Goierriko Hitza

Txistu doinuekin hasi dituzte Santikutzak Legazpin

Goierriko Hitza — 2026-04-30 20:02:51

Hasi dira Santikutz jaiak. Jendetza bildu da arratsaldean herriko plazan, aurtengo festei hasiera emateko. Aurten Goiz Deia txistulari bandari egokitu zaio udaletxeko balkoitik pregoia egitea, txistu doinuaz lagunduta ondoren. Ondorengo txupinazoarekin lehertu da festa, eta kalean izan du segida jai giroak, erraldoi eta buruhandien ohiko kalejirarekin.

Txupinazo ofizialaren aurretik, gazteek ere egin dute jaiak hasteko ekitaldia Gaztetxean. Suziria bota ondoren, kalejiran jaitsi dira erdialdeko kaleetara.

Jaietako lehen txanpa igandera arte da, eta hurrengo asteburuan Kapela dantzarekin eta Mirandaola egunarekin amaituko dira.

Honela eman diete hasiera txistulariek aurtengo jaiei, Maider Apaolaza eta Iker Azpeitiaren hitzetan:

Arratsaldeon Legazpi!!

Ohituago gaude mikroa beharrean eskuan txistua edukitzera, baina herriko jaien hasiera iragartzeko aukera ez da urtero izaten eta aprobetxatu behar.

Jaiak gaur hasiko ditugun arren, errodajea egina ekartzen dugu batzuk, pasa den astean, beste urte batez, Korosti dantza taldeak antolatzen zuen Oin Puntetan asteburuan parte hartu genuelako. Horretaz gain, lehen aldiz, Gaztetxeak Gazte Festak antolatu zituen. Blusak soinean ekintza guztiek izan zuten arrera ikusita, ziur gaude datozen urteetan ere ekimen honekin jarraituko dutela, bejondeiela!!!

Bueno, eta aurten zer? Ba aurtengorako ere egitarau oparoa prestatu dute bai jai batzordeak, baita Txo!Esnako kideek ere. Txistulariak, urtero bezala egitarau horretako hainbat ekintzetan izango gara; kalejiretan, Olaria eta Ezpata dantza ekitaldian edo datorren astean ospatuko diren Kapela dantza edo Mirandaola egunean adibidez.

Hala ere egitarauak gutxi balio du herritarren parte hartzerik gabe. Bete dezagun Plaza, bete dezagun Azoka eta nola ez, bete ditzagun kaleak. Herritarrok gara festa guztien arima eta muina. Herritarrik gabe ez dago festarik, herritarrik gabe ez dago girorik. Egun zoragarri batzuk ditugu aurretik. Kanta dezagun, dantza dezagun, parte hartu dezagun eta nola ez, ondo pasa eta goza dezagun!!

Ondo pasa dezagun, ondo pasatzen utziz….

Ondo pasa dezagun ondoan daukaguna errespetatuz…

Ondo pasa dezagun, pasatu gabe….bueno…. sobre la martxa….

Bilakatu ditzagun kaleak espazio seguru eta eroso bat guztiontzat eta ospa ditzagun jaiak pozez, arduraz eta elkar zainduz.
Azken finean, bakoitzak bere nota eman dezala guztion artean musika eta armonia sortuz.

Eta gehiegi luzatu gabe mikroa utzi eta txistua hartuko dugu, erraldoiekin batera jaiei bals batekin hasiera emateko. Erraldoiak prest?

Ba besterik gabe, ondo pasa jaiak eta…

GORA LEGAZPI!

GORA SANTIKUTZAK!

GORA EUSKADI TXISTULARI!

Ihurreko Jaien hasierako txupinazoa bihar izango da, 18:00etan

Goierriko Hitza — 2026-04-30 10:13:24

Ihurreko Jaiak maiatzaren 1ean eta 2an izango dira eta egitarau zabala antolatu dute. Festei hasiera emango diete txupinazoarekin eta buruhandiekin, 18:00etan. Trikipoteoa 19:30ean izango da. Iluntzean herri afaria egingo dute, 21:00etan. Tiketak 20 euroan zeuden, baina asteartea zen izena emateko azken eguna. Afalostean trikitilariak egongo dira, 22:00etan. Mikeltxi Dj-ak gaua girotuko du, 03:00ak arte.

Haurrentzako jolasekin hasiko dute bigarren eguna, 11:30ean. Gesaltza txaranga 12:30ean arituko da. Ondoren, kalderete sariak banatuko dituzte herri bazkariaren aurretik, 14:00etan. Bazkarirako txartelak eskuratzeko epea asteartera artekoa zen. Bazkalostean bingo, mus eta toka txapelketak egongo dira, 17:00etan. Gesaltza txaranga arituko da, 19:30ean.

Tortilla patata lehiaketarekin festei amaiera emango zaie, 20:00etan.

Gure Zirkuak bederatzigarren birari hasiera emango dio Olaberrian

Goierriko Hitza — 2026-04-22 13:01:43

Gure Zirkuak bederatzigarren bira hasiko du Olaberrian asteburu honetan. 11 emanaldi eskainiko dituzte apirilaren 25etik maiatzaren 9ra bitartean. Karpa muntaian ari dira zirkuko lan taldea astelehenetik, eta gaur bukatuko dutela adierazi du Iker Galartzak, Gure Zirkuaren sortzaileak, eta ikuskizuneko pailazoak.

Olaberriko Arrieta jatetxe pareko aparkalekua leku «zoragarria» iruditzen zaio zirkua jartzeko Galartzari: «Gure Zirkua jartzeko apropos pentsatuta dagoela ematen du, edo zirkua bertan jarrita geratzeko».

Entseguak ostegunean eta ostiralean egingo dituzte. Horietan emanaldiaren inguruko azken erabakiak hartzen dituztela adierazi du Gure Zirkuko pailazoak. «Artista batek besoan mina badauka, entsegu orokorrean erabakitzen dugu emanaldian aldaketak egin behar ditugun ala ez». Hasieratik hona ezustekoei aurre egiten ikasi dutela dio Galartzak.

Bederatzigarren birarako herri guztiak ez dauzkate oraindik «Olaberritik Oñatira joango gara, eta gero Bizkaia aldean mugitzen ibiliko gara abuztura arte».

Hemezortzi lagunek osatzen dute Gure Zirkuko lan taldea: «Hamabi artista, hiru teknikari, bi musikari eta abeslari bat». Beñat Maiz beasaindarrak bertan parte hartuko du.

Zirkua egonkortzen
Gure Zirkua hitz batean laburbiltzeko «konpromisoa» hitza aukeratuko luke Galartzak. Hasieratik zen beraien asmoa Euskal Herrian eskaintza kultural bat gehiago izatera heltzea. Gaineratu duenez, «5 urtean 1.000 emanalditik gora eginda joateak eta 9. bira hastear egoteak erakusten du ez ginela etorri udara bateko bira bat egitera». Lehen bira 4 hilabetekoa egin zutela, eta orain 8 hilabetekoa egiten dutela baloratu du zirkuko pailazoak.

«5 urtean mila emanalditik gora eginda izateak eta 9. bira hastear egoteak erakusten du ez ginela etorri udara bateko bira bat egitera»

«Gustatzen zaigunari eutsi behar diogu, ez dakigulako etorkizunean zer gertatuko den»

Iker Galartza. Gure Zirkuaren sortzailea

«Egonkortze prozesu» batean daude Gure Zirkukoak Galartzaren esanetan: «Urteetan zehar sari batzuk eman dizkigute, baina ez gara harrotu. Hankak lurrean mantendu eta lanean jarraitu dugu». Pailazoak argi du jendeak sarrera bat ordaindu duela, eta ikustea espero duen emanaldia eskaini beharra dutela.

Zirkua, bizi-estilo
Eurek umeak zirkuarekin hazi direla aitortu du Galartzak, «hasieran beti inguruan ibiltzen zirelako txorakeriaren bat edo beste egitera ateratzen genituen, eta barregarri gelditzen zen». Handitu direnean, ordea, «sekulako» ikuskizunak egiten dituztela aitortu du. Pailazoak gehitu duenez, beraien haurrek umetan, eurek egiten zutena errepikatzeko joera zeukaten: «Zirkuan leku guztietan bezala gauzek hoberen modu naturalean funtzionatzen dute».

Momentu honetan zirkuarekin disfrutatu nahi du Galartzak: «Gustatzen zaigunari eutsi behar diogu, ez dakigulako etorkizunean zer gertatuko den».

Herriarteko pilota txapelketaren kanporaketak, zehaztuta

Goierriko Hitza — 2026-04-22 08:20:49

Dagoeneko jakina da zein herriren arteko neurketek emango dioten hasiera maiatzeko lehen asteburuan Gipuzkoako Herriarteko Pilota Txapelketa. Goierriko sei herrik hartuko dute parte: eskuz, Lazkaok, Zaldibiak eta Zegamak; erremintaz, Lazkaok, Olaberriak eta Ordiziak; eta gomazko paletarekin Zumarragak.

Eskuz, final-hamaseirenetatik hasita
24 herrik eman dute izena eskuzko lehian –iazko baino hiru gehiagok–, eta final-hamaseirenak dira jokatu dituzten lehen kanporaketak.

Lazkaok, esaterako, Amezketaren aurka neurtuko dira indarrak (itzuliko partidak etxean, maiatzeko bigarren asteburuan), eta Zegamak Antzuola izango du aurkari (joaneko partidak etxean, maiatzeko lehen asteburuan). Koadro berean egokitu dira bi herriak, eta elkarren aurka jokatzekotan, finalerdietan behar luke izan.

Lazkaok 16 aldiz parte hartu du Herriartekoan –aurtengoa zenbatuta–, eta iaz atera lortu zuen berriz taldea ateratzea 6 urteko hutsunearen ondoren. Zegamak zazpigarren parte-hartzea du, eta iaz osatu zuen berriz taldea 17 urte eta gero.

Zaldibia, aldiz, final-zortzirenetan sartuko da txapelketan, eta Albiztur edo Astigarraga izango du aurkari. Lehen partidak kanpoan jokatu beharko lituzke (maiatzak 15-17 asteburuan), eta itzulikoak etxean (maiatzak 22-24). Goiko koadroan da Zaldibia, eta Hernani, Azpeitia, Oiartzun eta Azkoitia saihestu ditu. Zaldibiak 27. aldia du Herriartekoan, eta azken 5 urteetan osatu du taldea. 2024an txapeldunorde atera zen.

Finala ekainaren 28an jokatuko da.

Erremintaz, final zortzirenetan
Hamar herriko ariko dira larruzko paleta eta pala motzez –lau gehiago aurten–. Goierritarren artean, Olaberria izango da hasten lehena, final-zortzirenetan, Azpeitiaren aurka –joaneko partidak etxean, itzulikoak kanpoan–. Sailkatuz gero, Donostia izango du aurkari final-laurdenetan.

Ordiziak eta Lazkaok final-laurdenetan ekingo diote txapelketaren bideari, maiatzaren 22-24ko asteburuan. Lehenak Andoain izango du aurkari, eta bigarrenak Debak. Hauek ere etxean dituzte lehen partidak, eta itzulikoak kanpoan.

Olaberria 26. aldiz ariko da Herriartekoan, eta 3 urteko hutsunearen ondoren berriz itzuli da lehiara. Sei aldiz atera da txapeldun, eta bitan txapeldunorde.

Ordizia da Goierriko herrien artean parte-hartze gehien dituen herria –35.a aurtengoarekin–, eta 1991tik huts egin gabe aritu da. Behin txapeldun izana da, eta bitan azpitxapeldun.

Lazkaok 13. aldia du, eta 5 urtean kale egin eta gero, aurten taldea osatzeko moduan izan da.

Finala ekainaren 21ean jokatuko da.

Zumarraga, final-hamaseirenetan
Hemezortzi herri lehiatuko dira gomazko paletaz –iaz baino lau gehiago–, eta Zumarragako izango da Goierriko ordezkari bakarra. Final-hamaseirenetan ekingo dio bideari, Tolosaren aurka. Lehen partidak han jokatuko dira, itzulikoak etxean.

Zumarragak zazpigarren parte-hartzea du, azkeneneko 6 urteetan jarraian.

Finala ekainaren 28an jokatuko da.

Xabier Berasategi bigarren, Hainango Tourreko sailkapen orokorrean

Goierriko Hitza — 2026-04-19 17:07:43

Xabier Berasategi olaberriarrak bigarren postuan amaitu du Hainango Tourra (Txina), bosgarren eta azken etapa jokatu ondoren.

Azken jardunaldiak ez du aldaketarik ekarri sailkapen nagusian, eta Berasategik bere podiumeko postuari eutsi dio, itzuliari amaiera borobila emanez.

Bigarren postu orokorraz gain, olaberriarrak Erregulartasunaren saria ere eskuratu du, etapa guztietan erakutsitako konstantziaren ondorioz: bigarren, hirugarren eta bi seigarren postu lortuta.

Berasategi bigarren da Hainango Tourrean, azken etaparen faltan

Goierriko Hitza — 2026-04-18 18:10:09

Xabier Berasategi txirrindulari olaberritarrak (Euskaltel Euskadi) Hainango Tourra irabazteko borrokan jarraitzen du. Gaur 4. etapa jokatu da, eta 6. postuan helmugaratu da. 2 segundo bakarrik galdu ditu, baina nahikoak lidertza galtzeko. Sailkapen nagusian bigarren postuan dago orain, 10 segundora.

Gaurko etapa gain batean bukatu da. Azken igoera 2,1 kilometro luzekoa eta % 6,8ko maldakoa zen. Thomas Silvak (Astana) eraso du 500 metrora, eta Berasategi atzean uztea lortu du, tartetxo bat irekita. Erregulartasunaren lider da olaberritarra.

Hainango Itzulia bihar bukatuko da. Hiru mendate dituzte etaparen lehen zattan, 1. mailako bat tartean, baina bigarren zatia erosoagoa da.

4. Etaparen sailkapena (Lingshui-Baoting, 132,7 km):

1.Guillermo Thomas Silva (Astana), 2:45:46

2.Thomas Pesenti (Polti), d.b.

3.Alessandro Fancellu (MBH Bank), 2ra.

4.Nicolas Vinokourova (Astana), 2ra

5.Lorenzo Quartucci (Burgos BH), 2ra

6.Xabier Berasategi (Euskaltel-Euskadi), 2ra.

Sailkapen nagusia

1.Guillermo Thomas Silva (Astana), 16:39:35

2.Xabier Berasategi (Euskaltel-Euskadi), 10era

3.Thomas Pesenti (Polti), 10era

4.Lorenzo Quartucci (Burgos BH), 17ra

5.Alessandro Fancellu (MBH Bank), 18ra

Xabier Berasategi, liderraren elastiko horiarekin, Hainango Tourreko gaurko etaparen hasieran. /Euskadi Fundazioa

Xabier Berasategi Hainango Tourreko lider berria da

Goierriko Hitza — 2026-04-17 16:16:20

Xabier Berasategi, Euskaltel-Euskadiko txirrindulari olaberritarra, Txinako Hainango Tourreko lider berria da, hirugarren sailkatuta hirugarren etapan. Erregulartasunaren lidergoa ere mantentzea lortu du. Euskaltel-Euskadik adierazi du Berasategik bi segundo bereganatu dituela tarteko helmuga batean, eta hirugarren postua “erdietsi” duela helmugan, beste lau segundo pilatuz.

Etapa hasierako mendatean tropela murrizten saiatu direla “erritmoa azkartuz” azaldu du Berasategik: “Helmugaraino kilometro gorabeheratsu asko ziren, eta hamaika eraso egon dira. Azkenean batek ihes egitea lortu du, eta hirugarren portuan iritsi naiz”. Olaberritarra maillot horia lortzearekin “pozik” agertu da, eta gelditzen diren bi etepatetarako “gogoz” dago: “Dena dago jokoan, eta defendatzen saiatuko gara”.

Etapa hasi aurretik sailkapen nagusian liderra zen Thomas Silva uruguaitarrari, 2 segundo ateratzen dizkio Berasategik. Lorenzo Quartucci italiarra hirugarren postuan 7 segundora doa. Gotzon Martin eta Jokin Murguialday taldekideak 12 segundora daudela, eta haien “aukerak” dituztela ere esan du Euskaltel-Euskadik.

Xabier Berasategi bigarren Hainango Tourreko bigarren etapan, Txinan

Goierriko Hitza — 2026-04-16 17:11:15

Xabier Berasategik, Euskaltel-Euskadiko txirrindulari olaberritarrak bigarren postua lortu du Hainango (Txina) Tourreko bigarren etapan. Olaberritarrak 214 kilometro eta hiru mendate gainditu behar izan ditu. Berasategik adierazi du gaurkoa zela etaparik “gogorrena”, eta pozik dagoela bigarren postuarekin: “Pena da garaipena gertu izan dudalako, baina Silva oso indartsu agertu da”.

Lasterteketa “hiru igoeretan erabaki” dela azaldu du Euskaltel-Euskadi taldeak, 114, 152,9 eta 199,5 kilometroetan, hain zuzen ere, eta Berasategi 23 txirrindulariko taldean “helmugaratu” dela. Helmugan, olaberritarrak garaipena lehiatu, eta bigarren sailkatu dela, Astana taldeko Thomas Silvaren atzetik jakinarazi du txirrindulari taldeak. Euskaltel-Euskadiko Gotzon Martin eta Jokin Murguialday ere aurreneko multzoan heldu dira. Paul Hennequin-ek, berriz, lasterketa utzi behar izan du, gaixorik.

Olaberritarrak uste du, sailkapen nagusia larunbatean erabakiko dela. Etapa hori “laburra” dela, eta bi kilometroko “aldapa” batean amaitzen dela aurreratu du Berasategik: “Hor dena eman beharko dugu sailkapenari eusteko edo aurrera egiteko”.

Goierriko sei herrik parte hartuko dute Gipuzkoako Herriarteko Pilota Txapelketan

Goierriko Hitza — 2026-04-14 16:20:39

Gipuzkoako Euskal Pilota Federazioak aurtengo Gipuzkoako Herriarteko Txapelketaren berri eman du. 24 herrik eman dute izena eskuzko lehian –iazko baino hiru gehiagok–, hamar ariko dira larruzko paleta eta pala motzez –lau gehiago aurten–, hemezortzi gomazko paletaz –lau gehiago–. Zesta-puntaz, bi herrik besterik ez dute izena eman eta, hortaz ez da txapelketarik izango espezialitate honetan.

Goierriko sei herrik parte hartuko dute aurtengoan, modalitate ezberdinetan.

Eskuz ariko dira Goierriko hiru herri. Lazkao, Zaldibia eta Zegama. Nabarmentzekoa da azken urte askoan taldea osatu duen Ataunek ez duela parte hartuko, ezta iaz finalerdietan lehiatu zen Beasainek ere.

Larruzko paletan eta pala motzez Lazkao, Olaberria eta Ordizia ariko dira; eta gomazko paletaz Zumarraga.

Aurkezpen-zozketa apirilaren 21ean egingo dute, datorren asteartean, 19:00etan, Donostiako Kirol Etxean.

Maiatzaren lehen asteburuan ekingo diote txapelketari eskuz eta gomazko paletaz, eta maiatzaren 10ekoan larruzko paleta eta pala motzez. Rural Kutxak eta Aramendia gozotegiak babestuko dute, beste behin, Herriartekoa.

Hauek dira aurtengo parte hartzaileak:

ESKUA (24 herri)

Aduna
Aia
Albiztur
Alegia
Amasa-Villabona
Amezketa
Andoain
Antzuola
Aretxabaleta
Astigarraga
Azkoitia
Azpeitia
Bergara
Donostia
Eibar
Hernani
Lazkao
Oiartzun
Oñati
Usurbil
Zaldibia
Zegama
Zestoa
Zizurkil

LARRUZKO PALETA ETA PALA MOTZA (10 herri)

Andoain
Azpeitia
Deba
Donostia
Errenteria
Lazkao
Oiartzun
Olaberria
Ordizia
Zumaia

GOMAZKO PALETA (18 herri)

Aia
Alegia
Andoain
Anoeta
Astigarraga
Azkoitia
Donostia
Eibar
Errenteria
Hernani
Lasarte-Oria
Mutriku
Oiartzun
Soraluze
Tolosa
Zarautz
Zestoa
Zumaia
Zumarraga

24. Korrika Goierrin. Olaberria-Lazkao

Goierriko Hitza — 2026-04-01 08:31:33

Biometanizazio plantaren inguruko hitzaldia, Ihurren

Goierriko Hitza — 2026-03-24 15:50:26

Biometanizazioaren inguruko hitzaldia antolatu du herritar talde batek Ihurreko adinekoen ludotekan. Ostegunean izango da, 18:30ean. «Helburua da biometanizazioa eta planta hauen funtzionamenduari buruzko informazioa jasotzea». Sustrai Eraikuntzak fundazioko ordezkariak ariko dira hizlari lanetan.

Ihurre auzoan «400.000 tona abereen minda eta beste hondakin organiko batzuk tratatuko dituen biometanizazio planta bat proiektatzen» ari dela jakinarazi dute.

Gazte Kilometroa 24. Korrikan, Ihurre eta Olaberria artean

Goierriko Hitza — 2026-03-23 14:37:02

Goierriko Kontseilu Sozialistak, Goierriko Ikasle Antolakunde Sozialistak eta eskualdeko hainbat gazte asanbladak kilometroa izango dute Ihurretik Olaberriara 24. Korrikan, larunbatean, martxoaren 28an. Horri lotutako egitaraua antolatu dute.

Beasaingo Melmak gaztetxean 09:30ean harrera eta beroketa egingo dituzte. 10:30ean egin dute hitzordua Gazte Kilometrorako, Ihurretik Olaberriara (Ihurren 10:47an dago aurreikusita, Olaberrian 11:01ean).

Korrika egin ondoren, 12:00etan poteoa izango dute Beasaingo Antzizar kiroldegiaren inguruan, Eztanda txarangak girotuta, eta 14:00etan bazkaria. Goierriko gazteak deitu dituzte parte hartzera.

Gure Zirkuak Olaberrian ekingo dio bederatzigarren birari

Goierriko Hitza — 2026-03-23 10:28:26

Goierrin abiatuko du berriz Gure Zirkuak bederatzigarren bira, Olaberrian. 5 urte dira pasa dira azkenekoz Gipuzkoan hasi zenetik.

Apirilaren 25etik maiatzaren 9ra 11 emanaldi egingo ditu Gure Zirkuak Olaberrian, eta sarrerak saltzen etzi, hilak 25, hasiko dira Gurezirkua.eus webgunean.

EGUNAK ETA ORDUAK

Apirilak 25, larunbata: 18:00
Apirilak 26, igandea: 12:00 eta 18:00
Apirilak 30, osteguna: 19:00
Maiatzak 1, ostirala: 12:00 eta 18:00
Maiatzak 2, larunbata: 18:00
Maiatzak 3, igandea: 12:00 eta 18:00
Maiatzak 8, ostirala: 19:00
Maiatzak 9, larunbata: 12:00

Olaberriko IV. Gazte Festak ospatuko dituzte asteburuan

Goierriko Hitza — 2026-03-19 11:00:20

Laugarrenez antolatu ditu Gazte Festak Olaberriako Gazte Taldeak. Ostiralean, martxoaren 20ean emango diote jaiari hasiera, 19:30ean. Egitarau zabala dago astebururako antolatuta Olaberrian. Ostiralean, 19:30ean trikipoteoa egongo da Iñaki Larrañaga eta Imanol Insausti trikitilariekin, eta ondoren bertso afaria Mikel Etxezarreta, Aratz Igartzabal eta Iker Zubeldiarekin. Jarraian trikitilariek giroa alaitzen jarraituko dute.

Larunbatean dago ekintza eskaintza handiena. Poteo herrikoiarekin hasiko da eguna, 12:00etan. Txozna 18:30ean irekiko dute, eta jarraian sagardo dastaketa egongo da. Elektrotxufla elektrotxaranga giroa jartzen ibiliko da, 19:00etatik aurrera. Kontzertu eskaintza ere egongo da, 23:00etatik aurrera: Leihotikan, Trikidantz eta Oihana Begana DJa arituko dira.

Igandean, 17:00etan, herria txukuntzeko hitzordua izango dute, eta horrela Gazte Festei amaiera emango diote.

Gaueko autobusa
Gazte Festak direla eta autobus zerbitzu berezia egongo da larunbat iluntze-gauean, inguruko herrietako jendea Olaberriara gerturatzeko.

Joateko 18:00etan eta 22:30ean autobusak izango dira, martxoaren 21ean, larunbatean. Olaberriatik itzultzeko aukera 02:00etan eta 05:00etan egongo da, martxoaren 22an, igande goizaldean. Autobusak Ordizia, Beasain eta Lazkaotik igaroko dira.

Azpiegitura berde berri bat inauguratu dute Olaberrian

Goierriko Hitza — 2026-03-18 15:11:13

Gipuzkoako Foru Aldundiko Jasangarritasun Departamentuak azpiegitura berde berri bat inauguratu du gaur Olaberriko Ihurre auzoan. Erabilera publikorako berreskuratutako espazio natural bat da, eta lurraldeko babesleku klimatikoen sarean integratu da. Jose Ignacio Asensio Jasangarritasun diputatuak, Jokin Garmendia Olaberriko alkateak eta Clara Navas Eusko Jaurlaritzako Turismo zuzendariak parte hartu dute bisitan.

Jarduera Ihurre Garaian egin da. Atsedenleku horrek 2,3 hektarea ditu, eta udalerriko birika berde gisa eta herritarrentzako atsedengune gisa funtzionatzen du. “Proiektuak aukera eman du gutxi gorabehera hektarea erdiko lurzati degradatu bat berreskuratzeko, auzo-erabilerarako erabilgarri dagoen espazioa handituz eta, aldi berean, inguruko faunaren eta floraren babesa indartuz”, nabarmendu dute.

Eremu degradatu bat berroneratzea
46.360 euroko inbertsioa izan du, Juan Jaime Alkiza enpresak gauzatu ditu lanak eta AR Consultores en Medio Ambiente SL enpresaren obra-zuzendaritza izan du. Lanak lau asteko epean egin dira. “Jarduketa, gainera, naturan oinarritutako eta Europako Next Generation funtsen bidez finantzatutako konponbideak bultzatzean kokatzen da”, adierazi dute.

Esku-hartzean, bertan behera utzitako hainbat eraikin kendu dira, besteak beste, amiantozko estalkia duen etxola bat –enpresa espezializatu batek kendu du–, bai eta 4.200 metro koadro baino gehiagoko azalera bat garbitu eta sastrakak kendu ere. Ondoren, espazioa erabat berroneratu da lur-mugimenduen bidez, eta 280 metroko luzera eta bi metroko zabalera izango duen bide berri bat sortu da, irisgarritasuna eta inguruneko ibilbidea hobetzeko.

Egindako jardueren artean, enborren “mikadoa” ere nabarmentzen da. “Egitura natural hori obran moztutako zuhaitzetatik eratorritako egurrez eginda dago, eta biodibertsitateari mesede egiten dio eta animalia txikientzako babesleku gisa balio du”. Era berean, inguruko enborrekin eraikitako bankuak eta mahai bat jarri dira, espazioaren aisialdi-erabilera errazteko, eta hesi bat jarri da landaketa berriak babesteko beharrezkoak diren eremuetan.

Espezie autoktonoen landaketa
Proiektuak “ingurunearen leheneratze ekologikoaren aldeko apustua” egin duela zehaztu dute, espezie autoktonoen 222 zuhaitz landatuz – besteak beste, haritzak, gereziondo basatiak, serbalak eta urkiak – eta baso atlantikoko 335 zuhaixka landatuz, bai eta belar-ereintza ere esku hartutako azalera osoan. “Jarduketa horiek inguruneko biodibertsitatea indartzen eta klima-aldaketaren ondorioen aurrean erresilienteagoa den naturagune bat sortzen laguntzen dute”.

Babesleku klimatikoa
Bisitan, Jasangarritasuneko diputatuak nabarmendu duenez, “Ihurre bezalako proiektuek erakusten dute klima-aldaketara egokitzea tokikotik ere eraikitzen dela, espazio degradatuak berreskuratuz eta herritarrei itzala, natura eta ongizatea ematen dieten leku bizi bihurtuz”. Ildo horretan, azpimarratu duenez, “bultzatzen ari garen babesleku klimatikoen sareak aukera ematen du gero eta udalerri gehiagok izan ditzaten muturreko bero-gertakariei aurre egiteko prestatuta dauden naturaguneak”.

Jarduketa hori bat dator Jasangarritasun Departamentuak eta Naturklima Fundazioak bultzatutako klima-babeslekuen sarearekin. Sare hori dagoeneko presente dago Donostian, Azkoitian, Legazpin, Arrasaten, Getarian, Orion, Irunen, Legorretan, Hernanin eta Idiazabalen, besteak beste, eta zabaltzen jarraitzen du, lurralde osoan estaldura orekatua bermatzeko.

N-I errepidean mozketak egongo dira igandean

Goierriko Hitza — 2026-03-13 08:24:39

Inauste eta mozketa lanengatik zenbait errei itxita izango dira igandean, hilak 15, N-I errepidean. Legorreta, Itsasondo, Ordizia eta Olaberria parean izango dira mozketak. Tolosaldean ere egingo dituzte beste zenbait. Etenak ez dira aldi berean izango baina kontuan hartzea eskatzen da:

Donostiarako errei motela itxita egongo da, 423+500 KPtik (Ibaiondo industrialdea Itsasondon) 425,000 Kpra (Repsoleko gasolindegia Legorretan). Eragina goizeko 4:00etatik eguardiko 15:00etara.

Donostiarako errei motela ere itxita, 415,200 KPtik (Ampo Idiazabalen) 417,200 Kpra (Irizar, Olaberrian). Eragina goizeko 5:00etatik arratsaldeko 17:00etara.

Olatz Salvador, zainak ematen

Goierriko Hitza — 2026-03-06 12:42:17

Olatz Salvador bakarlari donostiarrak Zainak eman azken diskoaren izen bera duen biraren kontzertua egingo du bihar, hilak 7, Olaberriko kultur areto berrian (19:00). Sarrerak salgai daude udaletxean, Zezilionean eta Ihurreko ostatuan, 10 euroan.

Aizpea Gaztak bigarren saria lortu du Eibarren

Goierriko Hitza — 2025-12-01 12:37:45

Eibarko 45. San Andres Azoka ospatu zuten atzo, eta horren barruan Gazta lehiaketa ere izan zen. Bigarren saria lortu zuen Mikel Etxezarretaren eta Eli Arrillagaren Olaberriko Aizpea Gaztak. Etxezarretan jaso zuen saria. Txapelketa Legutioko (Araba) Iruri gaztak irabazi zuen.

'Stop Zundaketak-AHTrik ez' mendi martxa, igandean Idiazabalen

Goierriko Hitza — 2025-11-19 13:54:00

Igande honetako eguraldi iragarpena aldekoa ez bada ere, Stop Zundaketak-AHTrik ez mendi martxa egin egingo dela iragarri dute antolatzaileekin eta “aldarrikapenarekin aurrera” egingo dutela baieztatu dute. Eguraldiaren eraginez, egitarau alternatibo bat proposatu dute.

9:30ean Idiazabalgo plazatik abiatuta, Olaberria bidean dagoen zundaketa puntu bat bisitatuko dute eta azpiegitura honen ibilbidearen inguruko informazioa emango da ibilbidean zehar. Ibilbidea erraza dela aurreratu dute, ia aldaparik gabea. Ibilbide zirkularra da eta 12:00etarako Idiazabalen egotea aurreikusi dute.

12:00etan aldarrikapen festa egingo dute Idiazabalgo frontoian.
– Txalapartariak
– Egungo testuinguruaren irakurketa STOP ZUNDAKETAK – AHTrik Ez ekimenaren aldetik
– Inma Mugerza hidrogeologoaren azalpen labur bat AHTak ingurune karstikoan sortzen dituen kalteen inguruan.
– Izaki Mitologiko liluragarrien ikuskizuna
– Elkarretaratzeko argazkia.
– Bertako produktuz osaturiko mokadua
– Trikitilariak

Arropa eta oinetako egokiak eta ura eramatea gomendatu dituzte, eta txakurrak eramatekotan, lotua joan behar dutela gogorarazi dute.

Asteklimaren baitan, energia izango dute hizpide olaberritarrek

Goierriko Hitza — 2025-10-20 09:42:01

Klima aldaketari eta energiari eskainitako Euskal Autonomia Erkidegoko EAE Asteklima egitasmoarekin bat egin du beste urte batez Olaberriko Udalak, eta urriaren 26ra bitarte ekimen desberdinak gauzatuko dituzte herrian: hain justu, bi hitzaldi eskainiko dituzte. Etxean energia aurreztearen inguruan hitz egingo du aurrenekoak, eta bigarrenak, berriz, Tokiko energia komunitateen inguruan. Ekimen honen helburua da, besteak beste, herritarrek klima-aldaketaren eta beharrezko trantsizio energetiko eta klimatikoaren aurrean kontzientziatzea eta mobilizatzea. Zentzu horretan, bertaratzeko eta jardunaldietan parte hartzeko deia egin die udalak herritarrei.

Bihar eta ostegunean

Esan bezala, udalak energia jasangarritasunerako trantsizioan herritarra ahalduntzeko bi tailer antolatu ditu: aurrenekoa, bihar izango da, urriak 21, asteartea, 18:00etan eraikin berrian. Gipuzkoako Foru Aldundiak antolatzen dituen ARGITU tailerren barruan, Etxean energia aurrez dezakezu erosotasunik galdu gabe tailerra eskainiko dute CAVIAR arkitektura taldeko Markel Arbulu eta Jorge Otaegik. Gainera, KIT maletinekin, etxeko energia kontsumoak neurtzen dituzten gailuak etxera eramateko aukera izango dute bertaratzen direnek.

Bigarren tailerra, berriz, ostegunean izango da, urriak 23, aurrekoaren toki berean. Tailer hau, baina, Olaberriko Tokiko energia komunitateko kideei zuzendua egongo da. R2M solution enpresako Eneko Olabarrieta arduratuko da horretaz, eta besteak beste, energia komunitate batek aurrera egiteko behar dituen tresnak eman eta ahalduntzeko tailerra izango da.

Olaberriko EH Bilduk legealdi erdiko balantzea aurkeztu du

Goierriko Hitza — 2025-10-17 11:16:18

Olaberriko EH Bilduk legealdi erdiko balantzea aurkeztu du, etxebizitza, ongizatea eta zaintza ardatz hartuta. Koalizioak azaldu duenez, herriko erronka nagusiei aurre egiten hasi dira, eta datozen urteetan ere bide horretan jarraitzeko konpromisoa adierazi dute.

Azken Soziometroaren arabera, 2007tik lehen aldiz, etxebizitza da herritarren kezka nagusiena; Olaberrian ere, etxebizitza eskuratzeko zailtasunak, gazteentzako aukerarik eza eta emantzipazio arazoak gero eta handiagoak dira. Irtenbide bat emateko asmotan, EH Bilduk Elizaren inguruko lursail batean etxebizitza berriak egiteko lehen urratsak egin ditu, eta herrian identifikatutako 67 etxe hutsak alokairu sozialerako aktibatzeko gonbitea luzatu die jabeei. Gaineratu dute Ihurren hutsik dauden lokalak etxebizitza bihurtzeko proiektua ere abian dela.

Ongizatea eta zaintza arloan ere hainbat ekimen martxan jarri dituztela azaldu dute. 2023an egindako parte-hartze prozesu batean, Ihurreko biztanleria Gipuzkoako batez bestekoa baino zaharragoa dela ondorioztatu zuten; horrenbestez, EH Bilduk Matiarekin elkarlana sustatu du eta zaintza mahaia sortzea proposatu. Gizarte langilearen lanaldia hilabetean 20 orduz handitzea eta osasun zentroarekin koordinazioa hobetzea ere lortu dute, nahiz eta koalizioak lanaldi oso bat edo gehiago beharrezkotzat jotzen duen etorkizunean. Zaintzaileei dagokienez, formazioa eta lan baldintzak hobetzeko neurriak proposatu dituzte, baita etxez etxeko laguntza zerbitzua indartzeko plegu berriak sortzea ere.

Elkarlanerako sostengua

EH Bilduk gogorarazi du urtarrilaren 22an Goierriko udalek lankidetzazko gobernantza eredu berria sinatu zutela, eta nabarmendu dute, hori guztia datozen bi urteetan gauzatu ahal izateko elkarlana eta lidergo partekatua «beharrezkoak» direla.