Goierriko Hitza

Errigora sustraiak ahaztu gabe espaziora begira

Goierriko Hitza — 2026-10-24 17:40:58

Errigorak herri ekimenak hasierako boluntarioei omenaldia egin diete Lazkaon. Eguna hasteko Errigora sustraietatik espaziora dokumentala estreinatu dute Areria zineman. Jende asko hurbildu Euskal Herriko hainbat txokotatik, hori horrela zinema jendez bete da.

Dokumentalaren estreinaldiaren ondoren, Lazkaoko frontoira inguratu dira denak, hamaiketako egin ostean, omenaldi ekitaldia egiteko. Erramun Amundarain, hasierako boluntario izan zena eta lehengo urtean zendu zena, gogoratu dute bere argazki bat ipiniz oholtza gainean. Egunean zehar Kuxkuxtu txaranga urruñarra ere badabil giroa alaitzen. Behin omenaldia amaituta bazkaria egon da frontoiean bertan.

Omenaldiko argazkiak eta bideoa.

Udazkeneko kontzertua egingo du Legazpi Musika Bandak igandean

Goierriko Hitza — 2026-10-23 11:00:24

Legazpi Musika Bandak udazkeneko kontzertua eskainiko du igandean, urriak 25, Latxartegi aretoan. Emanaldia 12:30ean hasiko da, eta sarrera dohainik izango da. Ohi bezala, Jesus Castillejok Ezpeletak zuzenduko du kontzertua.

Hauxe da konzertuaren egitaraua:

Evocacion (Emilio Cebran Ruiz), martxa-pasodoblea
Coppelia (Leo Delibes), fantasia-opera
China march (Robert Allmend), martxa
Cora d´algar (Rafael Talens), mairuen martxa
Glenn Miller Medley (Naohiro Iwai), aukeraketa

Ekintzaileei zuzendutako laguntzak, Uggasaren eskutik

Goierriko Hitza — 2026-10-23 10:00:43

UGGASA Urola Garaiko Garapen Agentziak martxan jarritako tutoretza saioei esker, negozio edo ekintziletza ideia bat duten pertsonek aukera izango dute proiektua garatzeko eta martxan jartzeko. Lanbideren ekintzailetza sustatzeko programaren baitan kokatzen da laguntza, aholkularitza eta tutoretza zerbitzu hau.

Programaren helburua da negozio ideia bat duten pertsonei beren proiektuaren bideragarritasuna aztertzen laguntzea, negozio plana lantzea eta jarduera ekonomikoa martxan jartzeko beharrezko urratsak prestatzea. Horretarako, parte hartzaile bakoitzak gutxienez 25 orduko laguntza prozesu pertsonalizatua jasoko du, banakako tutoretzak eta aholkularitza espezializatua uztartuz.

Laguntza prozesuak hiru eta bost hilabete arteko iraupena izango du, eta bertan negozio ideia definitu, bideragarritasuna aztertu eta proiektua martxan jartzeko beharrezko tresnak landuko dituzte. Amaieran, tutoretza eta aholkularitzaz gain, diru laguntza bat jaso ahal izango dute partaideek, beti ere baldintzak betetzen badituzte.

Programan parte hartu ahal izango dute Lanbiden enplegu eskatzaile gisa inskribatuta dauden pertsonek, eta enpresa edo jarduera ekonomiko berri bat abian jartzeko asmoa duten pertsonek. Parte hartu nahi dutenen arteko hautaketan lehentasuna izango dute 30 urtetik beherako gazteek, 45 urtetik gorako pertsonek, eta diru sarrerak bermatzeko errenta jasotzen duten pertsonek. Era berean, emakumeen ekintzailetza sustatuko da. Informazio

Interesa duten pertsonek informazio gehiago jaso dezakete UGGASArekin harremanetan jarrita 943 72 58 31 telefono zenbakian, edo
aamenabar@uggasa.eus helbidera idatzita.

UGGASAk 30 urte baino gehiagoko esperientzia du ekintziletza sustatzen, eta urte hauetan ehunka proiektu lagundu ditu eskualdean, enpresa berriak sortzen, jarduera ekonomikoa indarzten eta enplegua sustatzen lagunduz.

Ludoteka bat, legazpiar guztientzat

Goierriko Hitza — 2026-10-23 09:04:11

San Ignazio, San Martin eta San Jose auzoetako Buskabaso elkartearen berpizkundeak zerbitzu berri bat ekarri die legazpiarrei: ludoteka bat. Buskabasok San Ignazioko eskola zaharretan duen egoitzan dago kokatuta, eta joan den astean egindako ate irekien saioren ondoren, martxan dago herri osoko haurrentzako eta familientzako.

Urte batzuetako etenaldiaren ondoren Buskabaso elkartea berriz lanean hasi zenean, zuzendaritza berriko lehen batzarrean hainbat proiektu jarri zituzten mahai gainean, Haritz Artzelus elkarteko lehendakariak gogoratu duenez, eta horietako bat zen azken aldian biltegi gisa bakarrik erabiltzen zen lokala txukuntzea eta herritarrei irekitzea. «Elkartearen lanaren ardatzetako batzuk integrazioa eta harrobia sortuz elkartea beraren oinarriak sendotzea direnez, ludoteka bat egitea pentsatu genuen», herri guztiari zerbitzua emateko.

Lankidetzan oinarrituta
Pentsatu, eta egin. Elkarteko kideek inguruko familien eta bizilagunen laguntza izan dute lokala egokitzeko lanetan, baita beste elkarte batzuen bultzada ere. Ludoteka altzariz eta materialez betetzeko, gainera, ez dute arazorik izan: «Olamendi eskolak hainbat material eman digu, Gironako DMJ Drums enpresak txalaparta txiki bat egin eta oparitu digu, Lenburrek argazkiak utzi dizkigu, Apatxo liburu dendak materiala eman digu, herritar askoko liburuak eta jostailuak ekarri dituzte…». Dena dela, material gehiago ere behar dute, eta dohaintzetarako irekita daude.

Buskabaso oso eskertuta dago proiektu hau gauzatzeko jaso duren laguntzarekin, eta egindako lanaren emaitzarekin. «Proiektua errealitate bihurtu ahal izan da bere aletxoa jarri duten pertsona guztiei esker, pertsona horien laguntasunari, eskuzabaltasunari eta ilusioari esker zehazki. Laguntza bakoitzak, ekarpen bakoitzak eta elkartasun keinu bakoitzak posible egin du guztion eta guztientzako gune honen sorrera».

Guztien artean hilabete gutxitan egindako lanaren ondoren, joan den asteko asteazkenean ireki zuten ofizialki ludoteka.

Asteazkenetan irekita
Zerbitzu berri hau herriko haur eta familia guztientzako da. Txoko desberdinetan dago antolatuta: ume txikienentzako jolasak, era askoko liburuak, adin desberdinetako jendearentzako mahai jokoak, musika tresnak… Bilerak eta tailerrak edo ikastaroak egiteko espazio bat ere badu lokalak.

Ludotekak poliki eman nahi ditu lehen pausoak, eta momentuz, astean behin egongo da irekita, asteazkenetan 17:00etatik 20:00etara.

Baina aurrerago ordutegia zabaltzeko asmoa dute, eta proiektu berriei irekiko dizkie ateak, zerbitzua bera osatzen joateko. Horretarako dirua behar dute, lokalaren mantentze gastuetarako eta asegururako bezala, eta hori lortzeko, besteak beste, Gabonetako loteria salduko dute Buskabasoko kideek.

Lan munduari eskainita, beste bi horma irudi erraldoi Legazpin

Goierriko Hitza — 2026-10-22 12:32:01

Legazpik bi horma irudi berri ditu. Iruñeko Deltadec enpresak aste honetan amaitu ditu Urola kaleko industrialdearen sarreran, bi alboetako paretetan, margotutako lanak. Herriko lan mundiari daude eskainita; batek lantegietako garai bateko langileen irteera jendetsuak irudikatzen ditu, eta besteak, Eduardo Txillidak Patrizio Etxeberriaren lantegian bertako langileekin egindako Haizearen orrazia eskultura.

Udalaren eskariz egindako horma irudiak dira, eta hauek, hirugarren proiektua osatzen dute. Lehena abuztuan zehar margotu zuten artista iruindarrek Kale Nagusian, Mirandaolako burdinola irudikatuz. Bigarren proiektua Azokako horman gauzatu zuten, hori baserri munduari eskainita.

Lan arloari eskainitako hirugarren proiektu hau amaituta, Deltadec enpresako kideak Bikuña kiroldegira lekuz aldatu da, laugarren lanari ekiteko.

Haurra galdu duten gurasoen testigantzekin mahai ingurua ostiralean, Latxartegin

Goierriko Hitza — 2026-10-22 11:40:27

Legazpiko Udalak bat egin zuen joan den astean, urriaren 15ean ospatu zen Haurdunaldiko, Jaiotza inguruko eta Jaioberriko Doluaren Nazioarteko Egunarekin, eta udaletxea hainbat egunez kolore arrosaz eta urdinez argiztatzearekin batera, Aitatxo dokumentalaren biharko proiekzioa ere babestu du, Zine Klub Legazpi eta Esku Hutsik elkartearekin lankidetzan.

Izan ere, Legazpiko Udala oso inplikatuta dago jaiotza inguruan edo jaioberritan hil diren haurren doluarekiko sentsibilizazioan. Dolu horren inguruan sortutako Esku Hutsik elkartearekin harreman estuak ditu, eta hilerrian haur horiei eta familiei eskainitako Zu memoria lekua sortu zuen iaz. Gainera, aurten talde bat sortu dute dolu horretan familiei eta hurbilekoei laguntzeko.

Pelikularen proiekzioaren ostean, mahai ingurua egingo da, eta bertan ondorengoek hartuko dute parte: Maria Gonzalez, Esku Hutsik elkarteko lehendakaria eta saioa gidatuko duena; Virginia Marcos elkarteko dolu taldeko psikologoa; Iosu Elorza eta Oihana Zurdo, haurra galdu duen familia; eta Anakotz Lasarte, dokumentalaren jatorrizko ideiaren sortzailea eta protagonista.

Burdin jaurtiketaren txapelketa, lehenengoz Legazpin

Goierriko Hitza — 2026-10-22 10:05:33

Ormaiztegin harriarekin, Nafarroako Martzillan aitzurrarekin, eta Errioxako hainbat herritan xirmendu sortarekin egiten duten bezala, Legazpin burdin totxoarekin egingo dute jaurtiketa txapelketa.

Igandean estreinatuko dute jokoa, Ardanbidetako erromerian. Kimuberri kultura elkarteko kideek asmatu dute, eta herritar guztiei luzatu diete parte hartzeko gonbita.

Mirandaolako burdinolatik eramango dute burdin totxoa, 4 kilo pisatzen duena, eta urrutien botatzen dutenentzat, sariak izango dira, emakumezkoen eta gizonezkoen kategorietan banatuta.

Haurrentzako jolas eta herri kirol saioaren ondoren izango da txapelketa, eguerdi aldera.

Bost argazkilari, bost estilo eta bost gai

Goierriko Hitza — 2026-10-21 13:33:31

Ikatza elkarteko Iosu Garai Ibabe, Miguel Angel Perez Herrero, Gurutze Langarika Urbitarte, Jesus Alonso Arranz eta Jose Venegas Flores argazkilariek erakusketa dute ikusgai Kultur Etxean, joan den ostiraletik. Erakusketa urriaren 30era arte egongo da zabalik, astelehenetik ostiralera, 17:00etatik 20:00etara.

Erakusketa honen ideia duela bi urte sortu zela azaldu du Gurutze Langarika Ikatzako lehendakariak: «Duela bi urteko elkartearen batzar orokorrean erabaki genuen bazkideon erakusketa kolektibo bat egitea, eta deialdia eginda, bost bakarrik agertu ginen prest. Kostatu zaigu ideia gauzatzea, baina hemen dago emaitza».

Argazki pertsonalak direla dio, «artistikoak, autore argazkiak». Bakoitzak sei argazkiko serie bat osatu du, eta kalitate altuan inprimatuta, berriki margotu duten Kultur Etxeko erakusketa aretoko hormetan eskegi dituzte; «dotore geratu da». Egiten duten lana erakusteko eta ezagutzera emateko modua dela nabarmendu du.

Lan hori Legazpin baino lehen, Elgoibarren erakutsi dute irailean, Kultur Kafean. Gero, Urretxura, Zumarragara eta Donostiara eramango dute erakusketa.

Bost argazkilari, bost gai

Langarika «sormenaren zale amorratua» da. Teknika eta estetika konbinatuz, eta kameraren mugimendua erabiliz, estilo piktorikoaren antzekoa lortu nahi du. Emakumeak etxe gorriaren aurretik pasatzen gaia aukeratu du.

Iosu Garairen gaia, berriz, Antsietatea da. «Natura eta bidaien maitalea» da, eta bi arlo horiekin lotuta dago bere lana. Argazkiak errealismotik abstrakziora lantzen ditu, « esperimentazioaren eskutik» inpresionismoa, erromantizismoa, minimalismoa bezalako estilo piktorikoak landuz.

Jesus Alonsok naturari eskaini dio erakusketa. «Naturari egindako argazkietan kameran nahita egindako mugimenduaren edertasuna eta indarra» helaraztea da bere helburua.

Jose Venegasek «momentuen argazkiak ateratzea» du gustuko, eta «edozein motatako argazkiak ateratzen dituen argazkilaria» da. Erakusketan Bizitza hemendik igaro zen eta bere forma lurrean utzi zuen» gaia landu du.

Miguel Angel Perez natur argazkilaria da, eta txoriak dira bere «pasioa». Bizitzaren eta heriotzaren artean izenburua harri dio bere argazki sortari.

Ardanbidetako erromeria ospatuko da igandean

Goierriko Hitza — 2026-10-20 16:39:13

Ardanbidetako erromeriaren eguna izango da igande hau, hilak 25, eta Kimu berri elkarteak antolatuta, festak eta kirol jarduerek hartuko dute aterpetxe horren inguruko zelaia. Egun osorako ekintzak prestatu ditu elkarteak, baita bazkaria ere, eta musika jartzeaz trikitilariak arduratuko dira. Gainera, autobus zerbitzua izango da Laubideko biribilgunetik, goiz eta arratsaldez, 10:00etatik aurrera.

Erromeria eguna goizean goiz hasiko da, eta Izadi Zaleak mendi elkartearekin batera, Kimu-berri aterpearen ingurura oinez igotzeko deia egin dute. Hitzordua 09:00etan izango da, Laubideko biribilgunean.

Goian, aterpean, salda eta txorixoa banatuko dute 10:00etatik aurrera borondatearen truke, eta haurrentzako eta helduentzako arku tiro saioak eta zaldi paseoak hasiko dira ondoren. Eguerdian haurrentzako jolasak eta erronka herrikoia hasiko dira. Horiek amaitzean, toka txapelketari emango diote hasiera. Bertan bazkaltzeko aukera ere izango da, babarrun jana hain zuzen, eta festak bazkalondoan jarraituko du, 16:00etan sokatira «mundiala» hasi arte.

Erromeria hau urteetan Zingi Zango euskara elkarteak Agorreko Santikutzetan antolatzen zuen festaren ondorengoa da. Elkartea desegin zenean, Kimu-berri aterpea kudeatzen dutenek hartu zuten erreleboa, eta urriko azken igandean hasi ziren antolatzen duela urte gutxi.

Klima azoka egingo dute ostegunean Laubiden

Goierriko Hitza — 2026-10-20 13:14:38

Legazpiko Udalak bat egin du urriaren 16tik 25era antolatutako Asteklima, Euskadiko Klimaren eta Energiaren Astearekin. Herritarrak klima-aldaketaren aurrean mobilizatzea eta trantsizio energetiko justu baterantz aurrera egitea helburu duen ekimena da Asteklima.

Horren barruan, klima azoka prestatu du etzirako, urriak 22. Esperientzia interaktiboa eta parte hartzailea da, pertsonei klima aldaketaren kontzeptu nagusiak modu praktiko eta dibertigarrian hurbiltzeko diseinatua. Zazpi karpa tematikoz osatuta dago, eta horien bidez, bisitariek klima aldaketaren ondorioei buruz ikasi ahal izango dute, eta etxetik, eguneroko mugikortasunean, kontsumoan edo aisialdian etorkizun iraunkorrago batean nola lagundu ikasiko dute.

Laubideko oinezkoen gunean egongo da kokatuta klima azoka hau, eta goizean, Olamendi eta Haztegi ikastolako ikasleentzat egongo da irekita bereziki. Tipi Tapako kideak ere bisitan joango dira.

Arratsaldean, herritar guztientzat egongo da zabalik, 16:00etatik 18:00ak arte. Aurten, EVE Energiaren Euskal Erakundeak energiaren inguruko proposamenak ekarriko ditu. Alde batetik, energiaren inguruko dinamika bat eskainiko du, eta bestetik, pantaila ukigarri bat ere jarriko du, bisitariek energia kontsumoari buruzko datuak eta informazioa kontsultatzeko.

Gainera, 17:30etik 18:30era, energiari buruzko hitzaldi laburrak eskainiko dituzte, energia berriztagarrien eta trantsizio energetikoaren inguruko azken berriak eta joerak azaltzeko.

Goiz Deia txistulari bandak kalejira egingo du igandean

Goierriko Hitza — 2026-10-20 12:05:01

Goiz Deia txistulari bandak ekin dio hilean behin igande goizez herriko auzoz auzo egiten dituen kalejiren agendari.

Igande honetan aterako dira Legazpiko txistulariak kalera 09:00etan, eta Itxaropen eta Domingo Agirre auzoetan, Aizkorri kalean eta Bikuña-enea plazan ibiliko dira goiza txistu eta atabal doinuekin girotzen.

Kooperatibismoak ere badu lekua Legazpiko Fabrikan

Goierriko Hitza — 2026-10-19 17:25:49

Euskal Herriko industrializazioaren bilakaera azaltzen duen Fabrika museoak kooperatibismoari ere lekua egin dio. Joan den ostiraletik eta azaroaren 1era arte, Jose Maria Arizmendiarreta, euskal kooperatibismoaren hastapenak izenburuko erakusketa dago ikusgai bertan, Lenbur Fundazioak antolatuta.

Erakusketa asteburuetan egongo da zabalik: ostiraletan 18:00etatik 20:00etara, larunbatetan 11:30etik 13:30era eta 18:00etatik 20:00etara, eta igandeetan 11:30etik 13:30era. Sarrera dohainik da.

Jose Maria Arizmendiarrieta (1915-1976), Mondragon kooperatiba-mugimenduaren sustatzailearen pentsamenduari eta obrari buruzko erakusketa hau joan den ostiralean aurkeztu zuten. Ekitaldian, Lenbur Fundazioako Agurtzane Elustondo eta Olatz Conde eta udal zinegotzi Amaia Aizpuruaren batera, Ander Etxeberria Mondragon taldeko Hedapen Kooperatiboko zuzendaria, Amaia Agirre Fagor taldeko idazkari nagusia, Jesus Mari Arizmendiarreta Jose Maria Arizmendiarretaren iloba, Javier Sotil Mondragon korporazioko zuzendari ohia, Javier Marcos Mondragon korporazioko komunikazioaren zuzendaria eta aurtengo maiatzera arte Fagor taldeko lehendakaria izandako Joxean Alustiza izan ziren.

Olatz Condek azaldu zuenez, “Fabrika euskal industrializazioari eskainita dagoen espazioa da, eta makinetan baino gehiago, pertsonengan jartzen dugu bertan arreta nagusia, izan Patrizio Etxeberria enpresaria, izan Nicanor Gutierrez labezaina, edo izan ekonomatuko Elvira. Legazpiko pertsonak dira, Legazpiko istorioak… baina Euskal Herri osora zabaldu daitezkeenak”. Baina Euskal Herriko industrializazioaren historia horretan “kooperatibismoa falta zen, eta aurten lekua egin diogu”.

Condek gaurko kooperatibaren munduko jendearen laguntza aipatu eta eskertu zuen, “testuak osatzeko, argazkiak lortzeko…”, baita Arizmendiarreta beraren familiarena ere, “haren txikitako eta heldutako bitxikeriak kontatu dizkiguna”.

ARGAZKIAK: Lenbur Fundazioa eta Agustin Zubeldia

Euskal Jolasen festa ospatuko da larunbatean Legazpin

Goierriko Hitza — 2026-10-19 14:05:12

Sorgintxulok dinamizatuta, euskal jolasen festa ospatuko da larunbatean, urriak 24, plazan, 17:00etatik aurrera, edo Azokan eguraldi txarra egiten badu. HHko 3. mailatik LHko 4. mailara bitarteko haurrei eta haien familiei zuzenduta dago.

Ostegunean 14:00etan amaituko da izena emateko epea, udalaren www.legazpi.eus webgunean

Legazpik bat egin du bularreko minbiziaren nazioarteko egunarekin

Goierriko Hitza — 2026-10-19 13:00:54

Gaur, urriak 19, bularreko minbiziaren nazioarteko eguna dela baliatuta, Legazpiko Katxalin elkarteak hainbat jarduera antolatu ditu gaixotasun horri buruz sentsibilizatzeko, eta aldi berean, gizonezkoen osasunari keinu bat egiteko.

Udalak ere bat egin du egun honekin, eta begizta arrosa jarriko du udaletxeko balkoian, eta gauez kolore arrosarekin argiztatuko ditu eraikineko fatxadak.

Biharko, eta gizonezkoen gaixotasunei tokia eginda, Movember mugimendua ezagutarazteko hitzaldia antolatu dute. Gizarte Etxean egingo dute, Movember, gertutik izenburuarekin, 18:00etan hasita.

Asteazkenean, urriak 21, pintxo-pote solidarioa egingo dute Laubiden, eta postulazio solidarioak ere egingo dituzte, ostiralean plazan, eta larunbatean, Kale Nagusiko Eroski ondoan. Elkartearen materiala ere salduko dute.

Aterpean ospatu da aurtengo kulturen arteko eguna

Goierriko Hitza — 2026-10-19 11:45:42

Azokan eta Urbeltz pilotalekuan ospatu da aurten Legazpiko Kulturen arteko eguna. Eguraldiak derrigortuta, gastronomia eta artisautza postuak eta topaketa horren aitzakian antolatutako dantza eta musika saioak eta ikastaro eta tailerrak aterpera eraman zituzten antolatzaileek. Festa honetako berritasuna izan behar zuen desfilea ere bertan behera geratu zen eguraldiagatik.

Baina aterpean izanda ere, larunbat goizerako antolatutako festak ez zuen erakargarritasunik galdu, eta herritar ugari biltzea lortu zuen, kanpoko jatorria duten legazpiarren kulturek eta ohiturek deituta.

Hotz Legazpi elkarteak eta udalak antolatuta, aurtengoarekin hirugarren edizioa bete du Kulturen arteko egun honek. Aurten hamabost herrialdetako ordezkarien partaidetza izan du: Errumania, Kosta Rica, Kuba, Senegal, Nikaragua, Nigeria, Venezuela, Euskal Herria, Peru, Kolonbia, Argentina, Honduras, Mendebaldeko Sahara, Maroko eta Pakistan.

AARGAZKIAK: Nati Madinabeitia, Hotz Legazpi eta Legazpiko Udala (Gorka Gomez)

Gorka Gomezek irabazi du Ikatzaren argazki rallya

Goierriko Hitza — 2026-10-19 09:49:16

Bi legazpiarrek irabazi dituzte lehenengo bi sariak Ikatzaren aurtengo argazki rallyan. Gorka Gomez izan da lehenengoa, eta Gurutze Langarika bigarrena. Hirugarren saria Bizkaiko Simon Rodriguezentzat izan zen, eta herriko saria Rafa Garciak jaso zuen. Sari banaketa ekitaldia joan den ostiralean egin zuten, Kultur Etxean, Eric Galvez alkatea eta Miryam Galilea kultur zinegotzia bertan zirela.

Ikatzaren argazki rallya, Batis Goikoetxearen izena daramana, joan den irailaren 13an egin zuten, leku askotako 68 argazkilariren partaidetzarekin. Partaide guzti horiek aurkeztutako lanen proiekzioa egin zuten sariak banatu aurretik.

Argazki erakusketa
Sari banaketa ekitaldi honekin batera, argazki erakusketa ere ireki zuten Kultur Etxean. Horretan, Ikatza elkarteko partaide diren Iosu Garai, Miguel Angel Perez, Gurutze Langarika, Jesus Alonso eta Jose Venegas herritarrek egindako argazkiak daude ikusgai.

Erakusketa urriaren 30era arte egongo da zabalik, astelehenetik ostiralera 17:00etatik 20:00etara.

Euskal kooperatibismoari buruzko erakusketa inauguratuko dute gaur Fabrikan

Goierriko Hitza — 2026-10-16 14:00:14

Jose Maria Arizmendiarreta, euskal kooperatibismoaren hastapenak izenburuko erakusketa inauguratuko du gaur Lenbur Fundazioak Fabrikan, 18:00etan. Azaroaren 1era arte egongo da ikusgai, asteburuetan: ostiraletan 18:00etatik 20:00etara, larunbatetan 11:30etik 13:30era eta 18:00etatik 20:00etara, eta igandeetan 11:30etik 13:30era.

Mondragon kooperatiba-mugimenduaren sustatzailearen pentsamenduari eta obrari buruzko erakusketa da hau. Zehazki, Jose Maria Arizmendiarrietaren (1915-1976) ibilbidea eta pentsamendua jasotzen ditu. Apaiza eta pentsalari praktikoa izan zen Arizmendiarreta, eta hezkuntzaren, lanaren eta elkartasunaren inguruko ideiak proiektu zehatz bihurtu zituen; proiektu horiek sakon eraldatu zuten Arrasateko gizartea.

Erakusketak bere obra nagusia izan zenari jartzen dio arreta: kooperazioari. Haren ibilbidearen bidez, euskal kooperatiba-mugimenduaren garapenerako funtsezkoak izan ziren ekimenak nola bultzatu zituen ezagutzeko aukera izango da: Lanbide Eskolaren eta ULGORren sorreratik hasi, eta Fagor, Euskadiko Kutxa, Auzo-Lagun eta Ikerlanen gisako proiektuetaraino, besteak beste.

Biografia kronologiko batetik harago, erakusketak haren pentsamenduaren zutabeetako batzuk jorratzen ditu: hezkuntza, berrikuntza, etxebizitza, finantzaketa, euskal kultura, eta emakumea eta lana.

Garaiko argazkiek, objektuek eta etxetresna elektrikoek osatzen dute ibilbidea, Arizmendiarrietaren figura eta euskal kooperatibismoaren erreferente nagusietako baten jatorrian dauden ideiak gertutik ezagutzeko aukera eskainiz.

La Bellota extremadurar zentroak urteroko kultur asteari ekingo dio gaur

Goierriko Hitza — 2026-10-16 10:30:30

La Bellota extremadurar zentroak urteroko kultur astea ospatuko du, gaurtik hilaren 24ra. irekiera ekitaldia gaur izango da 18:00etan San Ignazio auzoan duten egoitzan. Elkarteko lehendakariak ongi etorria egingo du eta ohorezko ardoa eskainiko die bertaratzen direnei. Hortik aurrera, ekitaldiz beteriko egitarauari ekingo diote, eta gehienak San Ignazioko egoitzan izango dira.

Bihar haurren eguna da, eta igandean gozogintzari egingo diote lekua. Astelehenean kakorratz lanak egingo dituzte, eta hurrengo hiru egunak ohiko txapelketentzako gorde dituzte: tutea, dominoa eta Extremaduran oso zabalduta dagoen cuatrola karta jokoa. Gozogintzan, kakorratzetan eta jokoetan parte hartzeko, bellotalegazpi@hotmail.com helbidera idatzi behar da.

Ostiralean Extremadurari buruzko dokumental bat eskainiko dute, eta larunbatean itxiko dute kultur astea, bermuta hartuz eta txapelketetako sariak banatuz.

EGITARAUA
Urriak 16, ostirala
18:00. Presidentearen ongi etorria eta ohorezko ardoa eta luntxa guztientzat.

Urriak 17, larunbata
17:00. Haurren eguna: jolasak eta askaria.

Urriak 18, igandea
10:00. Extremadurako gozogintza tradizionalaren tailerra eta dastaketa.

Urriak 19, astelehena
17:00. Kakorratz tailerra.

Urriak 20, asteartea
18:00. Kuatrola lehiaketa.

Urriak 21, asteazkena
18:00. Tute lehiaketa.

Urriak 22, osteguna
18:00. Domingo lehiaketa.

Urriak 23, ostirala
18:00. Extremadurari buruzko dokumentalaren proiekzioa.

Urriak 24, larunbata
Kultur astearen amaiera: bazkideen bermuta eta sari banaketak.

Urtatza birgaitzeko plan integrala azaltzeko, auzotarrak bilerara deitu ditu udalak

Goierriko Hitza — 2026-10-15 10:28:12

Legazpiko Udalak bilerara deitu ditu Urtatzako bizilagunak, auzoa bere osotasunean lantzeko planean jasotako proposamenak azalteko. Bilera hurrengo asteartean izango da, hilak 20, 18:00etan, Olamendi eskolan.

Medina & Murua arkitekto legazpiarrek gidatutako taldeak landutako plana da, eta bertan, auzoa modu integralean hobetzeko proposamenak jaso dituzte, irisgarritasuna, jasangarritasuna eta auzotarren kalitatea erdian jarrita. Proposamen horiek bizilagunei helaraztea eta haien iritziak, ideiak eta kezkak jasotzea da bileraren helburua. Izan ere, udal ordezkariek azaldu dutenez, “Urtatza, bere ezaugarri bereziekin, auzo kohesionatu eta bizigarria da, eta bertako bizilagunek beren ingurua zaintzeko konpromiso argia erakutsi dute eta are garrantzitsuagoa dena: auzoan bertan bizi nahi dute”.

Erik Galvez alkateak azpimarratu du Urtatzako bizilagunen iritzia “ezinbestekoa” dela prozesu hau aurrera eramateko. “Guztion artean plan bat landu nahi dugu, auzo irisgarriago, bizigarriago eta jasangarriago bat lortzeko”. Parte hartze saio hau auzoaren etorkizunerako aukera “ezin hobea” dela ere esan du, eta horregatik udalak guztion ekarpenak jasotzea eta lantzea nahi duela, “auzoaren bizitza eta bizi kalitatea hobetzeko”.

Auzoaren etorkizuna eraikitzea “lan kolektiboa” dela ere nabarmendu du, eta “iritzi bakoitza garrantzitsua da Urtatza irisgarriagoa, iraunkorragoa eta bertan bizi direnen benetako beharretara egokitua lortzeko”.