Goierriko Hitza

Errigora sustraiak ahaztu gabe espaziora begira

Goierriko Hitza — 2026-10-24 17:40:58

Errigorak herri ekimenak hasierako boluntarioei omenaldia egin diete Lazkaon. Eguna hasteko Errigora sustraietatik espaziora dokumentala estreinatu dute Areria zineman. Jende asko hurbildu Euskal Herriko hainbat txokotatik, hori horrela zinema jendez bete da.

Dokumentalaren estreinaldiaren ondoren, Lazkaoko frontoira inguratu dira denak, hamaiketako egin ostean, omenaldi ekitaldia egiteko. Erramun Amundarain, hasierako boluntario izan zena eta lehengo urtean zendu zena, gogoratu dute bere argazki bat ipiniz oholtza gainean. Egunean zehar Kuxkuxtu txaranga urruñarra ere badabil giroa alaitzen. Behin omenaldia amaituta bazkaria egon da frontoiean bertan.

Omenaldiko argazkiak eta bideoa.

Idiazabal, Segura eta Zegama Gipuzkoa Mugituz 2026 erronkan

Goierriko Hitza — 2026-10-23 12:18:23

Idiazabalgo, Segurako eta Zegamako udalak Gipuzkoa Mugituz 2026 erronkara batu dira. Gipuzkoako Foru Aldundiak eta Adinberri Fundazioak antolatutako ekimena da, adin guztietako herritarren artean jarduera fisikoa eta bizitza osasungarria bultzatzea helburu duena.

Udalerri ezberdinak liga birtual batean lehiatuko dira. Urriaren 26tik abenduaren 15era, herritarrek erregistratutako kilometro aktibo bakoitzak puntuak batuko ditu parte hartuko duten herri bakoitzarentzat. Hala, hiru herrietako udalek herritarrak animatu dituzte erronkan parte hartzera.

Nork parte har dezake?

14 urtetik gorako pertsona guztiek har dezakete parte eta ez da beharrezkoa udalerri hauetan erroldatuta egotea.

Erronkan modalitate ezberdinetan hartu daiteke parte: oinez, korrika, bizikletaz edo igerian. Sistemak jarduera motaren araberako ponderazio koefiziente bat aplikatuko du; oinez edo igerian egindako kilometro batek, adibidez, bizikletaz egindakoak baino gehiago balioko du, ahalegin handiagoa eskatzen duelako.

Gainera, sailkapenak biztanleriaren araberako koefiziente bat aplikatzen du udalerri bakoitzaren tamainaren arabera; horrela, herri txikiek handien pare lehiatzen dute. Gipuzkoako edozein herrik irabaz dezake liga hau.

Erronkan parte hartzeko urratsak

Parte hartzea doakoa da eta oso erraza, Wellk app-aren bidez.

Deskargatu: bilatu “Wellk” zure aplikazio-dendan (iOS edo Android).
Eman izena: sortu zure profila.
Batu udalerrira: hasierako orrian, “Gipuzkoa Mugituz 2026” txartelean, sakatu “Batu” eta aukeratu Idiazabalgo taldea.
Mugitu zaitez!: erregistratu zure jarduerak zuzenean app-aren GPSarekin, edo sinkronizatu zure ohiko gailu eta aplikazioekin (Strava, Garmin, Polar, Fitbit, Apple Health edo Health Connect). Kilometroak edonondik batu ditzakezu, udalerriaren barruan zein kanpoan.

Sariak jokoan

Sariak egongo dira parte hartzaileentzat. Xehetasunak hemen argitaratutako oinarrietan zehaztuko dira.

Laguntza teknikoa: aplikazioari buruzko edozein zalantzarako, idatzi wellk@wellk.eus helbidera edo sartu wellk.eus webgunean.

Migrazioaren errealitatea ‘Tertulia Afarien’ lehenengo saioan

Goierriko Hitza — 2026-10-21 13:25:41

Ostiral honetan ospatuko da Zegamako Amezti elkartearen Tertulia Afariak ekimenaren baitako bi saioetako lehenengoa. Cheikh Mbacke Lo idazle senegaldar altsasuarrak Itsasoak isildutakoen ahotsa hitzaldia egingo du Amezti elkartean, 20:00etan. Bigarren saioa, abenduaren 11n izango da eta Jon Aramendia herritarrak auto elektrikoei buruzko solasaldia girotuko du. Bigarren saio honetan parte hartzeko izen ematea irekita dago jada.

Cheikh Mbacke Lok 22 urterekin utzi zuen Senegal (Afrika) jaioterria. Mediterraneoa gurutzatu eta Andaluzian egin zuen lehenengo egonaldia, ondoren Euskal Herrira iristeko. Markinan (Bizkaia) bizi izan zen aurrena eta gaur egun Altsasu (Nafarroa) du bizitoki. Urte luzeetan Goierriko herrietan saltzaile aritu da eta oso ezaguna da eskualdean, Zegaman eta Seguran batez ere. Orain metalgintzan egiten du lan eta bere lehen liburua argitaratu du: Yakaar. Cartografia de la esperanza.

Migrazioaren errelitateaz

Orain bi hamarkada egindako bidaia berreskuratu du Lok liburua ontzeko. Migrazioaren errealitate gordina, bideko zailtasunak eta bizitako sufrimendua bildu ditu bertan eta horiei buruz arituko da ostiralean Ameztiko tertulia afarian. Liburua «gizakien artean zubi bat eraikitzeko eta gizarteak migratzaileen errealitatea hobeto ulertzen laguntzeko asmoz» idatzi duela esan zuen Lok GOIBERRI aldizkariari irailean emandako elkarrizketan.

Orain dela 20 urte iritsi zen Europara pateran, «hogeita hamaika lagunek ekin genion bidaiari, eta bi baino ez ginen iritsi. Bidean geratu ziren pertsonen oroimenak eta haien historia kontatzeko beharrak bultzatu ninduen liburua idaztera. Munduan injustizia asko dago, eta pertsona zaurgarrienen alde ahotsa altxatu nahi nuen», zioen.

Auto elektrikoak, abenduan

Gaia aldatuta, auto elektrikoen inguruko solasaldiaren bueltan antolatu dute abenduaren 11n, Tertulia Afariak ekimenaren bigarren saioa. Jon Aramendia ingeniari zegamarra izango da gonbidatua eta Auto elektrikoa: etorkizuneko mugikortasun egokiena? izenburupean egingo du hitzaldia. Mugikortasun jasangarri eta efizienteari buruzko gaur egungo ikerketak eta etorkizuneko aurreikuspenak aletuko ditu, «legeditik harago gizartean dagoen kezka nagusietako bati erantzunez».

Bi kasuetan, hitzaldien ostean afaria egingo da elkartean hitzaldietara gonbidatuta protagonistekin eta solasaldian parte hartu duten herritarrekin. Elkarteko bazkideek eta laguntzaileek izango dute lehentasuna izena ematerakoan, baina herritar guztiei zabalduko zaie aukera, epeak amaitu ostean. Afariak 30 euroko prezioa du. Abenduaren 11ko saioan izena emateko epea abenduaren 4ra arte egongo da irekita. Izena emateko elkarteko tabloian apuntatu daiteke edo 677 98 43 87 (Aitor) telefonora deitu.

Gipuzkoako taldekako bola txapelketa, ostegunean Zegaman

Goierriko Hitza — 2026-10-21 12:37:41

Gipuzkoako taldekako bola txapelketako hirugarren jardunaldia jokatuko dute gaur arratsaldean Zegamako Txarape bolatokian, 18:30ean hasita. Herriko Belatxingak Bola-Jokoa taldeko kideak Legazpiko Danantzako taldekoen aurka arituko dira. «Etxean jokatzen dugularik baikor gaude lan txukun bat egin eta puntuak bertan geldituko diren esperantzarekin», diote. Guztira, gizonezkoen 14 talde eta emakumezkoen 4 ari dira txapelketan parte hartzen.

Autobus zerbitzu bereziak urriaren 30 eta 31ko Cava Festarako

Goierriko Hitza — 2026-10-21 12:07:51

Urriaren 30ean eta 31n ospatuko da aurten 12. Cava Festa Zegaman. Ohi bezala, Zegama senidetuta dagoen Sant Sadurni D´Anoiako (Herrialde Katalanak) cava ezberdinak probatzeko aukera izango da herriko frontoian, 20:00etatik aurrera. Iaz bezala, aurten ere autobus zerbitzu berezia jarriko du Gipuzkoako Foru Aldundiaren Mugikortasuneko, Turismoko eta Lurralde Antolaketako Departamentuak.

Jaiak «modu jasangarrian, merkean eta batez ere, segurtasunez gozatu ahal izatea» da zerbitzu honen helburu nagusia Azahar Dominguez diputatuak esan duenez. Autobus zerbitzu bereziak ostiral iluntzetik larunbatera bitartean egongo dira indarrean, eta larunbatetik igandera Lurraldebuseko ohiko zerbitzuak eskainiko dira, «larunbatero bezala».

Ordutegiak herrika

Autobus zerbitzu bereziak 00:10ean eta 01:55ean irtengo dira Zegamatik ostiraletik larunbaterako gauean eta geldialdiak egingo ditu ondorengo herrietan: Seguran, 00:20an eta 02:05ean; Idiazabalen, 00:25ean eta 02:10ean; Ihurren, 00:30ean eta 02:15ean; Beasainen, 00:35ean eta 02:20an; Ordizian, 00:45ean eta 02:40an; Araman, 00:50ean eta 02:35ean; Itsasondon, 00:55ean eta 02:40an eta Legorretan, 1:00ean eta 02:45ean.

Ordutegiak Lurraldebuseko webgunean edo erabiltzaileei arreta emateko 900 300 340an kontsultatu daitezke.

Zegaman hasiko da asteburuan, aldundiaren Treba Gazteak programa

Goierriko Hitza — 2026-10-19 12:28:49

Gipuzkoako Foru Aldundiaren Gazteria sailak sustatzen duen Treba Gazteak programa Zegaman hasiko da asteburu honetan. Programak 17 eta 24 urte arteko gazteei beren ahalduntze prozesuan laguntzea du helburu, saio ezberdinetan beren interesekoak diren hainbat gai landuz. Berrikuntzekin dator aurten, prestakuntza, esperientzia eta sorkuntza uztartzen dituen proposamen batekin. Gipuzkoako sei herritan feminismoa, ongizate emozionala eta teknologia berriei buruzko hainbat ekintza antolatu dituzte, eta lehenengoa esan bezala Zegaman izango da.

Zegaman lehendabiziko jarduera scape room bat izango da, gaztelekuan. Urriaren 23an (17:00, 18:30 eta 20:00) eta urriaren 24an (10:00, 11:30, 13:00, 16:00, 17:30 eta 19:00), parte hartzaileek hainbat erronka gainditu beharko dituzte. Bigarren jarduera azaroaren 6an izango da Izan ON: sentitu eta konektatu izenburupean ongizate emoziolanari buruzko saioa gidatuko du Ainhoa Urretagoiena adituak.

Programari azaroaren 7an emango diote amaiera, Janire Atxurra eduki-sortzailearen gidaritzapean podcast bat sortuz. Posdcast honek scape room-ean eta ongizate tailerrean barneratutako ezagutzak bilduko ditu. Jarduera guztiak doakoak dira baina parte hartzeko aurrez izen eman behar da gip.eus/TREBAzegama helbidean.

Joxe Azurmendi kongresua aurkeztu dute Donostian

Goierriko Hitza — 2026-10-15 12:37:56

Joxe Azurmendi. Euskal pentsamenduaren ur-jauzia II kongresua aurkeztu dute gaur goizean Donostian. Abenduaren 16tik 18ra ospatuko da eta Jakinek eta EHUko Joxe Azurmendi Katedrak antolatu dute elkarlanean. Iñaki Zabaleta, EHUko Joxe Azurmendi Katedrako zuzendariak, Haritz Azurmendi, Jakineko proiektu arduradunak eta Alba Garmendia kongresuko antolakuntza taldeko kideak hartu zuten parte agerraldian.

2019an egin zen lehendabiziko edizioa, eta hari jarraipena emateko asmoz antolatu dute bigarrena. Ildo horretan, kongresuak «euskal pentsamenduaren testuinguru berriez, etorkizuneko erronkez, egiturez eta azpiegiturez jarduteko hitzaldiak eta solasaldiak» hartuko ditu bere baitan.

150 hizlari arituko dira

Lehendabiziko hura baina zabalagoa izango da bigarrena, «hala gaitegiz, nola kopuruz». Herrigintzako, kulturgintzako eta akademiako 150 parte hartzaile izango dira hiru egunetan Donostian, EHUren Carlos Santamaria Zentroan: «Askotariko gai eta formatutako 40 saiotan». Topaketa «akademiko-kulturala» izango dela aurreratu dute, unibertsitateko, kulturgintzako eta herrigintzako hizlariekin: Eneko Agirre, Xabier Barandiaran, Itxaro Borda, Jule Goikoetxea, Roldan Jimeno edo Uratxe Retolaza aipatu dituzte besteren artean.

Ruben Zubikoa salmonidoen euli arrantzako Espainiako txapelketan

Goierriko Hitza — 2026-10-13 11:03:23

Salmonidoen Euli-arrantzako Autonomia Erkidegoetako Selekzioen IV. Espainiako Txapelketa, Gipuzkoako Araxes eta Leitzaran ibaietan jokatu zen pasa den astean, urriaren 8tik 11ra, bikotekako modalitatean. Ruben Zubikoa zegamarrak, Nafarroako selekzioarekin batera hartu du parte txapelketan, eta bigarren sailkatu da.

Txapelketa hau Espainiako Pesca eta Casting Federazioak (FEPyC) antolatzen du, Euskadiko Arrantza eta Casting Federazioarekin lankidetzan, eta modalitate honetako estatuko bikote onenak bildu ditu.

Ate irekiak egingo ditu asteartean Zegamako Berdintasun taldeak

Goierriko Hitza — 2026-10-12 13:10:08

Zegamako Berdintasun taldeak ate irekien jardunaldia egingo du asteartean, urriak 13, 18:30ean Jabier Otaegi kultur etxean.

Zegamako Berdintasun taldea 2023ko abenduan sortu zuten herriko hainbat emakumek «herriko emakumeak biltzeko gune bat sortu eta ideiak sortzeko» helburuarekin. Herrian aurrera eraman duten lehendabiziko lanketa garrantzitsua izan da herriko zaintzaren mapa osatzea, Farapi elkartearen laguntzarekin 2024an zehar osatu zutena.

Lan horren emaitzetako bat izan zen, 2025eko martxoaren 8an osatu zuten Zaintzaren ibilbidea, «herriko zaintza guneak bistaratzeko eta zaintza hori egiten duten emakume eta gizonezkoei aitortza egiteko». Testuinguru horretan, 1824an Zegaman jaio zen Pascuala Legorburu Maiorari ere omenaldia egin zioten. Legorburuk lan asko egin zuen, herriko jendeari orokorrean eta behartsuei bereziki laguntzeko.

Bertaratzeko deia

Bide horretan, taldera batu nahi duten herritarrei astearte honetarako deitu duten ate irekien jardunaldira gerturatzeko deia egin diete, «berdintasunaren inguruan elkarrekin ideiak partekatu, proposamen berriak jaso eta ekintzak antolatzen jarraitzeko».

Berasategi eta Altolagirre garaile, Zegamako 1. Bolari egunean

Goierriko Hitza — 2026-10-12 11:44:45

Belatxingak Bolo Jokoa klubak antolatuta, Zegamako 1. Bolari eguna ospatu dute pasa den asteburuan. Belantxingak 2024an sortu zen, herrian bola jokoa sustatzeko helburuarekin; -Bolari eguna ere zentzu berean antolatu dute aurten, lehenengoz.

Larunbatean, haur eta gazteentzako bola tiraldiak izan ziren aurrena eta ondoren, helduen bola txapelketa jokatu zuten. Gizonezkoen sailean, Asier Berasategi izan zen irabazlea eta Ane Altolagirre, emakumezkoetan. Gazteen mailan, Orhi Alzelai eta Nora Elizegirentzat izan ziren garaipenak. Federatu gabekoetan, Miren Larreak egin zituen tiraldi gehien. Eguna borobiltzeko bazkaria egin zuten, ondoren, guztiak elkarrekin.

Zegama-Aizkorri mendi maratoia 2027ko ekainaren 6an jokatuko da

Goierriko Hitza — 2026-10-09 12:25:02

26. Zegama-Aizkorri mendi maratoia 2027ko ekainaren 6en ospatuko da. Hala eman du jakitera antolakuntza taldeak bere sare sozialetan. Maratoirako aurre izenemateak urtarrilaren 11an irekiko dira eta urtarrilaren 25an, berriz, Kilometro Bertikala (KB) eta Junior Trailerako.

Aurten ere Golden Trail World Serierako proba puntuagarria izango da eta guztira, 225 plaza izango ditu aurten ere zozketan.

Maratoiko dortsaletan parte hartzeko aurreinskripzioak urtarrilaren 11an irekiko dira,12:00etan, kronoak.com izen-emate plataformaren bidez. Hamaika egunez, urtarrilaren 11tik 22ra, parte hartu nahi duten guztiek aurrez izena eman ahal izango dute maratoiko dortsal bat eskuratzeko. Ondoren, zozketara doazenak, dortsala denbora onagatik dutenak eta dortsal herrikoa izateagatik edo edizio guztiak amaitu izanagatik dutenak banatuko dira.

Urtarrilaren 25etik otsailaren 5era, berriz, 13. Kilometro Bertikala eta 16. Junior Traila (16-18 urte) egiteko epeak irekiko dira. Hiru lasterketetarako dortsalen zozketa otsailaren 12an egingo da.

2027ko ekainaren 6ean, azken edizioko irabazleen lekukoa hartuko duten atletak ezagutuko dira. Aurtengo edizioko irabazleak emakumezkoetan, Tove Alexandersson suediarrak, lehenego aldiz hartu du parte Zegaman, probaren errekorra hautsiz, 4:08:09ko denborarekin; Malen Osa bigarren eta Sara Alonso hirugarren zirela podioan. Elhousine Elazzaoui marokoarra (3h45:07), Kilian Jorneten ondoren Zegamako plazan garaipena errepikatzeko gai izan den lehen korrikalaria bilakatu da, historia eginez.

Gorde datak:

2027ko urtarrilak 11: 26. Zegama-Aizkorri maratoiaren aurre izen ematea.
2027ko urtarrilak 25: 13. Zegama-Aizkorri KBaren eta 16. Zegama-Aizkorri Junior Trailaren aurre izen emateak.
2027ko otsailak 12: Dortsalen zozketa.
2027ko ekainak 4: 13. Zegama-Aizkorri Kilometro Bertikala.
2027ko ekainak 6: 26. Zegama-Aizkorri Maratoia eta 16. Zegama-Aizkorri Junior Trail-a.

Zegamako 1. Bolari eguna antolatu dute, larunbatean

Goierriko Hitza — 2026-10-08 13:34:38

Belatxingak Bolo Jokoa klubak Zegamako 1. Bolari eguna antolatu du larunbaterako. Belantxingak 2024an sortu zen, herrian bola jokoa sustatzeko. Larunbatean, haur eta gazteentzako txapelketa izango da 10:30etik 11:30era eta hortik aurrera, helduen txanda izango da. Ondoren, lagunarteko bazkaria egingo dute.

Uraren Euskal Agentziak arrainentzako arrapalak jarri eta berrituko ditu Oria ibaian

Goierriko Hitza — 2026-10-06 13:15:49

Uraren Euskal Agentziak —URAk— Oria ibaian arrain espezieen zirkulazioa errazteko eta bertako ekosistema hobetzeko bi jarduketa egin nahi ditu Goierrin. Hala, arrainentzako arrapala berri bat egin nahi da Zegaman, eta egun Armaolako eremuan egoera kaskarrean dagoen arrapala berritu, Seguran. Bi jarduketa hauek egiteko deialdia egin berri du Eusko Jaurlaritzako Industria, Trantsizio Energetikoa eta Jasangarritasun sailak. Bi jarduketak Oria Garaiko Kontserbazio Bereziko eremuan kokatuta daude, ingurumen balio handiko espazioan.

Zegamako kasuan, herrigunean egingo da esku hartzea, Oria ibaiak Elizalde eta Askatasunaren Etorbidea kaleak zeharkatzen dituen gunean. Ibaiaren eskuinaldeko ertzean eraikiko litzateke arrapala berria, amaitu gabe dagoen arrapala zahar baten ondoan. Gaur egun dagoen presa txikiak eragindako 1,5 metroko desnibela konponduko du azpiegitura berriak.

Izan ere, mota honetako presa txikiek, «hainbat espezie urtarren lekualdatzea oztopatu dezakete, euren habitatak suntsitu ditzakete eta kasu batzuetan, ur ekosistemen gaitasun naturala murrizten» dute. Zegaman aurreikusitako lanek, «ibaiak korridore ekologiko gisa berreskuratzen lagunduko du, faunaren zirkulazioa erraztuz, ekosistemen erresilientzia handituz eta biodibertsitatea kontserbatzen lagunduz».

Sei asteko epea

Zegamaren kasuan, lizitazioaren aurrekontua 94.531,19 eurokoa da (BEZa barne) eta obrak gauzatzeko epea 6 astekoa izango da, esleitzen den unetik hasita. Proiektuak 32 metroko luzera eta %5,8 inguruko malda izango duen arrainentzako arrapala bat aurreikusten du. Deflaktore bat ere eraiki beharko da, arrapalaren funtzionamendu hidraulikoa bermatzeko eta sedimentuek eta legarrek arrainen sarrera oztopa ez dezaten.

Seguraren kasuan, herrigunetik 1,4 kilometrora kokatuta dagoen Armaolako arrainentzako arrapala berritzea izango da egitekoa. Armaolako arrapala 2011n eraiki zuten eta frogatuta dago «martxan egon den denbora tartean, amuarrainen komunitatearen igarobidea erraztu» duela. 70 metroko luzerako azpiegitura izan da eta 4,15 metroko desnibela konpondu izan du Oria ibaiaren zati honetan. Gaur egun, denboraren eraginez, zati bat puskatuta dago.

Ibai tarte horretan mazkaria, amuarraian arrunta eta aingira bezalako espezien presentzia dago eta obra honi esker, «ubidearen joan-etorriak erraztuko dira eta ibaiaren egoera ekologikoa hobetuko da». Proiektuak 78.566 euroko aurrekontua du (BEZ gabe) eta obra burutzeko epea 5 astekoa izango da.

Life Kantauri proiektua

Lanak ingurumenean ahalik eta eragin txikiena izan dezaten faunarentzako aldi sentikorrenetatik kanpo egingo dira; lanerako esparru lehorrak ur hesien bitartez isolatuko dira eta ibaian behera solido isuriak gertatzea ekidingo dute. Europako Life Kantauri proiektuaren baitan burutuko dituzte lanak, Natura 2000 Sareko bost ibai lerrotan.

Oria ibaia Zegamako erdigunetik igarotzen. HITZA

De Prado eta Iparragirre nagusitu dira Tartaloetxeko mus txapelketan

Goierriko Hitza — 2026-10-06 10:43:50

Mus asteburu betea izan da pasatako hau Zegaman. Urriaren 2an jokatu zuten Zegamako elkarte arteko mus txapelketaren finala Amezti elkartean eta larunbatean, urriak 3, Tartaloetxe elkarteko 32. mus txapelketaren txanda izan zen.

Manex de Prado eta Odei Iparragirrek osatutako bikotea izan da aurtengo garailea; eta bigarren postuan sailkatu dira Asier Elizegi eta Iker Altzelai. Lehenedabiziko zortzi postuetan sailkatutako bikote guztiek jaso zitutzten askotariko opariak, ohi bezala. Antolatzaileek txapelketan parte hartu zuten lagunei eta antolakuntzan aritu zirenei, eskerrak luzatu dizkiete lerro haue bitartez.

Azurmendi eta Arakama txapeldun Zegamako mus txapelketan

Goierriko Hitza — 2026-10-05 15:24:09

Azurmendi-Arakama bikoteak jantzi du Zegamako elkarte arteko mus txapelketaren txapela, finalean Arizkorreta-Larrarte bikoteari irabazita.

Txapelketa hau urtero elkarte ezberdin batek antolatzen du, eta aurten Amezti Elkarteari egokitu zaio antolakuntza. 2025ean herriko elkarte ezberdinetako Mus Txapelketetako txapeldun eta azpi-txapeldunen arteko lehia izan zen urriaren 2an jokatutakoa. Zortzi bikotek hartu zuten parte.

Giro ederrean jokatu zen Mus Txapelketa eta tartean afari bat ere partekatu zuten mus jokalariek Ameztiko Gida Batzordeko kideek prestatuta.

Tartaloetxeren 32. mus txapelketa, larunbatean

Goierriko Hitza — 2026-10-01 13:34:36

32. Tartaloetxe mus txapelketa jokatuko da larunbatean Zegamako Tartaloetxe elkartean. Txapelketari 15:30ean emango diote hasiera eta 15:00etan irekiko dute izen ematea, elkartean bertan. Bikoteko 20 euro ordaindu beharko da parte hartzeko.

Ander Otegi zegamarrak Salamancako Itzuliko azken etapa irabazi du

Goierriko Hitza — 2026-09-21 11:09:18

Ander Otegi zegamarra (BBK-Euskadi) nagusitu da Salamancako Itzuliko hirugarren eta azken etapan. Otegi azkarrena izan da esprintean, amaiera estuan eta azken 400 metroak gorantz ziren etapa lehiatuan –127 kilometro Salamancan hasi eta buka–. Bide batez, amaiera bikaina eman dio itzuliari eta denboraldiari, taldearen 2026ko azken proba baitzen. Otegiren urteko laugarren garaipena da: Irungo Klasikoa, 23 urtez azpiko Euskadiko eta Gipuzkoako erlojupeko txapelketak eta Salamancakoa.

Asier Cardona, Iker Colmenero, Aimar Fernandez de Gorostiza, Aimar Marin eta Kepa Ormazabal gabiriarra izan ditu taldekide denboraldi honetako azken proban, Mikel Gaztañaga itsasondoarra zuzendari zutela. Aurtengo udan “stagiaire” modura ere lehiatu da Euskaltel-Euskadirekin ZLM Tourrean, Herbereetan.

Giro bikaina Aizkorpeko bost herrien arteko ibilaldian

Goierriko Hitza — 2026-09-19 10:55:57

Aizkorpe bailarako bost herriak urteroko ibilaldia egiten ari dira, aurtengoan Segurako mendi elkarteak antolatuta. Segura inguruko txoko ez hain ezagunak erakustea da aurtengo helburua. Ekimena bailarako mendizaleen arteko hartu-emanak sendotzeko baliagarria da eta Segura, Idiazabal eta Zegamako mendi elkarteetako eta Zeraingo Liztormendi eta Mutiloako Txerri Gorri kultur elkarteetako kideek hartzen dute parte. Aurtengo edizioan 45 lagun inguru elkartu dira. Behin ibilaldia burututa, elkarrekin bazkalduko dute Seguran.

Mendizaleak, Segurako irteeran.

Adifek 2 milioi eurotik gora bideratuko ditu Zegama eta Brinkola arteko azpiegitura hobetzeko

Goierriko Hitza — 2026-09-12 18:09:27

Adifek 2,13 milioi eurotik gorako kontratua esleitu du Madril-Hendaia trenbide-linea —zehazki, Zegama eta Brinkola (Legazpi) herrien arteko tartea— eusten duen ezponda egonkortu eta sendotzeko. Trenbide azpiegitura optimizatzea da helburua.

Lanak 548/860 eta 549/091 kilometro-puntuen artean gauzatuko da, eta trafiko-fluxua hobetzea eta eremu horretan abiadura handiagoak lortzea ahalbidetuko du. Lanek eragindako tartea egonkortzea izango dute ardatz; horretarako, ezpondaren oinarrian ainguratutako pilote eta mikro-pilote bidezko euste-hormak jarriko ditu Adifek (zenbait puntutan 18 metroko sakoneraraino iritsiz), eta, horrela, lurzoruaren egonkortasuna eta egituraren sendotasuna hobetuko ditu.

Lanak egiteko 2. bidea desmuntatu beharko du; aukera hori baliatuko du, halaber, materialak berritzeko eta bide-tartea egokitzeko. Gainera, bidearen alde horretan dauden elektrifikazio-zutoinetako hiru kendu eta, euste-horma amaitutakoan, berriro jarriko ditu.

Adifek zehaztu duenez, aurreikusitako beste neurri batzuen artean daude segurtasun eta komunikazio sistemetarako kanalizazio bat jartzea eta 4 kilometro zuntz optikoko kable ordezkatzea. Era berean, drainatze-baldintzak hobetzeko asmoz, zanga-horma luzatzea aurreikusi du, Azokaran tunelera doan egungo egiturarekin jarraitutasuna bermatuz.

Inbertsio horri esker, kanpoko elementu naturalekiko erresilientzia hobetuko dela dio, eta trenen operazioetarako euskarri fisikoa indartuko du.