Goierriko Hitza

Errigora sustraiak ahaztu gabe espaziora begira

Goierriko Hitza — 2026-10-24 17:40:58

Errigorak herri ekimenak hasierako boluntarioei omenaldia egin diete Lazkaon. Eguna hasteko Errigora sustraietatik espaziora dokumentala estreinatu dute Areria zineman. Jende asko hurbildu Euskal Herriko hainbat txokotatik, hori horrela zinema jendez bete da.

Dokumentalaren estreinaldiaren ondoren, Lazkaoko frontoira inguratu dira denak, hamaiketako egin ostean, omenaldi ekitaldia egiteko. Erramun Amundarain, hasierako boluntario izan zena eta lehengo urtean zendu zena, gogoratu dute bere argazki bat ipiniz oholtza gainean. Egunean zehar Kuxkuxtu txaranga urruñarra ere badabil giroa alaitzen. Behin omenaldia amaituta bazkaria egon da frontoiean bertan.

Omenaldiko argazkiak eta bideoa.

Ataungo 22. Argazki Rallyko sariak banatuta

Goierriko Hitza — 2026-10-24 20:44:28

Ataungo 22. Argazki Rallyaren sari banaketa izan da gaur Herri Antzokian. Argazkigintza oinarri duen ekintza hau Euskal Herriko 15 herrik osatzen duten liga bat da, Herriz Herri izena duena, eta Ataun horietako bat da. 63 parte-hartzaile izan dira eta bakoitzak 5 argazki aurkeztu behar zituen. Antolakuntzak argazkiak gai eta ezaugarri jakin batzuekin eskatzen zituzten: objektua uretan, eliza-ermita kanpotik, kantoiak, nahasketa eta kontraargia zirenak.

Argazki Rallyaren 22. edizioaren irabazle, beraz, Ruben Caceres irundarra izan da. Gorka Gomez legazpiarrak bigarren postua eskuratu du, eta hirugarren Patxi Irazabal Donostiakoa geratu da. Sarituak izan diren guztiek eraman dute oroigarri bana etxera. Horretaz gain, irabazleari 300 euroko saria eman zaio, bigarren egin duenari 150 euro, eta hirugarrenaren saria 90 euro izan da.

Saritu gehiago

Argazki lehiaketako lehen hiru sailkatuez gain beste saritu batzuk ere izan dira. 16 urtez azpikoen mailan Nahikari Barros zizurnagusitarra izan da partaide bakarra. Beraz, berak irabazi du saria: 20 euroko bono bat liburu-dendetan gastatzeko eta gazta zati bat.

Ekimenean parte hartu duten herritarren kategorian ere sarituak izan dira. Parte-hartzaile guztietatik 7 izan dira ataundarrak aurtengo edizioan. Lehen hiru sailkatuak Jone Galparsoro, Amaia Auzmendi eta Mariano Perez izan dira: Lehenengoak 90€ eraman ditu etxera, bigarrengoak bi txuleta eta hirugarrengoak hiru botila ardo.

Euskorleans Ordiziarrocken giroa jartzen dagoeneko

Goierriko Hitza — 2026-10-24 15:07:10

Ordiziarrock jaialdia lehenengo aldiz egun bakar batean ospatzen ari dira. Euskorleans ari da dagoeneko herria girotzen. Gainera, eguzkia oraingoz laguntzen ari zaie jaialdiaren formatu berriaren estreinaldian.

Aurreko edizioetan pilotalekua izan da jaialdiaren erdigunea. Aurten, ordea, alde zaharreko kaleetan barrena sakabanatuta ibiliko dira taldeak. Euskorleansek erakusten du aurtengo formatuaren norabidea. Euskal kantu eta dantza tradizionalak New Orleans estiloko brass band musikarekin uztartzen dituen kale ikuskizun ibiltaria da.

Musikaz harago, dantza ere kalera aterako dute. Izan ere, 19:00etan hasita, Street Dantz dantza-ikuskizunak hartuko du Plaza Nagusia, eta bizikleta gainean mugitzen den La Dinamo funk musika talde kataluniarraren txanda izango da ondoren. 22:00etan, berriz, Zo-Zongo taldearen Psycho Clown kale-ikuskizuna izango da alde zaharrean, perkusioa, piroteknia eta antzerkia uztartzen dituena. Sakatu elektrotxarangak hartuko du jarraian lekukoa, eta Dj Necoraren saioak emango dio amaiera ekimenari.

Euskal Selekzioa munduko txapeldun, eskuz binaka

Goierriko Hitza — 2026-10-24 11:00:57

Munduko Euskal Pilota Txapelketa gaur amaituko da. Edizio hau berezia izan da Euskal Selekzioak munduko txapelketa batean, kategoria absolutuan, parte hartzen duen lehen aldia baita. Gainera, lehen domina ofizialak irabazi ditu dagoeneko. Atzo, eskuz binaka urrea irabazi zuen Euskal Selekzioak, eta zilarra eskuz banaka. Tartean goierritarrak zeuden. Eskuz banaka Ekhi Irribarria (Arama, 2005) aritu zen. Eskuz binaka, finala jokatu ez bazuten ere, taldean ziren Beñat Azketa eta Beñat Garmendia beasaindarrak.

Herenegun German Elkoro beasaindarrak urrezko domina irabazi zuen pilota egokituko finalean. Elkorok eta Edorta de Antak 15-10 eta 15-19 irabazi zieten Navarro eta Cabanne frantziarrei.

Esku pilotako finalak

Eskuz banaka Irribarriak eta Gaizka Carregal galdakaoarrak jokatu zuten Espainiaren aurka, eta 2-0 galdu zuten. Eskuz binaka, aldiz, Oier Elortz zaratamarrak eta Eñaut Lizeaga astigarragarrak Espainiari 2-0 irabazi zioten.

“Kantxa barruan eta kanpoan izan gara munduko txapeldunak”

Euskal Selekzioko pilotaria, Beñat Azketa

Partida ostean Euskadiko Euskal Pilota Federakuntzak sare sozialetara eskuz binakako lau taldekideen bideo bat igo zuen. Bertan, Azketak nabarmendu zuen txapelketan zehar “beti elkar animatu gara”, edonork jokatzen zuela ere: “Kantxa barruan eta kanpoan izan gara munduko txapeldunak”. Garmendiak, berriz, bizi duten esperientzia horren atzetik “ezkutuko lana” egiten dutenei eskerrak eman zizkien, eta bere taldekideei jokatutako finalarengatik zoriondu.

Gogoratu ordu aldaketarekin

Goierriko Hitza — 2026-10-24 09:41:39

Teknologiak aurrera egin duen eran, automatikoki aldatzen da ordularia gailu askotan, baina ziurrenik gehiengoari gertatuko zitzaion inoiz ordu aldaketarekin nahasmenen bat. Larunbatetik igandera, goizaldeko 03:00etan, urriko azken igandearekin bat eginez, neguko ordutegia jarriko da indarrean, eta 03:00etan 02:00ak izango dira. Horrenbestez, goizago argituko du egunak (07:34) baina ilundu ere garaizago ilunduko du (18:10).

Zaintza sarearen lanketarako bigarren saioa, astelehenean

Goierriko Hitza — 2026-10-23 15:17:19

Beasainen nola elkar zaindu nahi dugu? egitasmoko bigarren lan saioa astelehenean izango da, 17:00etatik 19:00etara, udaletxeko batzar aretoan. Udalerriaren mapaketa egingo dute parte hartzaileek.

Udalerriko baliabideak, eragileak, ekimenak, espazioak eta zerbitzuak identifikatuko dituzte, zuzenean zaintzarekin lotura dutenak zein etorkizunean zaintza sarea indartzen lagundu dezaketenak.

Eltziegoko irteerarako izen ematea zabalik, azaroaren 2ra arte

Goierriko Hitza — 2026-10-23 13:02:29

Idiazabalgo Udalak senidetuta dagoen Eltziego (Arabar Errioxa) herrira irteera antolatu du datorren azaroaren 7rako. Azken urteetan bezala, Idiazabal eguna antolatuko dute Eltziegon egun horretan. Irteeran parte hartu nahi duten herritarrek azaroaren 2ra bitartean daukate izena emateko aukera.

Azaroaren 7an, 8:30ean irtengo da autobusa Idiazabaldik. Eltziegora iritsi eta hamaiketakoa egingo dute bertan. 12:30ean herri kirol saioa izango da eta 14:30ean, herri bazkaria Eltziegoko plazan. 21:00etan irtengo da Idiazabalerako autobusa Eltziegotik.

Izena liburutegian eman daiteke azaroaren 2ra arte, 10:30etik 12:30era goizez eta 16:00etatik 19:00etara arratsaldez. Irteeraren prezioa 25 eurokoa da.

Udaletik ohartarazi dutenez, 18 urtetik beherakoek heldu baten ardurapean joan beharko dute. Kotxez joan nahi duten herritarrentzat ere, izena ematea eta bazkarirako txartelak erostea derrigorrezkoa izango da.

Nico Alustizak eta Xabier Isasak Euskaltel-Euskadin jarraituko dute 2027an

Goierriko Hitza — 2026-10-23 12:29:04

Nico Alustiza zumarragarrak eta Xabier Isasa urretxuarrak Euskaltel-Euskadin jarraituko dute datorren denboraldian. Bi txirrindulariek beste urtebeterako berritu dute kontratua, 2027ra arte, “kirol garapena baieztatu ondoren, baita egutegiaren bukaeran talde laranjarekin duten erantzukizuna ere”.

Urrian, Isasa hiru kontinentetan aritu da: Cholet Agglo Tour, Vendeeko Tourra eta Binche-Chimay-Binche klasikoetan parte hartu du, Europan; Hong Kong Cyclothon proban, Asian, eta Panaman eman zion itxiera denboraldiari, Amerikan. Alustizak, bere aldetik, Aljeriako probak Venetoko klasikoekin lotu zituen.

Isasarentzat (Urretxu, 2001) seigarren denboraldia izango da Euskaltel-Euskadin. Txirrindulari ona batez ere ordekan, aurten bere lehendabiziko garaipena eskuratu du Portugalgo Itzulian. Alustizak (Zumarraga, 2003), berriz, laugarren urtea izango du taldean. Bi txirrindulariak harrobian hazi ziren, Euskadi Fundazioaren 23 urtez azpiko taldean, hain zuzen ere.

Jorge Azanzak, Euskaltel-Euskadi taldeko kirol arduradunak, biekin oso gustura dagoela esan du. “Nicoren eta Isasaren jarraipena albiste bikaina da egiturarentzat. Etxeko bi txirrindulari dira, harrobikoak, taldearen balioak eta filosofia bikain irudikatzen dituztenak. Proiektuarekin duten ardura erabatekoa izan da denboraldi osoan, etengabeko hazkundea erakutsiz eta edozein motatako lasterketa eta eszenatokitan jarrera erakutsiz. Garenaren oinarria dira; urtez urte urratsak ematen jarraitzen duten etxeko txirrindulari gazteak”.

Euskaltel-Euskadi taldeak gaur iragarri du herriko bi txirrindularien kontratu luzatzea, albiste berean.

Rafa Jarit oroimenean izango dute Beasain K.E.-ren partidetan

Goierriko Hitza — 2026-10-23 12:11:53

Bihar, larunbata, Rafa Jarit oroimenean izango dute Beasain Kirol Elkartearen futbol partida bakoitzaren aurretik. “Omenaldi xume bat” egin nahi diola azaldu du klubak. Hirugarren Federazio mailako taldearen partidaren aurretik, hitz batzuk irakurriko dituzte, familiartekoei oroigarria emango diete, eta minutuko isilunea egingo dute klubeko gainerako jokalari guztiak zelaian direla.

Urte asko eman zituen Rafa Jaritek klubaren alde lanean, joan den urriaren 18an hil zen arte. Gainerako Beasain K.E.-ren partida guztietan ere minutuko isilunea egingo dute, eta klubeko talde guztiek krespoi beltzarekin jokatuko dituzte partidak Jariten oroimenez. Hirugarren Federazio mailako taldeak Real Union B-ren aurka jokatuko du Loinatz zelaian bihar, 16:30ean hasita.

2027ko egutegirako legorretarren lanak jaso nahi ditu udalak

Goierriko Hitza — 2026-10-23 11:56:07

Legorretako Udalak legorretarrek ateratako argazkiekin osatu nahi du datorren urteko egutegia, eta herritarren proposamenak jasotzeko deialdia zabaldu berri du: datorren azaroaren 12ra arte izango dute herritarrek argazkiak bidaltzeko aukera.

Parte-hartzeko beharrezkoa izango da zenbait baldintza betetzea: argazkia Legorretan ateratakoa izatea, herritar bakoitzak gehienez ere bost argazki aurkeztea, argazkiek hazbeteko 300 pixeleko erresoluzioa izatea, JPG formatuan aurkeztea, eta tamaina 297×210 milimetrokoa izatea. Horiek guztiak betetzen dituzten herritarrek, kultura@legorreta.eus helbidera bidali beharko dute euren proposamena.

Ekimenean parte hartzeko deia zabaldu nahi izan du Legorretako Udalak.

Antzerki tailer inklusiboak antolatu dituzte udalak eta Dar-Dar kooperatibak

Goierriko Hitza — 2026-10-23 11:43:51

Antzerki tailer inklusiboak antolatu dituzte herritar guztiei zuzenduta udalak eta Dar Dar gizarte ekimeneko kooperatibak. Urbieta eraikinean egingo dituzte ostiralero, 15:00etatik 17:00etara, hasiera batean urte amaierara arte, eta luzatu egingo lukete harrera ona izango balu.

Parte hartzea doakoa da eta izena emateko epeak urriaren 28ra arte irekita jarraitzen du. Izena emateko edo informazioa eskatzeko, 657 799 622 zenbakira deitu edo idatzi behar da. Udalak azaldu duenez, “herritarren arteko harremanak bultzatzeko eta nahi ez den bakardadeari zein buru osasuneko arazoei aurre egiteko helburua” du ekimenak.

Proiektuak antzerkia eta arte-sorkuntza erabiltzen ditu tresna nagusi gisa pertsonen arteko komunikazioa, sormena, auto-konfiantza, enpatia eta talde lana sendotzeko. Inklusioa “elkarrekin sortuz, adierazteko moduak errespetatuz eta talde dinamiketan parte hartuz gauzatzen den praktika” dela nabarmendu du udalak.

Ez da baldintzarik bete behar parte hartzeko, ez da adin tarte zehatzik ez esperientziarik behar. Laguntza pertsonala edo irisgarritasun baliabide zehatzak behar dituzten pertsonak antolatzaileekin jar daitezke harremanetan aukerak aztertzeko.

Maider Bartolome Gurrutxagak gidatuko ditu saioak. Arte Dramatikoko goi-mailako diplomatura du, eta urte askotako esperientzia dauka Dar-Dar Produkzioak taldean aktore, dinamizatzaile eta antzerki irakasle bezala.

Adinberriren eta Gipuzkoako Foru Aldundiaren laguntza du ekimenak.

Norvegiatik Zumarragara, sei golekin eta Beñat Turrientesen kamisetarekin

Goierriko Hitza — 2026-10-23 11:20:03

Realak Europa Ligako partida jokatu zuen atzo Norvegian, Lillestrom taldearen aurka. Betiko moduan, Urretxu eta Zumarragako Musti Taldeko hainbat kide bertan izan ziren. Gustura itzuliko dira etxera, primeran pasatzeaz gain, Realak 0 eta 6 irabazi baitzuen. Ane Urdangarin zumarragarra bereziki gustura itzuliko da, partidaren amaieran Beñat Turrientes beasaindarrak bere kamiseta oparitu baitzion.

Laida Begiristain Apaolatza, Lazkaoko EH Bilduren alkategaia

Goierriko Hitza — 2026-10-23 11:13:06

Laida Begiristain Apaolatza izango da Lazkaoko EH Bilduren alkategaia 2027ko maiatzaren 23ko udal hauteskundeetarako.

2023an Begiristainek politika instituzionalera pausoa eman zuen. Oriako hautesbarrutian, EH Bilduren zerrendaburu izan zen 2023ko foru hauteskundeetan. Batzarkide taldeko hizkuntza berdintasuneko bozeramailea da. Horretaz gain, ekonomia sustapeneko eta Proiektu Estrategikoetako batzordeko Lehendakaria ere bada.

Begiristain Giza Zientziak: Enpresa espezialitatean lizentziatu zen Deustuko Unibertsitatean, eta Bartzelonako EADAn Marketineko masterra egin zuen.

Bere lan esperientzian hainbat enpresatako esportazio eta merkataritza departamentuetan lan egin ondoren, Maizpide Euskaltegian hasi zen. Azken hamarkadan zuzendaritza taldean ardurak izan ditu, eta 2017tik bertako zuzendaria da.

EH Bilduren hautagaia
Lazkaoko EH Bilduk dio Begiristain «ezerk bereizten badu, gertutasunez lan egitea» dela hori: «Lazkaoko herritarren oraina zaintzea eta etorkizuna lazkaotar guztien artean eraikitzea izango du bide orri». Begiristain «herrigintzan» ere aritutakoa dela diote, batez ere «euskalgintzan eta feminismoan. Horregatik da Lazkaoko EH Bilduko mahai politikoak proposatutako hautagaia»

Maixabel Lasak Gipuzkoako Urrezko Domina jasoko du

Goierriko Hitza — 2026-10-23 11:06:22

ETAk indarkeria utzi zuela hamabost urte bete berri diren honetan, Maixabel Lasak (Legorreta, 1951) Gipuzkoako Urrezko Domina jasoko du, bortizkeriaren biktima izandako pertsona guztien “duintasunaren aitortzan eta elkarbizitzaren berreraikuntzan” egindako ekarpenagatik. Datorren abenduaren 16an jasoko du legorretarrak saria, Diputazioaren jauregian egingo den ekitaldian.

Lurraldeko sari instituzional gorena da, eta Eider Mendoza diputatu nagusiak eman du gaur aurtengo sarituaren berri. Lasaren “ausardia eta gizatasuna” azpimarratu ditu, bizipen pertsonal “oso mingarrietatik” abiatuta -ETAk Juan Mari Jauregi senarra hil zuen 2000ko uztailean-, “elkarri entzuteko, indarkeriak eragindako mina aitortzeko eta erreparaziorako” bide berriak ireki dituelako.

Lasaren ibilbidea

Eusko Jaurlaritzako Biktimen Arretarako Bulegoko zuzendaria izan zen Lasa 2001 eta 2012 urteen artean; hainbat egitasmo bultzatu izan ditu azken hamarkadetan, besteen artean, Gleencree ekimena, ETAko presoak birgizarteratzeko Langraiz bidea edota topaketa errestauratiboak, une oro “biktimen pluraltasuna eta duintasuna” gidari izanik, aldundiak jakinarazi duenez.

Mendozak gaineratu du bere ahotsaren eta bizitza ibilbidearen bitartez, urteetan “erreferentzia etiko eta zibiko oso indartsua” eskaini diola Gipuzkoako eta Euskal Herriko gizarteari, hain zuzen ere bakea eta elkarbizitza eraikitzea “lehen mailako desafioa” zen momentu batean.

‘Gure selekzioen etorkizuna’ hitzaldia Zaldibian

Goierriko Hitza — 2026-10-23 11:02:37

Goierriko EAJk Gure selekzioen etorkizuna hitzaldia antolatu du Zaldibiako udaletxeko beheko aretoan, urriaren 28an, 19:00etan. Gorka Iturriaga Eusko Jaurlaritzako Jarduera Fisikoaren eta Kirol zuzendaria izango da hizlaria . Hitzaldiak «gure selekzioen aurrekariak, egungo egoera eta etorkizuneko perspektibak» ezagutzea eskainiko duela aurreratu du Goierriko EAJk.

Buenos Airesen (Argentina) euskal selekzioa Munduko Pilota Txapelketaren XX. edizioa ari da jokatzen. Euskal selekzioak selekzio nazional bezala debutatu du hitzordu mundialista baten kategoria absolutuan. EAJk dio bere apustua “argia” dela: “Nazio bat, selekzio bat“. Gainera, Goierrin kirola “bizitza pertsonalaren eta sozialaren dimentsio garrantzitsua” dela nabarmendu du Goierriko EAJk.

‘Beasain 1987’ antzezlana, gaur, Usurbe Antzokian

Goierriko Hitza — 2026-10-23 11:00:39

Gorka Aginagaldek eta Txemi Parrak antzeztutako eta Gurutze Beitiak zuzendutako Beasain 1987. Un asunto de txapelas umorezko antzezlana izango da gaur Usurbe Antzokian, 20:30ean. Lau hamarkada egingo dute atzera, baina gaurkotasunetik begiratuta. Aitor Tilla Txetxu Txintxarreta eskola kide ohiaren enpresara joango da lan eske, eta hautaketa prozesu berezi bat pasatu beharko du. Herriz herri izena aldatzen diote antzezlanari, keinu eginez tokian tokiko ezaugarriei.

345 txirrindulari Ormaiztegiko 54. Nazioarteko Ziklo Krosean

Goierriko Hitza — 2026-10-23 10:52:46

Bi egunen faltan, dena prest dute Ormaiztegin 54. Nazioarteko Ziklo Krosari heltzeko. Ostegun arratsaldean egin zuten probaren aurkezpen ofiziala Ormaiztegiko kultur etxeko areto nagusian. Aurkezpenean parte hartu zuten Unai Galagarraga eta Gorka Izagirrek talde antolatzailearen ordezkari gisa; Aitor Atorrasagastik, Gipuzkoako Txirrindularitza Federazioaren izenean eta Jon Enrike, Ormaiztegiko alkateak.

54. edizio honetarako 345 txirrindularik eman dute parte hartzeko izena, maila ezberdinetan. Parte hartzaileen artean, Yorben Lauryssen edo Kenay de Moyer belgikarren izenak azpimarratu zituzten antolatzaileek. Emakumezkoetan Lea Stern suitzarra edo Adele Hurteloup frantziarra ere aipatu zituzten.

Ibilbideari dagokionean, iaz egindako aldaketak mantenduko dituzte eta txirrindulariek herri gunea zeharkatuko dute berriz. Hala ere, bizikletak aldatzeko gunen aldaketa batzuk aurreikusi dituzte eta horrek ibilbidean eragina izango du.

Bizikletaren festa

Aurtengo edizioan txapelketan bigarren maila batean geratuko da, Lur Zufiria eta Ion Izagirre herri txirrinndulariei eta Pello Bilbaori omenaldia izango baita igandeko une nagusi eta hunkigarrienetako bat.

San Jose egoitzako langileen murrizketek zerbitzuaren kalitatea okertu dutela salatu du ELAk

Goierriko Hitza — 2026-10-23 10:30:01

Ordiziako San Jose egoitzako langileak pasa den urtarrilaz geroztik greba mugagabean daude; lan baldintzak hobetuko dituen hitzarmenaren aldeko borrokan ari dira, baina egoerak ez du hobera egiten: kaleratzeak, murrizketak, lan-karga handiak… zerbitzuaren kalitatean emandako okertze nabarmenak salatu berri ditu ELA sindikatuak.

Jakina da Kabia foru organismo autonomoak egoitzaren kudeaketa Zaintzen enpresari esleitu ziola 2025ean; ordutik, enpresa kudeatzailea langileak murriztu nahian dabiltzala jakinarazi du sindikatuak hedabideetara bidalitako oharrean: “Pasa den urriaren 1ean enpresak uda aurretik egindako kaleratze eta murrizketez gain, berriro laguntzaileen lan orduak (ratioak) murriztu ditu eta honek langileen lan-kargak igo eta euren artean sortu duen estres eta antsietateaz gain, erabiltzaileei ematen zaien arreta kalitatea nabarmen okertzea ekarri du”.

Erabiltzaileak, gainera, zaurgarritasun egoeran daudela azpimarratu du; izan ere, eguneko ordu tarte batzuetan solairu batean egoiliarrak gainbegiratuko dituen laguntzailerik gabe gelditu dira. “Erorketak egon dira emandako murrizketengatik eta otorduak zein siesta orduak atzeratzea ekarri du. Mediku agindu batzuk ere ezin izan dira bete”, ohartarazi du ELAk.

Ratioak murrizteak ekarri dituen ondorioak ere gogorarazi ditu sindikatuak. Izan ere, maiatza aurretik, laguntzaileek 126 orduko arreta eskaintzen zieten egoitzan dauden 55 erabiltzaileei, baina urriaren 1ean inposatutako murrizketen ondorioz, 80 orduko bataz bestekoa eskaintzen ari dira urrian. Alegia, lehen baino sei laguntzaile gutxiago daude eguneko. Hala, lehengo ratio mailara bueltatzea eskatzeko, sindikatuak helegitea jarri du sozial epaitegian.

Egoera hori guztia salatzeko, gainera, sindikatuak salaketa jarri du Foru Aldundiaren gizarte politiketako ikuskaritzan, eta egoeran eskua hartu dezala eskatu dio Foru Aldundiari. Zentzu horretan, langileak egoitzetako ratioak leheneratu eta erabiltzaileen eskubideak errespetatzea eskatzeko kalera aterako dira datorren azaroaren 18an, arratsaldeko 18.00etan. Mobilizazioan parte hartzera deitu dituzte langile, senide zein bestelako eragile eta herritarrak.

Egun bakarreko Ordiziarrock, lehen aldiz

Goierriko Hitza — 2026-10-23 09:40:04

23 urte ez dira alferrik igarotzen; Ordiziarrock jaialdiak ibilbide luzea egin du Ordiziako kultur egutegian eta milaka musikazaleen elkargune izan da urte luzeetan zehar. Urko Ruiz de Apodaka ordiziarra da antolakuntza taldean buru-belarri aritu den herritarretako bat, eta azaldu du urte askoan poztasun ugari ekarri dituen ekimena izanagatik ere, antolakuntza lanek ere badutela beren kostua: «Ordiziarrock bezalako jaialdi bat antolatzeak izugarrizko lana dakar. Urte osoko konpromiso, inplikazio eta diseinua eskatzen du, eta urteko lan osoari jaialdi handia gehitzeak buruhaustea eta nekea suposatzen ditu». Bada, 23. aldi honek agerian utzi du antolakuntza taldeko kideen urteetako zama pilatua.

Ruiz de Apodakak jakinarazi du orain hilabete eskas erabaki zutela aurtengo edizioa aurrera ateratzea: «Hainbat arrazoi tarteko, irailean aurten jaialdirik ez antolatzea zen asmoa». Irailaren 14an egindako bileran, ordea, formatuari buelta pare bat emateko proposamena atera zenez, jaialdiari eustea eta ekimena antolatzea erabaki zuten antolatzaileek.

Kale eta plaza bereziak

Aurtengo Ordiziarrock, beraz, ez da aurrekoen errepikapena izango. Ez du ohiko egiturarik izango, ez eta aurreko urteetako antolaketarik ere. Urteetako lanaren nekeak eraginda, taldeak beste bide bat hartu du eta formatua aldatzea izan da jaialdiari jarraipena emateko aukera bakarra. «Buruak lehertuta ditugu. Orain, lehertu daitezela kaleak!» da aurtengo lelo nagusia, eta hitz-joko horrek badu, nolabait, edizio honen atzean dagoen errealitatearen arrastoa ere.

«Ordiziarrock bezalako jaialdi bat antolatzeak urte osoko konpromisoa, inplikazioa eta diseinua eskatzen du»

«Hainbat arrazoi tarteko, irailean aurten jaialdirik ez antolatzea zen asmoa»

Urko Ruiz de Apodaka. Ordiziarrock

Orain arte bizpahiru eguneko egitaraua izaten zen arren, egun bakarrera lekualdatu dute aurtengoan: larunbatean izango da, eta jaialdia bere ohiko eszenatokietatik kalera lekualdatuko dute. Pilotalekua izan da gaur arte ekimenaren erdigune, baina oraingoan, alde zaharreko kaleek eta plaza nagusiak hartuko dute lekukoa. Ekitaldiak leku bakarrean kontzentratu ordez, herrian barrena sakabanatuko dira, eta espazio bakoitzak bere tartea eta bere soinua izango ditu. Hain justu, Ruiz de Apodakak jakinarazi du horixe dela aurtengo edizioaren helburua: Ordiziarrock gune konkretu bat izatetik, herri guztira igaro eta kaleak ere Ordiziarrock areto bihurtzea.

Hala izanagatik ere, leku berean amaituko dute taldeek euren ikuskizuna: Ordiziako Plaza Nagusian. Antolatzaileek aurreratu dutenez, areto «berezi, goxo eta polita» muntatuko dute herriaren epizentro eta elkargune nagusi den plazaren erdian. Jana eta edana ere izango dira bertaratzen diren herritar eta parte-hartzaileentzat. Taldeen ikuskizunak amaitzeko «modu ezin hobea» izango dela ziurtatu dute.

Egun osoko doinuak

Eguerdian hasi eta gauera arte luzatuko den egun bakarrean bilduko dute, beraz, aurtengo proposamena. Euskorleans lehenengo proposamenak dagoeneko erakutsiko du aurtengo formatuaren norabidea. Euskal kantu eta dantza tradizionalak New Orleans estiloko brass band musikarekin uztartzen dituen kale ikuskizun ibiltaria da.

Musikaz harago, dantza ere kalera aterako dute larunbatean. Arratsaldean, 19:00etan hasita, Street Dantz dantza-ikuskizunak hartuko du Plaza Nagusia, eta bizikleta gainean mugitzen den La Dinamo funk musika talde kataluniarraren txanda izango da ondoren.

Gauean, berriz, 22:00etan, Zo-Zongo taldearen Psycho Clown kale-ikuskizuna izango da alde zaharrean, perkusioa, piroteknia eta antzerkia uztartzen dituena. Sakatu elektrotxarangak hartuko du jarraian lekukoa, eta musikaz beteko ditu kaleak. Dj Necoraren saioak emango dio amaiera ekimenari.

Aurrera begirako lanetan

Zama pilatu horren guztiaren erdian eta Ordiziarrock jaialdiaren bezperan, lasaitasun puntu bat ere transmititu nahi izan du Ruiz de Apodakak. Jakinarazi du dagoeneko aurrera begirako lanetan pentsatzen jarriak direla antolakuntzako kideak, eta aurreikusi dezaketenaren arabera, Delikantuz eta Ordiziarrock ekimenekin aurrera jarraituko dute.