Goierriko Hitza

Txistu doinuekin hasi dituzte Santikutzak Legazpin

Goierriko Hitza — 2026-04-30 20:02:51

Hasi dira Santikutz jaiak. Jendetza bildu da arratsaldean herriko plazan, aurtengo festei hasiera emateko. Aurten Goiz Deia txistulari bandari egokitu zaio udaletxeko balkoitik pregoia egitea, txistu doinuaz lagunduta ondoren. Ondorengo txupinazoarekin lehertu da festa, eta kalean izan du segida jai giroak, erraldoi eta buruhandien ohiko kalejirarekin.

Txupinazo ofizialaren aurretik, gazteek ere egin dute jaiak hasteko ekitaldia Gaztetxean. Suziria bota ondoren, kalejiran jaitsi dira erdialdeko kaleetara.

Jaietako lehen txanpa igandera arte da, eta hurrengo asteburuan Kapela dantzarekin eta Mirandaola egunarekin amaituko dira.

Honela eman diete hasiera txistulariek aurtengo jaiei, Maider Apaolaza eta Iker Azpeitiaren hitzetan:

Arratsaldeon Legazpi!!

Ohituago gaude mikroa beharrean eskuan txistua edukitzera, baina herriko jaien hasiera iragartzeko aukera ez da urtero izaten eta aprobetxatu behar.

Jaiak gaur hasiko ditugun arren, errodajea egina ekartzen dugu batzuk, pasa den astean, beste urte batez, Korosti dantza taldeak antolatzen zuen Oin Puntetan asteburuan parte hartu genuelako. Horretaz gain, lehen aldiz, Gaztetxeak Gazte Festak antolatu zituen. Blusak soinean ekintza guztiek izan zuten arrera ikusita, ziur gaude datozen urteetan ere ekimen honekin jarraituko dutela, bejondeiela!!!

Bueno, eta aurten zer? Ba aurtengorako ere egitarau oparoa prestatu dute bai jai batzordeak, baita Txo!Esnako kideek ere. Txistulariak, urtero bezala egitarau horretako hainbat ekintzetan izango gara; kalejiretan, Olaria eta Ezpata dantza ekitaldian edo datorren astean ospatuko diren Kapela dantza edo Mirandaola egunean adibidez.

Hala ere egitarauak gutxi balio du herritarren parte hartzerik gabe. Bete dezagun Plaza, bete dezagun Azoka eta nola ez, bete ditzagun kaleak. Herritarrok gara festa guztien arima eta muina. Herritarrik gabe ez dago festarik, herritarrik gabe ez dago girorik. Egun zoragarri batzuk ditugu aurretik. Kanta dezagun, dantza dezagun, parte hartu dezagun eta nola ez, ondo pasa eta goza dezagun!!

Ondo pasa dezagun, ondo pasatzen utziz….

Ondo pasa dezagun ondoan daukaguna errespetatuz…

Ondo pasa dezagun, pasatu gabe….bueno…. sobre la martxa….

Bilakatu ditzagun kaleak espazio seguru eta eroso bat guztiontzat eta ospa ditzagun jaiak pozez, arduraz eta elkar zainduz.
Azken finean, bakoitzak bere nota eman dezala guztion artean musika eta armonia sortuz.

Eta gehiegi luzatu gabe mikroa utzi eta txistua hartuko dugu, erraldoiekin batera jaiei bals batekin hasiera emateko. Erraldoiak prest?

Ba besterik gabe, ondo pasa jaiak eta…

GORA LEGAZPI!

GORA SANTIKUTZAK!

GORA EUSKADI TXISTULARI!

Zegamak 900 kirolari baino gehiago hartuko ditu maiatzaren 15etik 17ra

Goierriko Hitza — 2026-04-30 13:48:06

Zegamak Gipuzkoako kirol ekitaldi nagusietako bat hartuko du datorren maiatzaren 15etik 17ra bitartean. Zegama-Aizkorri lasterketak 900 kirolari baino gehiago bilduko ditu aurten. Guztira 585 mendi lasterkari ariko dira lehian mendi maratoiaren 25. edizioan. 92 emakumezkoak. Kilometro Bertikalean 248 kirolarik hartuko dute parte –55 emakumezkoak–, eta Junior trailak 100 gaztetxo elkartuko ditu, horietatik 30 neskazkoak.

Gaur aurkeztu dute Donostian Zegama-Aizkorri mendi maratoiaren 25. edizioa. Azahara Dominguez Mugikortasuneko, Turismoko eta Lurralde Antolaketako diputatuarekin batera, Iker Zubeldia Zegamako alkatea, Niko Osinalde Goiturreko zuzendaria eta Maialen Arizkorreta antolakuntzako kidea izan dira. Azken horrek azaldu duenez, 25 nazionalitatetako korrikalariak bilduko ditu aurtengo edizioak, baina parte-hartzaileen % 25 baino gehiago Gipuzkoakoak dira eta % 35 baino gehiago EAEkoak. Golden Trail Word Series ligako lehen proba puntuagarria da Zegamakoa.

Emakumeen partaidetza handitzen
Zegamako asteburuak gero eta emakume atleta gehiago biltzen dituela adierazi du Arizkorretak. Maratoian emakumeen parte-hartzea % 15 ingurukoa izango da, KB kategorian emakumeak %22 dira eta junior kategorian % 30era igotzen da. “Datu horiek erakusten digute emakumeen parte-hartzea eta gaitasuna, bai orainaldian, bai etorkizunean, bermatuta dagoela”, nabarmendu du.

“Datuek erakusten digute emakumeen parte-hartzea eta gaitasuna, bai orainaldian, bai etorkizunean, bermatuta dagoela”

Maialen Arizkorreta. Zegama-Aizkorriren antolatzailea

Kilometro Bertikaleko 23 urtez azpikoen kategoriak “iaz izan zuen harrena ona” ikusita, aurten ere adin tarte horri “ikusgarritasuna ematen” jarraituko dutela zehaztu du. “Horrela, trail-runningaren oraina osatzen duten eta etorkizunean sarritan entzungo ditugun izenei protagonismoa ematea lortzen dugu”.

Junior kategoriari dagokionez, azken urteetako dortsal eskariaren aurrean, aurten ere zozketa bidez banatu dira, beste bi lasterketetan bezala. “Kategoria honetan parte hartzen dutenek larunbateko eliteko lasterketaren aurkezpenean ere parte hartuko dute”, adierazi dute Arizkorretak.

“Aurten jauzi kualitatibo bat emango dugu Warner Bros Discovery-k ekoitziko duen estaldura mediatikoan. Zuzenean emango da WBD plataformen bidez (HBO Max, Eurosport, discovery+, TNT Sports) eta mundu mailako emanaldi-sare zabal batean. Hemen EiTBn euskaraz eta Teledeporte edo Eurosport gaztelaniaz jarraitu ahal izango da “, gaineratu du.

Goi mailako mendi lasterkariak
Zegamak kirolari ezagun asko hartuko ditu aurten ere. Gizonezkoen artean, Elhousine Elazzaoui iazko irabazlea eta Daniel Pattis, Luca Del Pero eta Lorenzo Beltrami (iazko hirugarren, laugarren eta bosgarrena) nabarmentzen dira. “25. urteurrena dela eta, txapel preziatuaren jabe guztiak gonbidatu ditugu, eta Kilian Jornet, Manuel Merillas, Remi Bonnet, Rob Jebb eta Mario Poletti izango ditugu irteeran”, adierazi du.

Emakumezkoetan, ez da faltako iazko garailea, Sara Alonso eta TOP 5 osoa Judith Wyder, Malen Osa, Rosa Maria Lara eta Theres Leboeufekin. Aurten lehen aldiz egongo da irteeran Tove Alexandersson, aurtengo Salomonen fitxaketa, iaz Canfranc 2025ean munduko irabazlea –Sara Alonso bigarrenari ordu erdiko abantaila atera zion–. “Aurten emakumezkoen errekorra egon daitekeela uste dut”, dio Arizkorretak. Eta beste edizio batzuetako irabazleak ere Zegaman izango dira, Ida Nilsson eta Angela Mudge, besteak beste.

“Trail running proben kudeaketa hobetzea da helburua, ingurumenaren, gizartearen, ekonomiaren eta etikaren ikuspegitik praktika jasangarriak txertatuz mendi-lasterketako proba horien antolaketan”

Iker Zubeldia. Zegamako alkatea

Euskal izen nabarmenen artean, Paul Ormaetxea, Ibai Larrea, Ander Iñarra, Aitor Ajuria eta Aitor Zunzunegi legorretarra aipatu ditu gizonezkoetan. Emakumezkoetan, Sara Alonso, Malen Osa, Oihana Zubillaga, Ainara Uribarri, eta baita Euskal Selekzioko kide Lide Urrestarazu ordiziarra, Ainara Alkuaz eta Ainhoa Garikano.

‘Green Trail Concept’ zigilua
Zegamako alkate Iker Zubeldiak azaldu duenez, Kilian Jornet fundazioak bultzatzen duen Green Trail Concept zigilua modu ikuskatu batean lortzeko lanean ari dira. Europar Batasuneko Erasmus+ programarekin batera finantzatutako proiektu bat da: “Trail running proben kudeaketa hobetzea da helburua, ingurumenaren, gizartearen, ekonomiaren eta etikaren ikuspegitik praktika jasangarriak txertatuz mendi-lasterketako proba horien antolaketan”.

“Goierrik dituen baliabide natural eta bestelakoak bisitatzera animatzeko deia egin nahi nuke”

Niko Osinalde. Goiturreko zuzendaria

Gainera, 25. urteurrena dela eta, Labrit ekoiztetxe nafarrarekin elkarlanean, zilarrezko ezteietara iritsi arte Zegama-Aizkorrik izan duen bilakaera jasotzen duen dokumentala ondu dute. Sare sozialetan publikatuko dute. Efemeridea ospatzeko, murgiltze erakusketa bat ere jarriko dute Anduetza parketxean, Aizkorri-Aratz parke naturaleko interpretazio zentroan. Bertan, lasterketaren bilakaera eta punturik aipagarrienak ezagutzeaz gain, edizio guztietako kamiseta-oroigarri guztiak izango dira ikusgai.

Goierri ezagutzeko deia
Goiturreko zuzendari Niko Osinaldek eskerrak eman dizkie maratoiaren antolatzaileei eta Zegamako Udalari “eskualdearen alde egindako lan eskergarengatik”. Aurtengo ediziorako zorte ona opa ondoren, dei argia egin die gipuzkoarrei, beste leku batzuetatik iristen diren bisitariek eta turistek bezala, etxe aurrean dutena ere ezagut dezaten. “Goierrik haientzat dituen baliabide natural eta bestelakoak bisitatzera anima daitezela, hori guztia, ahal dela, garraio publikoan”.

Olaberri auzoko jaiak ospatuko dituzte Zegaman, ostiralean hasita

Goierriko Hitza — 2026-04-30 12:26:35

Olaberri auzoko jaiak ospatuko dituzte asteburuan Zegaman. Auzoko III. Mus txapelketarekin emango dioete hasiera festari, bihar arratsaldean 16:00etan. Izen ematea ordu erdi lehenago irekiko dute eta pintxoak eta edariak izango dira. Bikoteko 20 euro balio du izen emateak.

Larunbaterako egun osoko egitaraua dago antolatuta. Gurutze Santuko ermitan meza egingo dute 11:00etan eta ordu berean emango zaio hasiera txirrindu probari. Eguerdi aldera, 12:00etan botako dute txupinazoa eta toka txapelketari hasiera emango diote ordu erdi beranduago. Parte hartzeko izen ematea 13:15rera arte egongo da irekita.

Auzo bazkaria egingo dute 14:30ean hasita eta haurrentzako jolasak eta puzgarriak izango dira gero, 16:30etik aurrera. Herri kirol erakustaldia 18:30ean izango da, eta txoripanak eta sagardoa dastatzeko aukera izango da. 21:00etatik aurrera Dj Smallekin dantzaldia.

Udako aisialdi eskaintzaren izen ematea datorren astean irekiko da

Goierriko Hitza — 2026-04-29 13:35:50

Zegamako Udalak udako aisialdi eskaintza prestatu du opor garairako herriko haur eta gazteei zuzenduta. Adinaren arabera, zerbitzu ezberdinak eskainiko dituzte, guztiak ekainaren 22tik uztailaren 30era bitartean. Izen ematea maiatzaren 4tik 8ra (biak barne) egongo da irekita liburutegian, eta epez kanpoko izena emateak ez dira onartuko.

Nerabeei zuzendutako zerbitzua Bele Gazte gaztelekuak eskainiko du. Astean bi egunetan antolatuko dituzte ekintzak, 12 eta 18 urte bitarteko gazteei zuzenduta. Maiatzean zehar, gaztelekuko erabiltzaileekin batera adostuko dituzte udako ekintzak.

Udaleku irekien barruan, 2015 eta 2022 artean jaiotako haurrentzako zerbitzua eskainiko da; astelehenetik ostiralera eta bi ordutegi izango dira aukeran: 9:00etatik 13:00etara eta 10:00etatik 13:00etara. 4 orduko zerbitzuaren prezioa 85 eurokoa izango da eta hiru ordukoarena, 75 euro.

Udako haur txokoa ere izango da, 2023an jaitako haurrentzako. Matrikularen prezioa, izena ematen duten haur kopuruaren arabera kalkultatuko da.

Hezitzaileei deialdia

Udaleku irekietan eta Haur txokoan hezitzaile gisa lan egiteko deialdia luzatu du, bide batez, Zegamako Udalak. Hezitzaileen kontratazioa ekainaren 16rik uztailaren 30era bitartekoa izango da. Ezinbestekoa da ondoren irizpideak betetzea:

18 urtetik gorakoa izan edo 2026 urtean betetzea.
Zegaman erroldatuta egotea.
Langabezian egotea (ziurtagiria aurkeztu beharko da).
C1 hizkuntza titulua edukitzea. Ez izatekotan, euskararen ezagutza eta erabilera maila izatea baloratuko da.
Adingabekoekin lan egiteko aurrekari penalen ziurtagiria.

Aurretik aipatutako baldintzak betetzen dituztenen artean, aukeraketa ondorengo lehentasunen arabera egingo da:

A taldea: Eusko Jaurlaritzak homologatutako aisialdiko zuzendari edo begirale titulua izatea.

Talde honetako baldintzekin behar diren hautagai kopurua beteko ez balitz, hurrengo taldekoak hartuko lirateke kontutan, hurrenez hurren.

B taldea: hezkuntzarekin zerikusia duten ikasketak izatea edo ikasketa horiek burutzeb aritzea.
D taldea: hezkuntzarekin zerikusirik ez duten ikasketak izatea.

Hezitzaileentzako izen ematea maiatzaren 4tik 8ra egin beharko da udal liburutegian, 15:30etik 18:30era edo esteka honetan.

Aurkeztu beharrekoak: curriculuma, titulu eta agirien kopiak, langabezian egotearen ziurtagiria (Lanbide), adingabekoekin lan egiteko aurrekari penalen ziurtagiria, NANaren kopia eta osasun txartelaren kopia.

Aukeratuak izan diren hautagaien zerrenda maiatzaren 15ean jarriko da jendaurrean (14:00) udaletxean. Zozketa beharrezkoa izatekotan, maiatzaren 19an egingo da, 19:00etan udaletxean.

Bi urte eta bi sari Kimika Olinpiadan

Goierriko Hitza — 2026-04-23 10:00:43

Badira ikasketetarako gaitasun berezia duten ikasleak, ikastea gustatzen zaienak, ezarritako gaitegia erraz barneratzen dutenak eta haien jakin mina asetzeko gehiago eskatzen dutenak. Hori da Beasaingo institutu publikoko Batxilergoko 2. mailako ikasle den Maddi Mendizabal Lekuona zegamarraren kasua. Ainara Imaz Fisika eta Kimikako irakasle idiazabaldarraren gidaritzapean, 2026ko Kimikako Euskal Olinpiada irabazi du martxoaren 6an, eta Estatuko Kimikako Olinpiadan parte hartuko du asteburuan, Alacanten (Herrialde Katalanak).

Imazek proposatuta parte hartu du Euskal Olinpiadan, bere ikasgaian aurreratuta zihoala ikusi eta ikasleak berak gehiago eskatu ondoren. «Maddik esan zidan nolabait aspertu egiten zela, eta momentu horretan jaso genuen olinpiadarako proposamena. Hala, erronka bezala proposatu nion hori prestatzea», azaldu du Imazek. Izan ere, azpimarratu du izan daitezkeela aspertzen diren ikasle gehiago ere, baina Mendizabalek gehiago eskatzen du, ikasleak berak esan bezala, «gora begira egon beharrean». Batxilergoko 2. mailako ikasgaiak lantzen dira olinpiadetan; azterketa martxoaren 6an izan zela eta ikasturtea amaitu gabe zegoela kontuan hartuta, gainontzekoek oraindik landu gabeko ikasgaiak jaso ditu zegamarrak.

Lehen aldiz, iaz
Zientziaren arloan ez ezik, abanikoan zabaltzen da bere ikasketetarako gaitasuna. Baina zientziak ditu gustukoen, Mendizabalek berak azaldu duenez: «Txikitatik ikastea gustatzen zait, batez ere zientziak; matematika, kimika, biologia…». Biokimika Gradua egin nahiko luke, EHUn, Leioan: «Zalantzak izan ditut zer ikasi nahi dudan erabakitzeko. Azkenean, Biokimika ikasi nahi dut, arlo horretako gai ezberdinak uztartzen dituelako».

Bi urte dira Imazen gidaritzapean ikasleak Kimikako Euskal Olinpiadara aurkezten direla. Iaz, 2025ean, lehen aldiz Garazi Zubeldia Zubeldia beasaindarrarekin prestatu zuen erronka hori, eta hark ere lehen saria jaso zuen. Bi urte eta bi sari. Zubeldiak, ordea, ezin izan zuen estatukora joan, Euskadiko Orkestrarekin deialdi baterako deitu zutelako. Matematika ikasten ari da egun, Leioan.

Garazi Zubeldia Zubeldia beasaindarra, 2025eko Kimikako Euskal Olinpiadako saria jasotzen.Hitza

Estatukoak, elkarrekin
Aurten bai. Asteburuan ikaslea eta irakaslea elkarrekin joango dira Alacanten jokatuko den estatukora. Gogotsu dago Mendizabal: «Beste motibazio bat da, beste esperientzia bat, berria, ezberdina. Gogoa daukat beste olinpiadak irabazi dituztenekin egoteko, haiek ezagutzeko». Olinpiadaz gain, beste ekintza batzuk egingo baitituzte sailkatu diren ikasleek batera, besteak beste, Alacanten bisita gidatua. Larunbat goizean izango dute azterketa bat, eta bazkalondoren test moduko beste bat. Igandean izango da sari banaketa.

«Beste motibazio bat da, beste esperientzia bat, berria, ezberdina. Gogoa daukat beste olinpiadak irabazi dituztenekin egoteko, haiek ezagutzeko»

Maddi Mendizabal Lekuona. 2026ko Kimikako Euskal Olinpiadaren irabazlea

Horra iristea jada lorpen handia dela nabarmendu du Imazek. Eta garrantzia eman dio Maddi eta Garazi bezalako profiletako ikasleei motibaziorako tresnak emateari: «Askotan ikastetxe mailan kostatzen zaien ikasleak dauzkagu, baina badaude beste profil batekoak, azkarrak eta biziak direnak, eta horiek ere aspertzen dira. Askotan fokua ez dugu horietan jartzen, eta garrantzitsua da haiei erronkak ematea». Eskarne Galdos institutuko zuzendariak bat egin du horrekin, eta Mendizabalen zein Imazen ezaugarriak goraipatu ditu: «Ikasle azkarra, saiatua, jakin mina duena, gainditze espiritua duena… horrelako irakasle baten lidergoarekin elkartzen denean horrelako emaitzak lortzen dira».

Talentu gaztea eta zientzia
Ikasle azkar baten jakin mina, hori asetzeko etengabeko nahia, eta irakasle baten egokitzeko eta ikaslea hauspotzeko gaitasuna elkartuta, Kimikako Euskal Olinpiada irabazi dute, Garazi Zubeldiak iaz, Maddi Mendizabalek aurten, Beasaingo institutuaren izena talentu gaztearen eta zientziaren gorenera eramanda.

Emakumezko ‘speakerra’ maratoiaren 25. urteurrenean

Goierriko Hitza — 2026-04-23 08:00:05

Zegama-Aizkorri mendi maratoiak 25. urteurrena beteko du datorren maiatzaren 17an, –12. Kilometro Bertikala maiatzaren 15ean jokatuko da eta 15. Junior Traila maiatzaren 17an–. Mende laurdena ez da urtero ospatzen eta berezia izango da aurtengoa; baina ez horregatik bakarrik, 25 urte hauetan lehenengo aldiz, emakume bat izango baita hizlari lanetan: Laura Rodriguez elgoibartarra. Azken urteetan speaker lanetan aritu diren Jose Antonio de Pablo Depa eta Mikel Apaolaza beasaindarrarekin batera arituko da taldea osatuta.

Denis Perez Zegamako Udaleko Kultura zinegotziak azaldu duenez, «berdintasunaren aldeko lorpen txiki bat» da Rodriguez hizlarien taldera batzera, «gaur egungo moldeetara egokitzeko beharretik sortu da. Beharrezkoa zen zentzu horretan pauso bat ematea», azpimarratu du. Zegamako Berdintasun taldeak ere izan du zerikusia, «emakumezko speaker bat ekartzeko presioa egin dute, arrazoiarekin gainera».

Ez da erraza izan, lan hauetan aritzen diren emakumezkoak «oso gutxi» direlako oraindik, are gutxiago, «euskaraz aritzen direnak». Rodriguez orain gutxi hasi da speaker lanetan; «Ermuako (Bizkaia) Hiru Txikiak mendi lasterketan ezagutu nuen nik», kontatu du Perezek. Espainiako lasterketetan egin ditu orain arteko lanik gehienak, gaztelaniaz, baina Rodriguez euskalduna dela azpimarratu du, jaso dituzten kritiken harira: «Mundu guztiari eman behar zaio aukera bat kritikatu aurretik».

Zegamakoa, laugarrena
Rodriguezek izango du aurten Zegama-Aizkorri maratoiko lehenengo emakumezko hizlaria izatearen ohorea eta «errespetua» ematen diola aitortu du. Guztiarekin, «pozik» dagoela dio, «esperientzia berezia izango da eta ilusio handia egiten dit», gehitu du. Berria da hizlari lanetan, pasan den urteko irailean estreinatu zen lan honetan, Ermuako Hiru Txikiak mendi lasterketan. «Lagunak ditut antolatzaileak eta emakumezko hizlari bat nahi zutela esan zidaten, euskaraz aritzeko eta animatu egin nintzen», kontatu du. Rodriguez mendi korrikalaria da eta ezagun asko ditu mundu honetan.

«Esperientzia berezia izango da eta ilusio handia egiten dit Zegama-Aizkorrik»

Laura Rodriguez. Speakerra

Zegamakoa hizlari lanetan arituko den laugarrena izango du. Otsailean Quiroga Trail Challenge aurkeztu zuen Galizian eta pasa den asteburuan Asturiasko Cueva Negra Trailean izan zen. Aurkezle lana ondo egiteko aurretik prestatu beharra dagoela dio, «xehetasun txikiak eta korrikalariak ondo ezagutu behar dira», amaitu du.

Herriarteko pilota txapelketaren kanporaketak, zehaztuta

Goierriko Hitza — 2026-04-22 08:20:49

Dagoeneko jakina da zein herriren arteko neurketek emango dioten hasiera maiatzeko lehen asteburuan Gipuzkoako Herriarteko Pilota Txapelketa. Goierriko sei herrik hartuko dute parte: eskuz, Lazkaok, Zaldibiak eta Zegamak; erremintaz, Lazkaok, Olaberriak eta Ordiziak; eta gomazko paletarekin Zumarragak.

Eskuz, final-hamaseirenetatik hasita
24 herrik eman dute izena eskuzko lehian –iazko baino hiru gehiagok–, eta final-hamaseirenak dira jokatu dituzten lehen kanporaketak.

Lazkaok, esaterako, Amezketaren aurka neurtuko dira indarrak (itzuliko partidak etxean, maiatzeko bigarren asteburuan), eta Zegamak Antzuola izango du aurkari (joaneko partidak etxean, maiatzeko lehen asteburuan). Koadro berean egokitu dira bi herriak, eta elkarren aurka jokatzekotan, finalerdietan behar luke izan.

Lazkaok 16 aldiz parte hartu du Herriartekoan –aurtengoa zenbatuta–, eta iaz atera lortu zuen berriz taldea ateratzea 6 urteko hutsunearen ondoren. Zegamak zazpigarren parte-hartzea du, eta iaz osatu zuen berriz taldea 17 urte eta gero.

Zaldibia, aldiz, final-zortzirenetan sartuko da txapelketan, eta Albiztur edo Astigarraga izango du aurkari. Lehen partidak kanpoan jokatu beharko lituzke (maiatzak 15-17 asteburuan), eta itzulikoak etxean (maiatzak 22-24). Goiko koadroan da Zaldibia, eta Hernani, Azpeitia, Oiartzun eta Azkoitia saihestu ditu. Zaldibiak 27. aldia du Herriartekoan, eta azken 5 urteetan osatu du taldea. 2024an txapeldunorde atera zen.

Finala ekainaren 28an jokatuko da.

Erremintaz, final zortzirenetan
Hamar herriko ariko dira larruzko paleta eta pala motzez –lau gehiago aurten–. Goierritarren artean, Olaberria izango da hasten lehena, final-zortzirenetan, Azpeitiaren aurka –joaneko partidak etxean, itzulikoak kanpoan–. Sailkatuz gero, Donostia izango du aurkari final-laurdenetan.

Ordiziak eta Lazkaok final-laurdenetan ekingo diote txapelketaren bideari, maiatzaren 22-24ko asteburuan. Lehenak Andoain izango du aurkari, eta bigarrenak Debak. Hauek ere etxean dituzte lehen partidak, eta itzulikoak kanpoan.

Olaberria 26. aldiz ariko da Herriartekoan, eta 3 urteko hutsunearen ondoren berriz itzuli da lehiara. Sei aldiz atera da txapeldun, eta bitan txapeldunorde.

Ordizia da Goierriko herrien artean parte-hartze gehien dituen herria –35.a aurtengoarekin–, eta 1991tik huts egin gabe aritu da. Behin txapeldun izana da, eta bitan azpitxapeldun.

Lazkaok 13. aldia du, eta 5 urtean kale egin eta gero, aurten taldea osatzeko moduan izan da.

Finala ekainaren 21ean jokatuko da.

Zumarraga, final-hamaseirenetan
Hemezortzi herri lehiatuko dira gomazko paletaz –iaz baino lau gehiago–, eta Zumarragako izango da Goierriko ordezkari bakarra. Final-hamaseirenetan ekingo dio bideari, Tolosaren aurka. Lehen partidak han jokatuko dira, itzulikoak etxean.

Zumarragak zazpigarren parte-hartzea du, azkeneneko 6 urteetan jarraian.

Finala ekainaren 28an jokatuko da.

Dantzariek kaleak hartu dituzte Zegaman

Goierriko Hitza — 2026-04-19 13:54:09

Dantzari Txiki eguna ospatu dute Zegaman, Tobera Musika eta Dantza eskolak antolatuta. 11:30ean ekin diete dantzariek desfileari, herriko frontoian, eta Zegamako kaleak igaro dituzte txistulariek lagunduta. Eguraldi paregabea izan dute eta jende ugari gerturatu da.

Denera, eskualdeko sei dantza talde elkartu dira: Beasaingo Aurtzaka eta Ostadar, Lazkaoko Oin Arin, Idiazabalgo Axari eta Zeraingo Solkie dantza taldeak, Zegamako dantzariekin batera.

Aimar Ugarteburuk irabazi du Zegamako Elkartu Nahi txirrindulari proba

Goierriko Hitza — 2026-04-18 18:44:21

Aimar Ugarteburu Elgarresta (Bellota-Goierri) txirrindulari urretxuarrak irabazi du, gaur goizean, Zegaman jokatu den 39. Elkartu Nahi Saria. Txirrindulari junior gizonezkoentzat proba izan da, 73,5 kilometrokoa. Zegaman 10:00etan hasi eta eguerdia aurretxoan bukatu, Lierniko eta Troiko meategietako mendateak puntuagarri zirela, zirkuitua hiru aldiz osatu dute. Segura, Mutiloa, Lierni, Gabiriako Ugarana, Mutiloako Ergoiena, meategietako mendatea, Zerain, Segura ibilbidea egin dute pasaera bakoitzean.

Ugarteburu bakarrik iritsi da helmugara, eta 22 segundoko aldea die Manex Larrañagari (Besa-Geminis), Bastien Ospitali (Urt Velo 64) eta Jordi White-ri (Baque-Movistar). Zatikatuta iritsi da tropela, etaparen gogortasunaren eraskule.

Ugarteburu urretxuar garailearen ondoren, hurrengo goierritarra Eritz Atxega lazkaotarra (Ampo) izan da, 5. postuan, 25 segundora. Ampo taldeak hiru mutil sartu ditu lehenengo hamar postuetan. Atxegaz gain, Haitz Zunzunegi baliarraindarra 7. eta Jon Eskisabel gabiriarrak 10., eta Oxel Azkarate lazkaotarra 12. Taldekako saria Ampok irabazi du, horrenbestez, atzetik Baque eta Ipar Euskal Herriko Urt Velo 64 utzita.

Mendiko Saria Eritz Atxegak irabazi du (18 puntu), bigarren Jon Eskisabel izan da (15), eta hirugarren Aimar Ugarteburu (8).

Zegamako Elkartu Nahi junior saria sailkapena 2026-4-18

Argazkietan, Meategietako lehenengo igoeran (arg.: Aimar Maiz Morea)

Zegamarrak ere Realarekin

Goierriko Hitza — 2026-04-17 10:55:39

Realak Atletico Madrilen aurka jokatuko duen finalera atzera kontaketa hasi da. Goierritar asko, zegamarrak ere bai tartean, Sevillara bidean jarriko dira datozen orduetan.

Zegama zuri urdina da egun hauetan, atzo udalak banderinak eta globoak banatu zituen herritarren artean eta etxeko balkoiak apaintzeko deia egin die zegamarrei, herritarren beroa Sevillaraino irits dadin. Atzoko banaketa taldeko argazki txuri-urdina ateratzeko baliatu zuten.

Goierriko dantzarien bilgune bihurtuko da Zegama igandean

Goierriko Hitza — 2026-04-16 12:58:43

Tobera Musika eta Dantza eskolak antolatuta Dantzari Txiki eguna ospatuko dute igande honetan Zegaman. 11:30ean hasiko da dantzarien desfilea frontoitik abiatuta. Beasaingo Aurtzaka eta Ostadar, Lazkaoko Oin Arin, Idiazabalgo Axari eta Zeraingo Solkie dantza taldeak arituko dira Zegamako dantzariekin batera.

Junior mailako Elkartu Nahi Saria larunbatean jokatuko dute Zegaman

Goierriko Hitza — 2026-04-16 12:47:13

Junior mailako 39. Elkartu Nahi Saria jokatuko da larunbatean. 10:00etan hasiko da lasterketa, Zegamatik abiatuta eta 73,5 kilometroko ibilbidea egin beharko dute ziklistek. Segura, Mutiloa, Ormaiztegi eta Zeraindik barrena luzatuko da ibilbidea eta Lierniko mendatea eta Minetako gaina hirutan gainditu beharko da.

Euskal Herriko Trikitixa Eguna Zegaman ospatuko da 2027an

Goierriko Hitza — 2026-04-15 13:09:03

Euskal Herriko Trikitixa elkarteak berriki jakitera eman duenez, 2027ko Euskal Herriko Trikitixa Eguna Zegaman ospatuko dute apirilaren 10ean. “Trikitixaren doinuez eta giro paregabeaz gozatzeko” eguna izango dela iragarri dute elkartetik eta “laster” xehetasun gehiago jakinaraziko dituztela aurreratu dute.

Kopako finalari begira herriko balkoiak apaintzeko deia egin dute Zegaman

Goierriko Hitza — 2026-04-15 12:58:26

Egun gutxi geratzen dira datorren larunbatean Realak Atletico Madrilen aurka Sevillan jokatuko duen Kopako finalerako. Horren aitzakian, Zegamako Udalak herriko balkoiak zuri-urdinez apaintzeko deia egin die zegamarrei. Hori horrela, udalak banderinak eta globoak banatuko ditu herritarren artean. Hasiera batean, banaketa gaurko iragarrita bazegoen ere, azkenean ostegunean izango da 18:00etatik 19:00etara.

Gazte Eguneko otorduetarako izen ematea, ostegunean

Goierriko Hitza — 2026-04-15 12:07:29

Apirilaren 25ean Gazte Eune ospatuko dute Zegaman eta egun horretako bazkarian (5euro) eta afarian (10euro) izena emateko aukera izango da bihar, osteguna, 18:30etik 20:00etara kultur etxean. Bazkaltzeko makarroiak eta afaltzeko otartekoak izango dira aukeran. Izena ematerakoan otartekoa aukerau beharko da hurrengon arten:

Patata tortila
Xolomoa eta gazta
Xolomoa, gazta eta piperrak

Norbaiteko Gazte Euneko kamiseta edo jertsea nahi izatekotan, antolatzaileekin harremanetan jarri daiteke.

Goierriko sei herrik parte hartuko dute Gipuzkoako Herriarteko Pilota Txapelketan

Goierriko Hitza — 2026-04-14 16:20:39

Gipuzkoako Euskal Pilota Federazioak aurtengo Gipuzkoako Herriarteko Txapelketaren berri eman du. 24 herrik eman dute izena eskuzko lehian –iazko baino hiru gehiagok–, hamar ariko dira larruzko paleta eta pala motzez –lau gehiago aurten–, hemezortzi gomazko paletaz –lau gehiago–. Zesta-puntaz, bi herrik besterik ez dute izena eman eta, hortaz ez da txapelketarik izango espezialitate honetan.

Goierriko sei herrik parte hartuko dute aurtengoan, modalitate ezberdinetan.

Eskuz ariko dira Goierriko hiru herri. Lazkao, Zaldibia eta Zegama. Nabarmentzekoa da azken urte askoan taldea osatu duen Ataunek ez duela parte hartuko, ezta iaz finalerdietan lehiatu zen Beasainek ere.

Larruzko paletan eta pala motzez Lazkao, Olaberria eta Ordizia ariko dira; eta gomazko paletaz Zumarraga.

Aurkezpen-zozketa apirilaren 21ean egingo dute, datorren asteartean, 19:00etan, Donostiako Kirol Etxean.

Maiatzaren lehen asteburuan ekingo diote txapelketari eskuz eta gomazko paletaz, eta maiatzaren 10ekoan larruzko paleta eta pala motzez. Rural Kutxak eta Aramendia gozotegiak babestuko dute, beste behin, Herriartekoa.

Hauek dira aurtengo parte hartzaileak:

ESKUA (24 herri)

Aduna
Aia
Albiztur
Alegia
Amasa-Villabona
Amezketa
Andoain
Antzuola
Aretxabaleta
Astigarraga
Azkoitia
Azpeitia
Bergara
Donostia
Eibar
Hernani
Lazkao
Oiartzun
Oñati
Usurbil
Zaldibia
Zegama
Zestoa
Zizurkil

LARRUZKO PALETA ETA PALA MOTZA (10 herri)

Andoain
Azpeitia
Deba
Donostia
Errenteria
Lazkao
Oiartzun
Olaberria
Ordizia
Zumaia

GOMAZKO PALETA (18 herri)

Aia
Alegia
Andoain
Anoeta
Astigarraga
Azkoitia
Donostia
Eibar
Errenteria
Hernani
Lasarte-Oria
Mutriku
Oiartzun
Soraluze
Tolosa
Zarautz
Zestoa
Zumaia
Zumarraga

Gipuzkoako Bira amaitu dute Ameztikoek

Goierriko Hitza — 2026-04-13 13:50:48

Azkenean, eguraldiak tregoa eman zuen eta Zegamako Amezti mendi taldeko kideek Gipuzkoako Bira proiektuaren azken etapa egiteko modua izan zuten pasa den martxoaren 28an.

Aritxulegitik (Oiartzun) abiatu eta Aiako harrien magaletik zeharka, Elurretxe eta Erlaitz gainetatik igaroz, San Martzial ermitatik Irunera iritsi eta Hondarribin amaitu zuten Gipuzkoako Biraren 15. eta azken etapa. “Irunera iristear giñela txiri-miri pixkat, baina ondo. Hondarribiko kiroldegian dutxatu eta hirugarren denborara pasa giñen. Bapo bazkaldu eta arratsaldean itzuli giñen etxera”, esan du Asier Berasategi Ameztiko kideak.

Bazkalorduan proiekturen berrien ideak sortu zirela ere aitortu du Berasategik, “hori bai, urte kopuru laburrago eta bukaera berdiñarekin”, gehitu du.

Azkeneko etapa amaituta Hodarribian, bazkaltzera joan aurretik. AMEZTI

Zegamako Anduetzan, 'Frai Bartolomeren misterioa' eta San Adriango igarobidera bisita

Goierriko Hitza — 2026-04-01 13:17:45

Zegamako Anduetza parketxean ‘Frai Bartolomeren misterioa’ eskapu jolasa eta San Adriango igarobidera bisita antolatu ditu Aste Santu eta Pazko asterako.

‘Frai Bartoomeren misterioa’ Aste Santuan eta Pazkoko asteburuan izango da Anduetza parketxean. 2-8 laguneko taldeak izango dira aldiro, eta hiru txanda egongo dira: 10:15ean, 11:30ean eta 12:45ean. Helduek 6 euro ordaindu beharko dute sarrera, eta 4 euro 12 urtetik beherakoek. Sarreren salmenta webgunearen bitartez egingo da.

Azken urteetan bogan jarri diren escape room jokoetan oinarrituta dago, eta bereziki familiei eta lagun taldeei zuzenduta dago. Parte hartzaileek hainbat enigma argitu beharko dituzte jolas eta frogen bitartez.

San Adriango igarobidearen historiaz ezagutu ahal izango da, eta jarduera apirilaren 12an, igandean izango da. Bi txanda egongo dira ordu eta erdiko iraupenekoak, euskarazkoa 10:00etan eta gaztelaniazkoa 12:00etan. 3-12 urte bitartekoentzat 4 euro balioko du sarrerak, eta zaharragoentzat 6 euro. Izena aldez aurretik eman behar da.

Gipuzkoako Birako azkena

Goierriko Hitza — 2026-03-26 08:10:17

Ia 9 urte igaro dira Zegamako Amezti mendi elkarteko kideek Gipuzkoako Bira proiektuari hasiera eman ziotela. Hondarribian hasita, 15 etapatan Gipuzkoa osoari, mendiz mendi, bira ematea izan da erronka eta amaitzekotan dira. Eguraldiak laguntzen badie, larunbat honetan egingo dute azkena, hasierako puntura eramango diena, hain zuzen. Ondoren, Hondarribian bertan egingo duten bazkari batekin borobilduko dute 2017ko irailean hasi zuten abentura.

Hondarribian hasi eta Talia izeneko bidetik Pasaiara arteko etapa izan zen lehendabizikoa. Asier Berasategi Amezti mendi elkarteko kideak kontatu duenez, taldeko kide batek eman zien ideia: «aurretik, Orhitik Itsasora izeneko beste proiektu bat egina genuen; antzekoa, baina etapa gutxiagorekin. Orhi mendian hasi eta 8 bat etapatan itsasoraino iritsi ginen mendiz mendi. Hura ere Hondarribian amaitu genuen eta han, Gipuzkoako Biraz hitz egin zigun taldekide batek. Gustatu egin zitzaigun eta aukera polita izan zitekeela pentsatu genuen», kontatu du. 14 etapa eta 280bat kilometro oinetan metatu ondoren, amaitzear dira balentria. «Urteko etapa bat egiten hasi ginen, baina 15 urtek luze joko zutela ikusita tarteka, urtean bi egitea erabaki genuen. Gora beherak izan ditugu, eguraldiak baldintzatuta batzuk eta amaiera atzeratu egin zaigu, iaz bukatzekoak baikinen», gehitu du.

Eguraldiaren zain

Zeruari begira daude orain, larunbatean proiektuaren itxiera erdizka geldituko zaien beldur: «Eguraldiaren aurreikuspena txarra da momentuz, baina bazkaltzeko lekua hartuta daukagu eta Hondarribira joan beharra daukagu bai ala bai», dio Berasategik. Azkeneko etapa egin eta ondoren, bazkaritara biltzea litzateke egokiena baina oraindik ez daukate ezer erabakita, «bada ezpada B plana egin dugu. Etapa egiterik ez badaukagu Hondarribitik Hendaia aldera bueltatxoren bat emango dugu bazkal aurretik, eta aurrerago egiten saiatuko gara, baina arantzatxoa geratuko zaigu hala bada», dio. Aritxulegin (Oiartzun) hasita, Aaiako Harrien magaletik igarota Behobiatik Hondarribiara arteko ibilbidea da egiteko falta dutena, 16 kilometrokoa.

Hasierako lau etapak kostaldekoak izan ziren Hondarribi, Pasaia, Orio, Zumaia eta Mutriku inguruetan. Handik, Gipuzkoa barnealdera jo zuten makina bat herri eta tokitatik pasatuz: Eibar, Arrasate (Gesalibar auzoa), Leintz Gatzaga, Arantzazu, Otzaurte, Lizarrusti, Bedaio, Berastegi edo Hernani (Ugaldetxo auzoa), tartean. Batez beste, 8-10 bat laguneko taldeak hartu du parte etapa bakoizeko, nahi baina gutxiago: «Ez dugu jendea mendi irteeretara erakartzea lortzen», kexu da Berasategi. Mendira joateko ohiturak aldatu egin dira eta orain, jendeak mendira «bere kasa» joateko ohitura handiago duela uste du Berasategik

Momentuz, azkenak

Baina ez da Gipuzkoako Birarena Ameztikoek esku artean daukaten proiektu bakarra. Batera egiten aritu dira Urmuga edo Euskal Herriko uraren banalerroa izeneko beste proiektu bat ere, «ia paraleloan egin ditugu biak eta hori ere aurten amaituko dugu, azkeneko etapa falta zaigu», azaldu du. GR-12 natur ibilbidean zehar egin dituzte irteera ezberdinak, Euskal Herrian barrena. Momentuz, hauek izango dira azkeneko proiektu luzeak, ez baitaukate gisako proiekturik pentsatuta epe motzean.

Hernaniko Ugaldetxo auzotik Aritxulegira irteera, 14. etapa; 2025eko urrian. AMEZTI

Hitzaldia frankismoaz

Goierriko Hitza — 2026-03-24 14:05:05

Frankismoak Zegaman utzitako biktimei aitortza egin asmoz, udalak eta Aranzadi Zientzia elkarteak aspaldi abiatu zuten bi erakundeen arteko elkarlana. Zegamako Udalak urteak daramatza memoria historikoa lantzen: 2015ean sortu zuten Oroimenaren Txokoa, Jose Urbizu Berasategiren gorpuzkiak Urbasatik berreskuratu eta herriko hilerrian ehortzi zituztenean. Orduz geroztik, frankismoaren biktima gehiagori ere egin diote aitortza eta beste hainbat lanketa ere ondu ditu Aranzadirekin elkarlanean.

Frankismoak utzitako biktimen espektro zabalean, Zegaman 1936tik 1978ra bitartean gertatutako giza eskubideen urraketak, errepresioa eta motibazio politikoko beste indarkeria batzuk jasan zituzten emakumeen historia berreskuratzen ari da, zehazki, Aranzadi, ikerketa historikoaren bidez. Lanketa hau Zegamako Udalarekin egindako hitzarmenaren emaitza da.

Ikerketa historikoaren nondik norakoen berri emateko Isilpeko historia berreskuratuz. Frankismoak errepresaliatutako emakumeak tokiko ikerketan hitzaldia eskainiko du bihar arratsaldean, 18:30ean gaztelekuan Ione Zuloaga historialariak eta Aranzadiko kideak: «Errepublikan zehar protagonismoa izan eta 1936ko gerran eta haren ostean diktadura frankistan errepresioa jasan zuten emakume eta disidentzia sexu-generikoei buruz».

Harremana, lehenagokoa
Zuloagaren eta Zegamaren arteko harremana ez da gaurkoa, ordea. Zegamako Udalak hala eskatuta, Zegama 1936-1945. Giza eskubideen zapalketa eta errepresioa Gerra Zibilean eta Lehen Frankismoan ikerketa lana egin zuen orain urte batzuk. Proiektua 2019tik 2021era luzatu zen eta 2023an publikatu zuten bi liburukitan. Liburua urte hartako apirilean aurkeztu zuten eta aurkezpenarekin batera, 2015ean sortutako Oroimenaren Txokoaren plakaren ondoan beste bat jarri zuten, 11 izen gehituta.

Zuloagaren ikerketa lanean Zegamako udal artxiboa gakoa izatean ari da, beste herriko artxibo askotan baino «informazio gehiago» aurkitu dutelako bertan. Guztiarekin, garrantzitsuena ahaztutako memoria hori berreskuratzea da, «Horrenbeste urte pasa diren arren, oraindik irekita jarraitzen duten zauri horiek ixteko beharrezkoa da egia jakitea», azaldu zion ordu hartan Goierriko Hitzari Zuloagak berak.

Urretxuko Smartlog Nest Cycling Team taldearen aurkezpena

Goierriko Hitza — 2026-03-18 21:00:43

Gaur arratsaldean Smartlog Nest Cycling Team 23 urte azpikoen txirrindulari taldea aurkeztu dute Urretxun. Egitasmo berezia da, gazteen garapen integrala baitu helburu. Horretarako, txirrindularitza ikasketekin edo lanarekin uztartzeko aukera emango diete eta beharrezko baliabide guztiak eskainiko dizkiete. Taldean Goierriko hiru txirrindulari daude: Hodei Salaberria (Urretxu, 2007), Adur Arrizabalaga (Zegama, 2006) eta Ethan Cabanillas (Segura, 2006). Taldeko zuzendaria Jon Odriozola txirrindulari ohia da.

Smartlog barne logistikako prozesuak optimizatzeko eta automatizatzeko soluzio eta zerbitzuetan espezializatutako ingeniaritza enpresa bat da.