Goierriko Hitza

Errigora sustraiak ahaztu gabe espaziora begira

Goierriko Hitza — 2026-10-24 17:40:58

Errigorak herri ekimenak hasierako boluntarioei omenaldia egin diete Lazkaon. Eguna hasteko Errigora sustraietatik espaziora dokumentala estreinatu dute Areria zineman. Jende asko hurbildu Euskal Herriko hainbat txokotatik, hori horrela zinema jendez bete da.

Dokumentalaren estreinaldiaren ondoren, Lazkaoko frontoira inguratu dira denak, hamaiketako egin ostean, omenaldi ekitaldia egiteko. Erramun Amundarain, hasierako boluntario izan zena eta lehengo urtean zendu zena, gogoratu dute bere argazki bat ipiniz oholtza gainean. Egunean zehar Kuxkuxtu txaranga urruñarra ere badabil giroa alaitzen. Behin omenaldia amaituta bazkaria egon da frontoiean bertan.

Omenaldiko argazkiak eta bideoa.

Amaitzear dira Altzagan ostatu berria eraikitzeko lanak

Goierriko Hitza — 2026-10-01 08:34:39

Amaitzear dira Altzagan ostatu berria eraikitzeko lanak. Udaletxe azpiko espazioa egokitzeko hautua egin zuen udalak urte hasieran, eta ordutik hainbat lan egin dituzte: aurretik zegoen guztia eraitsi, espazioa berrantolatu eta altzairuak, ateak, leihoak eta bestelako elementuak jarri dituzte. Orain, obra-lanen azken fasean daude.

Ostatua kudeatzeko eta ustiatzeko lizitazioa ere atera du udalak, eta dagoeneko hamalau bat kudeatzailek aurkeztu dute proposamena, Maite Garmendia alkateak azaldu duenez: «Pasada bat izaten ari da». Urriaren 13a, asteartea, izango da proposamenak aurkezteko azken eguna.

Ostatuaren kudeaketa ez ezik, goiko solairuan egokitu duten etxebizitza txiki baten lizitazioa ere martxan jarri du udalak. Hilean 100 euro ordainduta, bertan bizitzeko aukera izango da. Hasierako kontratua bi urtekoa izango dela jakinarazi du, baina bost urtera luzatzeko aukerarekin. Etxebizitzak, gainera, herriko produktuak salgai jartzeko espazio bat ere izango du. Ostatuaren epe-muga bera izango du etxebizitzaren lizitazioak ere.

Bukatu dira Altzagako San Migelak

Goierriko Hitza — 2026-09-30 09:53:08

Ostiralean hasi eta lau eguneko jai egun bereziak igarota, bukatu dira Altzagako San Migelak. Patroiaren egun handiarekin itxi zituzten jaiak atzo, eta ohiko meza nagusiaren ondoren, herri bazkaria eta bertso saioa izan zituzten. Jende andana batu zen herriko elkartera.

Maite Garmendia alkateak azaldu du festa “jendetsuak” izan direla: “Oso animazio ona egon da; jende mordo bat juntatu gara, eta giro ederra izan da festa guztietan zehar”.

Manu Zudaire eta Adei Barandiaran, Altzagako patata tortilla lehiaketako irabazleak

Goierriko Hitza — 2026-09-27 22:33:00

Altzagan San Migel jaiak ospatzen ari dira. Ekitaldietako bat patata tortilla lehiaketa izan da. Lehen saria Manu Zudaire eta Adei Barandiaranek eskuratu dute. Bigarren saria Jon eta Aritz Insaustirentzat izan da.

Bigarrenak.

San Migel jaien bigarren eguna da gaur Altzagan

Goierriko Hitza — 2026-09-26 14:43:52

San Migel jaietan murgilduta dabiltza Altzagan bigarren egunez. Atzo iluntzean hasi zituzten festak altzagarrek, bigarren urtez jarraian, suziria jaurti gabe, eta frontenis txapelketa arduratu zen hasiera horretaz. Bertan, Ioritz, Ianire, Enaitz, Mikel, Denis, Iker, Deiane, Enaitz, Erkuden eta Beñat izan ziren irabazleak.

Gaurko eguna, jaietan berria duten ekitaldi batekin hasi dute, txirringa igoerarekin. Itsasondoko plazan elkartu dira partaideak 10:30ean, eta taldeko argazkia atera ondoren abiatu dira, aldapan gora Altzagaretaraino iritsi arte. Indarrak berreskuratzeko, txorizo egosia eta gazta izan dute dute Altzagako plazan.

San Migel jaiek iluntzean izango dute jarraipena, herri afariarekin eta ondorengo erromeriarekin, eta bihar eta asteartean, herriko zaindariaren egunean ere izango dira ekitaldiak.

Autobusa gaur gauean
Gaur gaueko erromeriari begira, autobus zerbitzua egongo da Goierriko hainbat herrietara.

Altzagara joateko ordutegia honakoa izango da: Legorreta (22:30), Itsasondo (22:35), Ordizia (22:45), Arama (22:55), Altzaga (23:00). Itzulerakoa, berriz: Altzaga (02:00), Arama (02:05), Itsasondo (02.20), Ordizia (02:30), Beasain (02:35).

EGITARAUA

Gaur, larunbata
21:00. Herri afaria, Sarayola katerin-aren eskutik.
23:00. Erromeria, Iratzar taldearen eskutik.

Irailak 27, igandea
11:00-13:00. Haurrentzat zirko tailerra, Zirkuolaren eskutik. Gaur da apuntatzeko azken eguna, irailaren 23a. 638 061 522 telefono zenbakira deitu behar da.

Asteartea, San Migel eguna
12:30. Meza nagusia.
14:00. Herri bazkaria eta bertso saioa, Altzagako elkartean. Bertsolariak: Iban Urdangarin eta Iker Zubeldia. Trikitilariak: Imanol Intsausti eta Iñaki Larrañaga.

Ostiraletik asteartera, San Migel jaietan murgilduko dira Altzagan

Goierriko Hitza — 2026-09-23 08:51:13

San Migel jaietan murgilduko dira altzagarrak ostiraletik asteartera bitartean, eta tradizioz zein berrikuntzez beteriko egitaraua ondu dute. Azken urteko ohiturari jarraiki eta iaz hartutako erabakira sendo eutsita, aurtengoan ere ez da jaien hasierako pregoirik izango Altzagan. «Herriko animaliak babesteko harturiko neurria» izan zen iaz, eta orduz geroztik, suziririk gabeko jaiak dira San Migelak.

Ostiraleko ekitaldiak gastronomian, kirolean eta herritarren arteko lehia bizi bezain berezian oinarrituko dira. Patata tortilla eta frontenis txapelketak izango dituzte. 19:00etan hasiko da patata tortilla lehiaketa, eta hamalau bikote inguru ariko direla aurreratu du Maite Garmendia alkateak. Lehiaketaren ondoren egindako tortillak dastatzeaz gain, txistorra eta hirugiharra ere banatuko dute bertaratzen diren herritarrentzat. Amaitutakoan, frontenisari ekingo diote. Izena emateko epea itxita dago dagoeneko, eta zortzi bikotek parte hartuko dute. Arratsaldea, gainera, trikitilariek girotua izango da, Iker Sukia eta Markinezen eskutik.

Berrikuntzak, iazkotik

Aurtengoan ez da herri kirolik zein sagardo dastaketarik egingo, baina horren ordez, berrikuntza gisa, Altzagaratera igoera antolatu dute. Larunbat goizean izango da, 10:30ean: Itsasondoko plazan elkartuko dira parte-hartzaile guztiak, eta argazkiak atera ondoren abiatuko dira Aramako bidegurutzera, handik Altzagaratera igotzeko. Altzagako herritarrez gain, Itsasondoko zein Aramako herritarrek ere parte hartuko dutela jakinarazi du Garmendiak, nahiz eta adierazi duen edonorentzat zabalik dela parte-hartzea. Amaitutakoan, partaide eta laguntzaile guztientzat txorizo egosia eta gazta banatuko dute Altzagako plazan.

Ondoren, 90 herritar bildu ohi dituen herri afaria egingo dute, Aguraingo Sarayola katerin-aren eskutik, eta ondoren, Iratzar taldearen erromeria izango da. Igandean, berriz, haurrentzako zirko tailerra izango da eguerdian, Zirkuolaren eskutik. Aurrez izena ematea beharrezkoa izango da, eta gaur itxiko da epea –638 061 522 zenbakira deituta–.

Egun handia, asteartean

Asteartean itxiko dituzte jaiak, azkenik, San Migel zaindariaren egun handiarekin. Ohiko moduan, meza nagusia, herri bazkaria eta bertso saioa izango dituzte. Iban Urdangarin eta Iker Zubeldia bertsolariak arituko dira kantuan, eta Imanol Intsausti eta Iñaki Larrañaga trikitilarien doinuek lagunduko dute.

Autobusa larunbatean

Larunbat gauerako Lurraldebusek autobus zerbitzu berezia jarriko du. Altzagara joateko ordutegia honakoa izango da: Legorreta (22:30), Itsasondo (22:35), Ordizia (22:45), Arama (22:55), Altzaga (23:00). Itzulerakoa, berriz: Altzaga (02:00), Arama (02:05), Itsasondo (02.20), Ordizia (02:30), Beasain (02:35).

Ekaitz Goikoetxea beasaindarrak irabazi du 35. Lazkao Txiki Bertsopaper Lehiaketa

Goierriko Hitza — 2026-07-22 14:35:06

Argi Berri elkarteak dagoeneko jakinarazi ditu 35. Lazkao Txiki Bertsopaper Lehiaketako irabazleen izenak. Ekaitz Goikoetxea Asurabarrena beasaindarrak egindako lana saritu dute helduen mailan. Datorren irailaren 6an izango da sari banaketa ekitaldia, 12:00etan, Ordiziako Barrena Kultur Etxeko Bertsolari Eskola gelan. Sarituek sariak jaso eta euren bertsoak kantatuko dituzte.

Lehenengo sariaz gain, eskualdeko lan onenaren saria ere jaso du Goikoetxeak, eta Iraitz Sarasola Lopetegi ordiziarraren bertso sortek, berriz, epaimahaiaren aipamena jaso dute. Gainerakoan, Oier Etxeberria azpeitiarrak eskuratu du helduen bigarren saria, eta Amaia Agirre asteasuarrak, berriz, hirugarrena. Gaia librea izan dute, eta hemeretzi lan aurkeztu dira denera.

Gaztetxoetan sarituak

Helduez gain, gazteenek ere izan dute parte hartzerik. 13 urte azpikoen artean, bost lan aurkeztu dira eta Eleder Lavilla iruindarrak, Ekai Legorburu hernaniarrak eta Maialen Urtxegi narbartearrak eskuratu dituzte sariak, hurrenez hurren. Eskualdeko lan onenaren saria, berriz, Lexuri Bastida Aiestaran altzagarrarentzat izan da. Gaztetxoenak izan dira gai konkretu bati jarraitu behar izan dioten bakarrak: ‘Lazkao Txikik 100 urte’.

14 eta 18 urte arteko gazteen artean, ordea, lau lan aurkeztu dira, eta Kattalin Arabolaza oiartzuarrak eskuratu du aurreneko saria.

Aurrera doaz Altzagan ostatu berria eraikitzeko lanak

Goierriko Hitza — 2026-02-20 11:51:59

Urte luzez sona handiko bi jatetxe izan dira Altzagan: batetik, Altzagaraten kokatutako familiarteko jatetxea, eta bestetik, herriko sagardotegia. Biak urte askotan zabalik egon arren, jubilazioagatik itxi zituzten: lehena pandemiaren garaian, duela bost edo sei urte, eta bigarrena duela ia bi urte.

Itxiera horrek herriaren bizitasunean eragin nabarmena izan duela azaldu du Maite Garmendia alkateak. “Jende asko erakartzen zuten, eta ez bakarrik Goierritik; Donostia aldetik ere etortzen zenik bazen. Itxi zituztenetik, herritar asko Ordiziara jaisten hasi dira gero eta gehiago”, adierazi du.

Egoerari buelta eman eta herriak galdu duen dinamismoa berreskuratzeko asmoz, udalak ostatu berri baten proiektuari heldu dio. Aspalditik buruan zuten udaletxe azpiko espazioa egokitzea, eta aurtengo legegintzaldian erabaki dute egitasmoa martxan jartzea. Iazko urrian ekin zioten lehen faseari, eta uda baino lehen amaitzea espero dute.

Proiektua bi fasetan banatu dute. Lehenengoan, aurretik zegoen guztia eraitsi eta berrantolaketa lanak egin dituzte. Bigarrenean, berriz, altzariak, leihoak, ateak eta bestelako elementuak jarriko dituzte. Lehen faseak hiru hilabete iraun du, eta laster hasiko dira bigarrenarekin.

Herritarren topagune

Orain arteko lanak Gipuzkoako Foru Aldundiaren Landa Garapen Proiektuak programaren laguntzarekin finantzatu dituzte, eta bigarren faserako ere laguntza bera eskatuko dute. Horrez gain, Foru Funtsen bidez jasotako dirua ere baliatuko dutela jakinarazi du alkateak. “Garai batean diru-laguntzak herri handietara bideratzen ziren batez ere, baina urteetako ahaleginaren ondorioz herri txikiek ere aukera gehiago ditugu. Orain baliabide gehiago ditugu, eta uda aldera proiektua amaituta egotea espero dugu”, azaldu du.

Ostatu berria herritarren topagune izatea nahi dute. Turismoari ere bultzada emango diotela aurreratu du alkateak: “Inguruan mendi ibilbide polit asko daude, eta helburua da bisitariek buelta egin ondoren ostatuan bazkaltzeko aukera izatea”. Gainera, tokiko ekoizleei ere lekua egin nahi diete. “Altzagan bertan badugu ekoizle bat, eta haren produktuak ostatuan salgai jartzea da asmoa”, gaineratu du.

Martxan da Zaldibiako Udalaren LGTBI+ diagnostikoa

Goierriko Hitza — 2026-01-08 13:55:35

Zaldibiako Udalak, Hiruki Larroxa kooperatibarekin elkarlanean, herriko LGTBI+ errealitateei buruzko udal-diagnostikoa zein ekintza plana jarri ditu abian. Ekimenaren helburua da, besteak beste, LGTBI+ herritarrek beren sexualitatea eta identitatea askatasunez bizitzeko dituzten «aukerak zein oztopoak» sakonean ezagutzea; bai eta ikusgarritasuna, bizigarritasuna eta askatasuna sustatzeko balizko neurriak eta ildoak aztertzea ere.

Diagnostiko prozesu honen bitartez, Zaldibiako LGTBI+ komunitatearen egoeraren inguruko ikuspegi osatu eta zehatza lortu nahi da, testuinguruari erreparatu eta eguneroko errealitateak hobeto ulertzeko. Horrez gain, eta etorkizunera begirako politika publikoak eta ekintzak garatzeko oinarriak ere ezarri nahi ditu Zaldibiako Udalak.

Prozesuak herritarren parte-hartze aktiboa eskatzen du, eta horregatik, Zaldibiako biztanle guztiek galdetegi bat bete dezaten animatu ditu udalak, ahalik eta ahots gehiena zein ikuspegi zabalena eskuratzeko asmoz. Udalaren webgunean eskegita dagoen estekara joanda aurki daiteke bete beharreko galdetegia, eta udalak sare sozialetan zabaldutako oharrean adierazi duenez, egindako ekarpen guztien «anonimotasuna eta konfidentzialtasuna» bermatuko direla jakinarazi dute sare sozialetan zabaldutako oharrean.

Altzagako baserrietako azpiegitura publikoak hobetzeko Erein laguntza

Goierriko Hitza — 2026-01-08 12:16:14

Altzagako Udalak Eusko Jaurlaritzaren Landa Garapeneko Erein 2024 programaren diru laguntza jaso du baserrietako azpiegitura publikoak hobetzeko. Udalak jakinarazi duenez, diru laguntzari esker, batetik, eguzki-energiaz elikatutako hamabost farola instalatu dituzte udalerri osoan barreiatutako baserrietan.

Eta bestetik, Altzagarate, Abalia eta Sarasolako auzoetan eta herrigunean, sute-harguneak erabiltzeko ekipamendu osagarri bana jarri dute, aurretik instalatutako sare publikoa osatuz.

Bizilagunen segurtasuna
Udalaren esanetan, «jarduketak bizilagunen segurtasuna eta ondasunen babesa hobetzea du helburu, baita jasangarritasun energetikoa eta landa-ingurunearen bizigarritasuna indartzea ere»

Altzagatik Aspanogi elkartera, 1.200 euro

Goierriko Hitza — 2026-01-08 08:06:24

Elkartasunezko kantu eskea egin zuten abenduaren 24an Altzagan. Etxez etxe eta baserriz baserri kantuan arituta, 1.000 euro bildu zituzten Aspanogi, Gipuzkoako minbizia duten adingabeen familien elkartearentzat. Altzagako Udalak ere beste 200 euroko diru ekarpena egin du.

Altzagako errepidea itxita egongo da bihar

Goierriko Hitza — 2025-11-05 08:13:29

Gipuzkoako Foru Aldundiak jakinarazi duenez, Altzagarekin lotzen duen GI-3871 errepidean zorua modu jasangarrian birgaitzeko lanak direla eta, bihar, azaroak 6a, 09:00etatik 13:30era eta 14:30etik 18:30era trafikoa erabat moztuko dute.

Egin beharreko lanen artean ondorengoak daude: ur-pasabide bat berritzea eta areka berriak egitea sartzen da, Etxeberriazpikoa baserriaren parean, 2+890 KPan, Altzagako hirigunetik 800 metrora.

Aldundiak nabarmendu duenez, “bizilagunen eta obren arteko bizikidetza errazteko, trafikoa ordutegien arabera mozteko aukera planteatu da, bizilagunei goizeko lehen orduan, eguerdian eta iluntzean sartzeko eta irteteko aukera emanez”.

Olaia Inziarte, gaur Altzagan, igandean Beasainen

Goierriko Hitza — 2025-10-03 09:57:49

Altzagako Udazken Kulturalak bi euskal sortzaile ezagun eramango ditu herrira. Gaur, ostirala, Olaia Inziarterekin solasaldi musikatua izango da, Esanezin taldeko Ianire Aranzabe altzagarrak gidatuta, Ertoetxen. 18:30ean irekiko dituzte ateak, eta 19:00etan hasiko da. Urriaren 11n, aldiz, Eñaut Elorrietak saioa eskainiko du Ateosteko bira emanaldi sortaren barruan, elizan.

Dohainik dira bi emanaldiak, baina gonbidapenak hartu behar dira aurrez, altzaga.eus webgunean. Garraio publikoa jarri dute egun horietarako. Altzagara joateko autobusak gaur eta hilaren 11n Itsasondotik 18:35ean aterako dira, Ordiziatik (18:35) eta Aramatik (18:40) igaro, eta Altzagara 18:45ean iritsiko dira. Itzulerakoa, berriz, gaur Altzagatik 20:45ean irtengo da, Araman 20:50ean gelditu eta Ordiziara iritsiko da 20:55ean. Hilaren 11n, aldiz, itzulerakoa 21:00etan irtengo da Altzagatik, Aramatik (21:05), Ordiziatik (21:15), Itsasondotik (21:25) igaro eta Legorretaraino iritsiko da 21:30ean.

Etzi Beasainen

Bihar Altzagan egon ondoren, igandean Goierrira itzuliko da Olaia Inziarte, beste emanaldi baterako. Igartza Musika zikloaren barruan, Igartzako jauregian akustikoan joko du Oronozko musikariak, 19:00etan. Gonbidapen bidezko emanaldia izango da hori ere; dagoeneko agortu dira denak.

Esanezin taldeak 'Gure zauria' bideoklipa jarri du sarean

Goierriko Hitza — 2025-09-30 16:35:05

Ianire Aranzabe abeslari duen Esanezin taldeak Gure zauria izeneko bideoklip berria igo du Youtubeko bere kanalera.

Sara Zozaia abeslari donostiarrak ere kantatzen du, eta Imanol G. Gurrutxaga lazkaotarra arduratu da bideoa grabatu eta editatzeaz.

Partaideak

Ianire Aranzabe: hitzak, ahotsa eta gitarra akustikoa
Sara Zozaia: hitzak eta ahotsa
Iñigo Asensio: pianoa, sinteak eta baxua
Imanol Rubio: gitarra elektrikoa
Igor Telletxea: bateria
Ekoizpena: Esanezin
Grabaketa: Mecca estudioa
Nahasketa eta masterizazioa: Aberin estudioa

Altzagako jaietako herri afarirako txartelak salgai

Goierriko Hitza — 2025-09-12 15:27:13

Irailaren 26tik 29ra bitartean Altzagan San Migel jaiak ospatuko dira, eta larunbatean, irailaren 27an egingo den herri afarirako txartelak salgai daude, irailaren 18ra arte. Irailaren 15tik 17ra, 08:00etatik 10:00etara, Altzagako udaletxean bertan erosteko aukera izango da, eta gainerako egunetan eta orduetan, Itsasondoko udaletxean, 08:30etik 14:30era bitartean. Prezioak: helduek 30 euro, ikasleek 20 euro eta haurrek 12 euro.

Altzagako Udazken Kulturalean, Olaia Inziarte eta Eñaut Elorrieta

Goierriko Hitza — 2025-07-11 16:31:22

Aurtengo Altzagako Udazken Kulturaleko bi ekitaldi iragarri dituzte dagoeneko.

Urriaren 3an, Olaia Inziarte kantari nafarrak solasaldi musikatu eskainiko du eta astebete beranduago, urriaren 10ean, Eñaut Elorrieta bizkaitarrak, Ateosteko birako kontzertua.

Irailean banatuko dituzte gonbidapenak.

Ianire Aranzabe Izarorekin BECeko oholtzan

Goierriko Hitza — 2025-06-02 12:02:17

Esanezin taldeko abeslaria Ianire Aranzabe altzagarrak Izaro Andresek joan den larunbatean BECen egin zuen Cerodeenero bira amaiera emateko kontzertuan parte hartu zuen. Er(h)ori abestia kantatu zuten elkarrekin.

Itsasondon, Altzagan eta Araman Euskaraldiko txapak jasotzeko aukera

Goierriko Hitza — 2025-05-09 11:54:36

Euskaraldian izena eman duten Ahobiziek eta Belarriprestek txapak jasotzeko aukera izango dute, Itsasondon gaur, 19:00etan banatuko dituzte txapak, Altzagan bihar 10:00etan eta Araman igandean, 13:00etan.

Aramatik Altzagara doan bidean errepide lanak egingo dituzte

Goierriko Hitza — 2025-04-16 16:38:28

Gipuzkoako Foru Aldundiak jakinarazi duenez, datorren asteartean hasiko dira Aramatik Altzagara eta Altzagaratera doan errepidean lerradura bat konpontzeko euste lanak. GI-3871 errepidearen kanpoko ertz batean izan da lerradura, Arama parean.

Lanak behar bezala egiteko, kanpoko erreia erabat okupatuko dute langileek beheranzko noranzkoan, baita gorako noranzkoan doanaren zati bat ere, baina zabalera bat libre utziko da ibilgailu arinak igarotzeko. Lanek hiru aste inguruko epea izango dute, apirilaren 22tik maiatzaren 16ra. 08:00etatik 18:00etara izango dute eragina errepidean.

Ezarritako obra-aldian, ibilgailu arinen zirkulazioa semaforoen bidez erregulatutako den ordezko pasabide baten bidez antolatuko da, eta ibilgailu astunek, berriz, ezin izango dute errepide zati horretara sartu ezarritako itxiera ordutegian.