Goierriko Hitza

Errigora sustraiak ahaztu gabe espaziora begira

Goierriko Hitza — 2026-10-24 17:40:58

Errigorak herri ekimenak hasierako boluntarioei omenaldia egin diete Lazkaon. Eguna hasteko Errigora sustraietatik espaziora dokumentala estreinatu dute Areria zineman. Jende asko hurbildu Euskal Herriko hainbat txokotatik, hori horrela zinema jendez bete da.

Dokumentalaren estreinaldiaren ondoren, Lazkaoko frontoira inguratu dira denak, hamaiketako egin ostean, omenaldi ekitaldia egiteko. Erramun Amundarain, hasierako boluntario izan zena eta lehengo urtean zendu zena, gogoratu dute bere argazki bat ipiniz oholtza gainean. Egunean zehar Kuxkuxtu txaranga urruñarra ere badabil giroa alaitzen. Behin omenaldia amaituta bazkaria egon da frontoiean bertan.

Omenaldiko argazkiak eta bideoa.

Euskorleans Ordiziarrocken giroa jartzen dagoeneko

Goierriko Hitza — 2026-10-24 15:07:10

Ordiziarrock jaialdia lehenengo aldiz egun bakar batean ospatzen ari dira. Euskorleans ari da dagoeneko herria girotzen. Gainera, eguzkia oraingoz laguntzen ari zaie jaialdiaren formatu berriaren estreinaldian.

Aurreko edizioetan pilotalekua izan da jaialdiaren erdigunea. Aurten, ordea, alde zaharreko kaleetan barrena sakabanatuta ibiliko dira taldeak. Euskorleansek erakusten du aurtengo formatuaren norabidea. Euskal kantu eta dantza tradizionalak New Orleans estiloko brass band musikarekin uztartzen dituen kale ikuskizun ibiltaria da.

Musikaz harago, dantza ere kalera aterako dute. Izan ere, 19:00etan hasita, Street Dantz dantza-ikuskizunak hartuko du Plaza Nagusia, eta bizikleta gainean mugitzen den La Dinamo funk musika talde kataluniarraren txanda izango da ondoren. 22:00etan, berriz, Zo-Zongo taldearen Psycho Clown kale-ikuskizuna izango da alde zaharrean, perkusioa, piroteknia eta antzerkia uztartzen dituena. Sakatu elektrotxarangak hartuko du jarraian lekukoa, eta Dj Necoraren saioak emango dio amaiera ekimenari.

San Jose egoitzako langileen murrizketek zerbitzuaren kalitatea okertu dutela salatu du ELAk

Goierriko Hitza — 2026-10-23 10:30:01

Ordiziako San Jose egoitzako langileak pasa den urtarrilaz geroztik greba mugagabean daude; lan baldintzak hobetuko dituen hitzarmenaren aldeko borrokan ari dira, baina egoerak ez du hobera egiten: kaleratzeak, murrizketak, lan-karga handiak… zerbitzuaren kalitatean emandako okertze nabarmenak salatu berri ditu ELA sindikatuak.

Jakina da Kabia foru organismo autonomoak egoitzaren kudeaketa Zaintzen enpresari esleitu ziola 2025ean; ordutik, enpresa kudeatzailea langileak murriztu nahian dabiltzala jakinarazi du sindikatuak hedabideetara bidalitako oharrean: “Pasa den urriaren 1ean enpresak uda aurretik egindako kaleratze eta murrizketez gain, berriro laguntzaileen lan orduak (ratioak) murriztu ditu eta honek langileen lan-kargak igo eta euren artean sortu duen estres eta antsietateaz gain, erabiltzaileei ematen zaien arreta kalitatea nabarmen okertzea ekarri du”.

Erabiltzaileak, gainera, zaurgarritasun egoeran daudela azpimarratu du; izan ere, eguneko ordu tarte batzuetan solairu batean egoiliarrak gainbegiratuko dituen laguntzailerik gabe gelditu dira. “Erorketak egon dira emandako murrizketengatik eta otorduak zein siesta orduak atzeratzea ekarri du. Mediku agindu batzuk ere ezin izan dira bete”, ohartarazi du ELAk.

Ratioak murrizteak ekarri dituen ondorioak ere gogorarazi ditu sindikatuak. Izan ere, maiatza aurretik, laguntzaileek 126 orduko arreta eskaintzen zieten egoitzan dauden 55 erabiltzaileei, baina urriaren 1ean inposatutako murrizketen ondorioz, 80 orduko bataz bestekoa eskaintzen ari dira urrian. Alegia, lehen baino sei laguntzaile gutxiago daude eguneko. Hala, lehengo ratio mailara bueltatzea eskatzeko, sindikatuak helegitea jarri du sozial epaitegian.

Egoera hori guztia salatzeko, gainera, sindikatuak salaketa jarri du Foru Aldundiaren gizarte politiketako ikuskaritzan, eta egoeran eskua hartu dezala eskatu dio Foru Aldundiari. Zentzu horretan, langileak egoitzetako ratioak leheneratu eta erabiltzaileen eskubideak errespetatzea eskatzeko kalera aterako dira datorren azaroaren 18an, arratsaldeko 18.00etan. Mobilizazioan parte hartzera deitu dituzte langile, senide zein bestelako eragile eta herritarrak.

Marcelo Bergarak pintura erakusketa berria inauguratuko du gaur

Goierriko Hitza — 2026-10-23 10:18:53

Ordizian jaiotako Marcelo Vergara Mugicaren pintura erakusketa berria inauguratuko da gaur arratsaldeko 19:00etan, Barrenako erakusketa gelan. Olio pinturaz egindako 24 koadro bildu ditu, eta besteen artean, formen eta koloreen inguruan hausnartzera gonbidatzen du haren lan berriak, begirada propioaren bitartez.

Arte garaikideaz gozatzen dutenentzat pentsaturiko erakusketa izango da eta datorren azaroaren 13ra arte egongo da ikusgai Barrenan bertan, goizean, 09:00etatik arratsaldean 19:00etara bitartean.

Egun bakarreko Ordiziarrock, lehen aldiz

Goierriko Hitza — 2026-10-23 09:40:04

23 urte ez dira alferrik igarotzen; Ordiziarrock jaialdiak ibilbide luzea egin du Ordiziako kultur egutegian eta milaka musikazaleen elkargune izan da urte luzeetan zehar. Urko Ruiz de Apodaka ordiziarra da antolakuntza taldean buru-belarri aritu den herritarretako bat, eta azaldu du urte askoan poztasun ugari ekarri dituen ekimena izanagatik ere, antolakuntza lanek ere badutela beren kostua: «Ordiziarrock bezalako jaialdi bat antolatzeak izugarrizko lana dakar. Urte osoko konpromiso, inplikazio eta diseinua eskatzen du, eta urteko lan osoari jaialdi handia gehitzeak buruhaustea eta nekea suposatzen ditu». Bada, 23. aldi honek agerian utzi du antolakuntza taldeko kideen urteetako zama pilatua.

Ruiz de Apodakak jakinarazi du orain hilabete eskas erabaki zutela aurtengo edizioa aurrera ateratzea: «Hainbat arrazoi tarteko, irailean aurten jaialdirik ez antolatzea zen asmoa». Irailaren 14an egindako bileran, ordea, formatuari buelta pare bat emateko proposamena atera zenez, jaialdiari eustea eta ekimena antolatzea erabaki zuten antolatzaileek.

Kale eta plaza bereziak

Aurtengo Ordiziarrock, beraz, ez da aurrekoen errepikapena izango. Ez du ohiko egiturarik izango, ez eta aurreko urteetako antolaketarik ere. Urteetako lanaren nekeak eraginda, taldeak beste bide bat hartu du eta formatua aldatzea izan da jaialdiari jarraipena emateko aukera bakarra. «Buruak lehertuta ditugu. Orain, lehertu daitezela kaleak!» da aurtengo lelo nagusia, eta hitz-joko horrek badu, nolabait, edizio honen atzean dagoen errealitatearen arrastoa ere.

«Ordiziarrock bezalako jaialdi bat antolatzeak urte osoko konpromisoa, inplikazioa eta diseinua eskatzen du»

«Hainbat arrazoi tarteko, irailean aurten jaialdirik ez antolatzea zen asmoa»

Urko Ruiz de Apodaka. Ordiziarrock

Orain arte bizpahiru eguneko egitaraua izaten zen arren, egun bakarrera lekualdatu dute aurtengoan: larunbatean izango da, eta jaialdia bere ohiko eszenatokietatik kalera lekualdatuko dute. Pilotalekua izan da gaur arte ekimenaren erdigune, baina oraingoan, alde zaharreko kaleek eta plaza nagusiak hartuko dute lekukoa. Ekitaldiak leku bakarrean kontzentratu ordez, herrian barrena sakabanatuko dira, eta espazio bakoitzak bere tartea eta bere soinua izango ditu. Hain justu, Ruiz de Apodakak jakinarazi du horixe dela aurtengo edizioaren helburua: Ordiziarrock gune konkretu bat izatetik, herri guztira igaro eta kaleak ere Ordiziarrock areto bihurtzea.

Hala izanagatik ere, leku berean amaituko dute taldeek euren ikuskizuna: Ordiziako Plaza Nagusian. Antolatzaileek aurreratu dutenez, areto «berezi, goxo eta polita» muntatuko dute herriaren epizentro eta elkargune nagusi den plazaren erdian. Jana eta edana ere izango dira bertaratzen diren herritar eta parte-hartzaileentzat. Taldeen ikuskizunak amaitzeko «modu ezin hobea» izango dela ziurtatu dute.

Egun osoko doinuak

Eguerdian hasi eta gauera arte luzatuko den egun bakarrean bilduko dute, beraz, aurtengo proposamena. Euskorleans lehenengo proposamenak dagoeneko erakutsiko du aurtengo formatuaren norabidea. Euskal kantu eta dantza tradizionalak New Orleans estiloko brass band musikarekin uztartzen dituen kale ikuskizun ibiltaria da.

Musikaz harago, dantza ere kalera aterako dute larunbatean. Arratsaldean, 19:00etan hasita, Street Dantz dantza-ikuskizunak hartuko du Plaza Nagusia, eta bizikleta gainean mugitzen den La Dinamo funk musika talde kataluniarraren txanda izango da ondoren.

Gauean, berriz, 22:00etan, Zo-Zongo taldearen Psycho Clown kale-ikuskizuna izango da alde zaharrean, perkusioa, piroteknia eta antzerkia uztartzen dituena. Sakatu elektrotxarangak hartuko du jarraian lekukoa, eta musikaz beteko ditu kaleak. Dj Necoraren saioak emango dio amaiera ekimenari.

Aurrera begirako lanetan

Zama pilatu horren guztiaren erdian eta Ordiziarrock jaialdiaren bezperan, lasaitasun puntu bat ere transmititu nahi izan du Ruiz de Apodakak. Jakinarazi du dagoeneko aurrera begirako lanetan pentsatzen jarriak direla antolakuntzako kideak, eta aurreikusi dezaketenaren arabera, Delikantuz eta Ordiziarrock ekimenekin aurrera jarraituko dute.

Mendi abentura asteari ekingo diote ordiziarrek azaroaren 2an

Goierriko Hitza — 2026-10-23 07:36:46

Ordiziako Mendizaleak eta Emaneurre taldeko herritarrek indarrak batu dituzte ekimen berri bati hasiera emateko: Mendi abentura astea. Mendizaleen mendi astea eta kulturzaleen abentura astea elkartu dituzte eta elkarlanean, jardueraz beteriko bost eguneko egitaraua osatu dute datorren asterako. Azaroaren 2an hasiko dituzte, eta azaroaren 6ra arte iraungo dute.

Besteen artean, Ordizia inguruko bazterrak eta zuloak, eta urrutiagotik ekarriko diren irudi eta kontakizunak izango dira ikusgai eta entzungai Barrena kultur etxean eskainiko diren jardueretan, arratsaldeko 19:00etan hasita.

Hona hemen egitaraua, egunez egun:

Azaroak 2: GMB. Zazpi hiriburuetako zeharkaldia.
Azaroak 3: Ordiziako Mendizaleak. Aralar pausoz pauso.
Azaroak 4: Unai Cobos. Eskalada Pakistanen, Perun eta Kirgistanen.
Azaroak 5: Josu Iztueta eta Ane Miralles. 3 pauso 3 norabide Eskandinabian.
Azaroak 6: Ziztor Espeleologia Taldea. Aralar eta Urbasako kobak.

Antolatzaileek jardueretara bertaratzeko deia luzatu diete herritarrei.

Gau beltza ospatuko dute ordiziarrek urriaren 31n

Goierriko Hitza — 2026-10-22 14:41:05

Tradizio bihurtu da dagoeneko Ordizian gau beltza ospatzea, eta aurtengoan ere, iaz egin moduan, egitarau betea antolatu dute Ordiziako eragile desberdinek udalarekin elkarlanean. Datorren larunbatean, urriaren 31n, izango da festa, eta Plaza Nagusia bihurtuko dute gau beltzaren agertoki nagusi.

18:00etatik aurrera, Errugbi elkarteak antolatutako gaztaina jana, taloak, Ortzadar Argazki Elkartearen mozorroen photocalla, Marta Art-ekin batera eskulanak, arrantza jolasa eta beldurrak erretzeko ekintza izango dira. Behin horiek amaituta, 20:00etan, disko festa beldurgarriari ekingo diote.

Ordiziako Udalak mozorroak janzteko eta gau berezia elkarrekin ospatzera gerturatzeko deia egin die herritar guztiei.

IV. Berdintasun Plana herritarren ekarpenekin osatzeko topaketa

Goierriko Hitza — 2026-10-22 14:28:32

Ordizia berdinzaleago eta feministago baten bidean, datozen urteetako berdintasun politikak markatuko dituzten lan ildoak zehazteko eta Berdintasun Plana diseinatzeko asmoz, parte-hartze prozesu bati ekin zion Ordiziako Udalak joan den irailean.

Bada, Berdintasun Plan horren lehen zirriborroa prest dagoela iragarri berri du udalak. Herritarren ekarpenekin osatu nahi du proposamena orain, eta herritarren bigarren topaketa bat deitu du datorren urriaren 28rako. Asteazkenarekin batera, Jabekuntza Eskolan elkartuko dira oraingoan ere, arratsaldeko 17:30ean. Bertaratzeko deia egin die udalak herritarrei.

Hilerrirako lore eta mizpira artean gaurko ferian

Goierriko Hitza — 2026-10-21 16:27:05

Azaroaren 1aren gertutasunak markatutako feria izan da gaurkoa Ordizian. Hamar egun besterik ez dira falta hilerrikoak bisitatzera joateko egunerako, eta hara eramateko lore eskaintza zabaldu du dagoeneko Iñaki Azanzak. Gaur enkarguak jasotzeko eguna izan da batez ere, baina datorren astean ere eskainiko du horretarako aukera, baita bertan erosteko ere.

Azanzak hilerrirako duen eskaintza lore eta landare biziz bakarrik dago osatuta. Solte saltzen ditu lore batzuk, ziklamena, azalea edo txilarra bezala, baina propio prestatutako terrinetan ere bai: krisantemoa (30 eta 38 euro artan), ziklamenekin egindakoak (38 euro) eta mistoak (45 eta 55 euro artean). Konbinazio bereziak egiteko ere prest dago, bezeroak aukeratutako loreekin, eta horien araberako prezioekin.

Mizpirak eta aza kontuak
Hilerrirako loreez gain, izan dira berritasun gehiago ere gaur. Mizpira izan da horietako bat, Altzagako Arantxa Lopetegiren postuan salgai egon dena, kiloa 3 euroan.

Azalore berriak ere iritsi dira. Ibarrako Esther Illarramendik izan ditu salgai, pieza 2 eta 2,5 euro artean. Eta lehen brokoliak ere ikusi dira, Gabiriako Anttoni Murgiondoren postuan, bakoitza 5 euroan. Azaren familiako tatsoi hostoak ere aurkeztu ditu goizean Sustrai Askeak elkarteko Natalia Magallenesek; azaldu duenez, ziazerbak bezala prestatuta jateko egokiak dira, baita gordinik ere. 200 gramoko sortak jarri ditu salgai, 2,20 euroan.

Mielatoa eta perretxiko beltzak
Bestalde, ezti mota berri bat aurkeztu du Jon Etxeberriak, mielatoa. Etxeberriak azaldu du ametzaren izerdiea dela ezti mota honen erleen iturria, eta ez loreen polena, eta aurten beste urteetan baino gozoagoa dagoela ere bai. Kiloa 16 euroan du salgai, gainerako eztiak bezala. Mielatoarekin batera, ezkaia eta erromero eztia, akazia eztia, mila lorea eta Nafarroako udako mila lorea ere baditu aukeran, kiloa 16 euroan horiek ere. Datozen asteetan mota gehiago ekarriko dituela ere aurreratu du.

Perretxikoak, azkenik, ugaritzen ari dira, batez ere onddoak; ferian zebilen batek esan duenez, «onddoak baino perretxikozale gehiago dago azken egunetan basoan». Ferian ere izan dira aukeran inguruko basoetan bildutako onddoak, eta horiek eta Barcinak eta Lasak salgai jarritakoak batuta, guztira 170 kilo eskaini dira, kiloa 15 eta 38 euro artean. 18 kilo ziza hori (22-24 euro), 15 kilo mendiko angula (33 euro) eta 10 kilo niskalo ere eskaini dituzte (28 euro). Eta Lasak, gainera, saltsa perretxiko beltzak aurkeztu ditu; sei kilo jarri ditu salgai, kiloa 37 euroan.

Bisitak ere izan dira gaur, ehun inguru gaztetxo. Irungo Txingudi herri eskolako ikasleak zirena, eta Plaza Nagusiko postuetan zehar ibili dira informazio eske eta erosketak egiten, D’Elikatuz zentroko gidarien eskutik.

Kulturen arteko X. Topaketa egingo da azaroaren 7an

Goierriko Hitza — 2026-10-21 14:29:03

Ordizia Kolore elkartearen ekimenez, Kulturen Arteko Topaketaren edizio berria ospatuko dute datorren azaroaren 7an, larunbata, Ordizian. Hamargarren edizio borobila izango da eta Beti Alai pilotalekua izango du topaleku.

Munduko Arrozak bazkari herrikoia egingo da, eta tiketak salgai daude – helduenak bost euroan eta haurrenak euro batean- Larratxa liburudendan (erdigunea), Magazine Romanesc elikadura dendan (Buztuntza) eta Nerea tabernan (Otegienea).

‘Digilagun’ proiektuari hamar ordenagailu eman dizkio Ordiziako Udalak

Goierriko Hitza — 2026-10-21 14:25:38

Baliabide teknologikoak eskuratzeko zailtasunak dituzten herritarren artean banatzeko hamar ordenagailu eman dizkio Ordiziako Udalak Digilagun proiektuari. IZT kooperatibak bultzatutako ekimena da, ingurumenaren zaintza eta arrakala digitalaren murrizketa uztartzen dituena. Ekimenak, hala, erabilitako ordenagailuei bigarren bizitza ematea eta baliabide digitalik ez duten herritarren aukera teknologikoak hobetzea du helburu.

Horretarako, jasotako ordenagailuak prestatu eta software librearekin hornitzen dituzte. Besteak beste, MX Linux sistema eragilea eta LibreOffice bulegotika-paketea instalatzen dituzte. Ekipamenduek Wi-Fi bidezko konexioa ere izan dezakete, beharrezkoa denean. Kooperatibak ordenagailuak prestatu ondoren, ekipoak Ordiziara itzuli dira, familiei banatzeko.

Proiektua IZT kooperatibako langileen lan boluntarioari esker garatzen dela gogoratu du udalak, eta ordiziarrei egingo dieten ekarpena nabarmendu du: «Eekipamenduak baliabide digitalak eskuratzeko zailtasunak dituzten Ordiziako familiengana iritsiko da».

Ordizientzia zikloaren azken hitzaldia ostiralean izango da

Goierriko Hitza — 2026-10-21 08:56:54

Ordizientzia 2026 zikloa ostiralean amaituko da Elias Unzuetak eskainiko duen Hidrogeno Berriztagarria Industrian: erronka eta ibilbideak izeneko hitzaldiarekin. Ordiziako Barrena Jauregian izango da, 19:00etan hasita.

Saioak hidrogeno berriztagarriak industria-eraldaketan eta deskarbonizazioan izan dezakeen eginkizuna izango du ardatz. Industria-eraldaketarako «palanka estrategiko» gisa aurkeztuko da hidrogeno berriztagarria, eta besteen artean, gaur egun fintze-prozesuetan eta industria kimikoan erabiltzen den hidrogeno fosila ordezkatzeko aukera aztertuko dute, lehendik dauden eskaria, azpiegiturak eta ezagutza baliatuz.

Hidrogenoaren zeregina

Era berean, elektrifikazio zuzena zaila duten energia-intentsitate handiko sektoreetan hidrogenoak izan dezakeen zeregina landuko dute. Besteak beste, fintzea, industria kimikoa, altzairugintza, zementua, beira eta zeramika.

«Euskadiren kasuan, hidrogenoaren inguruan garatzen ari den industria-ekosistema» ere izango da hizpide. Zentzu horretan, Petronorrek sektoreko «eragile traktore gisa» duen rola nabarmenduko dute.

Hitzaldiak, beraz, hidrogeno berriztagarriaren garapenak lurraldearentzat izan dezakeen lehiakortasun industriala, jarduera ekonomikoa eta deskarbonizazioa izango ditu aztergai.

Joseba Rezola pasealekuko zuhaitz-mozketen azalpenak eskatu ditu Ordizia Orainek

Goierriko Hitza — 2026-10-21 08:53:08

Ordizia Orain-Ahal Duguk Joseba Rezola pasealekuan egindako zuhaitz-mozketen inguruko azalpenak eskatu dizkio EH Bilduren udal gobernuari, ADIFen trenbide inguruko obren harira. Taldeak salatu duenez, hainbat ale moztu dituzte, baina antza, oraindik ez du jaso erabakia hartzeko zer irizpide tekniko erabili diren azaltzen duen informaziorik.

Taldearen arabera, obrak hasi aurretik agertu zuten kezka. Irailaren 16ko Lurraldeko Informazio Batzordean, udal gobernuak eremu horretan aurreikusitako jarduketak azaldu zituen, tartean lau metro inguruko pantaila akustiko zeharrargia, ureztatze-sistema instalatzea eta zuhaitzak birlandatzea; horretarako, loredun madariondoak aipatu zituzten.

Hurrengo egunean, Jasangarritasun Batzordean, pasealekuko bi eremuak bereizita aztertzea eta bakoitzerako espezie, lerrokadura eta landaketa-modu desberdinak alderatzea proposatu zuen Ordizia Orainek, komunikabideetara bidalitako oharrean adierazi duenez.

«Erantzunaren zain»

Urriaren 7an eskaera formala erregistratu zuen taldeak, «zuhaitzak markatuta zeudela ikusita». Besteak beste, zenbat eta zein zuhaitz kenduko ziren, mozketen arrazoiak, ADIFen baldintzak eta etorkizuneko birlandaketa nola egingo zen galdetu zuen. Salatu duenez, oraindik ez du erantzunik jaso: «Urriaren 12rako hainbat zuhaitz moztuta zeuden jada».

Ordizia Orainek onartu du obrek zuhaitz batzuk kentzea beharrezko egin dezaketela, baina «onartezintzat» jo du erabilitako irizpide teknikoak azaldu gabe jardutea. Udal gobernuari eskatu dio, hala, mozketen arrazoiak, mantenduko diren aleak eta erabakiaren arduradunak argitzeko.

Birlandaketa, zalantzan

Birlandaketarako proposatutako loredun madariondoen aukera ere zalantzan jarri du taldeak, beste espezieekin alderaketarik egin ez dela iritzita. Joseba Rezola «eguzkiak gogor jotzen duen kalea» dela nabarmendu du, eta zuhaitzek itzala ematea, lurzoruaren beroketa murriztea eta pasealekuko erosotasuna hobetzea ere kontuan hartu beharko liratekeela defendatu du.

Horregatik, bi edo hiru alternatiba aztertzea proposatu du, espezieak, kokapenak eta lerrokadurak aldatuta, eta zuhaitzak landatu berritan zein 10-20 urte barru nolakoak izango liratekeen alderatzea. Era berean, lurzorua leheneratzea, berdegunea handitzea eta euri-ura hobeto infiltratzeko aukerak aztertzea eskatu du.

Azkenik, Ordizia Orainek eskatu du ez dadila birlandaketari buruzko «erabaki atzeraezinik» hartu alternatibak aztertu aurretik, eta «udaleko Lorezaintza eta Jasangarritasuneko langileen parte-hartzea» bermatu dadila. Ustez, denbora dago Joseba Rezolak datozen urteetan izango duen zuhaiztia egokien aukeratzeko.

LAB sindikatuak EAEko hainbat eskualdetako eskola garraioan izandako murrizketak salatu ditu

Goierriko Hitza — 2026-10-20 13:29:31

LAB sindikatuak azken asteetan EAEko hainbat eskualdetan eskola garraioan izan diren murrizketak salatu ditu pentsa ohar bidez. “2026-2027 ikasturte hasieran eskola garraioaren murrizketen inguruan hainbat eskola komunitatek egindako salaketa publikoek eta abiatutako mobilizazioek agerian utzi dute egiturazko arazoa”, nabarmendu du sindikatuak. Ordiziako Oianguren ikastetxeko komunitateak eta Zaldibiako gurasoek abiatutako protestak eta Plentziako (Bizkaia) eskola publikoko guraso elkarteak plazaratutako salaketak jarri ditu adibidetzat.

Sindikatuak adierazi duenez, biztanleria gutxiko eremuetan, Arabako Lautadan kasu, Eusko Jaurlaritza “lineak bateratzen” hasi da. “Erabaki horrek ibilbideak desagerrarazten ez dituen arren, bidaiak askoz luzeagoak eta nekagarriagoak egiten ditu, honek ikasleengan duen eraginarekin negatiboarekin; ikasleen ongizatean eta ikaskuntza prozesuan, besteak beste”.

Kezka hori ez dela berria azaldu du, azken ikasturteetan “hainbat izan baitira desagertutako ibilbide edota geralekuak, eta horrek guztiak lanpostuen galera ekarri du”. Erabaki horiek ikasle, familia eta hezkuntza zerbitzuaren kalitatean “eragin zuzena” dutela dio. “Haur hezkuntzatik hasi eta batxilergora arteko ikasle eta familiak jotzen ditu bete-betean honek, eta are gehiago kaltetzen ditu premia bereziak dituzten ikasleak”. LAB sindikatuaren iritziz, Imanol Pradales lehendakaria buru duen gobernuaren “zerbitzu publikoen kudeaketa murriztailearen beste adibide bat” da. “Eskola-garraioa ez da bigarren mailako zerbitzua: hezkuntzarako sarbidea eta ikasleen eskubideak bermatzeko funtsezko tresna da, bereziki landa-eremuetan eta biztanleria sakabanatua duten udalerrietan”.

164/2023 Dekretua
“Egiturazko arazo honek” hainbat iturri dituela nabarmendu du. “Alde batetik 164/2023 Dekretuaren aplikazio zurruna dago. Dekretuak dio eskola garraio espezifikorako eskubidea izateko ikasleak ikastetxeetatik gutxienez 4 kilometrora bizi behar duela, kontuan izan gabe tokian tokiko ezaugarri edo bestelako aldagaiak. Beste kasu batzuetan, garraio publiko alternatiboa egotea jotzen du Eusko Jaurlaritzak eskola-garraio espezifikoa ez eskaintzeko argudio gisa, ibilbideen segurtasuna edota garraio publikoaren saturazioa kontuan izan gabe. Horri guztiari, zerbitzuaren lizitazioetan egon diren arazoak gehitu behar zaizkio. Izan ere, hainbat ibilbide esleitu gabe geratu dira”.

Zentzu honetan, LABentzat onartezina da Hezkuntza Sailak “hain garrantzitsua den zerbitzu publiko bat beren onura besterik bilatzen ez duten enpresa pribatuen eskuetan uztea”. Eskola-garraioa “oso sektore feminizatua” dela gogoratu du, eta emakumeek “kontratu eta lanaldi partzialekin eta lan baldintza prekarioetan” jarduten dutela. “Une honetan, euren lan baldintzak duintzeko borrokara loturik daude. Eskola garraioa defendatzea, lan baldintzak duintzeko borroka baino gehiago da, zerbitzu publikoak defendatzea da”.

Hezkuntza sailari eskaera
Horren guztiaren aurrean, LAB sindikatuak Begoña Pedrosak gidatzen duen Hezkuntza Sailari “lehenbailehen arazoari konponbidea eman diezaion” eskatu dio, “betiere alde soziala zein hezkuntza komunitatea aintzat hartuta”. Gainera, sindikatuak adierazi du “azken urteetan arazo honi lotuta egin den enpleguaren suntsiketaren aurrean gogor erantzungo” duela. Halaber, babes osoa adierazi nahi die kaltetutako hezkuntza komunitateei, eta elkarrekin lan egiteko prestasuna ere adierazi die familiei eta udalei.

Talo eta gaztaina jana Argi Berri elkartean

Goierriko Hitza — 2026-10-17 17:10:55

Urteroko hitzordua dute azaroaren 7an Ordiziako Argi Berri elkartean: talo eta gaztaina jana, 19:00etatik aurrera. “Bazkideak, beraien senideak eta lagunak edota auzotarrak” gonbidatu dituzte, “elkarrekin une atsegina igaroko dugulakoan”.

Mantangorria, Euskal Herriko agroekologiaren bidelagun

Goierriko Hitza — 2026-10-17 16:26:02

Euskal Herriko zazpi lurraldeetan agroekologiaren bidean lagundu eta bultzatzen duen baserritar, herritar eta elkarteen kolektiboko (EHKolektiboa elkartea) kideak Ordiziako Plaza Nagusian elkartu dira gaur. Gaurko egun 170 kide baino gehiagok osatzen dute elkartea.

Azoka berezia izan da gaur Ordizian, Euskal Herriko txoko desberdinetatik etorritako EHKolektiboko kideena. Haurrentzat tailerrak, hitzaldiak eta Nerea Ibartzabal eta Maddalen Lujanbioren bertsoak izan badira ere, Euskal Herriko agroekologiaren ikur eta bidelagun izango den identifikatzailea ere aurkeztu dute: Mantangorria.

Mantangorriaren bidez, EHKO etxaldeak, herritarrak eta elikadura espazioak bide berean kokatzen lagundu nahi dute.”Mantangorriak helburu du identifikatzea Euskal Herrian agroekologia mugimendu sozial, ekonomiko eta kulturala dela”.

Horrekin batera, “Mantangorriaren bidez, elkarte, eragile eta komunitateekin aliantzen lantzen jarraitu nahi dugu agroekologiaren bidean, elkarrekin aurrera egiten jarraitzeko”.

Ekoizpen ekologikoa, tokikoa, giza neurriko etxaldeak eta ekonomia sozial eraldatzailea dira agroekologiaren baloreak.

EHKolektiboaren inguruko informazioa ehkolektiboa.eus webgunean eskura daiteke.

Arratsaldean

Herri bazkariaren ondoren, arratsaldean jarraituko jai giroak Ordizian. 16:00etan umore saioa izango da Itziar Saenz eta Ojer-en eskutik, eta 17:00etan, Jun ta Jo-ren musika emanaldia.

Igande gauen hainbat lan egin dituzte N-1 errepidean, Ordizia parean

Goierriko Hitza — 2026-10-16 15:49:01

Gipuzkoako Foru Aldundiak jakinarazi du igande gauean afekzioak egongo dira N-1 errepidean, Ordizia parean, hainbat lan egin behar dituztela eta. N-I eta A-15 errepideetan sistema berriak instalatu behar dituzte, eta ibilgailuen zirkulazioan eragina izango du urriaren 18tik 19ra bitarteko gauean.

Urriaren 18ko 22:00etatik urriaren 19ko 06:00etara, honako adarrak itxiko dituzte:

N-422-1-S errepidetik Donostiarako noranzkoan San Joan auzorako sarbidea, Ordiziako udalerrian.
N-422-2-S errepidetik Etzegaraterako sarbidea, San Joan auzora, Ordiziako udalerrian.
N-422-1-E errepidetik Donostiarako noranzkoann dagoen sarbidea, Ordiziako udalerrian.

Donostiako noranzkoko N-I-422-1-S eta N-I-422-1-E adarren mozketek, N-I-426-1-S eta N-I-426-1-E adarrak erabiltzera behartuko dituzte ibilgailuak.

Etzegarateko noranzkoan N-I-422-2-S errepidetik San Joan Auzora sartzeko adarra ixtearen ondorioz, auzo horretara joan nahi duten ibilgailuek N-I-420-2-S errepidea erabili beharko dute.

Sormenezko argazkigintza lantzeko tailerra eskainiko dute Ordizian

Goierriko Hitza — 2026-10-15 14:27:27

Ordiziako Jabekuntza Eskolak, udalarekin elkarlanean, kultur dinamika berria abiarazi du: TRANSFER sormenezko argazkigintza tailerra. Mugikorrekin irudiak hartzen, argazki-konposizioa lantzen eta argazkien edizioen trebatzen ikasiko dute jardueretara hurbiltzen diren herritarrek. Sortutako irudiak, gainera, hainbat materialetara transferituko dituzte gero: harrira, egurrera edota oihalera. Ura Iturralde Larrañagak gidatuko ditu saioak, eta denera, zortzi saio egingo dituzte: astelehenean hasi, eta urriaren 19an eta urtarrilaren 11ra arte luzatuko dira.

Hauek izango dira lan-saioen datak eta orduak:

Urriak 19 eta 26
Azaroak 2, 9, 16 eta 30
Abenduak 14
Urtarrilak 11

Denak ala denak arratsaldean izango dira, 18:00etan hasita. Bi orduko iraupena izango dute eta Jabekuntza Eskolan bertan eskainiko dira. Saioetan parte-hartu nahi duenak, hala, aurrez izena eman beharko du udalak sare sozialetan eskegi duen karteleko QR kodearen bidez.

Beste garaipen bat poltsikoratuta, laugarren postuan da Ampo Ordizia

Goierriko Hitza — 2026-10-14 09:09:15

Ampo Ordiziak garaipen berria eskuratu zuen asteburuan Madrilen jokatutako liga erregularreko hirugarren partidan: 16-17 gailendu zen Alcobendas taldearen aurka.

Lehen zatian zailtasunak izan zituen erasoak puntutan bihurtzeko, eta aurkariak 10-0 aurreratu ziren atsedenaldira. Bigarren zatian, ordea, ordiziarren aurrelarien nagusitasunak partida aldatu zuen; bi entsegu eskuratuta, 13-14 aurreratu zen Ordizia, eta azkenerako 16-14 galtzen zihoazela, zigor kolpearekin lortutako hiru puntuekin lortu zuten garaipena.

Hala, sailkapenaren laugarren postua eskuratu du talde goierritarrak. Urriaren 25ean izango du hurrengo partida, etxean, Vracen aurka.