Goierriko Hitza

Txistu doinuekin hasi dituzte Santikutzak Legazpin

Goierriko Hitza — 2026-04-30 20:02:51

Hasi dira Santikutz jaiak. Jendetza bildu da arratsaldean herriko plazan, aurtengo festei hasiera emateko. Aurten Goiz Deia txistulari bandari egokitu zaio udaletxeko balkoitik pregoia egitea, txistu doinuaz lagunduta ondoren. Ondorengo txupinazoarekin lehertu da festa, eta kalean izan du segida jai giroak, erraldoi eta buruhandien ohiko kalejirarekin.

Txupinazo ofizialaren aurretik, gazteek ere egin dute jaiak hasteko ekitaldia Gaztetxean. Suziria bota ondoren, kalejiran jaitsi dira erdialdeko kaleetara.

Jaietako lehen txanpa igandera arte da, eta hurrengo asteburuan Kapela dantzarekin eta Mirandaola egunarekin amaituko dira.

Honela eman diete hasiera txistulariek aurtengo jaiei, Maider Apaolaza eta Iker Azpeitiaren hitzetan:

Arratsaldeon Legazpi!!

Ohituago gaude mikroa beharrean eskuan txistua edukitzera, baina herriko jaien hasiera iragartzeko aukera ez da urtero izaten eta aprobetxatu behar.

Jaiak gaur hasiko ditugun arren, errodajea egina ekartzen dugu batzuk, pasa den astean, beste urte batez, Korosti dantza taldeak antolatzen zuen Oin Puntetan asteburuan parte hartu genuelako. Horretaz gain, lehen aldiz, Gaztetxeak Gazte Festak antolatu zituen. Blusak soinean ekintza guztiek izan zuten arrera ikusita, ziur gaude datozen urteetan ere ekimen honekin jarraituko dutela, bejondeiela!!!

Bueno, eta aurten zer? Ba aurtengorako ere egitarau oparoa prestatu dute bai jai batzordeak, baita Txo!Esnako kideek ere. Txistulariak, urtero bezala egitarau horretako hainbat ekintzetan izango gara; kalejiretan, Olaria eta Ezpata dantza ekitaldian edo datorren astean ospatuko diren Kapela dantza edo Mirandaola egunean adibidez.

Hala ere egitarauak gutxi balio du herritarren parte hartzerik gabe. Bete dezagun Plaza, bete dezagun Azoka eta nola ez, bete ditzagun kaleak. Herritarrok gara festa guztien arima eta muina. Herritarrik gabe ez dago festarik, herritarrik gabe ez dago girorik. Egun zoragarri batzuk ditugu aurretik. Kanta dezagun, dantza dezagun, parte hartu dezagun eta nola ez, ondo pasa eta goza dezagun!!

Ondo pasa dezagun, ondo pasatzen utziz….

Ondo pasa dezagun ondoan daukaguna errespetatuz…

Ondo pasa dezagun, pasatu gabe….bueno…. sobre la martxa….

Bilakatu ditzagun kaleak espazio seguru eta eroso bat guztiontzat eta ospa ditzagun jaiak pozez, arduraz eta elkar zainduz.
Azken finean, bakoitzak bere nota eman dezala guztion artean musika eta armonia sortuz.

Eta gehiegi luzatu gabe mikroa utzi eta txistua hartuko dugu, erraldoiekin batera jaiei bals batekin hasiera emateko. Erraldoiak prest?

Ba besterik gabe, ondo pasa jaiak eta…

GORA LEGAZPI!

GORA SANTIKUTZAK!

GORA EUSKADI TXISTULARI!

II. Periazoka, arrakastatsua

Goierriko Hitza — 2026-04-25 15:42:24

Gaintzako Periazokako lantaldeak bilera izan du gaur, joan zen apirilaren 19an egindako II. Periazokaren balorazioa egiteko. Honela dio balorazio oharrak hitzez hitz:

“Apirilaren 19ko Periazokako bigarren ekitaldi arrakastatsuaren ondorenak aztertuta, gure hausnarketa eta erabakiak zuenganatu nahi ditugu.

Esan bezala bigarren ekitaldia ere jendetsua eta arrakastatsua izan da, giro bikainean ekitaldi guztiak arazorik gabe bete ahal izan genituelarik.

Guzti hau ez zen posible izango urtean zehar lanean aritu den Periazokako Lan Taldearen ekarpenik gabe, beraz ezer baino lehen eskerrak modu batera edo bestera bertan parte hartu duzuen herritarrei, Gaintzari urteroko egutegian egun eder bat eskaintzeagatik.

Horrez gain, herritarren parte hartzea ere azpimarratzekoa da, auzolanaren bitartez ezinezkoa dirudiena egingarri eta atsegina bihurtzen dugulako.

28 ekoizle eta artisau izan dira gure artean, iaz baino zapi gehiago, eta iazkoan bezala, denek azpimarratu digute antolakuntza maila eta izan dituzten salmenten kopurua. Oso gustura geratzeaz gain, datorren urterako plaza eskatzen geratu dira denak.

Egitasmoaren balorazio onarekin batera, gure lan egiteko eran helburutzat hartu dugu hasieratik ekimenaren autofinantzaketa, eta bazkaria prestatzen eta mokadutxoak banatzen egindako lanari esker lortu dugula esatera gatoz. Ondorioz, Udalean aurkeztu genuen diru eskaeraren beharrik ez dugula izango jakinarazten dizuegu, 2.000 eurotik gorako aurrekontua estaltzea lortu dugunez, egun borobila pasatzeaz gain, inolako kosturik gabe atera da.

Auzolan honetan ere Udalak izan duen parte hartzea eskertuz eta hurrengoetarako ere denen elkarlana izango dugulakoan, datorren urtekoari begira jartze gara. Mila esker denoi”.

II. Periazoka egin dute Gaintzan

Goierriko Hitza — 2026-04-19 14:46:28

Iazko arrakastaren ondoren, II. Periazoka egin dute Gaintzako plazan, 10:30etik 14:00etara. Guztira 28 ekoizle eta artisau egon dira euren produktuak erakusten eta eskaintzen.

Postuez gain, Asier Gozategik, Tolosako hainbat trikiti lagunekin batera, eguna girotu du. Ondoren, 14:00etan bazkaria egin dute, eta bazkalostean, Aitor Atxegak eta Imanol Kamiok eman diote jarraipena goizeko giro apartari.

Eguraldia lagun, jende andana gerturatu da Gaintzara.

Gaintzako batzorde kudeatzaileko kide berriak izendatu dituzte

Goierriko Hitza — 2026-04-16 11:24:39

Gaintzako Udaleko kudeaketa batzordeko kide berriak izendatu ditu Foru Aldundiak, asteartean, hilaren 14an egin zuen bilkuran. Batzorde Kudeatzaileko kide berriak Maria Arantzazu Begiristain Lasa, Larraitz Garmendia Altuna, Sara Garmendia Alustiza eta Joseba Matxain Blasco izango dira.

2026ko otsailaren 25eko Gaintzako Udaleko Osoko Bilkuran lau kideetatik hiruk uko egin zieten beren karguei: bi zinegotzik eta alkateak. Hori horrela, eta kontuan izanda 2025eko uztailean laugarren kide batek ere uko egin ziola, zinegotzi bakarrarekin gelditzen zen korporazioa. Horregatik, udalerriko gobernua eta administrazioa bere gain hartuko zituen batzorde kudeatzailea eratzeko eskatu zion udal idazkariak Foru Aldundiari.

II. Periazoka igandean Gaintzan

Goierriko Hitza — 2026-04-15 12:17:30

Periazoka egingo dute bigarren urtez jarraian Gaintzako plazan, igandean, apirilaren 19an, 10:30etik 14:00etara. 28 ekoizle eta artisau egongo dira Periazokan euren produktuak erakusten eta eskaintzen. Aurreko urtean 21 postu izan ziren, aurten baino zazpi gutxiago. Ekintza osagarriak ere izango dira. Eguerdi aldera Asier Gozategi bere Tolosako hainbat trikiti lagunekin eguna girotzen arituko dira.

Herri bazkaria ere izango da herritarrentzat nahiz bisitarientzat, 14:00etan. Aitor Atxegak eta Imanol Kamiok bazkalostea girotuko dute, eta denen artean kantatzeko emanaldia eskainiko dute. Bazkariko txartelak eskuratzeko epea atzo bukatu zen.

Ana Otegi Periazokako koordinatzailearen esanetan, «herriari poz pixka bat emateko», eta inguruko herrietako jendea «Gaintza ezagutzera erakartzeko» helburua du Periazokak: «Urte osoan zehar ez dago inongo ekintzarik, eta aurreko urtean zerbait egin behar genuela erabaki genuen».

Lehengo urteko «emaitzarekin» oso gustura gelditu zirela azaldu du antolatzaileak, jende asko joan zelako. Horrek, aurten errepikatzeko indarra eman die. Otegik dio badakitela Realaren Kopako finalak dela eta datarik onenak ez dela jende asko kanpoan egongo baita. Hala ere, hemen gelditzen den jendeari Gaintzara gerturatzeko gonbita luzatu die.

Garraio zerbitzua
Garraio arazoak saihesteko Ordiziako geltokitik autobus zerbitzu berezia antolatu da. Irteerak 11:00etan, 11:50ean, 12:25ean eta 13:00etan izango dira. Itzulerakoak, berriz, 14:00etan, 14:35ean, 17:15ean eta 17:50ean. Autobusek geldiuneak egingo dituzte bidean: Ordiziako Otegi-Enean eta Zaldibiako Biloren.

Gaintzako II. Periazoka, apirilaren 19an

Goierriko Hitza — 2026-03-30 17:58:26

Bigarren Periazoka apirilaren 19an egingo dutela jakinarazteko, agerraldia egin zuten atzo antolakuntza taldeko hainbat kidek Gaintzan. 28 ekoizlek eta artisauk parte hartuko dute; iaz baino sei gehiagok.

Hamaiketakoa eskaintzeaz gain, herritarrentzat zein bisitarientzat bazkaria antolatu dute, helduentzako 20 euroan eta haurrentzako 8 euroan. Helduentzako entsalada, haragi gisatua eta mamia izango dira eta haurrentzako, pasta eta solomoa. Txartelak udaletxean eta Kale Txiki tabernan eskuratu daitezke.

Autobus zerbitzua

Apirilaren 19an Gaintzara joateko Lurraldebuseko autobus bereziak izango dira,

Ordiziaiko Renfe geltokitik 11:15, 11:30, 12:00 eta 12:25ean abiatuko da autobusa eta geldialdiak egingo ditu Otegienean eta Zaldibian Biloren.

Itzulera autobusak 14:00, 14:35, 17:15 eta 17:50ean izango dira.

Alkateak eta bi zinegotzik kargua utzita, Gaintzako Udala desegin da

Goierriko Hitza — 2026-03-26 12:00:39

Otsailaren 23ko Gaintzako Udaleko osoko bilkuran, udal korporazioa osatzen zuten lau kideetatik hiruk uko egin zieten euren karguei; alkateak eta bi zinegotzik. 2025eko uztaileko osoko bilkuran beste zinegotzi batek ere kargua utzia zuenez, zinegotzi bakarrarekin gelditu zen udal korporazioa.

Kargua utzi duen Jon Gorrotxategi alkate ohiaren esanetan, egoera horren aurrean, «foru aldundiari komunikatu zitzaion egoera, udala deseginda geratu zelako. Ondorioz, gestora bat izendatzeko prozesua ireki zuen aldundiak».

Batzorde kudeatzailea
Hauteskunde-araubide Orokorrari jarraituz, 250 biztanletik beherako udalerrietan, korporazioko kideen izatezko kopurua legezko kopuruaren erdia baino txikiagoa denean, batzorde kudeatzaile bat eratu beharko da, karguan jarraitzen duten kideek eta herrialdeko diputazioak izendatutako beste pertsona batzuek osatuta.

Gipuzkoako Foru Aldundiak martxoaren 20ko Gipuzkoako Aldizkari Ofizialean argitaratu du Gaintzan eratu beharreko batzorde kudeatzaileko kideak izendatzeko deialdi publikoa. Besteak beste, adinez nagusi izatea, udalerrian behar adina errotuta egotea, eta 2023ko maiatzaren 28ko udal hauteskundeetan aurkeztu zen zerrendako hautagai edo karguari uko egindako ez izatea dira baldintzak.

Gorrotxategik aurreratu duenez, «bilera pare bat egin dira herrian. Eta nik dakidan arte, ez dakit dagoeneko ofiziala den ala ez, baina gestora horretarako bost herritar badaude. Horrekin suposatzen da, hasiko dela udalaren funtzionamendua, normaltasun batez».

Kasu horretan, lau herritarrek eta dimititu gabe geratu den zinegotziak [Uxue Irastorza] «agintaldiaren amaierara arte jarraituko dute, eta aurreko korporazioak zeukan konpetentzia maila berdina izango dute».

Dimisioaren arrazoiak
Dimisioaren arrazoiez galdetuta, «nik nirea eman dezaket», dio Gorrotxategik: «Duela urtebetetik, lau pertsonako talde bat izan da egoera hau behartzen aritu dena. Gainera, horrela esan da. Ez dakigu zein desadostasun tarteko, ez inork ez du arrazoi bat adierazi. Nire ustez ezikusi pertsonalak edozein arrazoien gainetik jarri dira. Baina bistan dena da, eta beraiek esan dutena izan da, nahi zutela udala desegin eta gestora bat izendatzea. Helburu horrekin egon da talde bat, herrian egon diren dinamiketan hori eragiten, eta azkenean lortu dute».

Castro-Urkiolak irabazi dute Goierri rallyesprinta

Goierriko Hitza — 2026-03-15 10:00:47

Goierri Rallyesprintaren hamargarren aldia Aingeru Castrok eta Alaitz Urkiolak irabazi zuten, larunbatean. Bigarren postuan Xabier Lujua eta Jesus Estrada gelditu ziren, eta Aitzol Apalantza-Arale Agirre hirugarrenak izan ziren. Euriak errepideko baldintzak asko txartu zituen. Lazkaoko Kilometroei laguntzeko asmoz egin da aurtengo rallyesprinta.

Lasterketako ibilbideak Lazkaomendi, Zaldibia eta Gaintza zeharkatu zituen. Goierri Rallyesprinteko erlojupeko bakoitzak irabazle desberdin bat izan zuen, denera lau izan ziren. Goizeko bi txandak Gaintzatik Lazkaomendirako noranzkoan izan ziren, eta arratsaldean Lazkaomenditik Gaintzara.

Lehenengoan, Gorka Idigoras eta Nerea Campos Peugeot 208 autoan izan ziren lehiakide azkarrenak. Bigarren txanda Alberto Marcos-Garazi Beitiak BMW M3 kotxearekin irabazi zuten. Hirugarrenean, Aingeru Castro eta Alaitz Urkiola nagusitu ziren BMW M3arekin. Laugarren txandan Aitzol Apalantzak eta Arale Agirrek egin zuten denborarik onena, horiek ere BMW M3 ibilgailuarekin. Lujua eta Estradak Alpine A110 autoarekin lortu zuten bigarren postua.

Lazkaoko plazako sari banaketan 2.000 euro banatu ziren hoberenen sailkatutako pilotu eta kopilotuen artean.

Erregularitate modalitatean
Irabazle gehiago ere izan ziren. Ricardo Perez de Vega eta Jesus Maria Landa izan ziren irabazleak erregularitatekoen artean, Audi Coupe GT autoarekin. Sergio Camarak eta Emilio Pascualek Peugeot 205arekin bigarren postua lortu zuten, eta Iñigo Cobelo-Aratz Etxebarria izan ziren hirugarrenak, Renault 5 GT ibilgailuan.

Erregularitateko lasterketetan ez du erlojupeko azkarrenak irabazten; antolakuntzak ibilbidean zehar ezarritako bataz besteko abiadura bat mantentzea duenak baizik. Modalitate horretan kotxe zaharrak ateratzen dira, 25 urte baino gehiagokoak.

Goierri Rallyesprintaren 10. edizioa abiatzeko prest

Goierriko Hitza — 2026-03-12 13:13:37

Hamargarrenez Goirri Rallyesprinta antolatu dute. Ibilbideak Lazkaomendi, Zaldibia eta Gaintza zeharkatuko ditu. Eneko Nazabal, Zaldibiako rally gidariak eta antolakuntzako kideak adierazi duenez 72 autok parte-hartuko dute, hamar edizioetako gehiena.

Hemezortzi pilotu eta kopilotu goierritar aterako dira, eta horien artean lau emakume daude: Lucia Duran eta Itxaro Estanga zaldibiarrak, Maier Altuna ordiziarra eta Alazne Goena Lazkaomendikoa. Rally gidariak zaldibiarren partaidetza handia aipatu du: “Sei zaldibiar aterako gara: Gaizka Mendizabal, Aimar Etxeberria, Itxaro Estanga, Lucia Duran, Ekhi Mendizabal eta ni neu”.

Bihar, autoen egiaztapenak egingo dituzte, Lazkaon. Lasterketa, berriz, larunbatean izango da, eta 10:00etan hasiko da.

Elkartasun lasterketa
Nazabalek adierazi du, rallyesprinta egin duten 10 alditan, beti, elkartasun lasterketa izan dela: “Aurten lortzen ditugun irabaziak Lazkaoko ikastolari emango dizkiogu Kilometroak antolatzen laguntze asmoz”.

“Sei zaldibiar aterako gara: Gaizka Mendizabal, Aimar Etxeberria, Itxaro Estanga, Lucia Duran, Ekhi Mendizabal eta ni neu”

“Aurten lortzen ditugun irabaziak Lazkaoko ikastolari emango dizkiogu, Kilometroak antolatzen laguntze asmoz”

Eneko Nazabal, Goierri Rallyesprinteko antolakuntzako kidea eta partaidea

Ikastolak boluntarioak bilatzen lagundu die. Antolakuntzako kidearen hitzetan, “horrelako ekimenetarako boluntario jendea bilatzea zaila izaten da”.

Zaldibian bideak itxita
Goierri Rallyesprinta Zaldibiatik igarotzen denez herrian hainbat aldaketa eta bide itxiera eragingo ditu. Lasterketan lau aldiz pasako dira autoak Zaldibiatik: Lehena, 9:30etik 11:10era. Bigarrena, 11:30-13:10. Hirugarrena, 14:30etik 16:10era. Eta azkena, 16:30-18:10. Baita ere, Nañarri eta Ibai-Ondo etxebizitza blokeen artean ezingo da aparkatu martxoaren 13 iluntzetik. Lasterketa ibilbidean zehar bizi direnek antolakuntzarekin hitzartuko dituzte sarrerak eta irteerak, 688642894 zenbakira deituta.

Zaldibiako Udalak trafiko antolaketan egongo diren aldaketak azpimarratu ditu. Santa Fe kalearen noranzkoa aldatuko dute, eskolako aparkalekutik eta Mariaundiñetik behera daude aparkalekuetatik ateratzeko. Egun horretan ezingo da Mediku-etxetik plazara sartu. Artxanberri kaleko noranzkoa aldatuko dute Estankoko bidegurutzetik aurrera, garajeetara uneoro sarrera-irteera bermatzeko.

Garraio publikoari dagokionez GO01 lineako autobusa Biloreko geltokira iritsiko da, bidaiariak bertan hartuz eta utziz.

Iaz baino aurrekontu handiagoa izatea aurreikusten du Gaintzak

Goierriko Hitza — 2026-01-21 15:37:52

Behin behieneko izaerarekin onartu da oraingoz Gaintzako Udalaren 2026rako aurrekontua, urtarrilaren 17an burututako ‘Gaintza Egiten’ parte-hartze prozesuan herritarrek onartu ondoren. Hala ere, zirriborroa izaten jarraitzen du oraindik, eta datorren otsailean egingo den Osoko Bilkuran hartu beharko dute aurrekontuen inguruko behin betiko erabakia. Printzipioz, 523.400,00 euroko kopurua izango dutela aurreikusi da urte berri honetarako, iazko aurrekontua 25.000 euroan hazita. UFFF foru finantziazio funtsaren igoerak zein ekainean izandako euriteen kalteei aurre egiteko bideraturiko dirulaguntzek ahalbidetuko dute hazkunde hori. Inbertsioetarako, berriz, 205.895,00 euro inguru bideratzea aurreikusten da.

Esku artean proiektu ezberdinak izan ditu orain arte Gaintzako Udalak, eta horietako batzuei forma ematen ari bada ere, atzera bota dituzte beste batzuk, hala nola udaletxeko eraikina etxebizitzetara birgaitzearen proiektua; iragan parte-hartze prozesuan herritarren gehiengoak ekimenari ezezkoa eman ostean, proiektua bertan behera utzi dutela azaldu du udal gobernuak.

Funtsezko inbertsioak
Ertotxe etxearen erosketarekin, bestalde, aurrera jarraitzen du udal gobernuak, eta erosketa gauzatu duen hitzarmena sinatu dute dagoeneko; azken ordainketa egiterakoan sinatuko dituzte eskriturak, eta horregatik, horretara bideratzea aurreikusi da inbertsioetako diru kantitate handienetakoa.

Baina ez horretara bakarrik. 2025ean nahikoa lan suposatu duten ekaineko euriteen kalteei aurre egiteko ere diru partida handi bat bideratzea aurreikusten da, Ertotxekoaren antzekoa. Ekainaren 13ko euriteek herrian eragindako kalte materialez gain, bost bide kaltetu zituzten, zenbait herritarrei horietara sarbidea «erabat» oztopatu zietelarik.

Gainontzean, berrikuntza gutxi izango direla ziurtatu dute, eta iaztik datozenei eutsiko dietela aurreikusten dutela iragarri dute: herriko mobiliarioa eta itxura zaintzea, azpiegiturak txukuntzea (paper ontziak, eserlekuak, paretak zein iturriak) edota herriko jaietarako, Periazokarako, ospakizunetarako zein kultur ekitaldientzako diru partidak gordetzea.

Peribidea gertuago
Apirilaren 19an egingo den Periazokaren bigarren edizioaren egunerako aurreikusten du Gaintzako Udalak Peribidea berreskuratzeko lanak amaitu eta inaugurazioa egitea. Izan ere, Peribidearen homologazioarekin amaitzeko ezer gutxi falta dela azaldu dute, eta Altzaga, Arama, Ordizia eta Gaintzaren arteko hitzarmena «aurki» sinatuko dela. Garai batean asteazkenetan Ordiziako azokara joateko erabiltzen zen oinezkoen bidea zen Peribidea, eta hura berreskuratzeko ahaleginetan ari dira iaztik; lau bat kilometro inguruko ibilbidea izatea aurreikusten dute, eta Mendi Federazioak burutuko dituen lanak amaitzea falta dela azaldu dute.

Amaierara iristen ari den egitasmo honetan, Goitur eta Jakintza Ikastolaren parte-hartzea ere funtsezkoa izaten ari dela nabarmendu dute: «Peribidearen osagarri izango dira Jakintzatik osatu duten ipuin tematikoa eta Federazioak zintzilikatuko duen Track-a». Panelak, berriz, Ordizia eta Gaintzan jarriko dira, eta ibilbidean zehar geziak izango dira bidelagun.

Legealdi «zaila»
Legegintzaldiaren azken laurdenean sartzera doa Gaintzako udal gobernua, eta koalizioko kideek ziurtatu dute «urte zaila» izaten ari dela: idazkariaren arazoa, administrari postua egonkortu ezinda egon direnean emandako aldaketak, euriteen ondorengo kudeaketa luze bezain neketsua, zinegotzi baten dimisioa, langileen bajak… ez da makala izan udalak jasan behar izan duen egoera, baina orain arteko lan guztiari «bultzada bat» eman nahi diotela ziurtatu dute, «hurrengoek bide leunagoa izan dezaten».

Aste honetan, 24. Korrikaren bost aurkezpen gehiago

Goierriko Hitza — 2026-01-19 17:40:24

AEK-k 24. Korrika aurkezteko eta batzordeak sortzeko bilerak egiten jarraitzen du. Aste honetan, beste bost izango dira: bihar, 18:00etan, Zaldibiako udaletxean, Zaldibia-Gaintzari dagokiona, eta 19:00etan, Ordiziako Barrenan; asteazkenean, Legorretako udaletxean, 18:00etan eta 19:00etan, Ataungo udaletxean; eta ostegunean, Zegamako Gaztelekuan, 18:30ean.

Ertotxe Etxearen erosketa sinatuta, urrats bat gertuago

Goierriko Hitza — 2026-01-08 11:01:00

Gaintza Egiten herriko erabakien parte izateko asmoarekin 2025 hasieran jaio zen parte hartze prozesua da, eta ordutik hainbat saio egin dituzte. Herritarren parte-hartzea «zabala» izan zela adierazi zuen alkateak aurreneko saioaren ostean, eta oro har, herritarrak «gustura» zeudela, «informazio zuzena jasotzeagatik eta udalak hartu beharreko zenbait erabakietan parte hartzeko aukera izateagatik». Batzarrak egin eta herritarrek parte hartzeko espazioa izaten da, baina, herritarrak une oro informatuta mantentzeko ere, hileroko agerkari digitala sortu zuten, eta horrekin jo eta su dabiltza.

Hala, urte osoa lanean jardun ondoren, urte berrirako esku artean dituzten proiektuen berri eman zuten abenduan ondu zuten urteko azken agerkarian, eta datorren batzarreko hitzordua ere finkatu zuten: urtarrilaren 17an, goizeko 10:00etan, elkartuko dira udaletxean herritarrak. Legealdiaren azken laurdenean aurki sartuko direnez, hurrengo hilabeteetako ildoak herritarrekin marraztu nahi dituzte, iritziak elkarbanatu eta herritarrekin batera erabakiak hartzeko. Udal ordezkariak ziur dira udal taldearen lana «erraztuko» duela horrek.

2025a urte «zaila»

2026ko erronketan sartu aurretik, 2025eko balantzea ere egin nahi izan dute. Ziurtatu dute igarotakoa urte «zaila» izan dela udal taldearentzat: administrazio sailean izan dituzten aldaketak tarteko, izan duten idazkari falta tarteko, ekainean izandako euriteak eta horrek guztiak ekarritako ondorioak tarteko, udal taldeko kideen kargu uzteak tarteko… 2025a ez da urte makala izan Gaintzako Udalarentzat, baina azaldu dute «egoera birbideratzen» ari direla gutxika-gutxika, eta urte berriko lan erritmoari heltzeko «prest» daudela.

Zentzu horretan, Eguberrietako oporren aurretik egindako Osoko Bilkuran dagoeneko onartu zituzten 2026rako ordenantza fiskalak. Berrikuntza bezala, kontribuzioarekin egindako akatsaren zuzenketa etorriko dela azaldu dute, «zerga txikitze nabarmenarekin». Hondakinen tasak, bestalde, igoera izango duela azaldu dute eta aldiz, ibilgailu zein zerbitzuena berdin geratuko direla. Familia ugarien titularrentzako IBIa ordaintzerakoan, berriz, %50eko hobariak ezartzea onartu dute.

Aurrerapausoak

Ondo bidean, urte itxaropentsua behar luke 2026ak gaintzarrentzat, proiektu garrantzitsuak baitituzte esku artean. Izan ere, jakina da udalak etxebizitzen alorrari dagokionez aspaldian izan duen asmoa, baina udal eraikina etxebizitzetara birgaitzeko planoak eta aurrekontuak esku artean dituzten honetan, Aldundiko Etorlurrek promozioa egiteko aukera eskaini dietela azaldu dute. Modu horretan, beste hiru etxebizitza babestu eraiki ahal izango lituzkete Gaintzan, «herriko gazteei bideratzeko». Eta ez hori bakarrik. Udaletxe zaharra berritzeko finantziazioa lortuko luketenez, betiko eraikinera lekualdatuko litzateke udaletxea.

Ertotxe etxearen erosketak ere aurrera jarraitzen duela jakinarazi dute. Betidanik oso sentitua izan da Gaintzako Erretore Etxea, eta 2024tik hura herriaren jabetzakoa izateko ahaleginak egiten aritu da udala, herriari bideraturiko ondasun publiko izateko. Orain, badirudi horretarako aukerak biderkatu direla, eta etorkizunean hala izateko aukera ofiziala da orain. Izan ere, Ertotxe etxearen erosketa gauzatu duen hitzarmena sinatu dute dagoeneko, eta hitzartutakoaren arabera, 2027an azken ordainketa egiten denean sinatuko dira eskriturak. Hala ere, adierazi dute aurreratzeko aukera ere sor daitekeela, baldin eta egitasmoaren gauzatzeak hala eskatzen badu. Hiru urteetarako balio izango du hitzarmenak, eta herriak iazko parte hartze prozesuan erabaki zuen eraikinaren eraberritzeari ekin ahal izango diote, besteak beste.

Gaintzako Ertotxe Etxea, artxiboko irudian.

San Migel eguna ospatzen ari dira Goierrin

Goierriko Hitza — 2025-09-29 12:29:13

San Migel eguna dute gaur Lazkaon, Gaintzan eta Altzagan; goiz-goizetik hasi dute jardunaldia hiru herrietan eta adin-tarte guztietako herritarrak hurbildu dira. Lazkaon, gauera arte iraungo du jaiak, eta Gaintzan zein Altzagan, berriz, eguerdi-arratsalde partean bukatuko dira ospakizunak: Gaintzan, herri bazkariaren ondoren egingo den toka txapelketarekin itxiko dute aurtengo edizioa, eta Altzagan bazkalosteko bertso saioarekin. Maialen Lujanbio eta Aner Peritz arituko dira kantuan, eta Imanol Intsausti eta Iñaki Larrañagak jarriko dituzte doinuak.

Lazkaotarrak goizean goizetik dabiltza plaza-inguruan bueltaka. Goizeko 10:30ean hasi dute pilota jardunaldia LAPKE pilota elkarteak antolatuta, eta 11:00etan ireki dute haur zein gazteentzako haur parkea. Jende andana erakarri dute ekitaldiek. Binakako esku pilota lehiaketa izan da, hiru kategoriatan banatuta: benjaminak (2027-16 urtean jaiotakoak), alebinak (2015-14 urtean jaiotakoak) eta infantilak (2013-12 urtean jaiotakoak). Hamasei tantotara lehiatu dira eta horrela geratu dira sailkapenak:

Infantilak:
- 1. postua: Kepa Otegi eta Ibai Artola
- 2. postua: Ainere Azpiazu eta Xanet Aranbuu
- 3. postua: Eneko Agirre eta Haritza Mauleon
- 4. postua: Jon Arrieta eta Ander Iturbe
Alebinak:
- 1. postua: Aritz Aranguren eta Eneko Garin
- 2. postua: Unax Garmendia eta Ibai Iglesias
- 3. postua: Oinatz Garmendia eta Xuhar Elola
- 4. postua: Danel Ferreira eta Kaiet Alustiza
Benjaminak:
- 1. postua: Enetz Izquierdo eta Josu Cambero
- 2. postua: Amets Garmendia eta Telmo Zufiaurre
- 3. postua: Lander Acea eta Ander Anton
- 4. postua: Gorka Aizpun eta Markel Etxeberria

Eguerdian, herriko jubilatuak izan dira festa-egile nagusienak. Ohiko modura, jubilatuen bazkaria egin dute San Benito ikastolan eta jubilatu ugari bildu dira.

Arratsaldean ere jaiak iraungo du oraindik. 19:00etan, Sukar erromeri taldearen kantaldiaren aurreneko saioa izango da eta afari herrikoia egingo dute ostera. Afalostean, bigarren saioari ekingo dio arratsaldeko erromeri berak.

Lazkaoko eguneko argazkiak:

Txindoki Kilometro Bertikalaren laburpena 'Helmuga' saioan

Goierriko Hitza — 2025-06-03 10:40:15

Aitor Ugarte aramaioarrak eta Onditz Iturbe igorreztarrak irabazi zuten maiatzaren 17an jokatu zen Txindoki Kilometro Bertikala. Euskal Herriko txapelketa ere jokatu zen proba berean. Lotura honetan ikus daiteke EITBko Helmuga kirol saioak egindako laburpena.

Euskaraldiko txapak bihartik aurrera Ataun, Lazkao, Zaldibia eta Gaintzan

Goierriko Hitza — 2025-05-08 15:55:47

Euskaraldia maiatzaren 15etik 25era da. Ekimenean izena eman dutenek txapak jaso ditzakete bihartik aurrera Goierriko zenbait herritan: Zaldibian, bihar banatuko dira, 19:00etan plazan; Lazkaon, berriz, bi banaketa-saio egingo dituzte, bata bihar 18:00etatik 20:00etara bitartean plazan, eta bestea, etzi, 11:00etatik 13:00etara plazan baita ere; Ataunen, astelehenean jarri zituzten eskuragai eta datorren maiatzaren 15era arte egongo dira astelehenetik ostiralera 9:00etatik 14:00etara udaletxean eta 17:00etatik 19:00etara liburutegian. Bihar ere egongo dira eskuragai 19:00etan San Martingo plazan.

Gaintzan larunbatean

Gaintzan, berriz, larunbaterako egin dute hitzordua; 12:00etan hurbildu beharko dira herritarrak plazara.

‘Gaintza Egiten’ prozesuaren lehen bilera, igandean

Goierriko Hitza — 2025-01-16 11:01:38

Gaintza Egiten parte-hartze prozesuaren lehen bilera egingo dute igandean, 10:00etatik 12:00etara, udaletxean. Legealdiaren balantzea, Ertotxe erosteko proposamena, aurrekontuak eta Larraitz edo Ibiurrera oinezko bideak eraikitzeko proposamenak landuko dituzte, besteak beste. Herritarrei bertaratzeko deia egin die udalak.

Gaintzan ostiralean ospatuko dute San Martin, afari batekin

Goierriko Hitza — 2024-11-06 11:24:05

Gaintzako Onbide elkarteak San Martin ospatzeko herri afari-merienda antolatu du, ostiralerako. Azaroaren 8an, 20:30ean elkartuko dira soziedadean. Hirugiharra, txorizoa eta gaztaina erreak jarriko dituzte. Helduek 10 euro eta 12 urte arteko haurrek 5 ordaindu behar dute. Izena emateko azkeneko eguna gaurkoa da.

Korrontzi taldeak Gaintzan kontzertua egingo du zapatuan

Goierriko Hitza — 2024-10-24 16:15:31

Agus Barandiaranek gidatutako Korrontzi folk taldeak Gaintzan kontzertua egingo du, larunbat honetan, 19:00etan hasita. Sarrerak lekuan bertan salduko dituzte, helduarena 5 euroan eta haurrarena 2 euroan. Mundu guztian dabil Korrontzi; urri hasieran Gwuangjun (Hego Korea) izan zen, eta Argentinara eta Marokora joatekoak dira gero.

Gaintzako udaletxea itxita egongo da abuztuaren 8tik 23ra

Goierriko Hitza — 2024-08-06 11:11:48

Gaintzako Udalaren bulegoak itxita egongo dira bi astez. Udal langileek oporrak hartuko dituzte, eta udaletxea itxiko dute abuztuaren 8tik 23ra.

Gaintzako udaletxea.

Gaintzan ardi larruak bide alboan utzi dituztela berriro salatu dute

Goierriko Hitza — 2024-05-03 12:04:42

Ardi larruak azaldu dira Gaintzarako GI- 3371 errepide bazterrean botata, bigarren kilometro inguruan. «Zaku mordoxka» bat utzi ditu norbaitek, Gaintzako Udalak salatu duenez. Ez da lehenengo aldia, iaz ere antzera agertu baitziren.

Udalak gogorarazi du artilea jasotzeko araudi bat dagoela, eta egun hondakin tratamendua duen produktutzat hartzen denez, ezin da edozein moduz utzi. Gaintzan iaztik hasi ziren «portaera desegokiak» sumatzen: «Artilea udazkenera arte gorde eta dagokion tasa ordaintzea saihestuz, artaldea moztu eta berehala Gaintzako errepide bazterrean zakuak botata utzi zituzten. Aurten ere bide berdinetik jo du artalde jaberen batek».

Elkarbizitza arauak
Udalak foru aldundira ere eraman du afera; egilea identifikatu eta dagozkion kalte-ordainak ordaintzera behartuko duen prozedura abian jarri du aldundiak.

Elkarbizitza arauak betetzeko, eta guztienak diren inguruak eta artzainen izen ona ez zikintzeko eskatu dio zakuak han utzi dituenari, aldi berean, udalak.

Gaintzan bertso afaria egingo dute ostiralean

Goierriko Hitza — 2023-11-07 10:59:40

On Bide elkartean bertso afaria izango da, ostiralean, San Martin ospatzeko. Afaria 20:30ean hasiko da. Helduek 15 euro eta haurrek 7 ordaindu behar dute. Menuan, hirugiharrea, txorizoa eta gaztainak izango dira. Izena emateko azken eguna azaroaren 8a, asteazkena, da.

Afal ondoren, Maddi Aiestaran beasaindarra eta Aratz Igartzabal gabiriarra ariko dira bertsotan.

On Bide elkartea, Gaintzan. /Aimar Maiz