Goierriko Hitza

Errigora sustraiak ahaztu gabe espaziora begira

Goierriko Hitza — 2026-10-24 17:40:58

Errigorak herri ekimenak hasierako boluntarioei omenaldia egin diete Lazkaon. Eguna hasteko Errigora sustraietatik espaziora dokumentala estreinatu dute Areria zineman. Jende asko hurbildu Euskal Herriko hainbat txokotatik, hori horrela zinema jendez bete da.

Dokumentalaren estreinaldiaren ondoren, Lazkaoko frontoira inguratu dira denak, hamaiketako egin ostean, omenaldi ekitaldia egiteko. Erramun Amundarain, hasierako boluntario izan zena eta lehengo urtean zendu zena, gogoratu dute bere argazki bat ipiniz oholtza gainean. Egunean zehar Kuxkuxtu txaranga urruñarra ere badabil giroa alaitzen. Behin omenaldia amaituta bazkaria egon da frontoiean bertan.

Omenaldiko argazkiak eta bideoa.

Ekintzaileei zuzendutako laguntzak, Uggasaren eskutik

Goierriko Hitza — 2026-10-23 10:00:43

UGGASA Urola Garaiko Garapen Agentziak martxan jarritako tutoretza saioei esker, negozio edo ekintziletza ideia bat duten pertsonek aukera izango dute proiektua garatzeko eta martxan jartzeko. Lanbideren ekintzailetza sustatzeko programaren baitan kokatzen da laguntza, aholkularitza eta tutoretza zerbitzu hau.

Programaren helburua da negozio ideia bat duten pertsonei beren proiektuaren bideragarritasuna aztertzen laguntzea, negozio plana lantzea eta jarduera ekonomikoa martxan jartzeko beharrezko urratsak prestatzea. Horretarako, parte hartzaile bakoitzak gutxienez 25 orduko laguntza prozesu pertsonalizatua jasoko du, banakako tutoretzak eta aholkularitza espezializatua uztartuz.

Laguntza prozesuak hiru eta bost hilabete arteko iraupena izango du, eta bertan negozio ideia definitu, bideragarritasuna aztertu eta proiektua martxan jartzeko beharrezko tresnak landuko dituzte. Amaieran, tutoretza eta aholkularitzaz gain, diru laguntza bat jaso ahal izango dute partaideek, beti ere baldintzak betetzen badituzte.

Programan parte hartu ahal izango dute Lanbiden enplegu eskatzaile gisa inskribatuta dauden pertsonek, eta enpresa edo jarduera ekonomiko berri bat abian jartzeko asmoa duten pertsonek. Parte hartu nahi dutenen arteko hautaketan lehentasuna izango dute 30 urtetik beherako gazteek, 45 urtetik gorako pertsonek, eta diru sarrerak bermatzeko errenta jasotzen duten pertsonek. Era berean, emakumeen ekintzailetza sustatuko da. Informazio

Interesa duten pertsonek informazio gehiago jaso dezakete UGGASArekin harremanetan jarrita 943 72 58 31 telefono zenbakian, edo
aamenabar@uggasa.eus helbidera idatzita.

UGGASAk 30 urte baino gehiagoko esperientzia du ekintziletza sustatzen, eta urte hauetan ehunka proiektu lagundu ditu eskualdean, enpresa berriak sortzen, jarduera ekonomikoa indarzten eta enplegua sustatzen lagunduz.

Ipuin kontaketa eta antzerkia, iganderako proposamenak

Goierriko Hitza — 2026-10-23 09:57:39

Kultur eskaintza bikoitza dago igande honetan Ezkion eta Itsason. Batetik, Ixabel Agirresaroberen ipuin kontaketa izango da Ezkioko gaztelekuan, 17:00etan, 5 eta 12 urte arteko haurrei zuzenduta. Bestetik, Zuhaitz Gurrutxaga, Oihana Maritorena,

Nerea Gorriti eta Iñigo Aranburu aktoreek Scape Room antzezlana eskainiko dute, 19:00etan Alegiko pilotalekuan, Begoña Bilbaoren zuzendaritzapean.

‘Oroimena ehuntzen’ familientzako saioa, bihar

Goierriko Hitza — 2026-10-23 09:52:27

Familientzako Oroimena ehuntzen saioa antolatu dute larunbat honetarako Igartubeitiko interpretazio zentroan. Saio honen bitartez galtzear dagoen ogibide bat ezagutzera eman nahi dute eta parte hartzaile bakoitzak bere ehun propioa sortuko du, material birziklatuak erabiliz. Saioak 3 euroko prezioa du eta Ondarearen Europako Jardunaldien baitakoa da. Izena emateko Igartubeitira deitu edo idatzi daiteke.

Ongizate bulego berria martxan, udalen akordioari esker

Goierriko Hitza — 2026-10-16 07:30:37

Ezkio-Itsaso, Ormaiztegi eta Gabiriako udalek egindako hitzarmen bati esker, Ongizate bulego zerbitzu berria dute urriaren 1z geroztik, hiru udalerri hauetako bizilagunek. Bihotza Esnaola gizarte langilea eta Naroa Maguregi administraria dira zerbitzuaren arduradunak. Gizarte gaien esparruan hiru udalerrietako bizilagunei erantzun integralagoa eta osatuago emateko helburuarekin jarri dute martxan zerbitzu berria.

Hilabeteetako elkarrizketaren emaitza da Ongizate bulegoa, «garrantzitsua izan da zerbitzu honetan sinisten duten politikariekin bat egitea akordioa errealitate bihurtzeko. Bere denbora eman du hau dena antolatzeak, baina azkenean lortu dugu, sinisten genuelako horrela izan behar zuela eta zerbitzu berriak izaera hori izan behar zuela», esan du Esnaolak.

Esnaola gizarte langile lanetan aritu da orain arte Ezkio-Itsasoko udaletxean, %33ko lanaldian. Ormaiztegik eta Gabiriak orain arte partekatzen zuten gizarte langileak erretiroa hartu berri du eta testuinguru horretan sortu da hiru udalerrien artean zerbitzu hau martxan jartzeko aukera.

Kalitatean irabazi

Zerbitzuaren erabiltzaileek kalitatean irabaziko dutela uste du Esnaolak, «zuzeneko arretari denbora gehiago eskaini ahal izango zaio, administrazio lanetarako figura berri bat sortu delako». Izan ere, azken urteetan lan administratiboak biderkatu egin dira eta horrek, aurrez aurreko arreta egiteko denbora kendu dio, orain arte, gizarte langileari. Zerbitzuaren ordutegia ere zabalagoa izango da eta emango duten arreta «integralagoa».

Herri txikietako gizarte zerbitzuetako erabiltzaileen beharrak, herri handiagoetakoen berdinak dira, baina erantzuna ematerako orduan, badira ezberdintasunak. «Landa eremuan daukagun arazo handietako bat dispertsioarena da, jendearengana iristeko zailtasunak. Azpiegitura falta ere beste arazoetako bat da, sarri, behar den kasuetan beste herri batzuetara mugitu behar izaten dutelako. Profesional bezala, baloratzen ditugun beharrei erantzun egoki bat emateko zailtasunak ere izaten ditugu askotan, gure lanaldia oso murriztua delako», zerrendatu du.

Kontrara, erabiltzaileekin harremana gertuagokoa da herri txikietan, «guztiak ezagutzen dugu elkar eta beharrezko informazioa beti iristen zaigu bide batetik edo bestetik», gehitu du.

Zerbitzu partekatua

Zerbitzu partekatua denez, ez dira egunero egongo herri guztietan, baina dagokionean, ordu gehiagoz izango dira bertan. Ongizate bulegoarekin haremanetan jartzeko edo hitzorduak eskatzeko telefono bakarra izango da aurrerantzean: 603 730 114. Astegunetan, 8:00etatik 14:00etara deitu ahal izango da bertara.

Ezkioko adinekoen bazkaria, urriaren 25ean

Goierriko Hitza — 2026-10-15 13:38:25

Ezkioko Udalak antolatuta, adinekoen bazkaria egingo dute datorren urriaren 25ean, Topa ostatuan. Herritar guztiei zabalduta dago ekimena. Izen ematea urriaren 20ra arte zabalik dago udaletxean, edo 943 72 13 03 telefonoan. Menuaren prezioa 45 eurokoa izango da —23 euro 65 urtetik gorakoentzat—. Garraio arazoak dituztenek udaletxean jakinarazi dezakete eta bila joango dira etxera.

Baliabide naturalen bidez, bizi kalitatea hobetzeko gakoak

Goierriko Hitza — 2026-10-14 11:50:15

Ezkion bizi den Eztizen Agirresarobek Udazkenean osasuna indartzen hitzaldia egingo du ostegunean Ezkioko udaletxeko areto nagusian, 18:00etan. Pertsonen osasuna eta bizi kalitatea hobetzeko baliabide naturalak helaraztea da hitzaldiaren helburu nagusia; testuinguruaren osagai nagusietako bat kontutan hartuz: urtaroa.

Ezkio-Itsasoko bigarren eskuko merkatua igandean

Goierriko Hitza — 2026-10-14 11:22:18

Ezkio-Itsasoko bigarren eskuko merkatua egingo dute urriaren 18an, 11:00etatik 15:00etara, Topa tabernaren inguruetan. Bertan postua jarrita parte hartu nahi dutenek, izena emateko azken egunak dituzte, urriaren 15era bitartean, Ezkio-Itsasoko udaletxean.

Komunitatean ospatzen ari dira Igartubeitiren 25. urteurrena

Goierriko Hitza — 2026-10-10 16:08:05

Igartubeiti baserri museoa Sagardo Aste betean da. Asteazkenean eman ziote hasiera, urteko ekimen garrantzitsuena den honi. Urriaren 17ra bitartean, dolarea martxan ikusteko urteko aukera bakarra izango da eta makina bat ekimen antolatu dituzte Sagardoa Route-ekin elkarlanean.

Sagardo Astearen baitan, Igartubeitiren 25. urteurrena ospatzeko festa ere egiten ari dira asteburu honetan. Mende laurdeneko ibilbidea komunitate osoarekin ospatu nahi dute eta horretarako bisitarientzako bazkariak antolatu dituzte larunbatean eta igandean.

Gaur, larunbata izan da lehendabizikoa. 87 pertsona izan dira gaur Sagardo Astearen baitan antolatzen dituzten sagar jotzeak ikusten. Horietatik 34 bazkaltzen gelditu dira, eguraldia lagun, Igartubeitiren lorategian inporbisatu duten jangelan. Bazkalordua girotzen Arandia anaiak trikitilariak izan dira. Bihar, beste horrenbeste bisitari izango dira bazkaltzen, eta Elustondo anai-arreba trikitilariak izango dira egunari musika jarriko diotenak.

Askotariko ekintzak

Egun hauetan Igartubeitira hurbiltzen direnek, zenbait erakusketa ikusteko aukera ere izango dute. Interpretazio zentroan ikusgai dagoen “Baserria. Egurra, harria, mitoa, orain” erakusketak, mendeetan zehar Euskal Herriko egoera ekonomiko eta sozialetara egokitzen eta eraldatzen jakin duen arkitektura gisa erakusten du baserria. Eta Igartubeitiko sagarrondoetako sagar mota ezberdinen erakusketa ere ikus ahal izango da.

Ingurumen jasangarritasuna

Igartubeiti Baserri Museoak jasangarritasunaren aldeko apustuan lanean jarraitzen du, eta aurtengo Sagardo Astea Erronka Garbia ingurumenaren jasangarritasun planaren baliozkotzearekin egingo da. Eusko Jaurlaritzaren Ingurumena, Lurralde Plangintza eta Etxebizitza departamenduak eta Ihobek bultzatzen duten programa da Erronka Garbia, eta ekitaldiak, diseinatzen diren unetik amaitzen diren arte, modu jasangarrian ospatzea du helburu.

Jardueren programa:

Igartubeitiko dolarea martxan

Egunak: urriak 7, 8, 9,13, 14, 15 eta 16
Ordua: 11:30ean

Igartubeitiko dolarea martxan Kirikoketa erritmora

Egunak: urriak 10, 11, 12 eta 17
Ordua: 12:00etan

Antzezpenak baserrian

Egunak: urriak 10 eta 17.
Orduak: 10:45 gaztelaniaz, 11:15 euskaraz eta 11:40 gaztelaniaz.
Egunak: urriak 11 eta 12.
Orduak: 10:45 euskaraz, 11:15 gaztelaniaz eta 11:40 euskaraz

Bazkaria erosteko aukera

Egunak: urriak 10 eta 11

Trikitilariak:

Egunak: urriak 10 eta 11
Ordua: 15:00-16:00

Legazpiko Langileen Ibilbidera bisita gidatua

Urriak 10 eta 17, 17:00etan

Jardueretarako lekuak mugatuak dira eta aurrez izena eman behar da parte hartzeko.

Izen ematea: 943 72 29 78 / 72 51 07 telefonoetan edo igartubeiti@gipuzkoa.eus helbidean.

Alex Aranburu ez da berriro lehiatuko 2026ko denboraldian

Goierriko Hitza — 2026-10-08 13:54:52

Alex Aranburuk lepauztaia hautsita du, Coppa Bernocchi lasterketan (Italia) izandako erorikoagatik, eta ez da berriro lehiatuko 2026an. Hala eman du jakitera Cofidis talde frantziarrak bere sare sozialetan. Cofidiseko txirrindularia probako esprintean jausi zen, astelehenean, eta, horren ondorioz, haustura du eskuin lepauztaian eta ertz iliakoan.

Sagardo Asteak mende laurdena osatuko du aurtengo edizioan

Goierriko Hitza — 2026-10-07 13:54:27

Hasi da Igartubeitiko 25. Sagardo Astea. Baserriko azpiegitura erraldoia martxan jarri dute berriz, eta urriaren 17ra arte, sagar zanpaketak eta dolarearen funtzionamendua zuzenean ikusteko aukera izango da. Baserri museoaren urteko ekintza garrantzitsuena da, urte guztian zehar dolarea martxan ikusi daitekeen une bakarra delako. Sagardo Astearekin batera, Igartubeiti baserri museoak ateak ireki zitueneko 25. urteurrena ere bete da aurten, eta mende laurdeneko ospakizunek segida izango dute datozen aste eta hilabeteetan.

Gaur goizean egin dute irekiera ofiziala. Kizkitza Ugarteburu, Igartubeitiko koordinatzaileak; Mari Jose Telleria, Gipuzkoako Foru Aldundiko Kultura zuzendariak; Libe Otaegi, aldundiko Turismo zuzendariak; Joseba Telleria, Ezkioko alkateak eta Igartubeitirekin batera Sagardo Astea antolatzeko lanetan diharduen Sagardoa Routeko koordinatzaile, Olatz Mitxelenak hartu dute hitza aurkezpen ekitaldian.

Igartubeitiren mende laurdeneko ibilbidea oso presente izan dute guztiek euren hitzartzeetan. Ugarteburuk eskerrak eman ditu 25 urte hauetan alboan izan dituzten norbanako eta erakundeei; azpimarra berezia eginez «Ezkioko komunitate osoari». Kultura zuzendariak begirada atzera botata, orain 25 urte aldundiak proiektu hau martxan jartzeko izan zuen «ausardia» goraipatu du. Goierrin, Igartubeiti turismoa erakartzeko bitarteko nagusietako bat izanik «benetakotasunaz» hitz egin du Otaegik, «hori delako kanpotik datozen turistek Gipuzkoa bisitatzen dutenean bilatzen dutena; eta Igartubeiti horren adibide garbia da», esan du.

“Ezkioko komunitatea eskertu nahiko nuke, beraiek direlako Igartubeiti martxan ipintzen dutenak”

Kizkitza Ugarteburu. Igartubeitiko koordinatzailea

Ezkioko alkate Joseba Telleriak dolarea lehenengoz martxan jarri zuteneko eguna oroitu du, «baserriko habeak zarata izugarria ateratzen zuten eta ezer jakin gabe jarri genuen martxan, logikari jarraituz». Igartubeitiri esker Ezkio «mapan kokatu» dela ere aipatu du, eta turismo jasangarriaren aldeko aldarria egin du. Amaitzeko, Sagardoa Routetik «sektore bezala hau zaintzeko eta bizitza emateko betekizuna» dutela azpimarratu du Mitxelenak. Hitzartzearen ondoren, 25 urteko ibilbidea jasotzen duen bideo motza aurkeztu dute.

Baserriaren 25. urteurrena ospatzeko Itziar de la Granja artistaren eskutik komunitatean sortu duten zumitzezko sagar erraldoia aurkeztu dute ondoren, eta ohiko brindisaren atzetik jarri dute dolarea martxan, sagar zanpaketarekin. Aurten, Beasain BHI institutuko DBH 2.mailako ikasleak izan dituzte gonbidatu gisa, baita Sagardoa Routek gonbidatutako hainbat turista atzerritar ere.

Egitaraua

Sagardoaren Astearekin batera, programazio oparoa jarriko dute bisitarien eskura urriaren 7tik 17ra, eta sagarraren prentsatzeaz gain, trikiti saioak eta antzerkia egongo dira, kirikoketa erakustaldiak eta erakusketak ikusi ahalko dira, eta Legazpiko Langileen Ibilbidea bisitatu ahal izango da. Urteurren berezi hau komunitatearekin ere ospatu nahi da, eta hala, urriaren 10ean eta 11n, larunbata eta igandea, festa berezia ere egingo dute Igartubeiti Baserri Museoaren eta Interpretazio Zentroaren inguruetan. Bisitariek bertan bazkaltzeko aukera izango dute eta bazkalondorena Arandia anaiak eta Elustondo anai-arreba trikitilariek girotuko dute.

Urriaren 7, 8, 9, 13, 14, 15 eta 16an izango da dolarea martxan ikusteko aukera, 11:30etik aurrera. Urriaren 10, 11, 12 eta 17ko sagar jotzetan kirikoketa talde bat ere izango da. Garai bateko baserritarren bizimodua irudikatzen duten antzezpen saioak ere izango dira urriaren 10ean, 11n, 12an eta 17an, 10:45etatik aurrera, Urretxu-Zumarragako Karmakros antzerki taldearen eta Amaia Ruiz de Galarreta aktore tolosarraren eskutik.

Erronka Garbia helburu

Igartubeiti Baserri Museoak jasangarritasunaren aldeko apustuan lanean jarraitzen du, eta aurtengo Sagardo Astea Erronka Garbia ingurumenaren jasangarritasun planaren baliozkotzearekin egingo da. Horren harira, bisitariak garraioa publikoa erabiliz gerturatzeko kanpainak egin dituzte eta lehenengo aldiz, doako autobus zerbitzua jarriko dute Ezkioko industriagunetik museora. Ahalik eta hondakin gutxien sortzea ere izango da helburuetako bat eta uraren kontsumoa murrizteko eta kontrolatzeko ere hainbat neurri hartuko dituzte.

Korrikalariek irabazi diote bizikletariari Ezkioko apustua

Goierriko Hitza — 2026-10-03 13:48:43

Ezkion gaur eguerdian jokatu den bizikletariaren eta bi korrikalariren arteko lasterketa-desafioak bigarrenen alde erori da. Eneko Zabaleta eta Unai Alberdi gazteak korrika nagusitu zaizkio Felix Etxeberria txirrindulariari. Hirurek guztia eman dute Ezkioko igoeran, eta ederki eskertu diete ikuskizuna kunplitu izana bertaratu diren ikusle ugariek. Jende asko elkartu da Ezkioko kaskoko helmugan, eta errepidean zehar ere animoak jaso dituzte partaideek.

Hamabietan puntuan, elkarri bostekoa eman, eta bereko bidegurutzetik abiatu dira Felix Etxeberria eta Eneko Zabaleta. Profesionalen bizikletaren Etxeberria, Alex Aranburu ezkiotarrak utzi baitio entrenatzeko eta apusturako txirrindua, Movistarren ibili zen garaikoa. Kamiseta gorria eta Praga motzak jantzita Zabaleta. Kontzentratuta, hitz askorik egin gabe, hasteko gogoz.

Zabaleta suziria bezala atera da korrika. Tarte motzagoa egin du berak, 850 bat metro pasa, baina aldapa pikoena bere zatian zeukan. Lehen unetik aurretik jarri da korrikalarien bandoa, eta 3 minutu eta 38 segundoan iritsi da Zabaleta lagunari erreleboa ematera, Igartubeiti baserriaren parera. Hogei-bat segundo atzego ailegatu da Etxeberria pare hartara.

Alberdik ere hanka-joko airosoa eraman du. Denak ere apusturako ondo prestatu direla antzeman da. Igartubeititik Ezkioko helmuga-marrara beste 6:35 minutu behar izan ditu Alberdik, eta lehenengo iritsi da, txirrindulariaren aurretik. Guztira, bien denborak batuta, 10 minutu eta 8 segundoan igo dira Zabaleta eta Alberdi korrikalariak. Etxeberriak 11:45 minutuan osatu du bidea. Denek jaso dituzte ikusleen txalo eta oihu beroak. Cava botila bat zabaldu eta tragoxka batzuk eginez, elkarri bizkarretik helduta eta egindakoarekin pozik bukatu dute hirurek.

“Urte askoan bizikletan ibili gabe nengoen, 44 bat urte, baina egindakoarekin gustura nago. Igoera gogorra da, agian ez du ematen, baina barrenetik hasita dena aldapa da. Lehenengotik eutsi egin nahi nion, bizkor hasiz gero betetzeko arriskua neukalako. Eutsi diot, nola-hala. Nik 12 minututik jaitsi nahi nuen, eta konforme nago”, azaldu du Felix Etxeberria bizikletariak.

Korrikalarien bikotean, Zabaleta hasieratik guztiarekin irten da, esprint batean ia. “Hasieratik topera abiatu naiz, gehiegian igual”, aitortu du. Entrenamenduetako denborak eta erreferentziak pikutara joan zaizkio. Erreleboa eman ondoren, Alberdi ere “azkarregi” hasi da. “Gero erritmoa moteldu dut, bukaeran esprint txiki bat egiteko. Publikoaren babesarekin askoz errazago egiten da”, esan du Alberdik. Entrenamenduetako denbora hobetu dute korrikalariek ere: “Berez, 10:30 edo 10:40 inguruan ibili gara, eta espero baino hobeto egin dugu. Honelako egunetan entrenamenduetan baino gehiago ematen da”.

Herri Festa Ezkion

Ezkiotarrek Ezkioko kaskoan egun guztirako festa daukate gaur. Txirrindulari-korrikalarien desafioa ikusi ondoren –streaming bidez pantaila batean zuzenean jarraitu ahal izan dute Ezkion zeudenek igoera–, herri bazkaria egongo dute. 180 lagun elkartuko dira. Arratsaldean, musika izango dute.

Andoni Salamerok ‘Baserri-minez...’ ikuskizuna egingo du larunbatean Igartubeitin

Goierriko Hitza — 2026-10-01 08:00:12

Larunbatean Antioko musikaldiko bosgarren eta azken kontzertua izango da. Ohi bezala, azken saioa Ezkioko Igartubeiti baserrian izango da. Andoni Salamero olerkari zumarragarrak, Andoni Egañak, Mixel Ducauk eta Caroline Phillipsek Baserri-minez… ikuskizuna egingo dute. 25 urte pasa dira aldundiak Igartubeiti zaharberritu eta museo gisa ireki zuenetik eta urteurrena ospatzen ari dira. Salamerok ikuskizun hau prestatu du, Igartubeitiri eta baserriari omenaldi gisa.

Kontzertua 18:00etan hasiko da. Urteroko moduan, autobusa antolatu dute Igartubeitira joateko. 17:30ean abiatuko da Zumarragako Elizkaletik. Kontzertura joan nahi dutenek Igartubeitira deitu behar dute izena emateko: 943 72 29 78.

Larunbatekoa diziplina desberdinak (musika, poesia eta bertsoak) batuz egindako ikuskizuna da. Phillipsek zarrabetea joko du eta abestu egingo duk, Ducauk gitarra joko du eta abestu egingo du, Egañak bertsoak abestuko ditu eta Salamerok olerkiak errezitatuko ditu.

Salemerok ikuskizunaren nondik norakoaren berri eman du. «Baserria, beti ezagutu dugu landan bakarturik dagoen etxe gisa, baina bertan nekazaritza, abeltzaintza eta bestelako lan ugari egiteaz gain, bizimodu, filosofia zein pentsaera berezia eratu izan dute baserritarrek haren inguruan».

Bestalde, baserriak gune euskaldunak izan dira. «Baserria euskararen gordailu eta hainbat euskal ohituren adierazpide zuzen eta zintzo izan dugu».

Hori guztia dela eta, baserriaren inguruko ikuskizun bat egitea erabaki du. «Emanaldi honen bidez, bertso, musika eta poesiaz baliatuz, baserri minez gatoz, baserri gosez, baserriaren berri ematera. Une atsegintsu hori pasarazi nahi diogu ikus-entzuleari, aurten, Igartubeiti museoak 25 urte betetzen dituen honetan. Igartubeiti museoan hainbat ekintza egin dituzte 25 urte hauetan: bisitak, tailerrak, sagar zukua, sagardo txastaketa, gure ondarea ezagutarazi, Antioko musikaldian artista ezberdinen lana erakutsi…», gogoratu du.

Gonbidapena

Salamero, Egaña, Ducau eta Phillipsek Igartubeitiren ekarpena txalotu eta omendu nahi dute eta, horretarako, larunbatean aurkeztuko duten ikuskizuna prestatu dute. «Ekitaldi berezia izango da, eta baserri-minez gauden honetan, bertara gonbidatzen zaituztegu, baserriaren bizimodua emanaldi samur eta hurbil honetatik ere bizi dezazuen», amaitu du Salamerok.

Biharkoa Antioko musikaldiko azken kontzertua izango da. Irailaren 5ean Quatuor Arod hari laukoteak jo zuen, 12an Oñatiko Ganbara Abesbatzaren txanda izan zen, 19an Carles Blanch-ek eta Pedro Estevan-ek jo zuten eta joan zen larunbatean Kambrass Quintet boskoteak.

Beteranoa gazteen aurka

Goierriko Hitza — 2026-10-01 07:41:33

Ezkiotarrak festazaleak dira, eta kirolzaleak ere bai. Ez da gaurkoa herriko festa nagusiak eta kirol desafioak uztartzeko duten ohitura. Goiko auzoko San Migel festetan Izazpira igoera, bizikleta lasterketa edo pilota eskolako txapelketa egiten dituzte, eta beheko auzoko sanpedrotan 4×4 areto futbol lehiaketa ere antolatu dute aurten lehenengoz. Festa egun gutxi zituztela eta, orain urte batzuk Ezkioko Herri Festa antolatzeari ekin zioten urrian —Alex Aranbururi egin zioten ongi etorrian du sorburua—. Herri kirolak izan dira egun honen pizgarrietako bat, eta aurten, horien faltan, apustua egin dute Felix Etxeberria, Eneko Zabaleta eta Unai Alberdi herritarrek: ea nork lehenago igo Santa Lutzi eta Ezkioko kaskoa lotzen dituen 2,4 kilometroak. Larunbatean izango dira herri festa eta apustua (12:00). 500 euro daude jokoan.

Etxeberria bizikletan, Zabaleta eta Alberdi korrika. Beteranoa bi gazteren aurka. Maiatzaren 9an, San Isidro jaietan itxi zuten apustua, «goizeko ordu txikitan», kontatu du Etxeberriak. Bizikletarenak ez zuen berehalakoan konbentzitu, «56 urte ditut eta 14 urte nituenetik ez naiz bizikleta gainera igo», dio. Momentuan gehiegi pentsatu gabe eman zuen baiezkoa, baina ez dago damututa, «10 kilo kendu ditut eta osasunarentzako onuragarria izaten ari da entrenamendua». Uztailetik gogotsu dabil bere burua prestatzen.

Profesionalen bizikleta

Bizikletarik ez izanagatik, ez du edozein bizikletarekin entrenatu: «Alex Aranburuk utzitako batekin ibili naiz, profesionalena. Lehenengo bat utzi zidan eta pasa den astean beste bat ekarri dit, ona; Movistarren zegoenean ibilitakoa. Hala agindu zidan; apustua onartuz gero berak utziko zidala entrenatzeko bizikleta».

Zumarragatik joanda, Santa Lutzi auzoko sarreran dagoen biribilgunean hasiko dute apustua. Zabaletak Igartubeitiraino dauden 850 metroak egingo ditu aurrena, eta handik helmugara arteko 1,5 kilometroak Alberdik egingo ditu erreleboa hartuta. Etxeberriaren estrategia bere indarrak ondo dosifikatzea da, «badakit Zabaleta topera aterako dela eta hari segika ateratzen banaiz indarrik gabe geratuko naiz berehala», dio. 11 minutu eta erdiko denbora muga jarri dio bere buruari, «gazteek seguru gutxiago beharko dute, baina lanak emango dizkiet», ohartarazi du.

Gazteen erronka

Zabaletarentzat eta Alberdirentzat ere erronka bat da larunbateko desafioa. Zabaleta korrika ibiltzen zen orain urte batzuk, baina lesio baten ondorioz lehiatzeari utzi behar izan zion. Alberdi berriz, bizikletan ibili izan da, baina korrika behin ere ez. Bakoitza bere aldetik ari da larunbateko saioa prestatzen. «Nire kabuz nabil. Hasieran kilometro luzeagoak egin ditut, korrika ohitzeko eta azken egun hauetan serie motzagoak egiten nabil», esan du Alberdik. Etxeberria gogor entrenatzen ari dela jakitun, beraiek ere «gerra emateko prest» daudela adierazi du.

Apustuaren kontura giroa berotuta dago Ezkion, «saltsa handia dago», dio Alberdik. Desafioaren ondoren, herri bazkaria izango da. Dagoeneko 175 herritarrek eman dute izena, eta ondoren Dj Ostorekin dantzaldia. Festa ordu txikietara arte luzatuz gero, zeinek daki ez ote den beste erronkaren batekin amaituko eguna.

Igartubeitiren 25. Sagardo Astea aurkeztu dute gaur aldundian

Goierriko Hitza — 2026-09-30 11:37:25

Igartubeiti Baserri Museoaren 25. urteurrena ospatzen da aurten, eta beraz, Sagardo Astearen 25. aldia ere bai. Urriaren 7tik 17ra egingo dira Sagardo Asteko ekintzak. Baserriko prentsaketa zuzenean ikusi ahal izateko urteko aukera bakarra izaten da Sagardo Astea, sagar zukua egiteko urteko zita bakarra, hilabete batzuen buruan hartzitu eta sagardo bihurtuko dena.

Edizio honetako programazioa gaur aurkeztu dute Foru Jauregian, Goizane Alvarez Kultura diputatuak, Azahara Dominguez Mugikortasun eta Turismo diputatuak eta Kizkitza Ugarteburu Igartubeiti Baserri Museoko koordinatzaileak parte hartu duten prentsaurrekoan.

Goizane Alvarez Kultura diputatuak nabarmendu duenez, “Igartubeitiren 25. urteurrena ospatzea gure ondarea ulertzeko eta transmititzeko modu bat ere ospatzea da. Urte hauetan guztietan, baserriak jakin izan du gure historiaren funtsezko zati bat bizirik mantentzen eta belaunaldi berrietara hurbiltzen, esperientziatik, ezagutzatik eta parte hartzetik”.

Alvarezen esanetan, gainera, “Sagardo Asteak aukera ematen digu urtero baserriko kulturari eta sagardoaren elaborazioari lotutako keinu, soinu eta jakintzak berreskuratzeko, baina baita gaur egungo begirada batekin egiteko ere, ingurunea zainduz eta gure tradizioek etorkizuna izaten jarrai dezaten lan eginez”. Zentzu horretan, Erronka Garbia planaren baliozkotzea eta Igartubeitik jardueraren ingurumen inpaktua murrizteko egindako lana nabarmendu ditu.

Autobus zerbitzu bereziak

Bestalde, Mugikortasun eta Turismoko diputatu Azahara Dominguezek azaldu duenez, “funtsezkoa da sagardoaren kulturaren pedagogia egitea ahalbidetuko diguten era guztietako ekimenak babestea”. Horregatik, urte osoan Sagardoa Routek antolatzen dituen ekimenekin lankidetzan aritzeaz gain, urriaren 10, 11, 12 eta 17rako autobus zerbitzu berezia jarriko da Ezkioko Santa Lutzi geltokiaren eta Igartubeiti museoaren artean.

Sagardoa Routekin lankidetzan (Euskal Sagardoaren Ibilbidea), Sagardoaren Astearekin batera, programazio oparoa jarriko da bisitarien eskura urriaren 7tik 17ra, eta sagarraren prentsatzeaz gain, trikiti saioak eta antzerkia egongo dira, kirikoketa erakustaldiak eta erakusketak ikusi ahalko dira, eta Legazpiko Langileen Ibilbidea bisitatu ahal izango da. Urteurren berezi hau komunitatearekin ere ospatu nahi da, eta hala, urriaren 10ean eta 11n, larunbata eta igandea, festa berezia ere egingo dute Igartubeiti Baserri Museoaren eta Interpretazio Zentroaren inguruetan.

Izan ere, asteburu horretan, ospakizunak arratsaldean ere jarraituko du. Ohiko erakustaldiak amaituta, Igartubeiti Baserri Museoan, bi egunetan, bazkaltzeko aukera eskainiko da hala nahi duten bisitarientzat, eta bazkalostea trikitilariek girotuko dute. Bisitan izena eman dutenei zuzendutako eskaintza izango da, eta dagoeneko izena eman duten pertsonekin datozen egunetan jarriko da museoa harremanetan, informazio zehatza helarazi eta zerbitzua erreserbatu nahi duten galdetzeko.

Askotariko jarduerak

Urriak 10, 11, 12 eta 17ko sagar jotzetan kirikoketa talde bat izango da. Kirikoketa, sagarrak jotzean sortzen den erritmo soinua da. “Sagar joaleak”, Igartubeitik antolatutako eta Juan Mari Beltranek, euskal herriko musikaren ikertzaile, eragile eta irudi garrantzitsuenetakoak, eskainitako lantegi batzuetan sortutako taldeko partaide dira kirikoketa taldeko kideak.

Sagardo Asteak Igartubeiti baserrian bizi izandako pertsonaien bitartez baserria bera ezagutzeko aukera ere eskaintzen du. Hala, urriaren 10ean, 11n, 12an eta 17an, 10:45etatik aurrera, antzezpenak izango dira, Urretxu-Zumarragako Karmakros antzerki taldeak eta Amaia Ruiz de Galarreta aktore tolosarrak “Kortaberria familiak XVII. mende hasieran baserrian bizi izandakoa” antzeztuko baitute.

Urriaren 10ean, larunbatean, eguerdiko bazkal ordua girotzeko, Arandia anaiak trikitilarien saioa izango da eta urriaren 11n, igandean, Elustondo anai-arreba trikitilariak arituko dira. Gainera, urriaren 10ean eta 17an Legazpiko Langileen Ibilbidera bisita gidatua eskainiko da gazteleraz arratsaldeko 17:00etan.

Ingurumen jasangarritasuna

Jardueren programa:

Igartubeitiko dolarea martxan

Egunak: urriak 7, 8, 9,13, 14, 15 eta 16
Ordua: 11:30ean

Igartubeitiko dolarea martxan Kirikoketa erritmora

Egunak: urriak 10, 11, 12 eta 17
Ordua: 12:00etan

Antzezpenak baserrian

Egunak: urriak 10 eta 17.
Orduak: 10:45 gaztelaniaz, 11:15 euskaraz eta 11:40 gaztelaniaz.
Egunak: urriak 11 eta 12.
Orduak: 10:45 euskaraz, 11:15 gaztelaniaz eta 11:40 euskaraz

Bazkaria erosteko aukera

Egunak: urriak 10 eta 11

Trikitilariak:

Egunak: urriak 10 eta 11
Ordua: 15:00-16:00

Legazpiko Langileen Ibilbidera bisita gidatua

Urriak 10 eta 17, 17:00etan

Jardueretarako lekuak mugatuak dira eta aurrez izena eman behar da parte hartzeko.

Izen ematea: 943 72 29 78 / 72 51 07 telefonoetan edo igartubeiti@gipuzkoa.eus helbidean.

Haurrentzako gaztelekua berriz martxan, datorren astetik aurrera

Goierriko Hitza — 2026-09-25 12:36:47

Ezkioko gaztelekuan datorren irailaren 30ean emango diote hasiera ikasturte berriari. Gaztelekua udaletxeko eraikineko beheko solairuan kokatuta dago eta sei urte eta 12 urte arteko gazteei ematen die zerbitzua (2020tik aurrera jaiotakoak).

Ikasturtea hasi aurretik, irailaren 28an, astelehena, zerbitzua azaltzeko aurkezpena egingo dute gaztelekuan bertan, 18:00etan. Ondoren, ate irekiak izango dituzte bi astez, urriaren 5ean, 7an, 14an eta 18an zerbitzua ezagutu eta probatzeko.

Erabiltzaile izateko izen eman behar da, herriko whatsapp taldean Ezkioko Udalak zabaldu duen estekan.

‘Eskailerapekoa’ bakarrizketa ostiralean, Ezkioko udaletxean

Goierriko Hitza — 2026-09-23 13:04:13

Idoia Torregarai eta Mirari Martirenak Eskailerapekoa bakarrizketa egingo dute Ezkion, ostiralean, 19:00etan udaletxeko ganbaran. Zortzi urte darama bikoteak oholtza gainean elkarrekin bakarrizketak egiten eta oraingo honetan ere, eskailerapean ezkutatua dauden gaiak, bizipenak, kontatuko dituzte barrea eraginez.

Herri kirol saioko lehenengo entrenamendua ostiralean

Goierriko Hitza — 2026-09-09 12:53:08

Ostegunean da urriaren 3ko Herri Festako herri kirol saioan izena emateko azken eguna. Herritarren whatsapp taldean zabaldutako esteka baten bidez egin daiteke izen ematea. Parte hartuko dutenek, ostiralean dute lehenengo entrenamendua (19:00). Bestalde, Herri Eguneko bazkarirako txartelak irailaren 25era arte egongo dira eskuragarri udaletxean.

Yoga, Pilates eta Tai-Chi ikasturte berrirako proposamenak

Goierriko Hitza — 2026-09-04 12:17:46

Ezkioko Udalak Yoga, Pilates eta Tai-Chi ikastaroak antolatu ditu beste behin, ikasturte berrirako. Izen ematea dagoeneko irekita dago udaletxean.

Tai-Chi klaseak irailaren 11n hasiko dituzte (18:30-19:30, ostiraletan), Pilates irailaren 16an (18:30-19:30, asteazkenetan) eta Yoga urriaren 6an (18:00-19:30, asteartetan). Irailean ate irekiak izango dira interesa duten guztientzat.

Yoga klaseak hileko 35 euroko kostua izango du eta Pilates eta Tai-Chikoak 25na euro. Ezkioko Udaletik jakitera eman dutenez, hilero kobratuko da kuota baina kontratazioa 6 hilabetekoa izango da eta ez joateak ez du kuota ordaintzetik salbuesten.