Goierriko Hitza

Errigora sustraiak ahaztu gabe espaziora begira

Goierriko Hitza — 2026-10-24 17:40:58

Errigorak herri ekimenak hasierako boluntarioei omenaldia egin diete Lazkaon. Eguna hasteko Errigora sustraietatik espaziora dokumentala estreinatu dute Areria zineman. Jende asko hurbildu Euskal Herriko hainbat txokotatik, hori horrela zinema jendez bete da.

Dokumentalaren estreinaldiaren ondoren, Lazkaoko frontoira inguratu dira denak, hamaiketako egin ostean, omenaldi ekitaldia egiteko. Erramun Amundarain, hasierako boluntario izan zena eta lehengo urtean zendu zena, gogoratu dute bere argazki bat ipiniz oholtza gainean. Egunean zehar Kuxkuxtu txaranga urruñarra ere badabil giroa alaitzen. Behin omenaldia amaituta bazkaria egon da frontoiean bertan.

Omenaldiko argazkiak eta bideoa.

Biometano plantari buruzko bilkura egingo dute gaur Olaberrian

Goierriko Hitza — 2026-10-21 10:39:03

Olaberriko Udalak ArcelorMittal eta CAF enpresek eraiki asmo duten biometano plantari buruzko informazio bilkura deitu du gaurko. Bi enpresa horiek 2025eko maiatzean egin zuten planta hori eraikitzeko proposamena. Bi enpresa sustatzaileen esanetan autokontsumora bideratuko litzateke soilik bertan sortutako energia.

Goierri Barnetik Goierriko Gobernatza Sarearen barruan mahai tekniko independente bat eratzea erabaki zen eskualdeko eragileek bultzatuta. Mahai horren egitekoa proiektuaren inpaktuak aztertzea izan da. Dagoeneko txosten teknikoa osatu du eta hori izango da gaurko bilkuran aurkeztuko dutena. Ihurreko jubilatuen lokalean da batzarra, 18:00etan.

“Gai honek sor dezakeen kezka kontuan izanda”, herritarrak bilerara deitu ditu udalak, “egon daitezkeen kezka eta zalantza guztiak azaldu ahal izateko, ondoren bakoitzak bere balorazioa egin ahal dezan”. Mahai teknikoaren koordinazioan aritu den adituak, eta biometano proiektua idatzi duen Delfos enpresako ordezkariak hartuko dute hitza.

Xabier Berasategik Gran Prix Chiriqui Klasikoa irabazi du Panaman

Goierriko Hitza — 2026-10-17 10:03:01

Euskaltel-Euskadiko Goierriko txirrindulariek erakustaldia eman dute Panamako Gran Prix Chiriquin Klasikoan. Olaberriko Xabier Berasategik irabazi du lasterketa eta bigarren postuan sartu da Xabier Isasa urretxuarra. Gari Ugarte legazpiarra ere protagonista izan da.

Hamaika txirrindularik osatutako multzo batek, bost laranjekin, lasterketa lehiatu du, 170,5 kilometrokoa David eta Las Lomas hirien artean. Gari Ugarte saiatu da, baina azkenean garaipena esprintean erabaki da; Berasategik bere maila azaldu du garaipena poltsikarazeko; Isasa, Muñoz, Gotzon Martin eta Gari Ugarte taldekideak, berriz, bigarren, laugarren, hamargarren eta hamaikagarren sailkatu dira, hurrenez hurren.

Lasterketa baldintza gogorretan jokatu da gainera, 37 gradurekin eta hezetasun itogarriarekin. Euskaltel-Euskadiren esanetan, “emaitza kolektibo izugarria eta 93 UCI puntu gehiago. Azken egunera arte, dena ematen”.

Berasategirentzat profesionaletako lehen garaipena izan da Panamakoa. Laugarren denboraldia du Euskaltel-Euskadi taldean, eta beste bi denboraldirako berritu zuen orain dela gutxi.

Txirrindulari talde berak, Jorge Azanzaren zuzendaritzapean, Chiriqui Probintzia Klasikoari (2.2) ekingo dio asteburuan, bi etapatan, larunbatean eta igandean.

Bigarren eskuko arroparen azoka ibiltaria, Olaberrian igandean

Goierriko Hitza — 2026-10-16 15:37:46

Biziola Kooperatibak eta Batuz Fundazioak bigarren eskuko arroparen azoka ibiltaria Olaberrian egingo dute, igandean, 12:00etatik 14:00etara bitartean.

Azoka ibiltarien bidez, bigarren eskuko arroparen eskaintza tokiko komunitateetara hurbiltzeaz gain, kontsumo ohitura arduratsuagoak sustatu eta herrietako ekimenekin elkarlanerako espazioak sortu nahi dira.

Egitasmoak dagoeneko hainbat herri bisitatu ditu, besteak beste, Ataun, Zerain eta Itsasondo, eta herriz herri zabaltzen jarraitzen du.

Ehunak berrerabiltzen

Ehungintza ingurumen inpaktu handiko sektorea da, lehengaien kontsumoari eta sortzen dituen hondakinei dagokienez. Beraz, arropa berrerabiltzea «funtsezkoa» dela diote antolatzaileek.

Azoka ibiltariaz gain, ehunak berrerabiltzeko tailerrak ere egongo dira. Arropa konpontzeko teknikak erakutsiko dituzte: «Botoiak josten, zuloak konpontzen…»

HINE Group-ek Nord Fluid enpresa bereganatu du

Goierriko Hitza — 2026-10-08 10:49:43

HINE Group-ek bere hazkunde estrategiari jarraituz Nord Fluid enpresa italiarra bereganatu du. HINEk atzo jakinarazi zuen eragiketa horren berri ohar baten bidez. Talde italiarrak 40 urtetik gorako esperentzia duela adierazi du Olaberriko enpresak. “60 milioi eurotik gora fakturatzen ditu, 400.000 erreferentzia baino gehiago ditu stockean; eta Italian, Eslovenian eta nazioarteko merkatuetan presentzia sendoa du”.

Eragiketaren bidez, HINEk enpresa italiarraren gehiengoa eskuratuko du, eta datozen urteetan kapitalaren %100 eskuratzeko konpromisoa hartu du. Danielle Brambilla Nord Fluid enpresako Zuzendari Nagusiak zein Alberto Carlo Finantza eta Eragiketa Zuzendariak Nord Fluid gidatzen jarraituko dute HINEren barruan. Olaberriko enpresak eragiketa 2025-2028 Plan Estrategikoaren barruan kokatzen du.

Inkorporazio horrekin, euskal enpresak bere jarduera zazpitik bederatzi herrialdetara zabaltzen duela adierazten du, hain zuzen ere Euskal Herriaz gain Estatu Batuak, Brasil, Mexiko, India, Txina, Polonia, Italia eta Eslovenia. Lander Gibelaldek nabarmendu duenez, “Europan dugun presentzia zabaltzen du eta industria-merkatuan zein mugikortasun sektorean hazten jarraitzeko aukera ematen digu”. Gainera, HINE Group-ek azpimarratu du 1.ooo profesional izatera “hurbiltzen” ari dela, eta 2027an 300 milioi euro inguruko fakturazioa lortzeko “helbururantz” aurrera egiten duela.

Xabier Berasategi bigarren Vendeeko Tourrean, Frantzian

Goierriko Hitza — 2026-10-05 10:57:16

Euskaltel-Euskadi taldeko Xabier Berasategik bigarren postua eskuratu du Vendeeko Tourrean, Frantzian, Saint-Jean-d ‘Hermine eta Saint-Gilles-Croix-de-Vie artean jokatutako 198,2 kilometroko lasterketan.

Garaipena lortzeko esprintean, Berasategi bigarren helmugaratu da; Alexis Renardek (COF) besterik ez gainditu du txirrindulari laranja. Gipuzkoarrak bere sasoi ona erakutsi du, ihesaldi baten parte izan baita lasterketaren lehen zatian. Gari Ugarte legazpiarra 11. izan da, Louis Sutton 22. eta Gotzon Martin 23.

“Egia esan, nahiko nekatuta nengoen, zalantza asko nituen, baina indarrak gordetzen saiatu naiz eta dena eman dut bukaeran. Gaur zortea izan dut eta pozik nago bigarren postu honekin”

Hauxe da Xabier Berasategi egindako balorazioa: “Bagenekien gaur lasterketa oso gogorra izan zitekeela. Hasiera aldapaz eta errepide estuez betea zegoen; gainera, aldeko haizea zegoen aurreikusita, eta, beraz, ihesaldi bat egin zitekeen. Oso adi egon gara, eta ihesaldi batean sartu gara Gari –zorte txarra izan du, katea atera zaiolako eta atzeratu egin da– eta ni. Iristeko aukerak genituela uste nuen, baina tropelean ez digute tarterik utzi. Egia esan, nahiko nekatuta nengoen, zalantza asko nituen, baina indarrak gordetzen saiatu naiz eta dena eman dut bukaeran. Gaur zortea izan dut eta pozik nago bigarren postu honekin”.

Aurten, Berasategi bigarren izan zen Hainango Tourrean eta Anicolor Sari Nagusiko etapa batean (laugarren sailkapen nagusian), bosgarren Castelloko Sari Nagusian, La Marseillaise Sari Nagusian eta Esloveniako Tourreko bi etapatan eta bederatzigarren Gaztela eta Leongo Klasikoan. Duela gutxi, bi denboraldirako berritu zuen kontratua Euskaltel-Euskadirekin.

Gari Ugarte legazpiarra eta Nico Alustiza zumarragarra lehen hamarretan Huangshango Tourrean

Goierriko Hitza — 2026-09-21 11:38:33

Euskaltel-Euskadin lehiatzen diren lau txirrindulari goierritarretatik hiru Huangshaneko Tourrean aritu dira, Txinan, eta emaitza bikainak lortu dituzte. Gari Ugarte legazpiarrak zazpigarren postua lortu du nagusian, Nicolas Alustiza zumarragarrak hamargarrena eta Xabier Isasa urretxuarrak hamabigarrena. Goierriko hiru txirrindulariak eguneko ihesaldian sartu dira azken etapan, eta hainbat gainsari bereganatu dituzte. Euskaltel izan da lasterketako talderik onena.

Bestalde, ostiralean bukatu zen Abruzzoko Giroan, Italian, Xabier Berasategi olaberritarra izan da sailkapen nagusiko txirrindulari laranjarik onena, 18. postuan.

Ezkerretik bigarrena Nico Alustiza, laugarrena Gari Ugarte eta bosgarrena Xabier Isasa.Euskaltel-Euskadi

Sagardo txapelketa herrikoiak egingo dituzte Olaberrian eta Zaldibian

Goierriko Hitza — 2026-09-16 10:37:06

Zaldibiako sagardogileen txapelketa izango da ostiralean. Zubi-Buru elkartean 20:30ean. Afaria egongo da 25 euroren truke, eta menuan Gernikako piperrak, txorizo egosia, bakailao tortilla, saiheskia eta gazta-menbrilloa sartuko da. Txartelak Arresen, Illatin, jubilatuenean eta Joxepanen daude eskuragarri.

Olaberriako sagardo txapelketa, berriz, larunbatean egingo dute Arkupe elkartean. Zortzi partaide izango dira: Garikoitz Arrietaren Aranguren sagardoa, Jokin Arratibelen Haize-Leku, Andoni Garmendiaren Etxola, Felix Urteagaren Txara-Berri, Juanjo Amoztegiren Makaztegi, Arantzegiren Barrene, Jose Bernardo Aldasororen Handikosoro eta Egoitz Salinasen Aranguren-Txiki. Ondoren, afaria egingo dute Arkupen, bertan, 20 euro ordaindu behar dira.

Eneko Goibururen gaztak irabazi du Elgoibarko gazta txapelketa

Goierriko Hitza — 2026-09-01 13:29:54

Goierriko gaztak Elgoibarko San Bartolome jaietako gazta txapelketan protagonista izan dira asteburuan. Herriko jai nagusien baitan, Baserritarren Eguna ospatu zuten larunbatean eta urtero bezala, sagardo eta gazta lehiaketak jokatu zituzten bertan. Segurako Ondarre baserriko Eneko Goibururen gaztak irabazi zuen txapelketa eta Olaberriako Aizpea gaztandegia sailkatu zen hirugarren postuan. Kortariako gaztak jaso zuen bigarren saria, iazkoan irabazle izan zen gaztandegiak.

Kalamua elkarteak antolatzen duen gazta lehiaketaren 64. edizioa izan zen larunbatekoa. Garaipen honi esker, urte bukaeran Elgoibarrera itzultzeko aukera eskuratu du Eneko Goiburuk, Urteko Gaztarik Onena aukeratzeko lehiaketan lehiatuko baitira txapelketaren bat irabazten duten gaztagileak urteko azken larunbatean ospatzen den Gabon Zahar Feriaren barruan egiten den lehiaketan. Goiburuk, hain zuzen, 2023an irabazi zuen lehiaketa hori.

San Juan Txiki eguna ospatzen ari dira Olaberrin

Goierriko Hitza — 2026-08-29 12:14:05

San Juan Txiki eguna dute gaur olaberritarrek, eta egun osorako egitaraua prestatu dute. Goiza bi pilota partiduekin hasi dute. Lehenengoa infantil mailakoa izan da: Aranburu eta Agirre olaberritarrak Lazkaoko J. Arrietaren eta Alegiako I. Artolaren aurka aritu dira. Partida estua izan da, bi bikoteak 21 eta 21eko berdinketara iritsi baitira. Azkenean, Aranburu eta Agirre izan dira garaile.

Bigarren partida, berriz, Euskal selekzioaren erakustaldia izan da. Olaberriko Azketa eta Segurako Goiburu Villabonako J. Cestauren eta Alegiako Irazustabarrenaren aurka lehiatu dira. Neurketa estua izan da hau ere, eta bi bikoteak 21eko berdinketara iritsi dira. Azkenean, Cestau eta Irazustabarrena izan dira garaile.

Arratsaldean ere kirolak hartuko du protagonismoa Olaberrin. 17:30ean haurren herri kirol desafioa egingo dute, eta ondoren helduen txanda izango da. 18:00etan, bi gazte taldek elkarren aurka neurtuko dituzte indarrak, eta ondoren, finala talde beteranoaren aurka jokatuko dute.

20:30ean moxal-haragi errea izango da, eta eguna borobiltzeko, 22:30ean Oilar Beltzak taldearen erromeria izango da.

Olaberri prest da San Juan Txikirako

Goierriko Hitza — 2026-08-25 07:38:26

San Juan Txiki eguna ospatuko dute Olaberrin abuztuaren 29an. Esku-pilota partidekin emango diote hasiera egunari, eta hainbat ekitaldiren ostean, Oilar Beltzak taldearen erromeriarekin amaituko dute ospakizuna. Adin guztietarako ekintzak izango dira tartean, egun osoan zehar giroa eta festa nagusi izan daitezen.

Hona hemen aurtengo egitaraua:

Aizpea berriro garaile, oraingoan Plentzian

Goierriko Hitza — 2026-08-17 08:27:14

Beste lehen sari bat irabazi du Olaberriko Aizpea gaztak. Atzo, Plentzian jokatutako XXXV. Idiazabal Baserrikoa Artzai Gazta Lehiaketan nagusitu zen, eta azken egunetako garaipen segida luzatu du.

Izan ere, larunbatean bertan, Araian (Araba) ospatutako Idiazabal Gaztaren Lehiaketan ere lehen saria eskuratu zuen Aizpeak. Hala, bi lehiaketetan jarraian garaile izatea lortu du Olaberriko gaztandegiak.

Plentzian, Elgoibarko Mausitxa gaztak eskuratu zuen bigarren saria, eta Barrundiako Larreako gaztak hirugarrena.

Argazkiak: @idiazabal_gazta

Xabier Berasategik 2028ra arte berritu du Euskaltelekin

Goierriko Hitza — 2026-08-06 11:24:43

Xabier Berasategi Olaberriko txirrindulariak beste bi denboraldiz jarraituko du Euskaltel-Euskadi taldean, “bere kirol-heldutasuna etxeko taldean osatzeko”.

Euskaltelek gogoratu du olaberritarrak zortzi urte daramatzala egituran, harrobian hasi zenetik, “eta pausoz pauso hazten jarraitu du”. 2026an, Tour of Hainanen bigarren izan da, eta hainbat top-10 lortu ditu, taldeko UCI puntu gehien batu dituen txirrindularia izanik.

Berasategirentzat “oso berezia da laranjaz jantzita lehiatzea eta etxeko taldean txirrindulari gisa hazten jarraitzea”.

Ertzaintzak hiru gizonezko atxilotu ditu Olaberriko lantegi batean lapurtzen saiatzegatik

Goierriko Hitza — 2026-08-04 23:29:36

Segurtasun Sailak jakinarazi duenez, igandetik astelehenera bitarteko gauean hiru pertsona atxilotu zituen Ertzaintzak Olaberrian, Harizti industrialdeko lantegi batean lapurtzen saiatzeagatik. Atxilotuak 33, 23 eta 18 urteko gizonezkoak ziren, eta hirurek dituzte polizia aurrekariak, ondasunen aurkako delituak egiteagatik.

Antza denez, Ertzaintzak herritar baten deia jaso zuen, hiru gizonezkok lantegi bateko kanpoko hesia apurtu eta barrura sartu zirela ohartaraziz. Ertzainak bertaratu zirenean, argirik gabe zirkulatzen ari zen ibilgailu bat ikusi eta geldiarazi zuten. Bertan, Ertzaintza ikusita ihesi ari ziren hiru gizonezkoak zihoazen. Hiru pertsonak identifikatu eta gero, koartelera eraman zituzten, epailearen aurrera eraman arte.

Angela Vilariño Europako Mendi Txapelketaren bila

Goierriko Hitza — 2026-07-15 10:40:48

Angela Vilariñoren 2026ko Europako Mendi Txapelketarako aurkezpena egin zuten Olaberriko zirkuituan, atzo. Vilariñok irabaziko duen bere hirugarren aldia izango litzateke. Aurkezpenean bere familia, taldekideak, babesleak eta instituzio ordezkariei eskerrak eman dizkie berarenganako «apustua» egiteagatik. Horien artean zeuden Efren Vazquez moto gidari ohia eta Angelaren senarra, Fito Cabrales abeslaria eta Goizane Alvarez Kultura eta Kirol diputatua.

Vazquezek Vilariñoren itzulera balioan jarri du, «bularreko minbizi baten ondoren eta bigarren haurdunaldiaren ondoren lehiatzera itzultzeko indar handia behar da». Kirol eta Kultura diputatuak harro esan dio, «dohaina eta talde on bat baduzu edonora iritsi zaitezkela erakutsi duzu, eta emakume feminista naizen aldetik asko miresten zaitut»

N-I errepidean jarduketak egingo dituzte udako hilabeteetan

Goierriko Hitza — 2026-07-03 10:42:37

Gipuzkoako Foru Aldundiak jakinarazi du uda baliatuko duela N-I errepideko hainbat puntutan kontserbazio- eta hobekuntza-lanak egiteko, bide-segurtasuna indartzeko eta azpiegituraren egoera hobetzeko helburuarekin.

Goierrin ere egingo dituzte zenbait jarduketa. Olaberrian, N-I eta AP-636 lotzen dituen bide-adarreko hiru bihurguneetan zoruaren itsaspena hobetuko da, zirkulazioaren segurtasuna handitzeko eta arrisku egoerak murrizteko; eta Legorretan, berriz, Itsasondo eta Legorretako tunelen arteko zatian galtzadaren errodadura-geruza berrituko da, zirkulazio-baldintzak hobetzeko eta zoruaren erabilgarritasuna luzatzeko. Goierrin ez ezik, Tolosan eta Andoainen ere egingo dira esku-hartzeak.

Afekzioa ahalik eta txikiena izan dadin, lanak udako asteburuetan programatu ditu Aldundiak, trafiko-intentsitatea txikiagoa izaten den garaian, hain justu. Gainera, mota honetako jarduketek, eguraldi-baldintza egonkorrak eskatzen dituzte, lanak behar bezala gauzatzeko.

Labaka eta Munduate txapeldun

Goierriko Hitza — 2026-06-09 10:40:16

Intza Labaka ataundarrak eta Islara Munduate olaberritarrak Nafarroako txapelketa irabazi zuten igandean. Finalean Vidan-Munduateri irabazi zieten. Islarak haren ahizpa Enearen aurka jokatu zuen. Emakumeen pilota ekitaldia izan zen, denera sei final jokatu ziren.

Ekainaren 5 eta 6ko elikagai bilketarako boluntarioak behar dituzte

Goierriko Hitza — 2026-05-29 13:46:57

Ekainaren 5ean eta 6an, Elikagai Bankuak antolatuta eta Nagusilan elkartearekin laguntzarekin, elikagai bilketa egingo dute. Bilketetarako boluntarioak behar dituzte. Laguntzeko prest daudenek 658 750 767 zenbakira deitu edo WhatsApp mezua bidali dezakete. Beasaingo Erosky City-n eta BMn eta Olaberriko Carrefourren izango dira bilketak.

Ihurreko Jaien hasierako txupinazoa bihar izango da, 18:00etan

Goierriko Hitza — 2026-04-30 10:13:24

Ihurreko Jaiak maiatzaren 1ean eta 2an izango dira eta egitarau zabala antolatu dute. Festei hasiera emango diete txupinazoarekin eta buruhandiekin, 18:00etan. Trikipoteoa 19:30ean izango da. Iluntzean herri afaria egingo dute, 21:00etan. Tiketak 20 euroan zeuden, baina asteartea zen izena emateko azken eguna. Afalostean trikitilariak egongo dira, 22:00etan. Mikeltxi Dj-ak gaua girotuko du, 03:00ak arte.

Haurrentzako jolasekin hasiko dute bigarren eguna, 11:30ean. Gesaltza txaranga 12:30ean arituko da. Ondoren, kalderete sariak banatuko dituzte herri bazkariaren aurretik, 14:00etan. Bazkarirako txartelak eskuratzeko epea asteartera artekoa zen. Bazkalostean bingo, mus eta toka txapelketak egongo dira, 17:00etan. Gesaltza txaranga arituko da, 19:30ean.

Tortilla patata lehiaketarekin festei amaiera emango zaie, 20:00etan.