako Zurutuza ahizpek aran gorri handia izan dute. «Berez Idiazabalgo Kalbariotik datorren arana da, hau ia gure etxeko arbolakoa», esan du Arantxa Zurutuzak.

Aramako Goiko Etxeberrikoek gustukoa dute produktu berriak probatzea eta gaur aurkeztutako txaiota da horietako bat. Bezero batek ekarritakoa etxean erein eta eskaintzen dute azken urte hauetan. Jatorrizko izena Sechium edule du, kurkubitazea familiakoa da, kalazaba, luzoker eta meloiak bezala. Gustuko tokia baldin badu batere lanik eman gabe eroritako fruituetatik bere kasa erne ohi da. Landare goikaria da, hortik «aireko patata» ere esaten diotela ezagutzen duten bezeroek, hegoamerikarrek bereziki. Ezezaguna zaienentzat «probatzea merezi du, purean edo krema moduan oso goxoa». Kiloa 3,5 euroan egon da salgai.

Postu berean azken asteetan eskaintzen zituzten andere-mahatsa eta india-mahatsa bukatu dira, eta gaur azken masustak eta mugurdiak amaitu dira.

Zizahoriak berriz ere plazan
Mikologia atalean Lasaren eta Barcinaren postuetan izan dituzten 50 kilo zizahorik eta boilur gutxi batzuek osatu dute eskaintza.

Santu kontuak bukatzeko. Lehen nabarmenagoa bazen ere, santutegia eta azoka oso lotuak daudela aipatu izan dugu. Gaur iritsi orduko honakoa entzun dugu: «Karmen eguna gaur, arrantzaleen zaindaria», dirudienez lotura berezirik ez nekazariekin.

Bestalde, datorren astean Santa Ana jaiak ospatuko dituzte Ordizian, plaza txingolaz apaindua da dagoeneko. Aurten ez dio eragingo asteroko azokari.

Aramako Arantxa Zurutuza, aran gorri handiekin.Lierni Elortza

San Isidro bezperakoa, giro onean

Goierriko Hitza — 2025-05-14 15:50:59

San Isidro eguna da bihar, nekazarien eguna, eta gaurko azokan berritasun gutxi baina jendea izan bazen. Goizeko giro onak lagunduta, jende dezente hurbildu da Ordiziara, eguerdi parterako trakestu badu ere.

Ziza eta perretxiko postuak izan dira begirada gehien erakarri dituztenak. Udaberriko ziza izan da gehien ekarri dutena, 370 bat kilo guztira, 10 eurotik hasita 38raino kiloa. Onddoak ere ugari, 75 kilo, 20 eta 38 euro artean. Zizahoriak ere ikus zitezkeen postuetan, 20 eta 26 euro artean.

Aurreko astean lehendabiziko tomateak aipatu genituen, eta gaurkoan postu gehiagotan zegoen aukera; 6 euroan dago kiloa. Gainontzean, ilarra (12 eta 16 euro artean kiloa), kale aza (6 euro), baba txikia (6 eta 8 artean), babarrun beltza (16 eta 18 artean), aza (2 euro), kale aza (1 eta 2 artean) edota babak (6 eta 7 artean) aurki daitezke. Azenario berria 1,80 eta 2,50 euro artean dago, eta udaberriko aza 2 euroan kiloa.

Landareetan ere bada aukera. Berrikuntza bakarretakoa, udako aza landarea izan da, zientoa 15 euroan dago salgai. Tipulinak (3,5 eta 4 euro artean), kukuluak (6-10 euro artean), porru landareak (4 euro), tipulin gorriak (3,5 eta 4 artean) eta haritz-orri urazak (6 eta 10 artean zientoa) osatzen dute eskaintza.

Azken asteetako beste berrikuntzetako bat, Jose Mari Albisu zorroztailearen postua izan da. Gaur jende ugari gerturatu zaio bisitan, kuriositateak eraginda edo. Goen plazan nahiz herriz herri ibiltzen da furgonetarekin eta 652 920 848 telefono zenbakian jasotzen ditu enkarguak.

Aukerarik gehien, loreetan
Maiatz betean, lore aukera zabal eta koloretsua ikus zitekeen plaza atarian, Zaldibiako Azanza mintegikoen postuan. Lehenengo alegriak iritsi dira (1,50 euro unitateko), baita margaritak (8,50 euroan sorta), petuniak (2 euro buruko) eta erreginaren belarritakoak ere (7,50 euroan).

Argazkiak: Arkaitz Apalategi

Bezeroa hazitarako patata eske

Goierriko Hitza — 2025-02-19 16:04:03

Oso goiz atsegina, 13 gradutik gora eta eguzkitsu, baratzeko lanetarako jendea animatu da. Jendea hazitarako patata erosten hasi da. Zuhaiztiko goialdeko kantoian duen postuan Jabier Lacallek urtero bezala –oraindik goiz dela, lurrak beroa behar duela eta eguraldiak duela azken hitza esanez– aurkeztu du aurtengo eskaintza: goiztiarra nahi duenak Jaerla du aukeran. Salduena Agria da, frijitzeko egokiena izatearen fama badu ere, egosia edota labean ere goxoa. Beste hiru mota ere baditu, Spunta, Monalisa eta Desire gorria, bezeroen gustua asetzeko lain. Denak ere 1,20-1,50 euro artean kiloa.

Arantxa Iparragirre Montesenekoak goizean goiz esana: «Gaur aproposa urteko tipula buruzabal gorri landarea erosteko, ilbehera eta eguraldi ona». Babesean dauden kala batzuk loratu dira 5 euroan sorta, Jaione Irazustaren postuan.

Joan zen astean aipatu genuen Lasaren postuan –gaur etortzerik ez dute izan– gazta berria bazutela. Gaur Itziar Etxeberriaren postuan ere bai, bi artzainenak, 20,5-23,5 euroan kiloa.

Corellako olio berria salgai
Gabiriako Oñatibi Txikiko Jose Antonio eta Errezilgo Mugarrietako Simon azken sagar kiloak saltzen ari dira, bi aste eta hilabete arteko jeneroa dutela kalkulatzen dute. Azkenekoak Topac, Granny Smith eta Mokotxa dira.

Uliako Labea postuan izan ohi dute Corellako olioa, ekologikoa. Haien La Noria etxaldeko olibondoetako Arbekina oliben azken uztako olioa gaur ekarri dute, 5 litro 50 euroan.

Udaletxe azpian jarri berri dituzten takilla adimentsuak erabiltzen hasi dira. Berrikitan aurkeztu duten aplikazioaren bidez ekoizlearekin harremanetan jar daiteke bezeroa eta erositakoa bertatik jaso dezake. Hantxe ikusi ditugu Iñaki Intxausti eta Beñat Telleria bizpahiru kutxatan eskaria uzten. Ea bada erabilpenera ohitu eta ugaritzen den azokara joaterik ez dutenen eskaria.

Corellako olioa Uliako Labekoen postuan.Lierni Elortza

Axaria Idiazabalen dago

Goierriko Hitza — 2025-01-31 21:10:25

Aurreko asteburuan jada ekitaldi ugari izan bazituzten ere, gaur hasi dira modu ofizialean Idiazabalgo San Blas jaiak. Arratsaldean Aita Iparragirre eskolako umeek playback-ak egin dituzte Igarondo pilotalekuan, eta txokolatada egon da plazan. Ondoren, Idiazabalgo Kirol Elkarteko mendi saileko kideek pregoia bota dute, eta Axaria jaitsi dute udaletxetik plazara. Txupinazoa botata eta Axaria herrian egonda, festei ekin diete idiazabaldarrek.

Aurten 40 urte bete ditu Idiazabalgo Kirol Elkarteko mendi sailak. Lurdes Mintegik, Alixi Arrizabalagak, Lurdes Intxaustik eta Jon Esnaolak saileko kideek izan dute pregoilari izateko ohorea. Mendiak eta mendizaletasunak eskaini dizkien onurak eta esperientziak partekatu dituzte udaletxeko balkoian. Txistulari taldeak lagunduta, herritarrekin batera ‘Ikusi Mendizaleak’ abestu eta zapia jantzi dute. Txupinazoak bota dituzte eta jarraian buruhandiak gazteen atzetik korrika atera dira.

Playback-ak, pilotalekuan

Horren aurretik, eskolako haurren playback emanaldiak izan dira. Plaza Nagusian izan ohi dira, baina aurten Igarondo pilotalekuan egin dute ekitaldia. Mailatan banatuta, taldeka atera dira haurrak dantzara. Harmailak herritarrez bete dira, eta bertatik udaletxera abiatu dira Axaria jaisten ikusteko.

Oraindik bost egun dituzte aurretik jaietaz gozatzeko. Gaur helduen danborrada ere izan da, eta gauean Añube eta Nafarroa 1512taldeen kontzertua eta erromeria Mugi Panderoa taldearekin. Bihar mozorro eguna da.

Feria motza, baina emankorra

Goierriko Hitza — 2024-07-24 16:17:44

Hasi dira Santa Ana jaiak Ordizian, baina aurretik azoka fin egin dute. Astigoxokoek, esaterako, eskaintza berezia izan dute gaurkoa, festen aitzakian. Euskal pastelak eta goxoak izan dituzte salgai, besteak beste.

Judith Garciak, berriz, gazta ondua eskaini du, kiloa 17,5 euroan. Udaberrian esne gehiago izaten dute eta gazta mota hau egiten dute. Esne gordina bi hilabetez ontzen dute eta, ondorioz, ohi baino zapore indartsuagoa du eta ez da hain koipetsua. Beste gaztak esne pasteurizatuarekin egiten ditu: bizpahiru astez ondutakoa, esnegain eta mantekila ukutuarekin (16’5 euro / kiloa), mami biguna izenekoa, oso krematsua (20€), laktikoa, biziagoa (18€), urdina (25€), freskoa (3 euro / terrina), gaztanbera (4 euro / terrina), eta gazta krema (5 euro / terrina). Azken Behieko Gaztak izan ditu salgai.

Eztala Goikoa baserriko Maria Jesus Zurutuzak Santiago udareak eraman ditu azokara. Kiloa 3 euroan saldu du. Santiago madariek haragi zuria dute eta testura ez oso mamitsua; halere, zapore gozoa dute.

Barazkien artean, igitai leka nabarmendu da. Jaione Irazustak eskaini du, Aiesta Beltza baserritik ekarrita. Kiloa 7 eurotan saldu du. Patata gorria ere izan du, kiloa 3 euroan.

Loreen artean, Maite Zurutuzak, Agapantus lorea, zuria, sorta 5 euroan saldu du. Kalak, daliak eta gladioloak ere izan ditu.

Madalena eguna, kotxe eta lagun artean

Goierriko Hitza — 2024-07-22 19:00:48

Itsasoko Alegia auzoan egun handia da gaur, Madalena eguna delako, jaietako egun nagusia. Jesusen dizipulu honi eskainitako elizan meza egin ostean, 13:00ak aldera, herriko kuadrilla batek auto bilduma bat erakutsi du. Mokadu bat jateko aukera ere izan da. Arratsaldean, berriz, haurrentzako jolas parkea muntatuko dute auzoan eta festak Modestoren erritmoan agurtuko dituzte, parrillan erretako haragia afaldu ondoren.

Jesus Mari Etxeberria bildumagileak azaldu du urteak zeramatzatela festen antolatzaileak eta eurak erakusketa bat egin nahian, eta aurten kointziditu dutela. “Itsason bagaude kuadrilla bat auto klasikoak ditugunak. Gure bildumaren zati bat ekarri dugu hona”, kontatu du. Iñaki Arratibel, Jose Mena, Martin Sagastizabal, Jesus Plazaola, Juana Bueno, Migel Arrospide, Luzio Iraeta, Juan Mari Goitia… aipatu ditu. “Kotxezaleak, betidanik. Asko, mekanikari izandakoak”, laburbildu du. “Gehiago edo gutxiago, kotxe hauekin azkar ikasten da mekanika”, gaineratu du. Egia esan, autoak erabat funtzionalak eta errepide irekian ibiltzeko modukoak dira.

Etxeberriak aipatu du erakusketaren edertasuna “aniztasunean” dagoela. “Kotxe bakoitza klase batekoa da: sportak, berlinak, kabrioletak…”. Denak XX. mendeko lehen erdikoak dira; zaharrena, 1915. urtekoa, Ford Model T bat. “Donostiatik Meridaraino (Espainia) joan gara kotxe honetan, inolako arazorik gabe. Asteburuan Sorian (Espainia) izan gara”, kontatu du jabeak. “Jada ez dira horrelako kotxerik egiten. Hauen mantenimendua askoz ere sinplegoa da, norberak egin dezake. Orain, argi bat ere ezin da aldatu mekanikariarengana joan gabe”. Justu, auto originalak ez zuen fokurik, kandela moduko batzuen bidez argiztatzen baitzuen bidea; segurtasun uhalik edo bi martxa besterik ez ditu.

Bizikletak ere bai

Autoen artean motorrak eta bizikletak ere izan dira ikusgai. Hauek, kotxeak baino zaharragoak. Tartean bazen 1890. hamarkadako belozipedo bat. Aurreko gurpila atzekoa baino nabarmen handiagoa du, baina ez da akatsa bat edo denboraren poderioz gurpil originala galdu eta halamoduz ordezkatu dutela: garai hartan, pedalak eta gurpilak zuzenean zuzenean zeuden lotuta, eta ez kate baten bidez egun bazala. Abiadura hartzeko, zenbat eta gurpil handiagoa izan, orduan eta hobe zen.

Ehun lagun elkartu dira Itsasoko Baserriko Uztan

Goierriko Hitza — 2024-06-22 13:37:47

Itsason egiten ari diren Baserriko Uzta topaketak ehun lagun inguru bildu ditu. Euskal Herriko osoko bisitariak izan dira Itsason, Iparraldekoak zein Hegoaldeko lau lurraldeetakoak, eta baita ere, atzerrikoak. EH Kolektiboa gertutik ezagutzeko aukera izan dute, Urteaga-Urkulegi etxaldeko ate irekiei esker.

Azkoititik (Gipuzkoa) etorri da familia bat. Kontatu dute kaletarrak direla, baina agroekologia gaia interesatzen zaizkienez, egun pasa “polita” egiteko baliatu dutela aukera. Lehen aldia dute Baserriko Uztaren topaketetako batean. Kataluniako bikote batentzat ere lehen aldia izan da gaurkoa: “etxetik abiatu ginenean ez genekien topaketa hau zenik ere, baina baratza bat dugunez eta lehendik ere agroekologia arloan lan egindakoak garenez, etorri egin gara”, esan dute. Agharas elkarteko kideek ere adi-adi entzun dituzte Pilare Muxika Lopetegi etxaldeko maizterraren esanak. Beraiek Bilbotik etorri dira, baratza bat dutelako han. Bertatik ateratakoarekin, kalean bizi diren gazteentzako eta etorkinentzako otorduak prestatzen dituzte, eta menu horietarako jakiak ahalik eta era jasangarrienean lortu nahi dituztela aipatu dute. Gainera, bazkalostean kontzertua emango dute.

Topaketa bisita gidatu batekin hasi da. Talde handian, Urteaga baserriaren atarian, EH Kolektiboa zer den azaldu dute arduradunek: deskribatu dute kolektiboak “guztiontzako elikadura osasuntsua eta eskuragarria egitea” duela helburu, “lurra, abere eta pertsona guztien errespetuan oinarriturik”. Horretarako, Europar Batasunak kutsadura edo energia arloan ezarritakoak baino arau zorrotzagoak ezartzen dizkiete euren buruei. “Hau ez diogu marketinagatik. Guk ez dugu negozioa egin nahi, ekonomia sozial eta solidarioan sinesten dugulako; ondoren, bi taldetan banatuta, Gorka Sasietak eta Muxikak etxaldeko eguneroko martxa azaldu die bertaratutakoei, denek jakin dezaten kolektiboko kideek nola lan egiten duten eta, gerora, bakoitzak bere baserrian aplikatu dezan. “Guk ez dugu hazi nahi. Lehen sektoreko beste ekoizleak ere gure irizpideetara erakarri nahi ditugu”, azpimarratu du Muxikak.

Saio teorikoaren ondoren, etxaldean bertan ekoitzitako elikagaiekin hamaiketakoa egin dute. Gorka Hermosare, Jon Maiaren eta Nacho Soto goierritarren Kantu berri bat gara emankizunak girotu du eguna. Bazkari agroekologikoa ere egingo dute eta, bukatzeko, Agharas kolektiboak kontzertua eskainiko du. Bazkaltzera 80 lagun eseriko dira.

Ezpata zarata eta ipuin kontalariak, Legazpin

Goierriko Hitza — 2024-04-13 18:34:45

Legazpiko Kale Nagusia ardatz kronologiko bat da: karrikak dituen ia 300 metroetan Legazpiko une historiko garrantzitsuen datak daude markatuta; 1290. urtean hasten da ardatza, Legazpiri egindako lehen aipua ordukoa delako, Erdi Aro bete-betean. Justu, asteburu honetan Erdi Aroko azoka egiten ari dira lehen aldiz eta gaurko eguna hasteko kalejira egin dute hainbat parte-hartzailek Kale Nagusiraren punta batetik Euskal Herria plazaraino.

Desfilean egindako bidea bezala, Erdi Aroa Aro Garaikideraino ekarri du azokak. Askotariko artisauen hirurogei postu daude eta iraganeko aisialdi eskaintza berreskuratu dute, legazpiarren gozagarrirako. Esaterako, Amalurra ipuin-kontalari bizkaitarrak garai bateko istorioak kontatuko ditu: Dragoiak, izaki mitologikoak eta fantasia nahasten ditu. “Beti, baloreak transmititzeko helburuarekin”, esan du. “Irakaslea naiz eta antzerkian ibiltzen nintzen. Ikusi nuen antzerkia baloreak transmititzeko oso tresna egokia zela. 15 urte daramatzat jada herri herri”, gaineratu du. Integrazioa, ingurumenaren zaintza, berditasuna… halako mezuak txertatzen ditu gizartean ipuinen bidez.

Legazpin, gainera, bere azken liburua aurkeztuko du: Belatzek dantzari izan nahi du. Datozen egunetan jarriko duela salgai iragarri du. Hirugarren lana ere bidean dela gaineratu du.

Gustura dago Legazpin, jendearen erantzuna ona izan delako. Atzo izan zen azokaren lehen eguna eta jendetza elkartu zen. “Nerabe ugari gerturatu zen nire ipuinak entzutea. Pozgarria da”, azpimarratu zuen.

Borrokak ere izango dira, Euskal Herriko, Espainiako eta Galiziako zaldun talde baten eskutik.”Gogorra da, baina polita ere bai”, kontatu du batek. “Armadurak burdinezkoak dira eta 30 kilo inguru pisatzen dute, Gainera, erosoagoak izateko esponjak erabiltzen ditugu eta horrek bero sentsazioa handitu egiten du”, azaldu dute. Buruak ere estalita eramaten dituzte, goitik beheraino. Segurtasun guztia behar dute, dena den, benetako ezpatekin aritzen direlako: “Profight edo Erdi Aroko borroka historikoa kirol modalitate bat da. Gehienok esgrima eta estiloko kiroletatik gatoz”, aipatu dute. Harrigarria da ezpatek elkarren aurka jotzean egiten duten zarata, baita ere burdin jantziek mugimenduarekin egiten dutena.

Erdi Aroko azoka honetan Ilintik ere parte hartuko du. Okasiorako apaintzeaz gain, postuak ere jarriko dituzte hainbat merkatarik. Halaber, postu horetan gastatutako 10 euroko, haurren gunean izango diren atrakzio ekologikoetan ibiltzeko txartel bat emango dute opari. Bihar bukatuko da azoka.

Azoka eguzkitsu eta jendetsua izan da gaurkoa

Goierriko Hitza — 2023-08-02 13:03:36

Abuztuko lehenengo azoka izan da gaurkoa, eta udako eguraldiarekin bat eginez, goiz eguzkitsua eta beroa izan da Ordiziakoa. Goizean goiz ez da jende asko inguratu, baina hamarretatik aurrera jendetza bildu da herriko plazan, eta postuetan ilara handiak sortu dira.

Abuztuaren hasierarekin batera, produktu berriak iritsi dira herriko plazara; hala nola xaiota, milalore eztia, potimarroi kuia, klaudia aranak eta zizahoriak.

Perretxikoak ere nagusitu dira gaurko azokan; Lasa plaza azpialdean daude. Zizahoriak, esaterako, 43 kilo ekarri dituzte, eta Goierrikoak 33, dira, Lasa eta Axunenak, hain justu. Kiloa 15 eta 22 euro artean dago. Zizaren kasuan, Barcinak ekarritako 35 kilo daude eta bakoitza 15 eta 35 euro artean dago salgai. Gibelurdinak, aldiz, bost kilo daude, eta Lasak 30 euroan saltzen du bakoitza. Boilurra, bestalde, 10 eta 20 euro artean dago bakoitza.

Xaiota

Aramako Arantxa eta Maite Zurutuza ahizpek ekarri dute Xaiota azokara gaurkoan. Barazki honen hazia Brasildik dator, baina Goierrin oso ondo egokitzen diren aleak dira. Kuriositate gisa, esan daiteke barazki honi modu ezberdin batean deitzen zaiola lekuaren arabera, eta gaur goizean postuan bertan esan dute “airezko patata” ere deitzen diotela batzuk. 3,5 euroan dago kiloa.

Ziza horiak

Axun Etxeberriaren zizahoriak dira hauek. Kiloa hiru euroan dago salgai azokan.

Klaudia aranak

Gabiriako Jose Antonio Elosegik ekarri du gaurkoan aran berdea. Arrakasta izaten duen fruta da, eta kiloa hiru euro eta erdian dauka.

Potimarron kuia

Potimarron izeneko kuia kalabazetan estimazio handiena duena da. Urteko lehenengo kalabaza da hau, eta Baliarraingo Edurne Jauregik ekarri du azokara. Kiloa hiru euroan dago salgai.

Milalore eztia

Balerdipekoek, milalore eztia ekarri dute berrikuntza gisa gaurkoan, eta kiloa 15 euroan dute salgai.

Oianguko lehenen mailako bi bikoteak aurrez aurre izango dira Gipuzkoako txapelketaren final erdietan

Goierriko Hitza — 2022-10-17 17:28:48

Ligaxka fasea amaitu da paleta larruz Gipuzkoako Txapelketan. Oiangu taldeko lehenen mailako bikoteek oso maila ona erakutsi dute. Irastorza eta Andonegik, ligaxkako lider amaitu dute eta maila berean, baina beste multzoan jokatu duen Oianguko beste bikotearen, Ibarguren eta Olaran, aurka jokatuko dute. Bien artean erabakiko da zeinek jokatuko duen lehenen mailako finala.

Bigarren mailan, aipamen berezia klubeko beteranoei. Roperok eta Garridok ere, 50na urterekin, erakutsi dute indartsu daudela, maila altuko txapelketa jokatu dute eta final erdietarako txartela lortu dute. Hurrengo fasean sartuta, aurkari gogorrak izango dituzte parez pare, dena den, orain arteko mailari eusten badiote, finalean sartzeko aukera handiak dituzte. Maila berean lehiatu den beste bikotea, Otegik eta Garridok osatzen dutena, ez da hain fin ibili. Otegik aurreko urteko mailari ezin segida eman eta Agirrek eutsi dio bikoteari. Asteburuko partida irabazi egin dute ordea, Oiartzungo bikotearen aurka, eta hala, final erdietan sartzea lortu dute oiaguntarrek, beraz, finalerako txartelagatik borrokatuko dira.

Azkenik, hirugarren mailan, hiru bikote izan ditu Oianguk. Batek ere ez du lortu garaipenik eskuratzea, baina hala izanda ere, balorazio positiboa egin du klubak, gazteak baitira oraindik eta denbora gutxi daramate kirol honetan. Jokatu dituzten partidetan erakutsi dutenagatik ere balorazio positiboa egin du Oianguk, “hobetze aldera egin dutelako”.

Ampo Ordiziak 15-19 galdu du Les Abelles taldearen aurka

Goierriko Hitza — 2022-10-17 12:27:30

Ampo Ordiziak ezin izan die garaipena eskaini zaletuei. Errugbiko ohorezko mailako ligako hirugarren jardunaldian -Amporentzat bigarren partida, pasa den asteburuan atsedena izan baitzuen-, Les Abelles taldearen aurka, 15-19 galdu zuen, “partida nahiko narratsa” jokatuta, Julen Goia Amporen kapitainak partida amaitu bezain pronto egindako adierazpenen arabera. Aipagarria ere, talde ordiziarraren azken lau fitxaketak zelairatu zituela Federico Gallo entrenatzaileak.

Bi aste izan ditu Ampo Ordiziak Les Abelles taldearen aurkakoa prestatzeko. Ligako lehenen jardunaldia, Bartzelonaren aurka jokatu zuten, urriaren 2an. Puntu bakarragatik ezin izan zuten garaipena lortu, 30-31 izan zen emaitza. Pasa den asteburuan, ligako bigarren jardunaldia izan zen ohorezko mailako talde gehientsuenentzat, baina Ampo Ordiziak atsedena izan zuen.

Hala izanda ere, Ordiziari intentsitatea falta izan zitzaion lehen minutuetan, zalantzak izan zituen defentsan, eta ez zuen asmatu erasoan. Horrekin batera, Alain Araña kanporatua izan zen eta abantaila ateratzen jakin zuten bisitariek; bi zigor kolpe eraldatu zituen Frutosek.

Ordiziarren lehenen puntuak Oier Goiak egin zituen, entsegu bidez. 32. minutuan, Les Abelles taldeko Martin Gerez kanporatua izan zen. Ordiziarrak jokalari bat gehiagorekin zeuden zelaian, eta aurretik jartzea lortu zuten, 12 puntuetaraino iritsiz. Baina jokalari bat gutxiagorekin ere, markagailua irauli zuen berriro Les Abelles-ek; talde valentziarrak bigarren entsegu bat eraldatzea lortu zuen. 12-13 joan ziren atsedenaldira.

Bigarren zatian, ez ziren gauzak hobetu Federico Galloren mutilentzat. Nahiz eta atsedenaldiaren osteko lehenen minutuetan, Amporen azken fitxaketetako bat den Kerr Tills hegoafrikarraren jokaldi bati esker, berriro ere markagailuan aurretik jartzea lortu, talde valentziarrak ez zuen etsi, eta bi zigor kolpe gehiagorekin itxi zuten partida (15-19).

Kapitainaren balorazioa

Partida amaitzean Julen Goia Ampo Ordiziaren kapitainak adierazi zuenez, “akats gutxien egin duen taldeak irabazi du”. Horri alde positiboa ateraz, kapitainak gehitu zuen, “ligaren hasiera” dela, eta oraindik “partida asko” daudela aurretik. Atzoko partidatik atera duen irakaspena da, “lanean jarraitu” behar dela, “detaile txikiak fintze aldera, izan ere, horiek izaten dira, partida talde baten edo bestearen alde jartzen dutenak”.

Gauzak horrela, sailkapen nagusian hamargarren postuan kokatuta dago Ampo Ordizia, hamaikagarren dagoen Complutense Cisneros taldearekin puntuetan berdinduta, baina partida bat gutxiago jokatuta. Momentu honetan, Real Ciencias Enerside dago lider, 14 punturekin.

Hurrengo partida, azaroko lehenen asteburuan jokatu dute, Pozuelo Rugbi Union taldearen aurka, Valle de las Cañas zelaian, Madrilen.

Azken bi fitxaketak

Asteburuan jokatu zuten partidaren atarian, Ampo Ordiziaren azken bi fitxaketen berri eman zuen Ordizia Rugbik. Bigarren lerroa eta hiru laurdena indartuko dituzten jokalariak dira iritsi berriak.

Batetik, Tuitavake Manoa, tongoarra da eta bigarren lerroan jokatzen du, nahiz eta hirugarren lerroan jokatzeko baliabideak ere badituen. 24 urte, 196 zentimetro luze eta 128 kiloko pisua du. Ezaugarri horiek sendotasuna eskainiko diote Ampo Ordiziari. Tutavake West Harbour taldetik dator.

Bestetik, Malcom-terr Kill erdi-melea da, nahiz eta hiru laurdeneko beste zenbait postutan ere joka dezaken. 27 urte ditu, 184 zentimetro neurtzen ditu eta 80 kilotako pisua dauka. Esperientzia handia duen jokalaria da honako hau, azken lau urteetan Griffons taldean jokatzen aritu da.

Sagarrari zukua ateratzeko unea

Goierriko Hitza — 2022-10-12 00:00:00

Igartubeiti Baserri Museoa Sagardo Astean murgilduta dago egunotan, 21. aldiz. Larunbatean hasi ziren jarduerak eta ostiralera arte iraungo dute. Sagardo Asteko bosgarren eguna da gaur. Atzo goizean 100 bat bisitari izan zituzten baserriko dolarean, lau taldetan banatuta: Haztegi ikastolako ikasleak, Maizpide euskaltegikoak, Leintz Gatzagako talde bat eta Galiziako beste bat.

Sagarra nola jotzen duten ikusteko aukera izan zuten atzo dolarera bertaratu zirenek, Igartubeitiko arduradunek azalpenak ematen zituzten bitartean. Pisoiekin sagarrak jo zituzten sagar joaleek. Zapaldutakoa patsa askan zabaldu eta egur mota ezberdinez osatutako piramide moduko bat egin zuten, garai batean egiten zen bezala, ardatzari birak eman eta goiko habeak eragindako presioaren ondorioz patsak zukua botatzeko. Zuku hori kupeletan gordetzen dute gero, bertan hartzitu dadin.

Sagar jotzearen ondorioz ateratako zukua dastatu ahal izaten dute bisitariek. Kizkitza Ugarteburu museoko arduradunak azaldu duenez, «giro onean» eman dituzte Sagardo Asteko lehenengo lau egunak, eta «beteta» dituzte datozen egunetako ekintzak ere. «Egunean 90 bat bisitari izan ditugu batez beste, eta gaur, bihar eta etzi ere izango ditugu». Gaur jai eguna denez, familien bisitak espero dituzte. Bihar eta etzi, aldiz, taldeak izango dituzte berriro ere.

Kanpoko sagarrak

Bisitariek arretaz entzun eta ikusten dute dolareko erakustaldia. Atzoko Leintz Gatzagako bisitari baten hitzetan, «ikusgarria» da: «Sagardoa egiteko prozesua ongi ezagutzen dut, baina horrelako dolareak eta sagar jotzeak jada ez dira geratzen». Dolarean jo dituzten sagarrak Frantziatik ekarri behar izan dituzte aurten, lehortearen eta sagarraren goraldi erritmoaren eraginez sagar gabezia izan delako. «Aurten ez dugu sagarra ingurutik ekartzeko aukerarik izan», adierazi du Ugarteburuk.

Atzoko prentsaketan ez zuten kirikoketa —sagarra jotzean sortzen den erritmo soinua da— saiorik egin, baina erritmoa bisitariek jarri zuten. Sagarra jotzen ari ziren bitartean, Aldapeko sagarraren abestia kantatzen hasi zen talde bat. Antolatutako Sagardo Asteko azken kirikoketa saioa, ordea, gaur egingo dute, Igartubeitik eta Juan Mari Beltran musika ikertzaileak eskainitako lantegi batean sortutako talde baten eskutik. Urretxuko eta Zumarragako Karmakros antzerki taldeak, Amaia Ruiz de Galarreta aktore tolosarrarekin, XVII. mende hasieran baserrian bizi izandako familia baten inguruko antzezpena egingo du.

Prozesu baten emaitza

Negutik udazkenera garatzen den prozesuaren emaitza da Sagardo Astea. Sagarra jo eta zukua kupeletan sartu baino lehen, sagarrondoen zaintza, izerdialdia, loraldia, aleen hazkundea eta bilketa izaten da. Hartziduraren ondoren, Barrikote Festan sagardoa dastatzen da, martxoan.

Asteazkenero legez Ordiziako plaza ekoizlez beteta

Goierriko Hitza — 2022-08-17 13:18:50

Beste asteazken batez Goierrin daukagun azokarik entzutetsuenera iritsi dira ekoizleak haien produktuak hartuta. Giro apartean hasi da goiza Ordiziako Azokan. Gaurkoan berrikuntza askorik ez da izan Ordiziako plaza nagusiko zutabeen artean. Jose Antonio Aizpuru errezildarrak Star sagarra ekarri du, 3 euroan kiloa; baita etxeko udarea 2,50 euroan kiloa ere. Landareei dagokienean, ez da berrikuntza handirik izan eta irailera begira loreberriak ekarriko dituztela aipatu dute. Perretxikuetara joz, 95 kilogramo onddo hartuta etorri da Barcina, 24kg 34€ inguruan saldu du. Ziza-horiari dagokionean, 27 kg ekarri ditu eta 15kg 20 euroan saldu ditu eta onddo korearraren kasuan, 5kg 20€an saldu ditu. Gaurkoan ekoizleren bat edo beste falta izan da, hala nola, Agapito Garmendia lazkaotarra.

'Egin zure sagar zukua' tailerra Igartubeiti Baserrian

Goierriko Hitza — 2022-08-12 13:56:57

Igartubeiti Baserrira leku askotatik etorri ohi da jendea, sagardoaren misterioak eta bitxikeriak ezagutu eta goiz pasa ederra egitera. Gaurkoan hamar bat pertsona inguru elkartu dira baserriaren bueltan ‘Egizu zure sagar zukua’ tailerraren baitan, goizeko 11:30etan. Lehenik eta behin Igartubeiti Baserriko inguruak ikusi dituzte eta ondoren, barrualdeak ezkutatzen dituen istorioak eta historia ezagutzeko asmoz sartu dira baserriaren iluntasunean.

Sarrerako atearen eta Igartubeiti osatzen duten egurren inguruan solsean aritu dira lehenbizi eta gidari laneta zebilenak garai historikoaren baitako testuinguruan kokatu ditu bisitariak. Ondoren, egurrezko ate handia zeharkatu eta lehenengo gelara iritsi dira, sarrera eta sukaldea. Bertan, sukaldearen nondik norakoen berri izan dute eta baserriaren erabileraren inguruko zenbait gako azaldu ditu.

Jarraian, logelak ikusi ahal izan dituzte eta bitxikeria gisa, Handia filmaren eszena bat bertan grabatu zela adierazi dute. Hortik ikulura joan dira bisitariak eta bertan, hainbat lanabes ikustearekin batera, baserriaren arkitekturaren parte garrantzitsua diren habe ikaragarriak izan dituzte parez pare. Goiko solairuan, zerealak eta hainbat lanabes gordetzen ziren lekua ikusteaz gain sagardoa egiteko tresnak, batez ere, solairu horretan protagonista den tolarea eta mekanismoak ezagutu ahal izan dituzte. Bisita gidatuan zehar gidari izan dutenak familia guztiarentzako moduko azalpenak eman dizkie une oro, izan ere, haur batzuk tarteko izanik, haiek ulertzeko moduko azalpenak eman dizkie, haiei egokituta; betiko azalpen garatuagoak ematearekin batera.

Behin baserriaren barrualdea ezagututa kanpora irten dira eta bertan, hasi da festa. ‘Egin zure sagar zukua’ tailerrari hasiera eman diote, sagar zukua egiteko prozesua ikasteko. Sagarrak txikitu dituzte lehendabizi pisoiak erabiliz eta ondoren, palen bitartez jaso dute txikitutakoa. Hortik beste ontzi batera eraman dituzte sagar zatiak, presioaren bitartez zukua ateratzeko eta behin zukua pitxarrera aterata dastatzeko unea iritsi da. Sagar zukua dastatu dute bisitariek, gazta puska batzuk lagun eta solasean aritu dira bisitako gidariarekin, Goierriko txokoetako bitxikeria gehiagoren inguruan.

Hemen gaurko Igartubeiti Baserriko goizaren laburpena:

Urteko lehen kuia ikusgarriak

Goierriko Hitza — 2022-07-21 08:00:00

Plaza Nagusia goitik behera apainduta zegoela, ofizialki igandean hasiko diren jaien usainarekin egin zen atzo feria Ordizian, eta azken bi asteazkenetan ez bezala, garai honetan ohikoa den eguraldiarekin gainera. Aurreko egunetako beroaldiekin alderatuta, fresko ere egiten zuen atzo, eta euri zaparradatxoa ere bota zuen goiz erdialdean. Gustura hartu zuten plaza inguruko baserritarrek ur apur hori, batek zioen bezala, «zeruko ura» behar dutelako orain, tenperatura itogarriek baratze eta soroetan utzitako lehorteari aurre egiteko.

Ur faltaren ondorioz, tomatea eta leka, esaterako, atzeratuta datozela ere entzun zen hainbat postutan. Bi produktu horien eskaintzarik ez da falta, hala ere, nahiz eta nahi besteko kantitatean ez dagoen oraindik. Aire libreko tomatea badabil, baina negutegikoarekin alderatuta gutxi (3-5,5 euroan kiloa, tamainaren arabera), eta leka ere badago salgai, geroz eta gehiago, kanpokoa hori ere (6 eta 6,5 euro artean kiloa).

Horiekin batera, kuiatxoak, luzokerrak, berenjenak eta piperrak dira momentuko izarrak. Eta piperretan, eskaintza zabala da: Ibarrakoa edo pipermina (12-12,5 euro), Gernikakoa (6-8 euro), italiar berdea (4 euro), morro berdea eta morro berde-gorria (4-4,5 euro), eta berde ezti luzea (8 euro).

Lehen kuiak

Feriak, bestela, ez zuen berritasun askorik eman atzo, eta horien artean, kuia izan zen nabarmenena. Mutiloako Juanita Murgiondok eraman zituen urteko lehenak.«Zein klasekoak diren ez dakit, baina laranja kolorea hartzen dute gero, eta jateko oso goxoak dira», azaldu zuen. Kalabaza handienak bost kilotik gorako pisua zuen. Kiloa 2,5 euroan jarri zuen salgai.

Mikologia atala ere berritasun izan zela esan daiteke, eskaintza txikiagatik. Mikel Lasaren posturik ez zegoen atzo, eta Felix Barcinarenean bakarrik eros zitezkeen perretxikoak: 30 kilo ziza hori, kiloa 12 eta 18 euro artean.

Landareetan, porrua nagusi

Landare postuetan, azkenik, ez dute atseden hartzeko tarterik oraindik. Aza familiako landareak dira gehien saltzen ari direnak, baina atzo Montesekoek porru ugari saldu zituzten (4 euroan ehunekoa). Albaka ere bazu- ten, hiru landare bi euroan.

Ordiziako azokako prezioak

Bi ibilaldi magiko

Goierriko Hitza — 2022-07-13 17:29:23

Larunbat iluntzean gau ibilaldi mitologikoa egin zen Ataunen, San Gregoriotik abiatu eta San Martinera bidean. Bertan izan ziren, besteak beste, Etsai, Torto, Akerbeltz eta jentilak. Aralar eta Lizarrusti inguruetatik behera jaitsi ziren gurera. Bezperan gutariko zenbait Aralar eta Lizarrusti aldera igo ginen, gauez, beste ibilaldi batean, Ehunmilak eta Goierriko 2 Handiak eginez, kasualitatea?

Asteburu honi tasun usaina hartzen diot urtez urte, atzizki horrek gordetzen dituen eskuzabaltasuna, gizatasuna, onberatasuna eta laguntasuna lehertzen baitira gurean. Ostiralean abiatu nintzen ni, hirugarrenez, baina lasterketa ez da orduan hasten, atzean utzitako urteko azaroan, udazkenean, izen ematearekin batera abiatzen da, kurioski, Jentilak Ataunera jaisten diren garai bertsuan, kausalitatea.

Denbora horretan mendietan barna ibiltzen gara bakarka, isilpean, zapatiletan iltzatutako kilometro bakoitzean etxekoen eginahala dagoela gogoratuz, gu goran izateko, norbaitek egon behar du beheran. Entrenamendu bakoitzarekin gozatzeko zortea dut nik, okerrik ezean, buelta bakoitzaren ondoren, errekan sartzen ditut hankak, freskatzen, eta handik etxerako 300 metrotan, Margariren letxugak edo Joxe Mariren basurde-zatiak eraman izan ditut, opari gainera. Etxean haurrak amarekin, zainduta. Familia.

Hilabeteak aurrera doaz, bidean istripu txikiak gertatzen dira, nire kasuan hankako behatz txikia puskatu dut aurten, martxoa zen eta tira! errekuperatzeko astia bada oraindik. Unairen eskuek hanketan sortutako korapiloak askatu zizkidaten eta bere hitzek nire barnean sortutakoak. Hiru aste igaro orduko lasterka nintzen berriro, izerdia errekako uretan isuriz ostera, eta gaur gogoan ditut istripua beranduago izan eta egunarekin gozatzeko aukerarik izan ez dutenak, Roberto eta Sergio, halere, azken astearen barruan hauspoa eman didatenak, batak Salamancatik, besteak Ordiziatik, bejondeizuela. Miseriak.

Ari da urreratzen eguna, udaberriko azken eguzkiak badoaz, eta auzoan lagunak galdezka ditut, zer moduz ote nagoen, prestatu al dudan, eta entrenamenduren bat egingo al dudan haiekin; Iñigo, Jabi, Aritz, badakizue gustura egingo nituzkeela, baina zuen hankak nireak baino bizkorragoak dira, zapo koadrila hori! Baina hitz horiek, bultzada horiek, barruan geratzen zaizkit, eta lasterketa-egunez, edozein gatz-pilula edo gel baino bortitzago dira, bizigarri erabat. Kemena.
Azken txanpa, uda iristear, azken entrenamenduak, azken kilometroak. Anartzekin atera naiz Aralarren barna, dozena bat tontor egiteko asmotan, Anartzek hustu nau, Anartzek erakutsi dit erritmoa, Anartzek abisua eman dit, lehendabiziko tontorrera iristerako buelta, ni ez naiz zu, zu ez zara ni, bakoitzak berea, etxera noa, erritmoak txikitu nau, eta gorputzeko akidura bizkor horrek buruari abisua eman dio, ez hau G2H egiteko moduan txiki!

Buruaren ajeak, gora eta behera, goizean itxaropentsu, arratsaldez zalantzati eta gauez ezkor. Iritsiko da goiza berriro. Eta iritsi da, Beasaingo Martxa, lehengusuarekin atera naiz, azken dantza Hur!. Oso ondo doa dena, bizkor, arin, herriko beste bi lagun, bi bare, topatu ditugu Atxurbi zeharkatu bezain laster. Taldetxoa, lagunak, elkarlana. Anoa postuetan borondateak eramanda hamaika ezagun, eta geldialdia horietan, hizketaldia, eta hitz aspertua hasterako martxa, giharrak alfertzerako. Azkenean taldetxoa elkartu gara. Ondo noa eta amaitzear nago azken froga eta, bat-batean, gihar-isuria, hemorragia, gorputza goitik behera amildu zait, 45 kilometrotan kito. Zolak egosita etxera, herrenka, ezin pausorik eman, telefonoz aitari deitu eta Idiazabalera etorri zait bila, pauso bakoitzak min ematen zidan. Ahaideak, gurasoak.

Azken astea. Aurtengoan ez dudala bukatuko uste dut, kasik seguru nago, baina dagoeneko gutxi geratzen da eta, ze kristo, atera eta ea noraino iristen naizen. Mugikorra bero izan dut aste osoan, animoak, aholkuak, zerbait behar ote dudan lasterketa egunerako, puntu zehatzen batean animoak ematen egotea nahi ote dudan… Txundituta nago, zer da hau! mezuak iritsi eta iritsi, aurtengoan bukatuko dudala uste dut, kasik seguru nago.

Iritsi da eguna, jentilak Ataunen dira eta gu Aralarren, bidean aurrera goaz eta kasualitatez edo kausalitatez, Beasaingo Plazara heldu naiz hirugarrenez. Etxegaratera arte lehengusuarekin, Jabi ere hor izan dut altzoan, nola ez. San Adrianen Eli eta Iñigorekin elkartu eta Eli atzean geratu da, bere erritmora, Iñigorekin ukitu dut Azkorri. Han geldialditxoa eta handik behera, Javi, Pablo, Iris, Aitor eta Jon izan ditut bidelagun. Azkenerako, bakoitzak bere erritmoa hartu eta aleka, baina iritsi gara. Seme-alabak nituen zain azken 100 metroetan, negarrari eutsiko niola uste nion, baina helmuga zeharkatu orduko semearen negarrak nirearekin nahastu dira, alabak, lasaitasunez, eskutik heltzen zidan bitartean. Andrea anoa postu guztietan agertu zait ia, nonahi, uso hegalariaren antzera jarraitu nauela dirudi bide guztian, Usoa. Miseriak pasa ditut bai, ezker orkatila lehen halako bi da, seruma jarri didate iritsi eta gutxira tentsioa plazapen nuelako. Izaro hor agertu zait Gurutze Gorrian, laguntza eskainiz, nik eskatu gabe. Bi orduz artatu nau eta Gorkarengana bidali nau, nik eskatu gabe. Fisioterapeutak irribarrez hartu nau arratsalde eta ia gau osoan hari eta honi masajeak eman ondoren, ni izan naiz bere azken pazientea. Gorputza abailduta baina ni kementsu nago erabat, hasi eta buka berriro.

Hori da Ehunmilak, hori da G2H, hori da Marimudumendi, ez da lasterketa hutsa. Laguntasun, eskuzabaltasun, gizatasun eta onberatasunaren leherketa da, naturarekin bat egiten dugu eta barnean daramatzagun jentilak, galtzagorriak eta Sugaarrak ateratzen zaizkigu, gu gara bete-betean, gure barneko bekaizkeri, maltzurkeri, eta keria guztiak tasun bilakatuta, lasterka gaudenak eta bide osoan daudenak, beren borondateak eramanda gaua Txindoki edo Aizkorrin igarotzen duten horiek, 4 gradutara, eta 40 kilometro orduko haizepean, guri animoak emateko baino ez, sekulakoa. Igandean Murumendira igoz, Mari omenduz, ematen zaio amaiera asteburu berezi honi, Mari ez baita Ataunera jaitsi, Marik hitzordua izaten baitu egun horretan Beasainen, baina garbi dago, Goierri osoa sorgintzen duela.

Uztarri bereko bi buruek gazta bakarra

Goierriko Hitza — 2022-03-10 08:30:00

Abel Goiburuk aurkeztu du beraien gazta. 2019an etortzen hasi ziren Naroa Irigoien eta Abel, urtarrilaren 16an hain zuzen ere, eta urteko gazta bukatu arte astero izan ohi dira azokan. Sarri ikusten ez den bi familien arteko elkarlana da Goiburu gaztaren atzean dagoena.

Izan ere Aritz Katarain aritzen da artzain lanetan eta ardi horien esnearekin Abel arduratzen da Goiburu gazta egitez. Zuria, naturala alegia (19,5€/k) eta ketua (20€/K) aukeran. Biak ere antzera saltzen omen dira baina lehena gehixeago eta hutsean plastifikatua besteari nagusitzen zaiola esaten zuen Abelek.

Azaroko azken astean hasi ziren gazta egiten eta ia asteroko salmentak ziurtatzeko adinako kopurura iritsi direnean hasi da Ordiziara etortzen.

Hilabete bukaera arte

Bestalde, Gozatu bere erregin jalea, propoleoa eta polena baditu baina ezti guztia saldu du eta atzo Erlandere eztia eskaintzen zuen. Nafarroako Arbaizako hiru mota: milalore, izpilikua eta basoko (artea) ezti ekologikoa da. Hilabete bukaera arte edo segituko du hemen eta udaberrian sartu orduko buru belarri erleekin hasiko da.

Landaretan berririk ez bada ere tipulak landatzeko garai bete-betean gaudela oroit arazten zigun Arantxa Iparragirre Ibarrako Montesenekoak mota ezberdinak aukeran 3,5€/z. Bestalde arbolak landatzeko edota txertatzeko asmorik inork balu bizkor ibili dadila, denboraldia aurrera baitoa.

Azenario berriak ekarri ditu Iñaki Telleriak, «negutegikoak dira eta orain segituan garatzen dira» ekarritakoak laster saldu ditu 2€/sorta. Aire librean ere izan daitezke oraindik baina mozorroa sartzen zaie eta desitxuratu egiten dira. Laster ilarrak ekarriko dituzte ondo bidean, garai honetan negutegikoak salgai izatea gertatu izan da.

Lehen kala sortak

Hemendik aurrera geroz eta gehiago hitz egingo dugu loreei buruz, poliki-poliki ari delako aukera handitzen, nahiz eta hotz arriskua baden oraindik eta zuhur jokatzea komeni den. Lore moztuen artean atzo kalak aukeran, 4€/sorta Mutiloako Juanita Murgiondok.

Udaberria gerturatuz

«Nolako txori kantuen eromena egunsentian, gaur bezalako egun garbitan batez ere, laster antz ematen dute haiek tristea edo eguzkitsua datorren». Pepita Aiestarainen hitzak udaberriaren gerturatzea pozik aipatuz.

Ordiziako azokako prezioak

Azenario ederrak giro goibeleko azokan

Goierriko Hitza — 2021-12-08 00:00:00

Hotz handirik ez, baino bustia eta giro ezatsegina atzo azokan. Gainera azken aste hauetan jarri izan den plastikoa ez zuten jarri eta antzematen da. Asteartea izanda ez da hain harritzekoa ere. Ez da gaurkoa berezkoa ez duen egunetik kanpokoei «peri galdue» esatea. Ohi baino postu eta jende gutxiago.

Betiko bezeroak goizean lehen orduan, eta bukaeran ere mugimendu pixka bat izan zen, ohiko asteazkenetan baino genero gutxiago ekarria zuten ekoizleek eta salmentak araberakoak izan zirela zioten.

Postu bakarrean eros zitezkeen perretxikoak, Lasarenean: onddo, gorringo, mendiko angula, zizahori, saltsa perretxiko beltza eta esne gorria aukeran. Eperrak (12 euroan pieza) eta usoak (8 euroan pieza). Hau azken aste hauetan euro bat garestitu da izan ere gutxi botatzen ari dira aurten eta eske handia da.

Landare saltzaileek ere genero gutxiago ekarri zuten, sartzeko girorik ez baita.

Azenario ikusgarriak

Nonbait eguraldi busti honek ez die denei kalterik egin. Maria Jesus Oriak Itsasoko Eztala Goiko baratzeko azenarioak arreta deitzen zuten. Sortaka saldu ohi dira eta 1.700 gramo bazituen hiruko sorta batek.

Aldiz, ezin kontu bera esan porruari dagokionez. Ez aspaldi, hartxo bat azaldu zen, euli batek jarritako arrautzetik sortzen dena, barneraino sartu eta erabat itsusitzen du porrua, lehertu, harilkatu eta herdoil kolorea hartu.

Jateko ona izanda ere aurkezteko itxurarik gabekoa. Hilabete batzuetan gutxiago somatu bada ere, azken aldi honetan berriz ere indarra hartu duela irudi du.

Koroak eta izeiak

Pinu haziarekin egindako Gabonetako koroatxoak ekarri zituen atzo Edurne Jauregi Baliarraingoak, 20-22 euro artean bakoitza.

Lehen izeiak ere salgai izan ziren. Izei Normandiarra, 15-25 euro artekoak, neurriaren arabera. Izei gorria ere ekarri izan dute aurreko urtetan. Normandiarrak hosto gozoago du eta garestixeago izan arren, hobeto saltzen da.

Hala ere, «azken 20 urtetik hona edo, asko jaitsi da izei salmenta, orduan azoka arrunt batean 50 salduko ziren, orain 5», zioen Mikel Lasak. Horretan ere moda edo joera jakina nagusitzen da.