Goierriko Hitza

Errigora sustraiak ahaztu gabe espaziora begira

Goierriko Hitza — 2026-10-24 17:40:58

Errigorak herri ekimenak hasierako boluntarioei omenaldia egin diete Lazkaon. Eguna hasteko Errigora sustraietatik espaziora dokumentala estreinatu dute Areria zineman. Jende asko hurbildu Euskal Herriko hainbat txokotatik, hori horrela zinema jendez bete da.

Dokumentalaren estreinaldiaren ondoren, Lazkaoko frontoira inguratu dira denak, hamaiketako egin ostean, omenaldi ekitaldia egiteko. Erramun Amundarain, hasierako boluntario izan zena eta lehengo urtean zendu zena, gogoratu dute bere argazki bat ipiniz oholtza gainean. Egunean zehar Kuxkuxtu txaranga urruñarra ere badabil giroa alaitzen. Behin omenaldia amaituta bazkaria egon da frontoiean bertan.

Omenaldiko argazkiak eta bideoa.

Jende ugari bildu da Gaintzako kirol probetan

Goierriko Hitza — 2026-09-27 18:21:23

Gaintzako San Migeletan eguraldia lagun izan dute goizeko kirol erronketarako. Lehenik, 11:30etan IV. Patin igoerako proba egin dute, eta jarraian, 12:00etan, 41. Txirrindu igoera klasikoa. Patinen igoeran lehen mutila eta neska Aitor Vacas eta Elaia Agirre izan dira. Txirrinduko proban 53 partaide izan dira. Aratz Amundarain azkarrena izan da, eta Garazi Garmendia nesketan gailendu da.

Arratsaldean, festak ez du etenik izan. 17:00etatik aurrera zirkuko tailerrean parte hartzeko aukera izan dute. Ondoren, 19:00etan, urteroko tradizioari helduz, mondeju dastaketa herrikoia egingo dute, arku tiroko erakustaldia ikusten duten bitartean. Egun osoan zehar Enaitz Alberdi eta Julen Rueda Erkizi trikitilariak dabiltza musika jotzen.

Argazkiak: Manex Usarralde

Gaintzako San Migel jaiak gaur hasiko dira

Goierriko Hitza — 2026-09-25 09:43:45

Gaintzako San Migel festak hasiko dira gaur, 19:00etan eta asteburuan zehar eta asteartean jai giroa izango da nagusi Goierriko herri garaienean.

Gaur txupinazoa, mozorrotuta, jaurtiz emango diete hasiera jaiei gaintzarrek. Ondoren, poteo girotua egongo da Unai Izagirre Attola eta Haritz Garmendia trikitilariekin herri kantu afarira arte. 21:00ean izango da. Lehen egunarekin amaitzeko Ahantzi erromeriak jarriko du gau giroa, 00:00etan hasita.

Asteburu betea
Larunbata izango da egitarau aldetik ekintza gehien egongo diren eguna. Haurren arteko jolasekin hasiko da eguneko jaia, 12:00etan. 16:30ean frontoiko puzgarriekin jarraituko dute. Patata tortilla lehiaketa 19:00etan izango da. Ondoren, 20:00etan, txakolin dastaketak eta pikoteoak emango diote jarraipena. Iluntzean, 21:00etan, Satur musikaria arituko da, eta Trikidantz erromeria 23:00etan.

Igandea bi kirol probekin hasiko da: 11:30ean, IV. Patin igoera egingo dute, eta 12:00etan 41. Txirrindu igoera. Arratsaldean, 17:00etan, zirku tailerra eskainiko da. Jaiarekin amaitzeko mondeju dastaketa egingo dute 19:00etan pilotalekuan. Gainera, arku tiroko erakustaldia ere egingo dute. Egun osoan zehar Enaitz Alberdi eta Julen Rueda Erkizi trikitilariak arituko dira musika jotzen.

Asteartean, San Migel egunean, berriro jai giroan itzuliko da. Egun osoan zehar Iker Sukia eta Aritz Markinez trikitilariak ibiliko dira herria alaitzen. Eguna mezarekin hasiko dute 12:30ean. Ondoren, bazkaria egingo dute Kale Txikin, 14:00etan. Azkenik, 18:00etan toka txapelketarekin amaituko dira aurtengo Gaintzako San Migelak.

Zaldibiako Zubiblok topaketa iruditan

Goierriko Hitza — 2026-06-28 19:34:56

Zaldibiako Gazte Festen barruan, Zubiblok topaketa jokatu zen atzo eguerdian Zaldibian, Amundarain errekako zubian.

Batzorde Kudeatzaile berria Gaintzan

Goierriko Hitza — 2026-06-24 09:27:30

Batzorde kudeatzaile berria ofizial egin zen Gaintzako udalean, apirilean. Bost gaintzarrek osatzen dute: Uxue Irastorza alkateak eta Joseba Matxain, Arantxa Begiristain, Sara Garmendia eta Larraitz Garmendia zinegotziek.

Udala desegin zen otsailean alkateak eta bi zinegotzik kargua utzi zutelako. Beste zinegotzi batek ere aurreko uztailean udal korporazioko kide izateari uko egin zion. Horrela, udal korporazioa osatzen zuten lau kidek kargua utzi zuten eta bat bakarrik gelditu zen, gaur alkate dena.

Hauteskunde-araubide Orokorrari jarraituz, 250 biztanletik beherako udalerrietan, korporazioko kideen izatezko kopurua legezko kopuruaren erdia baino txikiagoa denean, batzorde kudeatzaile bat eratu beharko da, karguan jarraitzen duten kideek eta herrialdeko diputazioak izendatutako beste pertsona batzuek osatuta.

Gipuzkoako Foru Aldundiak martxoaren 20ko Gipuzkoako Aldizkari Ofizialean argitaratu zuen Gaintzan eratu beharreko batzorde kudeatzaileko kideak izendatzeko deialdi publikoa. Besteak beste, adinez nagusi izatea, udalerrian behar adina errotuta egotea, eta 2023ko maiatzaren 28ko udal hauteskundeetan aurkeztu zen zerrendako hautagai edo karguari uko egindako ez izatea dira baldintzak.

Agintaldiko helburuak

2027ko maiatzaren 23an udal hauteskundeak izango dira. Hala ere, agintaldiak irauten duen denboran helburu batzuk dituztela zehaztu du Irastorzak: «Idazkariaren hitzarmena aldatu nahi dugu».

Une honetan Zaldibiarekin «partekatzen» dutela idazkaria azaldu du alkateak: «%9,80an daukagu guk eta Zaldibiak %90, 20an». Idazkaria «astean behin joaten dela hiru orduz» adierazi du Irastorzak: «Zaldibiak ere idazkari bat %100ean egotea nahi du eta guk ere gehiago nahi dugu». Horregatik, beraien lehentasuna «idazkaria ehuneko handiago batean» edukitzea izango da. Hori egin ahal izateko, ordea, Zaldibiako udalarekin daukaten hitzarmena «apurtu» behar dutela azaldu du alkateak. Baina horretarako herritarrez osaturiko batzordea behar zuten, eta ez diputazioko jendearekin osatutakoa.

Nahiz eta Zaldibiarekin hitzarmena eten, beste herri edo mankomunitate bateko idazkaria partekatu behar dutela aurreratu du Irastorzak: «Orain Abaltzisketarekin aukera daukagu idazkari bat behar den bezala edukitzeko». Alkateak udaletxe batean idazkariak duen «garrantzia» azpimarratu du: «Edozein baimen, diru-laguntza eskaera eta den-dena idazkariarengandik pasatu beharra dauka». Abaltzisketarekin saiatuko dira idazkaria beraiekin «%40-50» inguruan izatea hitzartzen. Modu horretan, idazkaria «egunero» izango luketelako.

Gaintzako GI-4371 errepidea astebetez itxiko dute

Goierriko Hitza — 2026-05-06 10:57:14

Gipuzkoako Foru Aldundiak konponketak egingo ditu GI-4371 errepidean, 0+595 KP parean, Gaintzan, galtzadan hondoratze puntual bat atzeman ondoren. Jardueraren helburua da segurtasun-baldintzak berrezartzea eta bidearen egonkortasuna bermatzea direla adierazi du aldundiak.

Lanak bermeekin egin ahal izateko, errepidea erabat moztu beharko dute bi noranzkoetan, eta eragindako zatia erabat itxita geratuko da zirkulaziorako.

Lanak egiteko aurreikusitako epea zazpi egunekoa da, eta, beraz, errepidea itxita egongo da gaurtik maiatzaren 14ra arte.

Aldi horretan, trafikoa barreiatuko udal-errepidetik desbideratuko da, eta, horri esker, zonaldeak komunikatuta jarraituko du.

II. Periazoka, arrakastatsua

Goierriko Hitza — 2026-04-25 15:42:24

Gaintzako Periazokako lantaldeak bilera izan du gaur, joan zen apirilaren 19an egindako II. Periazokaren balorazioa egiteko. Honela dio balorazio oharrak hitzez hitz:

“Apirilaren 19ko Periazokako bigarren ekitaldi arrakastatsuaren ondorenak aztertuta, gure hausnarketa eta erabakiak zuenganatu nahi ditugu.

Esan bezala bigarren ekitaldia ere jendetsua eta arrakastatsua izan da, giro bikainean ekitaldi guztiak arazorik gabe bete ahal izan genituelarik.

Guzti hau ez zen posible izango urtean zehar lanean aritu den Periazokako Lan Taldearen ekarpenik gabe, beraz ezer baino lehen eskerrak modu batera edo bestera bertan parte hartu duzuen herritarrei, Gaintzari urteroko egutegian egun eder bat eskaintzeagatik.

Horrez gain, herritarren parte hartzea ere azpimarratzekoa da, auzolanaren bitartez ezinezkoa dirudiena egingarri eta atsegina bihurtzen dugulako.

28 ekoizle eta artisau izan dira gure artean, iaz baino zapi gehiago, eta iazkoan bezala, denek azpimarratu digute antolakuntza maila eta izan dituzten salmenten kopurua. Oso gustura geratzeaz gain, datorren urterako plaza eskatzen geratu dira denak.

Egitasmoaren balorazio onarekin batera, gure lan egiteko eran helburutzat hartu dugu hasieratik ekimenaren autofinantzaketa, eta bazkaria prestatzen eta mokadutxoak banatzen egindako lanari esker lortu dugula esatera gatoz. Ondorioz, Udalean aurkeztu genuen diru eskaeraren beharrik ez dugula izango jakinarazten dizuegu, 2.000 eurotik gorako aurrekontua estaltzea lortu dugunez, egun borobila pasatzeaz gain, inolako kosturik gabe atera da.

Auzolan honetan ere Udalak izan duen parte hartzea eskertuz eta hurrengoetarako ere denen elkarlana izango dugulakoan, datorren urtekoari begira jartze gara. Mila esker denoi”.

II. Periazoka egin dute Gaintzan

Goierriko Hitza — 2026-04-19 14:46:28

Iazko arrakastaren ondoren, II. Periazoka egin dute Gaintzako plazan, 10:30etik 14:00etara. Guztira 28 ekoizle eta artisau egon dira euren produktuak erakusten eta eskaintzen.

Postuez gain, Asier Gozategik, Tolosako hainbat trikiti lagunekin batera, eguna girotu du. Ondoren, 14:00etan bazkaria egin dute, eta bazkalostean, Aitor Atxegak eta Imanol Kamiok eman diote jarraipena goizeko giro apartari.

Eguraldia lagun, jende andana gerturatu da Gaintzara.

Gaintzako batzorde kudeatzaileko kide berriak izendatu dituzte

Goierriko Hitza — 2026-04-16 11:24:39

Gaintzako Udaleko kudeaketa batzordeko kide berriak izendatu ditu Foru Aldundiak, asteartean, hilaren 14an egin zuen bilkuran. Batzorde Kudeatzaileko kide berriak Maria Arantzazu Begiristain Lasa, Larraitz Garmendia Altuna, Sara Garmendia Alustiza eta Joseba Matxain Blasco izango dira.

2026ko otsailaren 25eko Gaintzako Udaleko Osoko Bilkuran lau kideetatik hiruk uko egin zieten beren karguei: bi zinegotzik eta alkateak. Hori horrela, eta kontuan izanda 2025eko uztailean laugarren kide batek ere uko egin ziola, zinegotzi bakarrarekin gelditzen zen korporazioa. Horregatik, udalerriko gobernua eta administrazioa bere gain hartuko zituen batzorde kudeatzailea eratzeko eskatu zion udal idazkariak Foru Aldundiari.

II. Periazoka igandean Gaintzan

Goierriko Hitza — 2026-04-15 12:17:30

Periazoka egingo dute bigarren urtez jarraian Gaintzako plazan, igandean, apirilaren 19an, 10:30etik 14:00etara. 28 ekoizle eta artisau egongo dira Periazokan euren produktuak erakusten eta eskaintzen. Aurreko urtean 21 postu izan ziren, aurten baino zazpi gutxiago. Ekintza osagarriak ere izango dira. Eguerdi aldera Asier Gozategi bere Tolosako hainbat trikiti lagunekin eguna girotzen arituko dira.

Herri bazkaria ere izango da herritarrentzat nahiz bisitarientzat, 14:00etan. Aitor Atxegak eta Imanol Kamiok bazkalostea girotuko dute, eta denen artean kantatzeko emanaldia eskainiko dute. Bazkariko txartelak eskuratzeko epea atzo bukatu zen.

Ana Otegi Periazokako koordinatzailearen esanetan, «herriari poz pixka bat emateko», eta inguruko herrietako jendea «Gaintza ezagutzera erakartzeko» helburua du Periazokak: «Urte osoan zehar ez dago inongo ekintzarik, eta aurreko urtean zerbait egin behar genuela erabaki genuen».

Lehengo urteko «emaitzarekin» oso gustura gelditu zirela azaldu du antolatzaileak, jende asko joan zelako. Horrek, aurten errepikatzeko indarra eman die. Otegik dio badakitela Realaren Kopako finalak dela eta datarik onenak ez dela jende asko kanpoan egongo baita. Hala ere, hemen gelditzen den jendeari Gaintzara gerturatzeko gonbita luzatu die.

Garraio zerbitzua
Garraio arazoak saihesteko Ordiziako geltokitik autobus zerbitzu berezia antolatu da. Irteerak 11:00etan, 11:50ean, 12:25ean eta 13:00etan izango dira. Itzulerakoak, berriz, 14:00etan, 14:35ean, 17:15ean eta 17:50ean. Autobusek geldiuneak egingo dituzte bidean: Ordiziako Otegi-Enean eta Zaldibiako Biloren.

Aste honetan, 24. Korrikaren bost aurkezpen gehiago

Goierriko Hitza — 2026-01-19 17:40:24

AEK-k 24. Korrika aurkezteko eta batzordeak sortzeko bilerak egiten jarraitzen du. Aste honetan, beste bost izango dira: bihar, 18:00etan, Zaldibiako udaletxean, Zaldibia-Gaintzari dagokiona, eta 19:00etan, Ordiziako Barrenan; asteazkenean, Legorretako udaletxean, 18:00etan eta 19:00etan, Ataungo udaletxean; eta ostegunean, Zegamako Gaztelekuan, 18:30ean.

Txindoki Kilometro Bertikalaren laburpena 'Helmuga' saioan

Goierriko Hitza — 2025-06-03 10:40:15

Aitor Ugarte aramaioarrak eta Onditz Iturbe igorreztarrak irabazi zuten maiatzaren 17an jokatu zen Txindoki Kilometro Bertikala. Euskal Herriko txapelketa ere jokatu zen proba berean. Lotura honetan ikus daiteke EITBko Helmuga kirol saioak egindako laburpena.

Euskaraldiko txapak bihartik aurrera Ataun, Lazkao, Zaldibia eta Gaintzan

Goierriko Hitza — 2025-05-08 15:55:47

Euskaraldia maiatzaren 15etik 25era da. Ekimenean izena eman dutenek txapak jaso ditzakete bihartik aurrera Goierriko zenbait herritan: Zaldibian, bihar banatuko dira, 19:00etan plazan; Lazkaon, berriz, bi banaketa-saio egingo dituzte, bata bihar 18:00etatik 20:00etara bitartean plazan, eta bestea, etzi, 11:00etatik 13:00etara plazan baita ere; Ataunen, astelehenean jarri zituzten eskuragai eta datorren maiatzaren 15era arte egongo dira astelehenetik ostiralera 9:00etatik 14:00etara udaletxean eta 17:00etatik 19:00etara liburutegian. Bihar ere egongo dira eskuragai 19:00etan San Martingo plazan.

Gaintzan larunbatean

Gaintzan, berriz, larunbaterako egin dute hitzordua; 12:00etan hurbildu beharko dira herritarrak plazara.

‘Gaintza Egiten’ prozesuaren lehen bilera, igandean

Goierriko Hitza — 2025-01-16 11:01:38

Gaintza Egiten parte-hartze prozesuaren lehen bilera egingo dute igandean, 10:00etatik 12:00etara, udaletxean. Legealdiaren balantzea, Ertotxe erosteko proposamena, aurrekontuak eta Larraitz edo Ibiurrera oinezko bideak eraikitzeko proposamenak landuko dituzte, besteak beste. Herritarrei bertaratzeko deia egin die udalak.

Gaintzan ostiralean ospatuko dute San Martin, afari batekin

Goierriko Hitza — 2024-11-06 11:24:05

Gaintzako Onbide elkarteak San Martin ospatzeko herri afari-merienda antolatu du, ostiralerako. Azaroaren 8an, 20:30ean elkartuko dira soziedadean. Hirugiharra, txorizoa eta gaztaina erreak jarriko dituzte. Helduek 10 euro eta 12 urte arteko haurrek 5 ordaindu behar dute. Izena emateko azkeneko eguna gaurkoa da.

Korrontzi taldeak Gaintzan kontzertua egingo du zapatuan

Goierriko Hitza — 2024-10-24 16:15:31

Agus Barandiaranek gidatutako Korrontzi folk taldeak Gaintzan kontzertua egingo du, larunbat honetan, 19:00etan hasita. Sarrerak lekuan bertan salduko dituzte, helduarena 5 euroan eta haurrarena 2 euroan. Mundu guztian dabil Korrontzi; urri hasieran Gwuangjun (Hego Korea) izan zen, eta Argentinara eta Marokora joatekoak dira gero.

Gaintzako udaletxea itxita egongo da abuztuaren 8tik 23ra

Goierriko Hitza — 2024-08-06 11:11:48

Gaintzako Udalaren bulegoak itxita egongo dira bi astez. Udal langileek oporrak hartuko dituzte, eta udaletxea itxiko dute abuztuaren 8tik 23ra.

Gaintzako udaletxea.

Gaintzan ardi larruak bide alboan utzi dituztela berriro salatu dute

Goierriko Hitza — 2024-05-03 12:04:42

Ardi larruak azaldu dira Gaintzarako GI- 3371 errepide bazterrean botata, bigarren kilometro inguruan. «Zaku mordoxka» bat utzi ditu norbaitek, Gaintzako Udalak salatu duenez. Ez da lehenengo aldia, iaz ere antzera agertu baitziren.

Udalak gogorarazi du artilea jasotzeko araudi bat dagoela, eta egun hondakin tratamendua duen produktutzat hartzen denez, ezin da edozein moduz utzi. Gaintzan iaztik hasi ziren «portaera desegokiak» sumatzen: «Artilea udazkenera arte gorde eta dagokion tasa ordaintzea saihestuz, artaldea moztu eta berehala Gaintzako errepide bazterrean zakuak botata utzi zituzten. Aurten ere bide berdinetik jo du artalde jaberen batek».

Elkarbizitza arauak
Udalak foru aldundira ere eraman du afera; egilea identifikatu eta dagozkion kalte-ordainak ordaintzera behartuko duen prozedura abian jarri du aldundiak.

Elkarbizitza arauak betetzeko, eta guztienak diren inguruak eta artzainen izen ona ez zikintzeko eskatu dio zakuak han utzi dituenari, aldi berean, udalak.

Gaintzan bertso afaria egingo dute ostiralean

Goierriko Hitza — 2023-11-07 10:59:40

On Bide elkartean bertso afaria izango da, ostiralean, San Martin ospatzeko. Afaria 20:30ean hasiko da. Helduek 15 euro eta haurrek 7 ordaindu behar dute. Menuan, hirugiharrea, txorizoa eta gaztainak izango dira. Izena emateko azken eguna azaroaren 8a, asteazkena, da.

Afal ondoren, Maddi Aiestaran beasaindarra eta Aratz Igartzabal gabiriarra ariko dira bertsotan.

On Bide elkartea, Gaintzan. /Aimar Maiz