Goierriko Hitza

Errigora sustraiak ahaztu gabe espaziora begira

Goierriko Hitza — 2026-10-24 17:40:58

Errigorak herri ekimenak hasierako boluntarioei omenaldia egin diete Lazkaon. Eguna hasteko Errigora sustraietatik espaziora dokumentala estreinatu dute Areria zineman. Jende asko hurbildu Euskal Herriko hainbat txokotatik, hori horrela zinema jendez bete da.

Dokumentalaren estreinaldiaren ondoren, Lazkaoko frontoira inguratu dira denak, hamaiketako egin ostean, omenaldi ekitaldia egiteko. Erramun Amundarain, hasierako boluntario izan zena eta lehengo urtean zendu zena, gogoratu dute bere argazki bat ipiniz oholtza gainean. Egunean zehar Kuxkuxtu txaranga urruñarra ere badabil giroa alaitzen. Behin omenaldia amaituta bazkaria egon da frontoiean bertan.

Omenaldiko argazkiak eta bideoa.

Energia ereduaz hausnartuko dute Itsasondon

Goierriko Hitza — 2026-10-22 10:31:38

Eusko Jaurlaritzaren Asteklimaren aurtengo edizioaren barruan Goierri Barnetik lankidetza sareak eta Hitzar Energia Komunitateak Zer egin dezakegu Goierrin? mahai-ingurua antolatu dute Itsasondoko Kulturgunean, hurrengo asteartean, 18:00etan.

Topaketaren helburua Goierrin energia eredu «bidezkoago, jasangarriago eta komunitarioago bat sustatzeko egin dezakegunaz hausnartzea» dela azaldu dute antolatzaileek.

Mahai-inguruan izango diren hizlariak aurreratu dituzte antolatzaileek: Eneko Maioz, Orexako Energia Komunitatea eta Tolosaldea eskualdeko energia komunitateko kidea; Elena Herrarte, Gizabideak, Debagoienako Energia Puntua eta Ernamuinako kidea; eta Aritz Otxandiano, EHnergia Sareko lehendakaria.

Herritar guztiei zuzendutako saioa izango da eta antolatzaileek diote «aldi bereko itzulpen zerbitzua» egongo dela.

Urteko egutegia osatzeko argazkiak bidali ditzakete itsasondoarrek

Goierriko Hitza — 2026-10-21 14:36:56

Urtea bukatzeko hilabete gutxi geratzen diren honetan, 2027ko egutegia prestatzen hasteko asmoa azaldu du Itsasondoko Udalak. Horretarako, herritarren laguntza eskatu du, eta argazkiak bidaltzeko epea ireki berri du. Helburua da udalaren eta herritarren arteko elkarlanaren bidez, 2027ko urteko egutegia osatzea. Itsasondoko mendia eta natura hartu dute gaitzat, eta horri lotutako argazkiak bidali beharko dira udala@itsasondo.eus helbidera azaroaren 9a baino lehen.

Ekimen herrikoian parte hartzeko deia egin die udalak herritarrei.

Erramun Amundaraini herri omenaldia, kantuz

Goierriko Hitza — 2026-10-11 14:53:03

Duela urtebete hil zen Erramun Amundarain zenari herri omenaldia egingo ditoe urriaren 31n, larunbatean, Ordizian. Kantua izango du ardatz. 12:00etan, kantu poteoa hasiko da Herriko tabernatik.

Ondoren, 14:00etan, Tximista sagardotegian kantu bazkaria izango da. Bazkari txartelak salgai daude dagoeneko Herriko, Kirkil eta Amonane tabernetan. Helduen menuak 35 euro balio du eta haurrenak 16 euro: entsalada, bakailao tortilla eta oilaskoa.

Kantu bazkarian parte hartuko dute Kuxkuxtu txarangak, Kantazak Ordiziak eta Laguntasuna Errondailak.

Zaldibiako, Legorretako eta Itsasondoko hainbat ikasle bizikletaz joan dira Oianguren institutura

Goierriko Hitza — 2026-09-29 13:33:22

Zaldibiako eskola garraioa dela eta Oianguren BHIra bizikletaz joan dira hainbat ikasle. Legorretakoak eta Itsasondokoak ere bazeuden horien artean. Ekimen honekin hainbat arlo ikutu nahi izan dituzte, alde batetik, Zaldibiaren kasuan “ez dagoela bidegorririk”, eta ez dela bizikletaz egiteko bide segurua. Gaineratu dutenez, “ez da bidea ez dela segurua, baizik eta ez dagoela oinezko biderik. Nola eta bidea ez den mendiz egiten”.

Horri lotu nahi izan diote, Hezkuntza Sailak eskola garraioa kentzeko erabilitako argudio nagusia, “4km baino gutxiago egotea ikastetxera” da. Baina, dekretuan bertan dioenez, baldintza horretatik salbuetsita geratuko liratekeela ondorengo kasuetan azaldu du Zaldibiako Guraso Batzarrak: “Tresna informatikoaren bidez kalkulatutako oinezko ibilbidea egingarria ez bada bide-segurtasuneko gutxieneko baldintzak betetzen ez dituelako, zenbaketatik kanpo utziko da, eta, haren ordez proposatutako ibilbideen artean, benetan oinez baldintza egokietan egingarria den kilometro gutxienekoa hartuko da kontuan”. Salbuespen hori aintzat hartzeko, “ezinbestekoa” da ikaslea matrikulatuta dagoen ikastetxeak ziurtatzea bidea ezin dela baldintza egokietan oinez egin.

Ez dira “isilik” geratuko

Beraz, Gurasoek aurreratu dute, “bide juridikoak martxan jarriak ditugula, eta Arartekora jotzeaz gain, Eusko Legebiltzarrera ere eramango dugula gaia”. Orain, Zaldibiako ikasleei gertatu zaiela diote, baina 2015ean salbuetsita zeuden hainbat herri eta auzori ere bai. Pixkanaka zerbitzua kendu die Hezkuntza Sailak, urtetik urtera, “hots asko atera gabe”. Horren aurrean berresten dute ez dutela “isilik” pasatuko arazoa: “Herritarren eta ikasleen eskubideez ari garelako, kasu honetan derrigorrezko hezkuntzaz”.

Ehunaren berrerabilpena sustatzeko azoka Itsasondora iritsi da

Goierriko Hitza — 2026-09-25 09:23:36

Joan den astean Zeraingo hitzordua egin ostean, Biziolak eta BATUZ Gizarte Fundazioak Itsasondora eramango dute gaur arratsaldean azoka ibiltaria, ehunaren berrerabilpena eta kontsumo arduratsua sustatzen jarraitzeko asmoz. Itsasondoko plaza izango dute topaleku, 17:30etik 20:30era bitartean, eta bertaratzeko gonbidapena egin diete goierritarrei. Udazkenean ere azoka gehiago egingo dituztela aurreratu dute, bai Itsason, Ataunen eta Olaberrian ere.

Bigarren eskuko arroparen salmenta eta bilketa gunea ez ezik, doako konponketa tailerra ere eskainiko da. Hala, erabiltzen ez duten arropa eramateko aukera izango dute herritarrek, bai eta joskintza tailerraren bidez, konpondu edo moldatu beharreko jantziak eramateko aukera ere. Oinarrizko konponketak egiten ikasiko dute, arroparen bizitza erabilgarria luzatzeko.

2025ean martxan jarria

Egitasmoak 2025ean du abiapuntua. Urte hartan, Biziolak eta BATUZ Gizarte Fundazioak elkarlanean ehun hondakinak bildu, eta berrerabiltzeko gunea egokitu zuten Biziolan. Lau hilabetean, 270 kilo arropa eta osagarri sartu ziren berrerabilpen zirkuituan. Esperientzia hark, herritarrek gaiaren inguruan zuten interesa erakusteaz gain, zerbitzua gune bakarrean zentralizatzeak zekartzan mugak agerian utzi zituen.

Horri erantzuteko, zerbitzua Goierriko gainerako herrietara zabaltzeko erabakia hartu zuten, bereziki herri txiki eta ertainetara hedatzekoa. Intza Barandiaran antolatzailearen esanetan, bigarren eskuko arroparen eskaintza «gune urbanoetan» kontzentratzen da batez ere, eta azokak herriz herri eramateak «berrerabilpenerako aukerak deszentralizatzen» zituenez, aukera egoki gisa baliatu zuten.

Azokaren helburua, ordea, ez da soilik arropa bildu eta berrerabiltzea. Ingurumenaren ikuspegitik, ehun hondakinen sorrera murriztu eta jantzien bizitza luzatu nahi dute; lurraldeari dagokionez, berrerabilpenerako aukerak deszentralizatu; eta gizartearen alorrean, tokiko komunitatea eta eragileen arteko sareak indartu.

Elkarlanean ondua

Zentzu horretan, tailerren diseinua, dinamizazioa, herritarren aktibaziorako jarduerak eta azoketako sentsibilizazio ekintzen koordinazioa Biziola kooperatibak eta BATUZ Gizarte Fundazioaren artean burutuko dituzte.

Hala ere, Barandiaranek dio «bertako eragileekin lankidetza» ere bilatuko dutela tailerrak dinamizatzerako garaian: «Ideia da herri bakoitzeko sare eta ezagutzak baliatzea, proiektua tokian tokiko eragileekin elkarlanean eraikitzeko». Horren guztiaren emaitza izango da gaurkoa.

Itsasondoko jaietako asteburua, iruditan

Goierriko Hitza — 2026-09-21 11:33:25

Asteburua topera gozatuta, giro ederrean, eguraldi onarekin eta herritarren parte-hartze handiarekin joan dira Itsasondoko jaiak. Ostiral arratsaldetik atzora arte, ekitaldiz beteriko asteburua izan dute herritarrek. Kuadrilla egunarekin hasi, mozorro egunean herria irudimenez bete eta ijittoaren igoerarekin agurtu zituzten jaiak, atzo iluntzean.

Nagore Etxeberria alkateordeak azaldu du ekintza guztiak “arrakastaz” burutu direla: “Dena ongi joan da, jendetza bildu da ekintzetan, eta umorea nagusitu da”. Herri afarian, ia 200 lagun bildu ziren.

Larunbateko mozorro egunean ere izan zen berrikuntzarik. Izan ere, diplomak banatu beharrean, sari ezberdinak banatu zituzten. Horien artea datorren urteko jaietako pregoia botako zuen herritarra zozketatu zen, eta gaztetxo kuadrilla bati tokatu zitzaion. “Haiek izango dira datorren urtean udaletxeko balkoira igo, pregoia irakurri eta ijittoa jaisteko ardura hartuko dutenak”, gogoratu du Etxeberriak.

Hona hemen asteburuko zenbait irudi.

Argazkiak: Itsasondoko Udala

Ander Otegi zegamarrak Salamancako Itzuliko azken etapa irabazi du

Goierriko Hitza — 2026-09-21 11:09:18

Ander Otegi zegamarra (BBK-Euskadi) nagusitu da Salamancako Itzuliko hirugarren eta azken etapan. Otegi azkarrena izan da esprintean, amaiera estuan eta azken 400 metroak gorantz ziren etapa lehiatuan –127 kilometro Salamancan hasi eta buka–. Bide batez, amaiera bikaina eman dio itzuliari eta denboraldiari, taldearen 2026ko azken proba baitzen. Otegiren urteko laugarren garaipena da: Irungo Klasikoa, 23 urtez azpiko Euskadiko eta Gipuzkoako erlojupeko txapelketak eta Salamancakoa.

Asier Cardona, Iker Colmenero, Aimar Fernandez de Gorostiza, Aimar Marin eta Kepa Ormazabal gabiriarra izan ditu taldekide denboraldi honetako azken proban, Mikel Gaztañaga itsasondoarra zuzendari zutela. Aurtengo udan “stagiaire” modura ere lehiatu da Euskaltel-Euskadirekin ZLM Tourrean, Herbereetan.

Ijitu futbol taldeko kideen pregoiarekin hasiko dira etzi Itsasondoko jaiak

Goierriko Hitza — 2026-09-16 08:24:12

Itsasondok etzi emango die hasiera herriko jaiei, eta aurtengo egitarauak ohiko hitzorduak ez ezik, aspaldian baztertutako zenbait ekitaldi ere berreskuratuko ditu. Kuadrilla eguna izango dute abiapuntu, eta Ijitu futbol taldeko jokalariek hartuko dute festen hasierako protagonismoa: joan den ekainean Herri Txikietako Txapelketako B Kopa irabazi izanagatik eta aitortza modura, haiek izango dira aurtengo pregoilariak.

18:00etan udaletxeko balkoira igoko dira futbolariak, eta bertatik irakurriko dute jaietako pregoia. Azaldu dute «plazer handia» izango dela udaletxeko balkoira igotzea: «Oso pozik gaude eta ilusioz beteta pregoia emateko aukeratuak izan garelako. Urtero herriko elkarte bat da horren ardura duena eta elkarte horrek aukeratzen du hurrengoa; oso polita da».

Ondoren, Ijitto jaitsiko dute balkoitik plazara, eta ekitaldi horrekin emango diete ofizialki hasiera festei.

Kuadrillen egun berritua

Lehen eguneko egitarauak izango du berritasun nagusietako bat. Iaz, 2011tik jokatu gabe zegoen Itsasondo eta Arama arteko futbol derbia berreskuratu zuten herriko zenbait gazteren ekimenez; aurten, berriz, urte luzez jaietako programatik kanpo egon diren lagunarteko jolasak itzuliko dira.

«Adin eta kuadrilla ezberdinetako herritarrak talde anitzetan elkartu, komunitatea indartu eta elkarrekin jolasteko proposamena da», azaldu du jaien
antolaketaz arduratu den Nagore Etxeberria alkateordeak. Askotariko jolasak egingo dituzte, eta herritarren parte-hartzea eskatu dute.

Gainerakoan, azken urteetako egitarauaren oinarriari eutsiko diote. Herri afarirako 150 lagun inguru elkartzea espero dute, eta beste ehundik gora paella-janerako, nahiz eta oraindik ez duten behin betiko parte-hartzaileen kopurua itxi. Ohiko hanburgesa jana ere egingo dute, azken urteetako «harrera onari» eutsiaz.

Kirola, musika eta gehiago

Itsasondoko jaietako ohiko hitzorduen artean izango dira, besteak beste, Betiko igoera txirrindulari proba, Ijitu Show ikuskizuna, haurren pilota partidak eta sagardo dastaketa.

Kirolak eta gastronomiak ez ezik, mozorroek ere izango dute euren eguna: aurten, iraganeko marrazki bizidunak izango dituzte gai nagusi.

Musikak ere leku berezia izango du egitarauan. Erromeriek, elektrotxarangek, bestelako musika taldeek eta DJ-ek girotuko dituzte jaietako hainbat une, adin eta gustu ezberdinetara egokitutako eskaintza osatuz.

Horrela, ohiko ekitaldiei eta azken urteetan berreskuratutako hitzorduei berritasunak gehituta, Itsasondok egitarau zabala prestatu du jaiak herritarren parte-hartzearekin eta kale giroarekin ospatzeko.

Urkiko festa asteburua, iruditan

Goierriko Hitza — 2026-09-14 12:48:31

Giro paregabean igaro dituzte Gurutze Deunaren jaiak Itsasondoko Urkia auzoan. Beste behin ere, larunbatean hasita, hiru eguneko festa asteburua izan dute, eta zaindariaren egun bereziarekin itxi dute gaur. Goizean meza nagusia izan dute, eta ondoren, hamaiketakoa egin dute bertaratu diren auzotarren artean.

Hemen asteburuko argazki batzuk:

Gurutze Deunaren festa asteburua dute Urkian

Goierriko Hitza — 2026-09-10 09:57:14

Gurutze Deunaren jaiak ospatuko dituzte asteburuan Itsasondoko Urkia auzoan. Beste behin ere, larunbatean hasita, hiru eguneko festa asteburua izango dute auzotarrek, eta zaindariaren egunarekin itxiko dute ospakizuna, astelehenean. Bestelako zenbait ekitaldien artean, dagoeneko tradizio bihurtu diren zenbait ekimenerako, festarako, kirolerako zein otordu herrikoietarako tartea izango da. Antolatzaileek egitaraura hurbiltzera eta ekintzetan parte hartzera gonbidatu dituzte herritarrak.

Larunbat iluntzean ekingo diote ospakizunari, jaien hasiera berezi eta musikatuarekin. Jarraian, lagun arteko afaria izango da, baina bertaratu ahal izateko, ezinbestekoa izango da aurrez 680 342 121 telefono zenbakira deituta izena ematea –bihar, hilak 10, izango da horretarako azken eguna–. Afalostea, berriz, Ostolaza eta Narbaiza trikitilariek girotuko dute.

Astelehenera arte

Igandean goizean goizetik abiatuko dituzte jarduerak, 10:00etan hasita. Meza nagusia egingo dute aurrena, eta ondoren, hamaiketakoa Laja II.a eta Lutxurdio trikitilariekin. Eguerdian bazkaria izango da –bihar arte izango da apuntatzeko epea, telefono berera deituta–, eta arratsaldean, berriz, herri kirol ekinaldia, 18:30ean. Lau aizkolari eta harri-jasotzaile bat izango dira Urkian: Igoin Pikabea, Laiene Pikabea, Unai Etxeberria, Uxue Ansorregi eta Udane Ostolaza, hurrenez hurren. Eguna borobiltzeko, azkenik, erromeria izango da.

Gurutze Deunaren egun berezi bezain tradizionalarekin itxiko dute urkiatarrek jai asteburua, 11:00etan egingo duten meza nagusiarekin zein ondorengo hamaiketakoarekin. Saskiaren zozketa, 14:00etan egingo da.

Itsasondoarrek dena prest dute garagardo azokarako

Goierriko Hitza — 2026-06-17 10:00:08

Garagardo azoka izango da ekainaren 19an, 20an eta 23an Itsasondon, Arbelaitz elkarteak antolatuta. Festa, jana, musika eta edariak aurkitu ahal izango dira asteburuan Errota pilotalekuko garagardotegi berezian. Iker Mendizabal antolakuntzako kideak azaldu du hamalau urte igaro direla aurreneko garagardotegia jarri zutenetik: «Elkartean egindako obra handi bat diruz laguntzeko asmoz erabaki genuen antolatzea; eskuzabalik hartu zen herrian, eta ordutik, urtero egin izan dugu».

Ostiralean 18:00etan zabalduko ditu ateak baina irekiera ez da nolanahikoa izango. Azken urteetan ohikoa bihurtu da udalaren ekimenez plazara artistaren bat edo beste ekartzea, arratsaldeko ekinaldia eta afal aurreko giroa musika doinuez apaintzeko. Mendizabalen hitzetan, «antolakuntzak eskertzen du azken urteetako ahalegin hori».

Aurtengoan, Ines Osinaga musikaria izango da herriko plazan, 20:00etan hasita. Iluntzera arte iraungo du festak, eta 00:00etara bitarte, hamabi garagardo ezberdin dastatzeko aukera izango dute herritarrek: alemaniarrak, belgiarrak, euskaldunak… eta edanaz gain, jatekoa ere izango da aukeran, besteak beste, ukondoa, saltxitxak, solomoa eta postrea. «Ukondoak bertan erretzen ditugu eta kargarik handiena elkarteko zuzendaritzak hartzen duen arren, bazkideek eta herriko partikularrek ere bolondres lanak egiten dituzte», dio Mendizabalek.

23an, taberna soilik

San Joan bezperan, dena den, ekainaren 23an, taberna soilik egongo da zabalik, eta ezingo da afaltzeko tarterik hartu. Gainerakoan, antolatzaileek pilotalekura gerturatzeko, garagardoaz gozatzeko eta herri ekimenean parte hartzeko deia egin die herritarrei.

Lau bertsolari gonbidatuen saio berezia ostiralean Itsasondon

Goierriko Hitza — 2026-06-04 10:43:30

Itsasondoarrentzat ohikoa bihurtu da ekaina partean punta-puntako bertsolarien saio berezia jasotzea herrian. Orain urte batzuk hasi ziren aurreneko gonbidatuak Itsasondoko pilotalekura eramaten, eta aurtengoan ere ez dute hutsik egingo.

Bihar ostirala, 18:30ean hasita, lau bertsolari gonbidatu ariko dira pilotalekuan kantari Saroi Jauregi zaldibiar gai jartzailearen esanetara. Horien artean daude Xabat Illarregi leitzarra, Onintza Enbeita muxikarra, Aitor Etxebarriazarraga gernikarra eta Sarai Robles barañaindarra. Aurten ez da goierritarrik izango bertsolarien artean.

Sarrera doakoa izango da eta ez da beharrezkoa izango inon izena ematea. Hartara, euskara sustatzeko, kultura indartzeko eta bertsozaletasunari bultzada emateko, herritarrei zein goierritarrei gonbidapen berezia egin diete antolatzaileek.

Itsasondok eta Bidania-Goiatzek irabazi dute Gipuzkoako Herri Txikietako Kopa

Goierriko Hitza — 2026-06-01 14:41:22

Jende ugarirekin jokatu ziren larunbatean Gipuzkoako Herri Txikietako Kopako finalak Ikaztegietan, eta jardunaldi horrekin itxi dute aurtengo denboraldia. A mailan, Bidania-Goiatz izan zen irabazle, eta B mailan, berriz, Itsasondo. Hasieratik erakustaldi ederra egin zuten goierritarrek eta partida gogor baten ostean, gol baten aldean nagusitu ziren.

Liga irabazi eta Kopan ere ezin zuen bestelako emaitzarik lortu Bidania-Goiatzek. A mailako txapeldun izan ziren, Leaburu-Txaramari 3-2 mendean hartuta. Neurketa estuan lehiatu ziren eta amaierara arte iraun zuen emozioak. Hirugarren postuan, berriz, Ikaztegieta geratu zen, eta laugarrenean, Elgeta. Ikaztegietak 10-6 hartu zuen mendean Elgeta.

B mailan, berriz, Itsasondoko Ijitok taldeak irabazi zuen, 6-5 Ikaztegietaren aurka. 1-0 eta 2-1 aurreratu ziren hasieran goierritarrak, baina etxekoen ahaleginek ez zizkieten gauzak erraz jarri. 3-3 berdindu, eta ostera, ikaztegietarrak aurreratu ziren markagailuan, 3-5. Azkenerako, itsasondoarrek 5-5 berdindu eta azken segundoetan lortu zuten azken gola. Jon Aseginolaza izan zen goleatzailerik onena.

Gipuzkoako areto futboleko Kopako finalean da Itsasondo

Goierriko Hitza — 2026-05-29 10:53:10

Gipuzkoako Herri Txikietako Kopa bukatzear da, eta asteburuan Ikaztegietako frontoian jokatuko diren finalekin agurtuko da. Tolosaldea, Debagoiena eta Goierriko zenbait herri txikietako talde iritsi dira final horietara, A eta B mailetan. Horien artean da Itsasondo ere.

16:30ean hasita, A mailako finala jokatuko da aurrena, Bidania-Goiatz eta Leabururen artean. Maila bereko hirugarren eta laugarren postuak jokatuko dira jarraian, Ikaztegieta eta Elgetaren artean, eta B mailako finalarekin amaituko da jardunaldia. Ikaztegieta eta Itsasondoren artekoa izango da azken hori.

Jardunaldia amaitzean, sari banaketa egingo dute.

Esanezin eta Jurgi Ekiza, akustikoan Itsasondon

Goierriko Hitza — 2026-05-28 10:27:42

Esanezin taldearen eta Jurgi Ekiza abeslariaren kontzertuaz gozatzeko aukera izango dute bihar arratsaldean, ostirala, Itsasondon. Kontzertu akustikoak egingo dituzte, 19:00etan hasita, herriko plazan. Esanezinen txanda izango da aurrena, 19:00etan, eta Ekizarena ondoren, 20:15ean. Sarrera doan izango da, eta bertaratzeko deia egin du Itsasondoko Udalak.

Itsasondoko udalekuetarako izen ematea, zabalik

Goierriko Hitza — 2026-05-26 09:49:53

Itsasondoko Udalak dagoeneko zabaldu du udaleku irekietan izena emateko epea; ostirala izango da, hilaren 29a, udaletxean izena eman eta dokumentazio guztia aurkezteko azken eguna.

Itsasondoko udalekuak aurten ekainaren 22tik uztailaren 17ra bitartean gauzatuko dira, hiru orduz, 10:00etatik 13:00etara. 5 eta 12 urte bitarteko haurrentzat bideratuta egongo dira –2014 eta 2021ean jaiotakoak–. Gurasoek nahiko balute, zaintza aukera ere egongo litzateke udalekua hasi baino ordubete lehenago, goizeko 09:00etatik 10:00etara bitartean, hain zuzen.

Tarifei dagokienez ere, prezio ezberdinak izango dira: Itsasondon erroldatuta dauden haurren familiek 120 euro ordaindu beharko dituzte, eta udalerrian erroldatuta ez daudenen familiek, berriz, 155 euro. Ordainketa kontu honetan egin beharko da: ES50 2095 4408 52 1060024675 haurraren izen-abizenak eta ‘uda kanpaina 2026’ adierazita.

Udalaren web orrian eskegita jarri duten galdetegian aurkitu ahal izango da informazio guztia, www.itsasondo.eus webgunean, eta hori bete beharko dute familiek, haurraren izen-abizenak, jaioteguna, gurasoen izen-abizenak, zerbitzu motza… eta beste zenbait datu adierazita.

Urkiko auzotarrek festa asteburua izango dute

Goierriko Hitza — 2026-04-30 14:04:22

Urkiko auzotarrek festa asteburua izango dute, Gurutze deunaren jaiak ospatzeko. Bi eguneko festa jardunaldia izango dute, larunbatean hasi eta igandean amaituta. Iluntzean emango diote hasiera ofiziala, 20:00etan, eta lagunarteko afariarekin zein Ostolaza eta Narbaiza trikitilarien sasoiarekin girotuko dute gaua.

Igandea, berriz, zaindariaren eguna izango da, eta meza nagusia egingo dute, 11:00etan hasita. Ondorengo ekitaldi guztiak Laja II.a eta Lutxurdio trikitilariek alaituko dituzte: eguerdiko hamaiketakoa eta arratsaldeko erromeria, hain zuzen. Tartean, bazkaria eta XLI. Toka Txapelketa ere izango dituzte.

Gaur azken eguna
Otorduetara apuntatzeko azken eguna gaur izango da, eta bertaratu nahi duenak 680 342 121 zenbakira deitzea besterik ez du izango. Ekitaldietara animatzeko deia egin die antolakuntzak itsasondoar guztiei.

24. Korrika Goierrin. Arama-Itsasondo-Legorreta

Goierriko Hitza — 2026-04-01 08:39:12