Goierriko Hitza

Txistu doinuekin hasi dituzte Santikutzak Legazpin

Goierriko Hitza — 2026-04-30 20:02:51

Hasi dira Santikutz jaiak. Jendetza bildu da arratsaldean herriko plazan, aurtengo festei hasiera emateko. Aurten Goiz Deia txistulari bandari egokitu zaio udaletxeko balkoitik pregoia egitea, txistu doinuaz lagunduta ondoren. Ondorengo txupinazoarekin lehertu da festa, eta kalean izan du segida jai giroak, erraldoi eta buruhandien ohiko kalejirarekin.

Txupinazo ofizialaren aurretik, gazteek ere egin dute jaiak hasteko ekitaldia Gaztetxean. Suziria bota ondoren, kalejiran jaitsi dira erdialdeko kaleetara.

Jaietako lehen txanpa igandera arte da, eta hurrengo asteburuan Kapela dantzarekin eta Mirandaola egunarekin amaituko dira.

Honela eman diete hasiera txistulariek aurtengo jaiei, Maider Apaolaza eta Iker Azpeitiaren hitzetan:

Arratsaldeon Legazpi!!

Ohituago gaude mikroa beharrean eskuan txistua edukitzera, baina herriko jaien hasiera iragartzeko aukera ez da urtero izaten eta aprobetxatu behar.

Jaiak gaur hasiko ditugun arren, errodajea egina ekartzen dugu batzuk, pasa den astean, beste urte batez, Korosti dantza taldeak antolatzen zuen Oin Puntetan asteburuan parte hartu genuelako. Horretaz gain, lehen aldiz, Gaztetxeak Gazte Festak antolatu zituen. Blusak soinean ekintza guztiek izan zuten arrera ikusita, ziur gaude datozen urteetan ere ekimen honekin jarraituko dutela, bejondeiela!!!

Bueno, eta aurten zer? Ba aurtengorako ere egitarau oparoa prestatu dute bai jai batzordeak, baita Txo!Esnako kideek ere. Txistulariak, urtero bezala egitarau horretako hainbat ekintzetan izango gara; kalejiretan, Olaria eta Ezpata dantza ekitaldian edo datorren astean ospatuko diren Kapela dantza edo Mirandaola egunean adibidez.

Hala ere egitarauak gutxi balio du herritarren parte hartzerik gabe. Bete dezagun Plaza, bete dezagun Azoka eta nola ez, bete ditzagun kaleak. Herritarrok gara festa guztien arima eta muina. Herritarrik gabe ez dago festarik, herritarrik gabe ez dago girorik. Egun zoragarri batzuk ditugu aurretik. Kanta dezagun, dantza dezagun, parte hartu dezagun eta nola ez, ondo pasa eta goza dezagun!!

Ondo pasa dezagun, ondo pasatzen utziz….

Ondo pasa dezagun ondoan daukaguna errespetatuz…

Ondo pasa dezagun, pasatu gabe….bueno…. sobre la martxa….

Bilakatu ditzagun kaleak espazio seguru eta eroso bat guztiontzat eta ospa ditzagun jaiak pozez, arduraz eta elkar zainduz.
Azken finean, bakoitzak bere nota eman dezala guztion artean musika eta armonia sortuz.

Eta gehiegi luzatu gabe mikroa utzi eta txistua hartuko dugu, erraldoiekin batera jaiei bals batekin hasiera emateko. Erraldoiak prest?

Ba besterik gabe, ondo pasa jaiak eta…

GORA LEGAZPI!

GORA SANTIKUTZAK!

GORA EUSKADI TXISTULARI!

Errebueltako festa egingo dute larunbatean Itsason

Goierriko Hitza — 2026-04-22 13:09:26

Hirugarren urtez, Errebueltako festa egingo dute larunbat honetan Itsason. Haur jolasek emango diote hasiera 12:00etan festari. Zinta jokoa eta arku tiraketa izango dira. 14:00etan bazkaritara elkartuko dira, pikatzekoak, oilasko entsaladarekin eta pastak izango dituzte menuan. Herriko ogia, auzoko sagardoa, ardoa eta likore eta konbinatuak izango dira.

Larunbaterako auzolana deitu dute Itsason

Goierriko Hitza — 2026-04-16 12:49:48

Urtero bezala, udaberriko auzolanerako deia egin dute Itsason larunbat honetarako. 14:30ean hasita 19:00etara bitartean luzatuko dira herriko kaleak eta inguruak txukuntzeko lanak. Parte hartzeko izena eman behar da 943 47 77 90an edo udala@itsaso.eus helbidean. Ondoren, mokadutxoa egingo dute Ostatun, parte hartzaileen artean.

Etxez etxeko ogi banaketa zerbitzua berriro martxan

Goierriko Hitza — 2026-04-13 12:02:22

Martxoaren 31n egin zuen Urretxuko Illargi okindegiak etxez etxeko azkeneko ogi banaketa Ezkion, Itsason eta Gabirian. Ezkioko Udalak berriki jakitera eman duenez, Ormaiztegiko ME janari denda (estankoa) etxez etxeko banaketa egiteko prest agertu da; ogia eta egunkaria etxean jasotzeko zerbitzua astelehenetik ostiralera eskainiko du. Ogien katalogoa herritarren eskura jarri du udalak eta eskaerak 667 492 336 edo 943 887 724 telefonoetan egin daitezkeela jakinarazi du.

Ogiaren eguneroko bozina-hotsa isildu da

Goierriko Hitza — 2026-04-02 08:00:43

Goizeroko ordu bertsuan, furgoneta zuriarekin etxe aurre bakoitzean bozina joz iritsi da ogi banatzailea. Etxeetatik jendea atera zaio, adinekoak ia denak, eta eguneko ogia eta egunkaria hartu dizkiote; ez daudenen etxeetan, atarian zintzilikatutako poltsan sartu du eskatutakoa Jose Ramon Agirre okinak eta ogi-banatzaileak.

Baina bukatu da herri txikietan hain ohikoa izan den zerbitzu hori. Urretxuko Illargi okindegiak asteartean egin zuen azkeneko banaketa Ezkion, Itsason eta Gabirian. Zerbitzu hori etengo du, eta atzodanik jada herritarrek dendetara joan beharko dute ogia erostera.

Sei hilabete aritu da Agirre banaketan. Bere aurretik urte askoan ibilitako Antonio erretiratu zenetik. Agirre ere herenegun jubilatu zen, eta haren lanarekin batera bukatu da banatzea. Illargi 1971n sortu zuten, bailarako 11 okin batu zirenean. Harrezkero, herri txikietara egunero ogia eramateaz –azken urteetan asteburuetan ez– arduratu da, lehenago beste okin batzuek ematen zuten zerbitzuarekin jarraituta. Illargik Lazkaoko Errotaundi okindegia erosi zuen iaz, eta Lazkaon egiten dute orain ogia. Urretxuko lantokia, glutenik gabeko ogi birrindua ekoizteko birmoldatzen ari dira.

Etxe bakoitzekoa, buruan

Dirudiena baino lan nekezagoa da banatzailearena. Kilometro asko furgonetan, geldialdi ugari. Etxe bakoitzean zer utzi, buruz ikasia du. «Dena ondo apuntatu behar da hasieran. Akats batzuk ere beti izaten dira, oso nahasgarria delako. Baina jendearekin oso ondo moldatu naiz», aitortu du Agirrek.

Ogi handi bat hemen, txikia han, naturala hurrengoan, edo gatzik gabekoa, berezia, romanitoa… Egunkariekin ahaztu gabe. «Ezkion hasten dut banaketa-ibilbidea, Itsaso pasatzen dut ondoren, eta Gabirian bukatu. Hiru herri horietan aritu gara, azkeneko urteetan». Duela 6 edo 7 urte eten zuten beste banaketa-ibilbide bat, Brinkola, Telleriarte eta Aztiria hornitzen zituena.

Okintzan lanean 35 urte igaro ditu Agirrek, postu askotan. Gaztetan, banatzaile hasi zen, hain justu, udan, jaiegunetan eta igandeetan ordezkapenak eginez Mutiloan eta Gabirian. «Beste lanik ez zegoenez, bertan geratu nintzen. Urte haietan lan kontuak nahiko gaizki zeuden».

Gaur egun, 90 bat bezerorekin bukatu du zerbitzua. Buruan dauzka bakoitzaren ordainketa-moduak ere: «44ri esku-dirutan eta hilekoa kobratzen diet, biri astean behin, eta 45i kontu korronte bidez». Eta ia-ia beste horrenbeste geldialdi egin izan ditu, etorrera bozina joz abisatuta. «Etxe gehienetan ogi bakarra hartzen dute. Leku batean, ostiraletan lau egunkari ere bai. Izan ere, helduek batez ere esan didate ogia baietz, baina egunkari falta gehiago nabarituko dutela». Tartean, Goierriko Hitza eta Goiberri ere banatu dizkie harpidedunei.

Gizarte aldaketaren lekuko

Poz-tristurak nahasian dauzka Agirrek. Jubilatu delako, pozik da. Baina gustura ibili da banaketan, eta eten izanak penatzen du. Gizartea bere begien aurrean aldatzen ikusi du: «Azken 20 urteetan bai, baina gehien bat 10 urteotan asko aldatu da dena. Lehen, auzoan festak zirenean, 20 ogi gehiago eskatzen zizkiguten. Jendea joaten zen baserrietara, jaietara… Han bizi ziren zaharrak hil dira, eta kalera joan dira ondorengoak. Ez da ezer geratzen herri txikietan».

Brinkolako kasua aipatu du, txikitatik hango baserrirako joera zeukalako oporretan eta. Baina beste lekuetan ere antzera gertatu da. Herri txikietara kanpotik etorriak ere badaude, baina beste ohitura batzuk dituztela ohartu da. «Desberdina da. Bizimodua ez dute herrian egiten». Eta ogirik ere ez diote hartzen okinari.

Bozina hotsik ezak hutsune gehiago ere utziko du.

24. Korrika Goierrin. Ezkio-Itsaso-Ormaiztegi

Goierriko Hitza — 2026-04-01 08:22:46

Itsasoarrak Korrikara batzeko prest

Goierriko Hitza — 2026-03-25 17:09:41

Korrikaren 24. edizioa Goierrira iristeko ez da ezer falta. Itsasoarrak ere prest dira Korrikara batzeko eta hainbat ekintza prestatu dituzte. Gaur, 18:15ean irakurle taldearen solasaldia izango da 18:15ean, Iñaki Dorronsoro idazlearen Azpijokoa Azpiazun liburua mintzagai hartuta. Larunbatean, 8:45ean Alegiko Zelai Ondo elkartean elkartuko dira, oinez Altzibar edo Uribar ingurura joateko. Euskaraldia taldeak eramango du Itsasoren lekukoa eta ondoren, herriko produktuekin gosaria egingo dute elkartean. Parte hartzeko 943 47 77 90an edo udala@itsaso.eus-en eman behar da izena.

Alegiko Sindikatoak Landaola Saria jaso du

Goierriko Hitza — 2026-03-06 13:44:18

Itsasoko Alegiko Sindikatuak jaso du gaur eguerdian Gipuzkoako Landa Garapen elkarteak biltzen dituen Landaola Federazioak –tartean dago Goierriko Goimen– banatzen dituen Landaola sariak.

Mendaroko San Agustin Kulturgunean egin dute aurten IX. Landaola sarien banaketa, eta Itsasoko herriak garatutako proiektua Erakunde Publikoaren kategorian izan da saritua. Gorka Sasietak jaso du saria itsasoar guztien izenean.

Goimenek Zegamako Soraluze baserriaren Basoberri proiektua aurkeztu zuen hautagai modura Erakunde pribatuen sarirako, baina ez du saririk lortu.

SARITUAK

Erakunde pribatuen saria: Bizi-Iraun (Oiartzungo baserritar elkartea)
Erakunde publikoaren saria: Alegiko Sindikatua (Itsaso herria)
Emakumeak Landa eremuan saria: Maitane Beristain Salegi
Urteetako ibilbideari saria: Aldaba Zahar elkartea

Gorka Sasieta itsasoarra, saria jaso ondorengo hitzartzean.Landaola

Saltzailerik gabeko denda
Itsasoko Alegia auzoko Sindikatoa dendak formatu berritzaile batekin zabaldu ditu ateak. Izan ere, saltzailerik gabeko denda autonomoa da. Ekoizleen eta bezeroen arteko elkargune izateko jaio da: ekoizleek zuzenean hornitzen dute denda, eta bazkide diren herritarrek, behar bezala identifikatuta, nahi duten unean sar daitezke erosketak egitera.

Dendaririk gabeko formula zerbitzuari eusteko eta haren bideragarritasuna indartzeko hautatu da. Itsaso 160 biztanle inguruko herria denez, gertuko zerbitzua funtsezkoa da eguneroko erosketak herrian bertan egin ahal izateko, autoa hartu beharrik gabe, eta aldi berean tokiko ekoizpenari irteera emateko.

Zerbitzuak, beraz, erosketak erraztuko dizkie herritarrei, bereziki mugikortasun zailtasunak dituztenei edo egunerokoan denbora justuarekin dabiltzanei. Ekoizleentzat ere abantaila nabarmenak ditu, produktuak saltzeko gune fisiko egonkorra eskaintzen baitie. Horrela, Sindikatoa denda tokiko ekoizpena balioan jartzeko eta merkaturatze-bide laburrak indartzeko tresna eraginkorra da.

50 familia-bazkiderekin ekingo zion ibilbideari, gehienak itsasoarrak, eta gaur 67 familia-bazkide dira. Ezkioko, Gabiriako eta Ormaiztegiko erroldatuek ere bazkide izateko aukera dute, baita Itsason eta aipatuko beste hiru herrietan lan egiten dutenek ere.

Azken batean, Sindikatoa landa-eremuko jasangarritasunaren aldeko apustu praktikoa da: tokiko ekonomia aktibatzen du, ekoizpena balioan jartzen du, zerbitzuak hurbiltzen ditu, eta komunitatearen kohesioa sendotzen du.

IX. Landaola Sarietako hautagai guztien argazkia.Landaola

Koplen doinuek lagunduta, solairu berria estreinatu dute Itsason

Goierriko Hitza — 2026-02-08 13:24:56

Alegi auzoko elkarteko bigarren solairuaren inaugurazio ekitaldia eta kopla emanaldia egin dituzte Itsason. Herritarrak espazio berrian bildu dira solairua estreinatzeko eta ondorengo ekitaldian parte hartzeko.

Jakinarazi dutenez, lokala erabilera anitzeko gunea izango da, herriko gazte zein helduentzat zabalik egongo dena. Bertan askotariko jarduerak egin ahal izango dira: bilerak eta ahozko topaketak, irakurri eta ikasteko txoko lasaia, formazio tailerrak, baita haur eta gazteentzako aisialdi gunea ere. Horretarako, hainbat baliabide jarri dituzte eskuragarri: ordenagailu eramangarria, Smart TV telebista, musika bozgorailua, Wifi konexioa, bi besaulki, bi bilera-mahai, idazmahai bat eta hamabi aulki.

Aurkezpenaren ostean, kopla saioa egin dute. Santa Ageda egunaren bueltan, herritarrek duela hamar urtetik kopla berriak sortzeko ohitura dute, eta aurten ere ez diote tradizioari huts egin. Koplek aurreko urteko gertakariak izaten dituzte hizpide, betiere umore ukitu batez lagunduta.

Jai giroa, gainera, ez da kantaldiarekin amaitu, eta ekitaldiaren ostean, mokadutxo batekin borobildu dute goiza herritarrek.

Matxinbenta auzoa festa giroan dago

Goierriko Hitza — 2026-02-01 14:20:20

Santa Ageda festak ospatzen ari dira Beasaingo Matxinbenta auzoan, urtarrilaren 30etik otsailaren 1era bitartean, eta jarraipena izango dute otsailaren 5ean. Festetako lehen astebururako egitarau oparoa prestatu dute. Goizean, Beasaingo txistulariek auzoa esnatu dute, eta jarraian meza ospatu da. 12:30ean, herri kirolek hartu dute protagonismoa: aizkoran Mikel Larrañaga eta Unai Etxeberria aritu dira Igoin Pikabearen aurka, eta harri-jasotzen, berriz, Olaia Esnaola eta Udane Ostolaza lehiatu dira. Giroa alaitzeko, Itzeder eta Txibilter trikitilariek musika jarri dute.

Arratsaldean ere izango da zer ikusi. 17:00etan ardi motze erakustaldia egingo dute eta ondoren festetako otarraren zozketa.

Korrikaren aurkezpena, gaur Lazkaon

Goierriko Hitza — 2026-01-26 10:01:58

24. Korrika aurkezteko eta batzordeak sortzeko bilerak egingo ditu AEK-k aste honetan ere.

Lazkaon, gaur, hilak 26, 18:30ean, kultur etxeko erakusketa gelan.
Itsason, bihar, hilak 27, 18:30ean, udaletxean.
Ezkion, hilaren 28an, 17:30ean, udaletxean.
Ormaiztegi-Gabiria dagokiona, hilaren 29an, 18:00etan, Ormaiztegiko Gizarte Etxean.

Santa Ageda bezperako koplak sortzeko hitzordua, Itsason

Goierriko Hitza — 2026-01-23 13:19:23

Ohi bezala, Santa Ageda bezperan kopla emanaldia egingo dute Itsason, otsailaren 4an. Urtero kopla berriak sortzen dituzte egun horretarako eta larunbatean, urtarrilak 24 hitzordua egin dute herritarren artean bertso berriak sortzeko. 18:00etan elkartuko dira, udaletxeko Ganbara aretoan.

Keatonen zinema mutua eta Itsasoko harmoniuma batuta

Goierriko Hitza — 2025-12-19 07:14:31

Kontzertu berezia antolatu dute urteari amaiera emateko Itsason. Oiartzungo organozaleak elkarteak sustatuta, zinema mutua eta harmoniuma uztartuko dituen ikuskaria prestatu dute abenduaren 28arako, 19:00etan Batolome Deunaren elizan. Izazpe abesbatzaren emanaldiak osatuko du emanaldia.

Oscar Rodriguez (Santander, Espainia 1999) organo joleak jarriko dio musika Buster Keatonen (AEB, 1895-1966) El moderno Sherlock Holmes filmari, aurtengo martxoan inauguratu berri den Itsasoko harmoniumarekin. Aurretik, Ezkioko Izazpe abesbatzak emanaldia egingo du.

Xabier Barriola Izazpe abesbatzako zuzendariak azpimarratu duenez, Rodriguez “puntako” organo jotzailea da: “Holandan ari da orain ikasketa batzuk amaitzen”; zehaztu du. Gogorarazi du gainera, orain dela hamabost egun Espainiako abesbatza nazionaleko zuzendari-orde izendatu dutela. Interesgarria irutzen zaio zaio prestatu duten emanaldia, “kuriosoa da, hemen inguruan ez dira horrelako gauza asko ikusten”.

Buster Keaton zinema mutuko gidoilari, aktore eta zuzendariaren El moderno Sherlock Holmes 1924an estreinatu zen zinemetan. Film hau bere konplexutasun teknikoagatik eta efektu bisual berritzaileengatik da ezaguna. American Film Istitute erakundearen historiako 100 film komiko onenen zerrendan dago.

Doluaz hausnartuko dute Itsasoko literatur tertulian

Goierriko Hitza — 2025-12-10 10:43:43

Itsasoko irakurle taldeak literatur tertulia antolatu du gaurko, 18:30ean Ganbara aretoan, Alba Payas-en El mensaje de las lagrimas hizpide hartuta. Payas psikoterapeuta da lanbidez eta doluan aditua. Hain zuzen, gertuko norbaiten heriotza gainditzen laguntzeko gida bat da, gaur, Itsason mintzagai hartuko dutena.

Itsasoko jubilatuen eguna, igandean

Goierriko Hitza — 2025-11-05 10:25:56

Datorren igandean, hilak 9, jubilatuen eguna ospatuko dute Itsason. Alegiko elizan ospatuko den mezarekin (13:00) emango diote hasiera egunari eta amaitutakoan taldeko argazkia aterako dute (13:45). Itsasoko Ostatuan egingo dute bazkaria (14:30) eta parte hartu nahi duenak, bihar arteko epea du apuntatzeko.

Bazkaria erreserbatzeko Itsasoko udaletxean eman behar da izena, 943 47 77 90 telefonora deituz, 628 437 422 zenbakira whatsapp bat bidalita edo udala@itsaso.eus helbidera mezu bat idatzita.

Jubilatuentzako bazkariaren prezioa 21,5 euro izango da; gainontzekoentzat 43 euro. Jatetxean bertan ordaindu beharko da. Ospakizuna amaituta, datozen egunetan ateratako talde argazkia banatuko da oroigarri gisa parte hartu dutenen artean.

Itsasok gertuago du tokiko entitate txiki izateko aukera

Goierriko Hitza — 2025-10-08 16:31:26

Itsasok gertuago dauka tokiko entitate txiki izateko aukera, gaur Gipuzkoako Batzar Nagusietan egindako osoko bilkuran aho batez hartu baitute aintzakotzat talde guztiek foru arauaren (2/2003ko martxoaren 17ko udal-barrutiak erregulatzen dituen foru-araua) aldaketaren proposamena. Joan den asteko asteazkenean eman zuen Gipuzkoako EH Bilduk proposamenaren bidearen berri: EAJrekin adostasuna lortuta, elkarrekin foru arauaren aldaketaren proposamena Batzar Nagusietan aurkeztuko zuten.

Gaur bilkuran foru arauaren proposamenaren aintzatespena bozkatu dute, eta guztiek aldeko botoa eman dute. Oraindik bere bidea egin beharko du proposamenak Batzar Nagusietan, baina aldeko bozkek adierazi dute bideari ekin diotela, prozedura martxan dagoela.

Foru arau horretan baldintza bat ezartzen da auzo udal edo tokiko entitate txiki izan nahi dutenentzat: 500 biztanleko muga gainditu behar izatea. Itsasok ez du muga hori gainditzen, ezta Angiozarrek (Debagoiena, Gipuzkoa) ere. Zelai Amenabarro Gipuzkoako EH Bilduren Politika Instituzionaleko arduradunak azaldu du bi salbuespen aurkeztu dituztela proposamenean: «Bata, 1960ko hamarkadan herritarren borondate demokratikoaren kontra batu zituzten udalerrian kasua; eta bestea, historikoki auzo udal, auzo alkate edo antzeko organoren bat izan duten biztanle gune bereizien kasua».

Atea zabaltzeko
Aldaketarekin bide emango zaie Itsasori eta Angiozarri tokiko entitate txiki izendapena eskuratzeko. «Eta aurrerantzean beste auzoren batek pausoa eman nahiko balu, atea zabalik edukiko luke». Amenabarrok adierazi du «urteak» daramatzatela horren zain. «Aurreko legealdian ponentzia bat eratu zen, baina gerora aldundiak ez zuen aldaketa proposamenik aurkeztu, eta beste hainbeste gertatu da legealdi honetan ere». Batzarkideek gaia jorratuko dute, eta Batzar Nagusietara eramango dute berriro, azken onespena emateko.

Eskaera historikoa
Gorabehera asko izan ditu auziak. 2016ko abenduaren 20an aldundiko dekretu baten bidez Itsaso Ezkiotik desanexionatu zuten, bi udalerri sortuta. Ia lau urte beranduago, 2020ko uztailaren 16an, Espainiako estatuko Auzitegi Gorenak dekretu hori baliogabetu zuen, errekurritzeko aukerarik gabe.

Itsaso tokiko entitate txiki izateko prozesua martxan jarriko dute Gipuzkoako Batzar Nagusietan

Goierriko Hitza — 2025-10-01 16:28:31

Gipuzkoako EH Bilduk hedabideetara bidalitako ohar baten bidez jakinarazi duenez, Itsaso tokiko entitate txiki izateko prozesua martxan jarriko da Gipuzkoako Batzar Nagusietan, udal barrutien foru araua aldatzeari bide emanda, EAJrekin batera. Urriaren 8ko osoko bilkuran emango zaio argi berdea aldaketarako tramitazioari.

“EH Bilduk eta EAJk gai horretan duten oinarrizko adostasuna baliatuta ekingo zaio foru arauaren aldaketari”, adierazi dute oharrean. Udal-barrutiak eregulatzen dituen foru arauak honakoa jaso beharko du “EH Bilduk bultzatutako proposamenaren arabera”: “60ko hamarkadan biztanleen borondate demokratikoa kontuan izan gabe beste udalerri bati batu izan ziren herrien kasuetan, foru arau honetan xedatuta dagoen 500 biztanleen kopuruaren baldintza betetzetik salbuetsiak egongo dira”. Baldintza hori foru arauan jasota, Itsaso tokiko entitate txiki izango litzateke, Angiozarrekin batera.

Eskaera historiko bati erantzungo zaio modu horretan. EH Bilduk “ilusioz begiratzen dio” tramitazio faseari. EAJri, dena den, aurreko agintaldian aldaketari “iskin egin” ziola egotzi dio: “Ezin dugu ahaztu Gipuzkoako Foru Aldundiak 2019-2023 agintaldian iskin egin ziola aldaketa hori gauzatzeko bere erantzukizunari, eta agintaldi honetan ere, EH Bilduk hartu behar izan duela gidaritza, ekimena Batzar Nagusietara ekarrita”. Baina, aldi berean, “txalotu” egiten dute “azkenean EAJk ere aldaketa-proposamena aurkeztu izana”. Hala, Gipuzkoako bi alderdi nagusiek elkarrekin egingo dute foru araua aldatzeko urratsa. “Gauzak horrela, datorren urriaren 8ko osoko bilkuran, foru arauaren aldaketarako tramitazioari argi berdea emango diote Batzar Nagusiek, Itsaso eta Angiozar tokiko entitate txiki izan daitezen”.

Zelai Amenabarro (Legorreta, 1985) Gipuzkoako EH Bilduren Politika Instituzionaleko arduradunak adierazi du “nahi baino beranduago bada ere, azkenean” Batzar Nagusietan hasiera emango dietela udal barrutien foru araua aldatzeko prozesuari: “Eta horrek esan nahi du behin betiko testua onartzen denean Itsasok eta Angiozarrek aukera izango dutela aspaldiko eskaera bati erantzuteko eta tokiko entiate txiki izateko”.

Aurtengo aurrekariak

Apirilean, Itsaso auzo udal bihurtzeko prozesua Batzar Nagusietan landuko zela jakinarazi zuten, bi alderdien proposamen banarekin. Ekainean, berriz, gai zerrendatik erretiratu zuten, foru arauaren erreforma egikaritzeko bi proposamen ezberdin egoteak prozedura luzatu eta traba egin zezakeelako.

Kizkitzako eguna bideoan

Goierriko Hitza — 2025-09-09 09:59:55

Irailaren 8an, Andra Mari eguna Kizkitzan ospatzeko ohitura aspaldikoa dute itsasoarrek. Atzo, eta eguraldiak lagundu ez bazuen ere, berriz elkartu ziren Kizkitzan meza entzun, elkarrekin bazkaldu eta erromeriaz gozatzeko. Gotzon Aranburuk iruditan jaso du atzokoa.

Aterkipean ari dira ospatzen Kizkitzako eguna itsasoarrak

Goierriko Hitza — 2025-09-08 13:39:46

Irailaren 8a gorriz markatuta izaten dute itsasoarrek egutegian. Andra Mari egunez Kizkitzan erromeria egin ohi dute eta gaur ere, eguraldiak gehiegi laguntzen ez badu ere, ez dute hutsik egin. Mezarekin eman diote hasiera goizari eta bazkalordua bitartean, Baltzola eta Andonegirekin erromeria dute orain. Bazkalostean, 16:30ean ekingo diote berriz erromeriari eta toka txapelketa ere jokatuko dute 17:30ean hasita. Itsasoko plazaraino oinez jaitsiko dira iluntzean (20:30) eta afari batekin amaituko dute eguna Ostatun.

Mandubin ere bai
Kizkitzan bertan ez ezik, Mandubiko bentan ere jai giroa da nagusi. Aurten ere erromeria izango da eguerdian eta arratsaldean, Imanol Intxausti eta Iñaki Larrañaga trikitilariekin.

: Kizkitzako erromeria, atzo, euripean.

Unai Elizegi, Itsasoko mendi bizikleta martxako lehena

Goierriko Hitza — 2025-09-01 11:40:47

Gasteizen bizi da, baina Zumarragakoa da jaitzez Unai Elizegi, eta bosgarren ekinaldian, lortu du Itsasoko mendi bizikleta martxa irabaztea. Larunbat arratsaldean egin zen, San Bartolome jaien barruan. Probak 25 kilometroko luzera zuen, eta 40 partaideetatik, Elizegi izan zen lehena.

Lehen postu horrek esanahi berezia zuen txirrindulari honentzat, 2019an lehen aldiz egin zuenean, azkena iritsi zelako, “bizikleta-eskobarekin”, Gotzon Aranburuk grabatutako bideoan azaldu duen bezala.

Ogi-labeak hizpide izan dituzte Itsason

Goierriko Hitza — 2025-08-31 13:55:32

Abuztuaren 23an eta 24an, eta abuztuaren 29tik 31ra San Bartolome jaiakospatzen ari dira Itsason. Goizeko hamaiketan eman die hasiera egunari, hilerrian egin den mezarekin. Ondoren, Trapalata txarangak herria alaitu du. Eguneko ekintza nabarmenena 13:00etan izan da, Anttoni Okarizek eta Pilare Muxikak herriko ondareari buruzko aurkezpena egin dute. Urtero ondare elementu bati buruzko azterlana egiten du bikoteak, eta aurtengoan, ogi-labeen inguruan hitz egin dute. Herritar ugari bildu da ekintzara eta udaletxeko ganbara txiki gelditu da.

Okarizek eta Muxikak Itsason dauden ogi-labeak izan dituzte aztergai azkeneko aldi honetan. Herrian bertan daudenak katalogatu, ze egoeratan dauden ikusi eta ze funtzio bete duten aztertu dute. Baserriz baserri egin dute errepasoa, eta horietan gelditzen diren aztarnak, etxekoen oroitzapenak eta beste zenbait daturen inguruan aritu dira. Gainera, adierazi dute oraindik bi okin ere badaudela Itsason: Goiti eta Hariztizabal.

Gaurko ekintzekin emango diete itsasoarrek amaiera San Bartolome jaiei.