Goierriko Hitza

Errigora sustraiak ahaztu gabe espaziora begira

Goierriko Hitza — 2026-10-24 17:40:58

Errigorak herri ekimenak hasierako boluntarioei omenaldia egin diete Lazkaon. Eguna hasteko Errigora sustraietatik espaziora dokumentala estreinatu dute Areria zineman. Jende asko hurbildu Euskal Herriko hainbat txokotatik, hori horrela zinema jendez bete da.

Dokumentalaren estreinaldiaren ondoren, Lazkaoko frontoira inguratu dira denak, hamaiketako egin ostean, omenaldi ekitaldia egiteko. Erramun Amundarain, hasierako boluntario izan zena eta lehengo urtean zendu zena, gogoratu dute bere argazki bat ipiniz oholtza gainean. Egunean zehar Kuxkuxtu txaranga urruñarra ere badabil giroa alaitzen. Behin omenaldia amaituta bazkaria egon da frontoiean bertan.

Omenaldiko argazkiak eta bideoa.

2027ko egutegirako legorretarren lanak jaso nahi ditu udalak

Goierriko Hitza — 2026-10-23 11:56:07

Legorretako Udalak legorretarrek ateratako argazkiekin osatu nahi du datorren urteko egutegia, eta herritarren proposamenak jasotzeko deialdia zabaldu berri du: datorren azaroaren 12ra arte izango dute herritarrek argazkiak bidaltzeko aukera.

Parte-hartzeko beharrezkoa izango da zenbait baldintza betetzea: argazkia Legorretan ateratakoa izatea, herritar bakoitzak gehienez ere bost argazki aurkeztea, argazkiek hazbeteko 300 pixeleko erresoluzioa izatea, JPG formatuan aurkeztea, eta tamaina 297×210 milimetrokoa izatea. Horiek guztiak betetzen dituzten herritarrek, kultura@legorreta.eus helbidera bidali beharko dute euren proposamena.

Ekimenean parte hartzeko deia zabaldu nahi izan du Legorretako Udalak.

Maixabel Lasak Gipuzkoako Urrezko Domina jasoko du

Goierriko Hitza — 2026-10-23 11:06:22

ETAk indarkeria utzi zuela hamabost urte bete berri diren honetan, Maixabel Lasak (Legorreta, 1951) Gipuzkoako Urrezko Domina jasoko du, bortizkeriaren biktima izandako pertsona guztien “duintasunaren aitortzan eta elkarbizitzaren berreraikuntzan” egindako ekarpenagatik. Datorren abenduaren 16an jasoko du legorretarrak saria, Diputazioaren jauregian egingo den ekitaldian.

Lurraldeko sari instituzional gorena da, eta Eider Mendoza diputatu nagusiak eman du gaur aurtengo sarituaren berri. Lasaren “ausardia eta gizatasuna” azpimarratu ditu, bizipen pertsonal “oso mingarrietatik” abiatuta -ETAk Juan Mari Jauregi senarra hil zuen 2000ko uztailean-, “elkarri entzuteko, indarkeriak eragindako mina aitortzeko eta erreparaziorako” bide berriak ireki dituelako.

Lasaren ibilbidea

Eusko Jaurlaritzako Biktimen Arretarako Bulegoko zuzendaria izan zen Lasa 2001 eta 2012 urteen artean; hainbat egitasmo bultzatu izan ditu azken hamarkadetan, besteen artean, Gleencree ekimena, ETAko presoak birgizarteratzeko Langraiz bidea edota topaketa errestauratiboak, une oro “biktimen pluraltasuna eta duintasuna” gidari izanik, aldundiak jakinarazi duenez.

Mendozak gaineratu du bere ahotsaren eta bizitza ibilbidearen bitartez, urteetan “erreferentzia etiko eta zibiko oso indartsua” eskaini diola Gipuzkoako eta Euskal Herriko gizarteari, hain zuzen ere bakea eta elkarbizitza eraikitzea “lehen mailako desafioa” zen momentu batean.

Haur eta familientzako irakurketa klubak aurrenekoz martxan dira Legorretan

Goierriko Hitza — 2026-10-21 12:52:54

Ikasturte berriarekin batera, dinamika berriak martxan dira Legorretan: aurreneko aldiz, udalerriko haur eta familiei zuzenduriko irakurketa-klubak izango dituzte udalerrian. Legorretako Udalaren ekimenez antolatu dituzte, eta Galtzagorri elkartea arduratuko da saioaren dinamika zein gidaritza orokorraz. Ostegunean abiatuko dituzte, urriaren 22an, Legorretako Udal Liburutegian.

Irakurketa-kluben helburu nagusia da gurasoen eta haurren artean liburutegira joateko ohitura sortzea eta sendotzea, eta, aldi berean, haurrei zuzendutako euskal literatura abiapuntu hartuta, irakurketara gerturatzea. Zentzu horretan, irakurketa-ohiturak sustatzea, kalitatezko euskal literatura ezagutaraztea eta guraso nahiz senideen eta haurren arteko irakurketa-giro partekatua sortzea bilatuko dute saioek.

Helburu horiek lantzeko, Legorretako Udalak Galtzagorri elkartearen laguntza izango du. Elkarteak urteak daramatza haur eta gazteen artean irakurzaletasuna sustatzen eta euskarazko haur eta gazte literatura ezagutarazten. Saioen bidez, beraz, liburuak eta irakurketa izango dira familia arteko jardueraren ardatz, eta liburutegia topagune eta irakurketa partekaturako gune gisa indartu nahi dute.

Euskara hutsean

Legorretako Udalak jakinarazi duenez, bi talde osatuko dituzte adinaren arabera banatuta: bata 3 eta 5 urte bitarteko haurren familientzat izango da, eta bestea, berriz, 6 eta 8 urte bitarteko haurren familientzat. Ostegunetan izango dira, aste honetan hasita, eta urriaren 22an ez ezik, azaroaren 12an eta abenduaren 3an egingo dira, liburutegian bertan. HHkoen taldeko gurasoen txanda izango da lehenik, 17.00etatik 18:00etara bitartean, eta LHko gurasoena, berriz, jarraian, 18:00etatik 19:00etara bitartean.

Saioak euskara hutsean izango direla ere aurreratu du udalak, eta beraz, garrantzitsua izango da haurrarekin saioetara joaten den helduak parte hartzeko jarrera aktiboa izatea eta hizkuntza ondo ulertu eta menperatzea.

Gazte festetako egitaraua prest dute Legorretan

Goierriko Hitza — 2026-10-15 12:51:34

Badatoz Legorretako Gazte Festak, eta prestaketa lanetan murgildutako hilabeteak atzean utzita, dagoeneko prest dute egitaraua. Hurrengo asteburuan ospatuko dituzte, urriaren 30 eta 31n, eta 27. edizioa izango da.

Hona hemen egitaraua, osorik:

Urriak 30, ostirala

18:30. Txupinazoa eta buru handiak. Ondoren, txapelpoteoa.
19:15. Gaztetxeen aldeko elkarretaratzea.
21:00. Afari autogestionatua karpan.
23:00. Kontzertuak: Lepue Zapaldu, Aurrez Aurre, Ipso Fakto eta Dj Euzkolabel.

Urriak 31, larunbata

14:30. Bazkaria frontoian. Ondoren, presoen aldeko argazkia eta bingoa.
18:30. Kontzertua: Sutargi.
23:00. DJak: GZ eta Perdonis.

Lazkaoko Beneditarren Fundaziora bisita legorretarrentzat

Goierriko Hitza — 2026-10-15 12:19:29

Lazkaoko Beneditarren Fundazioa 2011n sortu zen, Euskal Herriko ondarea ikertzeko eta zabaltzeko asmoz. Juan Jose Agirrek 1970eko hamarkadatik gaurdaino bildutako argitalpenak, artxiboak eta mota guztietako bildumak daude bertan.

Maiz, Goierriko herri ezberdinetako interesdunei hura bisitatzeko aukera ematen zaie, eta oraingoan ere, Legorretako Udalarekin sinatutako akordioari esker, liburutegia eta artxiboa bisitatzeko aukera izango dute legorretarrek datozen egunetan: bihar, ostirala, 18:30ean; etzi, larunbata, 11:00etan; eta urriaren 22an, osteguna, 11:00etan.

Bertaratu nahi duenak aurrez izena eman beharko du 943 88 87 81 telefonora deituta edota lbf@lbf.eus helbidera mezua bidalita.

‘Ama begira zazu’ antzezlana ikusgai, etzi Legorretan

Goierriko Hitza — 2026-10-14 09:14:00

Ama begira zazu antzezlana eskainiko dute Segurako Xirikara antzerki taldeko kideek ostiralean 19:00etan, Legorretako herri antzokian. Legorretako Udalak beste hainbat eragile herrikoiekin batera antolatu duen Udazken Kulturalaren barruan kokatu dute ekimena. Sarrera bost euroan eskuratu ahal izango da.

Azpiegiturak eta herri-bideak hobetzeko lanak martxan dira Legorretan

Goierriko Hitza — 2026-10-13 14:43:48

Legorretako Udalak udalerriko azpiegiturak hobetzen jarraitzeko konpromisoari eutsita, beste bi berrikuntza-lan abiatu ditu: herriko bizikleta parkeko Pumptruck-aren asfaltatzea, batetik, eta Iturri Haunditik Esnaola auzorako herri-bidearen berreskuratzea, bestetik.

Batetik, herritarrei eremu anitzagoa eskaintzeko helburuarekin asfaltatuko da bizikleta parkean kokatzen den Pumptruck-a. Hala, bizikletekin ez ezik, patineteekin, patinekin zein gurpildun aulkiekin ere ibiltzeko aukera zabalduko da. Pool Sport enpresak burutuko ditu lanak eta 39.862,61 euroko aurrekontua izango du. Legorretako Udalak jakinarazi du 24.112 euroko dirulaguntza jaso duela.

Bestetik, iaz Iturri Haundiko eremua berreskuratu ondoren, eremu hau Esnaola auzoarekin lotzen duen herri-bidea berreskuratzeko helburua ezarri du udalak. Lau hau burutzeko, ahala, eremu degradatuak berreskuratzeko dirulaguntza jaso du Legorretako Udalak eta proiektuaren kostu osoa, 26777 euroko dirulaguntzarekin finantzatuko dela aurreratu dute.

Joskintza tailer berria izango du Legorretak 2026-2027 ikasturtean

Goierriko Hitza — 2026-09-30 08:32:47

Legorretako Udaleko Kultura Sailak joskintza tailer berri bat antolatu du 2026-2027 ikasturterako eta dagoeneko zabalik da izena emateko epea; urriaren 8a izango da horretarako azken eguna, udaletxera edo liburutegira joanda edota internet bidez. Urrian hasi eta martxora arte luzatuko lirateke tailerrak.

Ikastaroa datorren urriaren 17an hasiko da eta asteartero elkartuko dira bi ordutegi ezberdinetan: bata 14:30etik 16:30era eta bestea 16:30etik 18:30era. Ana Rosa Agirrek eta Ana Belen Marcosek gidatuko dute.

Tailerretako plazak, hala ere, mugatuak izango dira, eta eskaintzen diren plaza kopurua gaindituz gero, zozketa bitartez esleituko dira. Ikastaroaren kostua 50 eurokoa izango da eta tailerra hasi aurretik, urriaren 13an, bilera informatibo bat egingo da tailerraren ezaugarri guztiak zehatz mehatz azaltzeko, 16:30ean hasita.

Legorretan Duchenne FM elkartearen aldeko elkartasun asteburua

Goierriko Hitza — 2026-09-30 08:30:40

Legorretan ohitura bihurtu da urriarekin batera asteburu solidarioa antolatzea; bederatzigarren edizioa izango da, eta aurten, Duchenne Familiak Mugimenduan elkarteari laguntzeko izango da. Duchenne distofria-muskularra duten pertsonen eta haien familien bizi-kalitatea hobetzeko lan egiten duen elkartea da, ikerketa eta gaixotasunaren inguruko sentsibilizazioa bultzatuta.

Kontzientzia hedatzeko lan horretan, urrats sendoa izango da asteburukoa, eta ahalegin bakoitzak helburu berezi bat izango duela aurreratu du ekimenaren antolatzaile den Pikuk elkarteko Aitor Castillak: Duchennerekin bizi diren pertsonen eta haien familien etorkizunean laguntzea. Hala, gaixotasun honi buruzko hitzaldiarekin hasiko dituzte ekintzak, elkartearen gidaritzapean, 18:30ean, Herri Antzokian.

Duchenne muskulu distofria duten haurrei eta haien familiei dibertsioa eta aisialdia eskaintzea ere bada elkartearen beste helburuetako bat, eta horretarako ere izango da tartea larunbatean. Goiz osoko egitaraua antolatu dute. 10:00etan, artisau azoka izango da plazan eta 11:00etan, ohiko lasterketa solidarioa hasiko da. Zazpigarren aldiz jokatuko da, baina ohiko ibilbideak mantenduta. Korrika (7,1km) edo oinez (4km) egin daiteke.

Izen emateak zabalik

Aurreneko 100 partaideentzat kamiseta bana oparituko dutela ere jakinarazi du. Oraingoz, 55 lagunek eman dute izena, baina aste honetan zehar eta egunean bertan partaide gehiago animatzea espero dute antolatzaileek. «Parte-hartzaileetan gorakada nabarmena izaten da azken momentuan», azaldu du Castillak. Parte-hartu nahi duenak oraindik ere izango du izena ematerik, Kirolprobak.com webgunean.

Dortsalak larunbat goizean bertan jasoko dituzte, herriko plazan, 09:45etik 10:45era. Sari banaketarekin amaituko da lasterketa, eta ondoren, musikarako eta gehiagorako tartea zabalduko dute legorretarrek, Pikukada Batukada Taldeak eguerdia girotuta.

XVI. Garagardo azoka ere izango da eguerditik aurrera, Aldapa Haundi kultur elkarteak antolatuta. 13:00etan irekiko dute barra eta 14:00etan bazkaria izango da. Ukondoa, saltxitxak eta postreaz gain, izango da aukera beganorik, nahiz eta beharrezkoa izango den herriko tabernetan eskuragarri dauden tiketak aurrez lortzea.

Zaldibiako, Legorretako eta Itsasondoko hainbat ikasle bizikletaz joan dira Oianguren institutura

Goierriko Hitza — 2026-09-29 13:33:22

Zaldibiako eskola garraioa dela eta Oianguren BHIra bizikletaz joan dira hainbat ikasle. Legorretakoak eta Itsasondokoak ere bazeuden horien artean. Ekimen honekin hainbat arlo ikutu nahi izan dituzte, alde batetik, Zaldibiaren kasuan “ez dagoela bidegorririk”, eta ez dela bizikletaz egiteko bide segurua. Gaineratu dutenez, “ez da bidea ez dela segurua, baizik eta ez dagoela oinezko biderik. Nola eta bidea ez den mendiz egiten”.

Horri lotu nahi izan diote, Hezkuntza Sailak eskola garraioa kentzeko erabilitako argudio nagusia, “4km baino gutxiago egotea ikastetxera” da. Baina, dekretuan bertan dioenez, baldintza horretatik salbuetsita geratuko liratekeela ondorengo kasuetan azaldu du Zaldibiako Guraso Batzarrak: “Tresna informatikoaren bidez kalkulatutako oinezko ibilbidea egingarria ez bada bide-segurtasuneko gutxieneko baldintzak betetzen ez dituelako, zenbaketatik kanpo utziko da, eta, haren ordez proposatutako ibilbideen artean, benetan oinez baldintza egokietan egingarria den kilometro gutxienekoa hartuko da kontuan”. Salbuespen hori aintzat hartzeko, “ezinbestekoa” da ikaslea matrikulatuta dagoen ikastetxeak ziurtatzea bidea ezin dela baldintza egokietan oinez egin.

Ez dira “isilik” geratuko

Beraz, Gurasoek aurreratu dute, “bide juridikoak martxan jarriak ditugula, eta Arartekora jotzeaz gain, Eusko Legebiltzarrera ere eramango dugula gaia”. Orain, Zaldibiako ikasleei gertatu zaiela diote, baina 2015ean salbuetsita zeuden hainbat herri eta auzori ere bai. Pixkanaka zerbitzua kendu die Hezkuntza Sailak, urtetik urtera, “hots asko atera gabe”. Horren aurrean berresten dute ez dutela “isilik” pasatuko arazoa: “Herritarren eta ikasleen eskubideez ari garelako, kasu honetan derrigorrezko hezkuntzaz”.

Soroizi eta Garmendiari gorazarre, Euskal Zinemaren Gala Handian

Goierriko Hitza — 2026-09-23 11:15:09

Protagonista asko izan zituen atzoko Euskal Zinemaren Gala Handiak, tartean bi goierritar: Jose Ramon Soroiz (Zinemira Saria) eta Aitziber Garmendia (EAB Distira Saria). Euskal Zinemari ez ezik, ibilbide osoan zehar alboan izan dituztenei eskaini zizkieten hitzak.

Soroizek zuzendariei

Txalo zaparrada artean, Soroizen txanda izan zen aurrena. Eskerrak emateko eta egindako ibilbidea gogoratzeko modu gisa, hura protagonista izan deneko hiru film aukeratu zituen legorretarrak: Juan Miguel Gutierrezek zuzendutako Balantzatxoa (1977), Eneko Olasagasti eta Karlos Zabalaren Maité (1994) eta Jose Mari Goenagak eta Aitor Arregik zuzendutako Maspalomas (2025).

Zuzendari bakoitzari hitz politak eskaintzeaz gain, sariaren zati bat beraiena ere badela gogoratu zuen, baina Maspalomas jo zuen bere ibilbidearen gailurtzat: «Nire bizitza osoan egindako guztiaren laburpena da; saria izan da niretzat».

Zineari aipamen berezia eginda amaitu zuen hitzartzea: «Bitxia da, zeren nik beti esan dut askoz lasaiago egiten dudala bai telebista edo antzerkia. Nik zinearekin ez daukatela horrelako feeling-a. Ez diotela punturik hartu zineari, alegia. Eskerrak ez dioten hartu! Ba hori. Besterik ez».

Garmendiak Zaldibiari

Beste sari batzuk banatu ondotik, Aitziber Garmendiren txanda izan zen. Zaldibiarrak, hala, euskal zinemarekiko sentitzen duen harrotasunari, geroz eta indar handiagoz hedatzen ari den faxismoari eta ametsak betetzen ikusi dion jaioterriari eskaini zizkion hitzak. Horrela zioen haren hitzartzeak:

«Hau gara gu, hau da gure herria, gure hizkuntza, gure talentua eta gure zinema. Euskal film bat estreinatzen den bakoitzean nirea bezala sentitzen dut poz eta harrotasun hori. Herri, hizkuntza, komunitate eta identitate batekiko pertenentzia sentsazio oso sakon batek eramaten nau horretara.

Eta faxismoak hainbesteko indarra hartu duen garai hauetan, inoiz baino ozenago esan nahi nuke. Beraien gorroto guztiaren gainetik: nire emazteari, maite zaitut.

Orain zuen baimenarekin, hau jaioterrira daramat, gu izaten hasi nintzen leku horretara; amesten, ametsengatik borroka egiten, eta zorionez, ametsak betetzen ikusi nauen jaioterrira. Zaldibia, hau gurea da!».

Legorretako haur eta familientzako irakurketa klubak, urritik aurrera

Goierriko Hitza — 2026-09-22 15:32:16

Irakurketa-ohiturak sustatzeko, kalitatezko euskal biografia ezagutarazteko eta haurrentzako euskal literatura abiapuntutzat hartuta irakurketan murgiltzeko asmoz, haur eta familiei zuzendutako irakurketa-klubak martxan jarriko ditu Legorretako Udalak urritik aurrera. Bi talde osatzea aurreikusten dute, adinaren arabera banatuta: bata 3-5 urteko haurren familientzat izango da, eta bestea, 6-8 urteko haurren familientzat. Biak ala biak udalerriko liburutegian eramango dituzte aurrera, dinamizatzaile baten pean.

Saioak ostegunetan egingo dira, urriaren 22an, azaroaren 12an eta abenduaren 3an, eta euskara hutsean izango dira. Haur Hezkuntzakoen kasuan (3-5 urte bitarteko taldea), 17:00etatik 18:00etara izango da, eta Lehen Hezkuntzakoen kasuan (6-8 urte bitarteko taldea), berriz, 18:00etatik 19:00etara.

Bertaratzeko interesa duenak aurrez izena eman beharko du, goizetan udaletxera joanda, arratsaldeetan liburutegian izena emanda, edota internet bidez. Irailaren 25ean amaituko da izena emateko epea.

Goierritarren erakustaldia Beriaingo Kilometro Bertikalean

Goierriko Hitza — 2026-09-22 09:30:07

Igandean jokatu zen Beriaingo (Nafarroa) Kilometro Bertikala, Euskal Herriko Kopako hirugarren proba, eta goierritarrek sekulako erakustaldia egin zuten maila ezberdinetan.

Maila absolutuan, Maider Unanue Aranburu aramarra gailendu zen emakumezkoen artean, eta lidergoa ere eskuratu zuen. Master AC mailan, Edurne Arakistain Jauregi legorretarrak bigarren egin zuen, eta Master B mailan, berriz, Anartz Etxeberria Larraza idiazabaldarrak lortu zuen bigarren postua.

KGT Kolektiboa kurtso berriari heltzeko prest

Goierriko Hitza — 2026-08-31 12:43:20

Bihartik aurrera, KGT Kolektiboak bere jardunari ekingo dio berriro, kurtso berrirako aurreikusitako ekintzekin jarraitzeko. Hala, ohiko ordutegian zabalduko dute berriz ere Ordiziako KZgunearen ondoan dagoen Lutxi IraziGune lokala. Astelehen, asteazken eta ostiraletan arratsaldez egongo da zabalik, 17:00etatik 19:00etara; astearte, ostegun eta larunbatetan, berriz, goizez, 11:00etatik 13:00etara.

Orain arteko dinamikarekin jarraituko dute. Bi hilabetez behin, gai jakin baten inguruko monografikoa osatzen dute, eta horri buruzko materiala herritarren eskura jartzen dute: liburuak, aldizkariak, ikerketak eta abar. Irailean eta urrian zehar, ‘Munduko Pentsamendua eta Euskal Pentsamendua: Filosofia’ izango dute aztergai.

Era berean, IraziGune Ibiltaria proiektuarekin ere aurrera jarraituko dute, Goierriko herrietan zehar KGT Kolektiboan egiten ari diren lana zabaltzeko asmoz. Dagoeneko iragarri dute zein izango den hurrengo topalekua: Legorreta. Bertako udaletxeko areto nagusian izango dira irailaren 14tik urriaren 2ra bitartean, hiru astez, 17:00etatik 19:00etara. ‘Euskal Herriko memoria eta historia’ izango dute hizpide, eta herritarrek gai horren inguruan kolektiboak bildutako materiala bertan kontsultatzeko edo etxera eramateko aukera izango dute.

Joxe Ramon Soroizek jasoko du aurtengo Zinemira saria

Goierriko Hitza — 2026-08-29 07:48:38

Joxe Ramon Soroizek bizitza osoa eskaini dio aktore lanari, eta azken urteotan urte luzez ereindakoaren fruituak jasotzen ari da.

Azken urtean, hainbat sari garrantzitsu jaso ditu Soroizek. Iaz, esaterako, gizonezko aktore onenaren Forque saria eta Zilarrezko Maskorra eskuratu zituen Maspalomas filmean egindako lanagatik. Aurten, berriz, Goya, Feroz eta Fotogramas de Plata sariak ere jaso ditu, besteak beste. Oraingoan, Zinemira Saria jasoko du Donostiako zinema-jaialdian.

Zinemira Saria Donostia Zinemaldiak ematen duen ohorezko saria da, euskal zinemagintzaren alorrean ibilbide nabarmena izan duen pertsona bat aitortzeko.

Irailaren 22an banatuko diote saria Soroizi, Victoria Eugenia antzokian egingo den Euskal Zinemaren Gala Handian.

Beste goierritar baten presentzia ere izango da Donostian aurten, Izaro Nieto ordiziarrak Koldo Almandoz zuzendariaren Azken Agurra filmean parte hartu du.

Aitor Zunzunegik Alpeetan lehiatuko du etzi

Goierriko Hitza — 2026-08-20 10:21:34

Aitor Zunzunegi Legorretako mendi-korrikalariak Merrell Skyrunner World Series nazioarteko zirkuituan lehiatuko du abuztuaren 22an.

Hain zuzen ere, Trofeo Kima ospetsuan izango da, Euskal Selekzioarekin. Val Masinon (Italia) jokatuko den lasterketak 52 kilometro eta 4.200 metroko desnibel positiboa ditu, eta 2.500 metrotik gorako zazpi mendi-lepo zeharkatzen ditu; punturik altuena Cameraccio lepoa da, 2.950 metrokoa.

Ibilbidea oso teknikoa da, eta elur-eremuak, gailur ageriak eta zenbait zatitan soka finkoak aurkituko dituzte korrikalariek.

Euskara ikasteko eta aisialdiko begirale titulua eskuratzeko diru laguntzak kaleratu ditu Legorretako Udalak

Goierriko Hitza — 2026-08-11 12:20:16

Legorretako Udalak bi diru laguntza lerro ditu irekita, eta bietarako eskaerak egiteko epeak indarrean daude. Euskara ikasteko diru laguntzak dira batzuk, eta aisialdiko begirale eta zuzendari titulua euskaraz ateratzeko besteak.

Euskara ikasteagatik urtero ematen dituen diru laguntzak udalak. Aurtengoak, 2025eko irailaren 1etik 2026ko ekainaren 30era bitartean ikastaroren bat egin zuten herritarrei zuzenduta daude, eta eskaerak egiteko epea irailaren 30ean amaituko da. Ezinbestekoa da ikastaroa egin izanaren agiria aurkeztea.

Bestalde, aisialdiko begirale eta zuzendari ikastaroak finantzatzeko diru laguntzak ere banatzen ditu Legorretako Udalak. Kasu honetan, ezinbestekoa da ikastaroa euskaraz egin izana, eta urriaren 31 da eskaerak egiteko azken eguna.

Informazio gehiago www.legorreta.eus webgunean dago.

N-I errepidean jarduketak egingo dituzte udako hilabeteetan

Goierriko Hitza — 2026-07-03 10:42:37

Gipuzkoako Foru Aldundiak jakinarazi du uda baliatuko duela N-I errepideko hainbat puntutan kontserbazio- eta hobekuntza-lanak egiteko, bide-segurtasuna indartzeko eta azpiegituraren egoera hobetzeko helburuarekin.

Goierrin ere egingo dituzte zenbait jarduketa. Olaberrian, N-I eta AP-636 lotzen dituen bide-adarreko hiru bihurguneetan zoruaren itsaspena hobetuko da, zirkulazioaren segurtasuna handitzeko eta arrisku egoerak murrizteko; eta Legorretan, berriz, Itsasondo eta Legorretako tunelen arteko zatian galtzadaren errodadura-geruza berrituko da, zirkulazio-baldintzak hobetzeko eta zoruaren erabilgarritasuna luzatzeko. Goierrin ez ezik, Tolosan eta Andoainen ere egingo dira esku-hartzeak.

Afekzioa ahalik eta txikiena izan dadin, lanak udako asteburuetan programatu ditu Aldundiak, trafiko-intentsitatea txikiagoa izaten den garaian, hain justu. Gainera, mota honetako jarduketek, eguraldi-baldintza egonkorrak eskatzen dituzte, lanak behar bezala gauzatzeko.