Goierriko Hitza

Errigora sustraiak ahaztu gabe espaziora begira

Goierriko Hitza — 2026-10-24 17:40:58

Errigorak herri ekimenak hasierako boluntarioei omenaldia egin diete Lazkaon. Eguna hasteko Errigora sustraietatik espaziora dokumentala estreinatu dute Areria zineman. Jende asko hurbildu Euskal Herriko hainbat txokotatik, hori horrela zinema jendez bete da.

Dokumentalaren estreinaldiaren ondoren, Lazkaoko frontoira inguratu dira denak, hamaiketako egin ostean, omenaldi ekitaldia egiteko. Erramun Amundarain, hasierako boluntario izan zena eta lehengo urtean zendu zena, gogoratu dute bere argazki bat ipiniz oholtza gainean. Egunean zehar Kuxkuxtu txaranga urruñarra ere badabil giroa alaitzen. Behin omenaldia amaituta bazkaria egon da frontoiean bertan.

Omenaldiko argazkiak eta bideoa.

Gabiria eta Ormaiztegi artean bypass-a jarriko dute

Goierriko Hitza — 2026-10-23 09:30:14

AP-636 errepidean asfaltatze lanak egingo dituzte, Gabiria eta Ormaiztegi artean, Beasaingo noranzkoan. Horren ondorioz bypass-a jarriko dute, gaur 19:00etatik, larunbatetik iganderako 01:00ak arte.

Bypass-a ostiral arratsaldean jarriko badute ere presatzeko lanak ostiral goizetik hasiko dira. Hori horrela, erdibideko pasoa irekitzeko ezkerreko erreia itxiko dute, 9:00etatik aurrera, Gabirian Beasaingo noranzkoan, 7,500 eta 7,250 pk artean. Beste muturreko erdibideko pasoa, Ormaiztegin 4,500 eta 4,250 pk artean, 11:00etatik aurrera itxiko dute.

Igandean azken lanak
Asfaltatze lanak amaituta erdibideko pasoa itxiko dute igandean. Hala ere, azken lanak egitko bi norabideetako ezkerreko erreia itxita mantenduko da, igandetik astelehenerako 02:00ak arte.

Bidegik jakinarazi du ordutegi horiek “gutxi gorabeherakoak” direla. Izan ere, “eguraldia bezalako faktoreek” aldaketak eragin ditzaketela diote. Horregatik, gomendatzen du “zuhurtziaz gidatzeko” eta seinaleen zein langileen “instrukzioak jarraitzeko”.

Ongizate bulego berria martxan, udalen akordioari esker

Goierriko Hitza — 2026-10-16 07:30:37

Ezkio-Itsaso, Ormaiztegi eta Gabiriako udalek egindako hitzarmen bati esker, Ongizate bulego zerbitzu berria dute urriaren 1z geroztik, hiru udalerri hauetako bizilagunek. Bihotza Esnaola gizarte langilea eta Naroa Maguregi administraria dira zerbitzuaren arduradunak. Gizarte gaien esparruan hiru udalerrietako bizilagunei erantzun integralagoa eta osatuago emateko helburuarekin jarri dute martxan zerbitzu berria.

Hilabeteetako elkarrizketaren emaitza da Ongizate bulegoa, «garrantzitsua izan da zerbitzu honetan sinisten duten politikariekin bat egitea akordioa errealitate bihurtzeko. Bere denbora eman du hau dena antolatzeak, baina azkenean lortu dugu, sinisten genuelako horrela izan behar zuela eta zerbitzu berriak izaera hori izan behar zuela», esan du Esnaolak.

Esnaola gizarte langile lanetan aritu da orain arte Ezkio-Itsasoko udaletxean, %33ko lanaldian. Ormaiztegik eta Gabiriak orain arte partekatzen zuten gizarte langileak erretiroa hartu berri du eta testuinguru horretan sortu da hiru udalerrien artean zerbitzu hau martxan jartzeko aukera.

Kalitatean irabazi

Zerbitzuaren erabiltzaileek kalitatean irabaziko dutela uste du Esnaolak, «zuzeneko arretari denbora gehiago eskaini ahal izango zaio, administrazio lanetarako figura berri bat sortu delako». Izan ere, azken urteetan lan administratiboak biderkatu egin dira eta horrek, aurrez aurreko arreta egiteko denbora kendu dio, orain arte, gizarte langileari. Zerbitzuaren ordutegia ere zabalagoa izango da eta emango duten arreta «integralagoa».

Herri txikietako gizarte zerbitzuetako erabiltzaileen beharrak, herri handiagoetakoen berdinak dira, baina erantzuna ematerako orduan, badira ezberdintasunak. «Landa eremuan daukagun arazo handietako bat dispertsioarena da, jendearengana iristeko zailtasunak. Azpiegitura falta ere beste arazoetako bat da, sarri, behar den kasuetan beste herri batzuetara mugitu behar izaten dutelako. Profesional bezala, baloratzen ditugun beharrei erantzun egoki bat emateko zailtasunak ere izaten ditugu askotan, gure lanaldia oso murriztua delako», zerrendatu du.

Kontrara, erabiltzaileekin harremana gertuagokoa da herri txikietan, «guztiak ezagutzen dugu elkar eta beharrezko informazioa beti iristen zaigu bide batetik edo bestetik», gehitu du.

Zerbitzu partekatua

Zerbitzu partekatua denez, ez dira egunero egongo herri guztietan, baina dagokionean, ordu gehiagoz izango dira bertan. Ongizate bulegoarekin haremanetan jartzeko edo hitzorduak eskatzeko telefono bakarra izango da aurrerantzean: 603 730 114. Astegunetan, 8:00etatik 14:00etara deitu ahal izango da bertara.

XIX. eta XX. mendeko musikari gabiriarra

Goierriko Hitza — 2026-10-15 11:33:06

Valentin Larrea Iturbe (Gabiria, 1876 – Iruñea, 1970) piano jotzaile, konpositore eta musikari gabiriarraren jaiotzaren 150. urteurrena bete da aurten. Omenaldi gisa, Ahanzturatik itzulia dokumentala eta liburua osatu dituzte. Ikus-entzunezkoa Aitor Arruti zinegile andoaindarrak zuzendu du, eta liburua Aimar Maiz kazetari gabiriarrak idatzi du. Hilaren 2an, Donostian aurkeztu zituzten bi proiektuak, baina, orain musikariaren sorterrian egingo dute aurkezpena ostiralean, Gabiriako kultur etxean, 18:30ean.

Proiektua Larrea musikariaren biloben «kezka» batetik sortu zela dio Maizek «Berazadi-Larrea familiak bazekien beraien aitona musikaria, pianojolea eta konpositorea izan zela, baina sekula ez ziren musika hori entzuten jarri». Beraz, «pianojolearen bilobak duela 7 urte hasi ziren musikariaren lana eta bizitza berreskuratu nahian».

Jakinmin hori abiapuntutzat hartuta hasi ziren proiektu horiei forma ematen. Familian biloba asko dira, baina bereziki bik bultzatu dutela proiektua dio kazetariak, «Elena eta Maria Teresa Berazadi Larrea ahizpek».

Liburua gehiago Valentin Larrearen biografian oinarritzen da. Dokumentala, aldiz, gehiago «Berazadi-Larrea bilobek beraien arbasoaren bizitza eta musika berreskuratzeko egin duten prozesuan», azpimarratu du kazetariak. Gehitu du liburua idazteko familiak gordeta zuen dokumentazioa «ezinbesteko» informazio iturria izan dela: «Gordeta zituzten musikariaren oroigarri, diploma eta sariak».

Gabiriarra bere garaian musikari ospetsua izan zen, baina gaur egun «adintsuenek kenduta» ahaztuta dagoela aitortu du Maizek. Hor, liburua idazteko izan duen arrazoietako bat. Hala eta guztiz ere, idazten hasi aurretik hutsune handia zegoela dio: «Duela mende eta erdi jaio zen, eta hemeroteketan informazioa agertzen bazen ere, bilaketa lan sakona eskatu du».

Informazio iturriak

Informazio bilketa lanean hasi eta leku batean bakarrik aurkitu zuela musikariaren inguruko informazioa azaldu du Maizek: «Auñamendi entziklopedian zetorren Valentin Larreari buruzko sarreratxo bat eta gutxi gehiago». Horregatik, hemeroteka askotan begiratu duela dio: «Madrilen ikasi eta Iruñean bizi zelako leku horietako, garai horretako, prentsan bilatzen nuen».

Idazleak aipatzen dituen beste iturri batzuk dira, gaur egungo musika ikasleen gradu edo master amaierako lanak. Bi nabarmendu ditu: «Bata, Ignacio Arakistain organista azpeitiarra, Musikene saria irabazi zuen Valentin Larrearen lanarengatik. Bestea Iñaki Gezala irungo pianista. Horrek ere gradu amaierako lanean, Valentziako unibertsitatean, Valentin Larrearen musika eta bere estiloa landu zuen».

«Gozoki gustagarria»

Valentin Larrearen bi bilobek ezagutzen zuten lehendik Maiz, «herrian musikariaren inguruko kontzertu batzuk antolatzen lagundu nielako». Horretaz gain, Gabiriako Memoria Historikoko lan bat egin zuen kazetariak. «36ko gerraren inguruko liburu bat». Liburua ikusita zeukaten, eta hori kontutan hartuta beraien arbasoaren inguruko liburua idazteko pertsona egokia zela iruditu zitzaien.

3 urte inguru igaro ditu Maizek liburua idazten amaitzeko. Gehitu duenez, bi helbururekin abiatu zen: «Batetik, Valentin Larrearen bizitza eta biografia lantzea; nor izan zen, zer egin zuen, non ikasi zuen edo musika jotzen non ibili zen…». Bestetik, musikariaren lana «ezagutaraztea».

Kazetari ofizioan horrelako lanak «gozoki gustagarriak» direla aitortu du Maizek. Gaineratuz barruko sen batek esaten ziola: «Hemen pertsonaia interesgarri bat dago aztertzeko». Asebeteta dago emaitzarekin.

Gabiriako Balentzategiko komunitateak Eskolaren Eguna estreinatu du

Goierriko Hitza — 2026-10-03 13:16:43

Gabiriako Balentzategi herri eskola lehenengo aldiz Eskolaren Eguna du, gaur. Goizean hasi eta iluntzera arte, egun osoko egitaraua antolatu dute. Garai batean guraso, irakasle eta ikasleekin elkarrekin egiten zuten kurtso bukaerako irteera gogoan, formatua aldatu eta herrian bertan ari dira ospatzen hezkuntza-komunitatearen festa-eguna. Haurrek eurek goizeko irekiera ekitaldian irakurri duten testuan zioten bezala, “eskolako festa bakarrik ez, guztion festa” izatea du helburu.

Eskola aurreko terrazan egunari hasiera eman ondoren, makila igo dute eta Agurra dantzatu dute. Jarraian, plazan, haurrak buruarinak egiteko eskulanetan hasi dira, gurasoek lagunduta. Helduek, berriz, taldeka antolatu eta ginkana proban gozatu dute. Hiruzpalau laguneko taldeetan, zortzi proba ezberdin gainditu behar izan dituzte, abildadekoak nahiz eskolari buruzko galderenak, tartean. Argazki erakusketa ere atondu dute, udaletxeko arkupean. 200 bat irudi bildu dituzte, 1930eko hamarkadatik hasi eta Eskolan ibili diren ikasle-talde ugarirenak eta egindako ekimen nahiz irteerenak.

Eguerdian herri bazkaria izango da, eliz atarsan. 91 lagun elkartuko dira. Argazkien bideo-muntaia ikusiko dute gero, bukaeran “sorpresaren bat” dela. Haurrek herri kirolak izango dituzte arratsaldean, eta musikarekin amaituko da eguna. Lepoko zapi gorriak ere atera dituzte.

Ikasle kopurua egonkor

Balentzategi eskolak 25 ikaslerekin ekin dio 2026-2027 ikasturteari. Iaz baino hiru ikasle gutxiago dira; ekainean hiru irten ziren DBH egitera kanpora, eta berririk ez da sartu. Hala eta guztiz, herri eskolaren kopuru naturaletan dabiltzala ziurtatu du Iñaki Intsausti zuzendariak. “Gure zenbakiak 25-30 ikasle bitartean ibiltzea da. Gehiago izatea ezohikoa da, eta gutxiago ere bai. Egia da iaztik zerbait jaitsi dela, baina datorren ikasturterako, adibidez, sei haur txiki badaude Eeskolan hasiko direnak”.

Eskolaren Eguna urrian ospatzea “kuriosoa” dela gehitu du zuzendariak, urte sasoi honetan ez delako ikastetxeetan halakorik egin ohi. “Baina maiatzean ekitaldi piloa egoten da herrian, eta orain antolatu dugu”, gaineratu du.

Ziklo-kroseko lau proba Goierrin

Goierriko Hitza — 2026-10-02 13:44:19

Urriaren 25ean hasiko da aurtengo ziklo kros denboraldia, Ormaiztegin. Abenduan beste hiru proba gehiago izango dira Goierrin. Abenduaren 12an, Gabirian berreskuratuko dute ziklo kroseko proba. Hurrengo egunean, abenduaren 13an, Seguran antolatuko dute eta abenduaren 19an, Ataunen.

Kattalin eta Nenufarrak taldeak disko berria aurkeztuko du Gabirian

Goierriko Hitza — 2026-10-01 09:42:52

Kattalin eta Nenufarrak musika taldeak bere bigarren diskoa aurkeztuko du Gabiriako plazan, bihar, 19:30ean. Zeruak eta Sabaiak lan berria bederatzi abestik osatzen dutela aurreratu du Sara Iriarte taldeko abeslariak.

Gabiria herri «berezia» dela taldearentzat aitortu du Iriartek: «Gabiriako udaletxean ensaiatzen dugu eta herri guztiak entzuten gaitu, gainera, batzuetan ez dira saiorik onenak izaten». Horregatik, herriarekin «zorretan» dauela diote. Gainera, taldeko hiru gabiriarrak dira: Iñaki Rezusta gitarra jotzailea eta Jon eta Julen Sagarna anaiak, taldeko bateria eta baxua. Horietaz gain, Leire Agirre taldeko teklatuak nahiz ahotsak, eta Iriarte berak osatzen dute taldea.

Azken denboran Zaldiak beraien abestia irrati askotan entzuten da. Horrek, taldea «ezagunago» egin duela dio abeslariak. Arraroa ematen badu ere abeslariak dio, «hasieran abestia diskotik kanpo utzi genuen ia-ia eta begira orain».

Ezagunak egiteak hala ere ematen die «beldur apur» bat, «zer ekarri dezakeen ez dakigulako». Gainera, abestien ospea kontzertuetan «neurtuko» omen dute: «Hor garbi ikusten baita jendeak benetan kantuak badakizkien ala ez». Kattalin eta Nenufarrak-en Zeruak eta Sabaiak diskoa formatu fisikoan atera dute, eta kamixetekin batera egongo da salgai kontzertuetan.

Hurrengo kontzertuak

Momentu honetan Kattalin eta Nenufarrak taldea Katapulta Tour-ekin –Gipuzkoako Foru Aldundiaren programa– elkarlanean ari da.

Programa horren bidez lau kontzertu eskaini dituzte, eta datorren hilaren 10ean, Tabakaleran (Donostian) ziklo horretako azkena joko dute. Hurrengo egunean, berriro, Tabakaleran egongo dira, Gaztea irratiak antolatzen duen Musikaren Egunean.

Kontzertu gehiago lotzen ari direla zehaztu du taldeko abeslariak: «Kontzertu gehiago lotzen saiatzen ari gara, baina oraindik ez daude erabat lotuak».

Lehen diskotik hona

Kattalin eta Nenufarrak taldeak Zoruak eta Sabaiak diskoaren aurretik beste bat badauka Hubble izena duena. Taldekoen iritziz bigarren diskoa «serioagoa» da lehenengoa baino: «Lehenengoak bost abesti bakarrik zituen, bigarrenak bederatzi».

2019an Iriartek eta Sagarna bateriak unibertsitatean ezagutu zuten elkar. Gero, Rezusta Sagarnaren kuadrillakoa batu zen. Lehen diskoa «hirurek» grabatu zutela adierazi du Iriartek: «Gerora sartu dira Leire eta Julen».

Ziklo-kroseko teknifikazioa saioa Gabirian

Goierriko Hitza — 2026-09-24 08:48:47

Gipuzkoako Txirrindulari Federazioak ziklo-kross ikastaroa antolatu du Gabirian, 12-18 urte bitartekoentzat, larunbatean, 10:00etan. Nahiz eta kanpotik etorriko diren gazteak, herriko ume zein gazteak gonbidatuta daude ikastarora. Ez da derrigorrezkoa ziklo-kroseko bizikleta eramatea, mendikoak ere balio du. Izan ere, ekintza horren helburua ziklo-krosean ibiltzen ikasteaz gain, kirola herrian sustatzea da.

Baztarrikarentzat Landaola eta Caixabanken saria

Goierriko Hitza — 2026-09-22 16:58:36

landaolak eta Caixabankek Gabiriako Baztarrika gaztandegia saritu dute, Berrobiko Freshentzia, Errezilgo Ibarbia Errezil Sagar Kooperatiba eta Ikaztegietako Balerdipeko Erleak proiektuekin batera. Zaldibian, Goizane zentroan egin da sari banaketa ekitaldia.

Tierra de Oportunidades programaren barruan jaso dute aitortza Gipuzkoako landa eremuko lau ekintzailetza proiektuk. Sarituetako bakoitzak 1.000 euroko saria jaso dute, euren proiektua ezagutarazteko eta zabaltzeko laguntzarekin batera. Bestalde, Rural Talentekin elkarlanean garatzen den El Reto prestakuntza lehiaketan parte hartzeko aukere izango dute.

Baztarrika

Gabiriako Baztarrika gaztandegiaren kasuan, ardikiarekin hanburgesak egiten hasi dira. Duela bi urte hasi ziren etxean ardiaren haragiari irtenbidea bilatzeko hausnarketa egiten. «Ardi haragia galtzen ari zen, jendeari ahazten ari zitzaion, eta Artzain Egunean egiten zen haragi gisatu lehiaketan bakarrik jaten zuen…».

Landaolak eta Caixabankek saritu dituen Gipuzkoako lau ekintzaileak.Manex Usarralde.

Ander Otegi zegamarrak Salamancako Itzuliko azken etapa irabazi du

Goierriko Hitza — 2026-09-21 11:09:18

Ander Otegi zegamarra (BBK-Euskadi) nagusitu da Salamancako Itzuliko hirugarren eta azken etapan. Otegi azkarrena izan da esprintean, amaiera estuan eta azken 400 metroak gorantz ziren etapa lehiatuan –127 kilometro Salamancan hasi eta buka–. Bide batez, amaiera bikaina eman dio itzuliari eta denboraldiari, taldearen 2026ko azken proba baitzen. Otegiren urteko laugarren garaipena da: Irungo Klasikoa, 23 urtez azpiko Euskadiko eta Gipuzkoako erlojupeko txapelketak eta Salamancakoa.

Asier Cardona, Iker Colmenero, Aimar Fernandez de Gorostiza, Aimar Marin eta Kepa Ormazabal gabiriarra izan ditu taldekide denboraldi honetako azken proban, Mikel Gaztañaga itsasondoarra zuzendari zutela. Aurtengo udan “stagiaire” modura ere lehiatu da Euskaltel-Euskadirekin ZLM Tourrean, Herbereetan.

Valentin Larrearen jaiotzaren 150. urteurrena ospatuko dute Gabirian

Goierriko Hitza — 2026-09-16 10:58:25

Valentin Larrea Iturbe musikari gabiriarraren (1876-1970) jaiotzaren 150. urteurrena ospatuko dute elizan, igandean, 12:00etan. Urteurren emanaldian musikariaren konposaketak joko dituzte, eta musikari hauek arituko dira Larrearen lanak interpretatzen: Ignacio Arakistain organo-jotzailea, Aitor Garitano tenorra eta Eragiyok abesbatza.

Organoarekin, Andante en domayor, Preludio, Adagio y fuga, Elevación y Plegaria andante religioso lanak joko dituzte. Organoan eta tenorrean, Motete al santisimo, Panis Angelicus, Ave Maria eta Ikazkina Mendian. Abesbatzak organoarekin Villancico al niño Jesus eta Nere Etorrera, eta abesbatzak bakarrik Eresiak eta Euskal Festak.

Arakistain musikari azpeitiarrak Valentin Larrea Iturbe (1879-1970) musikariaren lan eta bizitzaren berreskurapen bidean gradu amaierako ikerketa lana egin zuen, Musikene Euskal Herriko Musikako Goi Mailako Ikastegian, organo ikasketak amaitzeko. Garitanok ere Musikenen Kantu Interpretazioan gradua eta masterra ikasi zituen, eta operako hainbat ekoizpenetan aritu da. Eragiyok, berriz, 2018an sortutako ahots grabeen abesbatza da, Euskal Herrian zein hortik kanpo sari ezberdinak irabazi dituena.

Musikariaren bizitza
Larrea gabiriarra piano-jotzailea izan zen. Bere aita Meliton Larrea organo-jotzailea zenez semeari txikitatik erakusten hasi zitzaion organoa eta solfeoa. Musikarako abilezia txikitatik erakutsi zuen eta gurasoek Madrilgo Musika eta Deklamazioko Eskola Nazionalera bidali zuten musika ikasketak egitera.

Ikasketak amaitu ostean Iruñeko Eslava Kasinoko piano-jotzaile postua lortu zuen. Iruñeko bizitza kulturalean oihartzun handia izan zuen. Hiriburuko Orfeoiaren sortzaileetako bat izan zen, eta bertako lehen tenorra izateaz gain orfeoiarentzako musika ere konposatu zuen. Felipe Aramendiak sortutako Aramendia boskotearen partaide izan zen 18 urtez.

Gabirian bizi ez bazen ere Larreak gabiriartzat zeukan bere burua. Hain zuzen ere, Gabiriari eskaini zion Goiko mendyan. Nire herri politari pianorako lana, eta 1912an La perla en el Oceano martxa konposatu zuen herriko eskola berrien inaugurazio ekitaldirako.

1948an erretiroa hartu zuen Iruñeko Eslavan 50 urtez lana egin ondoren. 1970ean zendu zen 93 urte zituela, bizitza oso bat musikari eskaini ondoren.

Gabiriako festetako gertakari jakin batzuk salatu ditu udalak

Goierriko Hitza — 2026-09-01 14:03:07

Gabiriako udalak zein herriko beste hainbat eragilek jaietako gertakari jakin batzuk salatu dituzte. Sare sozialetan gaur argitaratu du komunikatua udaleko kontuak.

Gabiriako festak aurten ere “bikainak eta jendetsuak” izan direla baloratu du udalak. Gaineratu dute herritarren partehartze “ikaragarria” izan dela. Hala ere, festen “lehen egunetik azkenekora” izan diren gertakari hauek salatu nahi ditu udalak: “Seinaleetan pintadak egitea, herriko umeei petardoak botatzea, komun publikoak apurtzea, txosnako langileak oztopatzea, edariz eta bonbonaz betetako txosnako biltegiari petardoak jaurtitzea, abuztuaren 14ko kontzertuak behin baino gehiagotan etenaraztea eta azkenik lehenago bukaraztea soinu teknikariei kontrol mahaira petardoak eta musikariei edalontziak zein izotzak jaurtitzeagatik, abuztuaren 16an txosnara eta jendartera basoak bota zituzten eta soinu tekniariei zigarroak bota zizkieten kontrol mahaira eta txosnatik batzuek edariak ordaindu gabe alde egitea”.

Udalak dio ez dela gertakari “isolatu” bat eta ekintza horien atzean lagun talde berdina dagoenez uste dute “larriak eta salatu beharrekoak” direla. Lagun talde horretan 18-25 urte bitarteko gazteak daudela adierazi dute. Festen antolatzaileak diote behin baino gehiagotan hartu dietela kargu baina berdin jarraitzen dutela.

Errepikatzen den kontua

Gabiriako udalak horrelako ekintzak egiten dituzten lehen urtea ez dela azaldu du: “Azken urteetan antzeko egoera puntualak sortu dituzte, baina aurten muga guztiak gainditu dituzte”. Antolatzaileak ez daude prest hainbeste “mimoz” antolatzen dituzten festak haien erruz “izorratzeko”. Gaineratu dute ez dutela ulertzen nola diren gai “ondoko herrira” joan eta festak horrela “boikoteatzeko”.

Festa herrikoien aurkako erasorik ez dutela onartuko aldarrikatu dute, eta aurreantzean ere jai herrikoeien alde lanean jarraituko dutela: “Errespetuzko jaiak nahi ditugu eta jakin horrelako portaerak ez direla ongietorriak gurean”.

Kepa Ormazabal eta Gari Ugarte Poitou-Charentesesko Tourrean ariko dira

Goierriko Hitza — 2026-08-25 10:40:46

Goierriko bi txirrindulari izango dira Euskaltel-Euskadirekin Poitou-Charentesesko Tourrean: Gari Ugarte legazpiarra eta Kepa Ormazabal gabiriarra. Talde laranjak gaur ekingo dio lau eguneko erronkari, abuztuaren 25etik 28ra bitartean.

Ormazabalek, gainera, BBK-Euskaditik iritsita, debuta egingo du talde laranjarekin, stagiaire gisa.

Guztira, lau etapa izango ditu lasterketak. Lehen bi jardunaldiak luzeak izango dira, eta hirugarren egunean 27 kilometroko banakako erlojupekoa jokatuko dute txirrindulariek. Azken etapa, berriz, Poitiersen amaituko da.

Aztiriko mendi lasterketarako izen-ematea zabalik dago

Goierriko Hitza — 2026-06-11 14:05:45

Uztailaren 19an egingo da aurten Aztiriako mendi lasterketaren 20. edizioa, 12 kilometroko luzera eta +745 metroko desnibeleko ibilbidearekin. Aurten ere, Haizaleku eta Otaño mendi tontorrak igaroko ditu.

Izen-ematea zabalik dago www.kronoak.com webgunea, eta uztailaren 16an itxiko da.

Aurten Goierri Kopan sartu da lasterketa hau sprint modalitatean, eta Gipuzkoako Minbiziaren Aurkako Elkartearentzat dohaintza egingo dute eta Etiketa Berdearen komunitatean sartu da. Gainera, 20. urteurrenaren aitzakian, sari bereziak banatuko dituzte.

Arau subsidiarioen aldaketa landuko dute Gabirian

Goierriko Hitza — 2026-06-09 10:33:39

Gabiriako Udalaren Obra eta Hirigintza Batzordearen bilera irekia bihar egingo dute, 18:30ean, udaletxean. Arau subsidiarioen bi aldaketa landuko dituzte. Batetik, Aztiriko eremu bat landa izaerako lurzoru izatetik hiritarrera pasatzea; bestetik, herri osoko baserrietan etxebizitzak zatitu ahal izateko gehieneko muga bitik laura igotzea.

Felix Zubia helduaroko hauskortasunaz ariko da Gabirian

Goierriko Hitza — 2026-05-27 13:31:31

Gaur, 17:00etan, Hauskortasuna helduaroan hitzaldia egingo du Gabiriako udaletxeko areto nagusian Felix Zubia medikuak.

Udaberriko Kulturaldiaren azken urreko ekintza izango da. Azkena ostiralean da. Mikel Elustondok parrila ikastaroa emango du.

Gabiriako udaleku irekietako izen-emate epea zabalik

Goierriko Hitza — 2026-05-27 09:23:22

Udaleku irekietarako izen-ematea ekainaren 5a baino lehen egin behar da, udaletxera deituta edo helbide elektronikora idatzita. Udalekuetako bi ordutegi daude eta prezioa ezberdina da bakoitzean: 09:00etatik 13:30erakoan 65 euro; eta 10:00etatik 13:30etarakoan 55 euro. 2014 eta 2022 artean jaiotakoentzat izango dira ekainaren 22tik uztailaren 17ra.

Euskaraz eroso aritzeko saioak eta Ameli kontalaria Gabirian

Goierriko Hitza — 2026-05-07 13:28:30

Euskaraz eroso aritzeko hartu-eman tailerra antolatu dute Gabiriako udaletxeko pleno aretoan, maiatzaren 13 eta 20an, 17:00etatik 19:00etara. Herritar guztiei zuzendutako egitasmoa da. Haurrak dituztenentzat doako zaintza zerbitzua jarri dute. Bestalde, Ameli ipuin kontalaria egongo da kultur etxean, bihar, 18:00etan.

Gabiriako bertsozaletasunaz ariko dira 'Hitzetik Hortzera' saioan

Goierriko Hitza — 2026-04-17 09:48:39

Herri bertsozalea da Gabiria. Gai horri helduta, herritar talde batek afizio horrek izan duen transmisioa ikertzeari ekin zion. Ikerketa horren emaitza da Gabiriako bertsolaritza eta bertsolaritza Gabirian liburua. Talde horretan aritu zen Eresti Oiarbide Murua, eta aste honetako Hitzetik Hortzera saioan aztertutako horien nondik norakoak ekarriko ditu pantailara.

2021ean Kilometroak Kultur Elkarteak eta Mintzola Ahozko Lantegiak esleitutako ikerketa beka eskuratu zuen Oiarbideren eta Maialen Akizu Bidegainen ikerketa proposamenak, eta horrela, ikertzeari bide eman zioten. Programan azalduko den moduan, Gabirian bertsozaletasuna noiz jaio zen ez dute topatu, baina hainbat gako bildu dituzte liburuan. Gako horiei buruz, Gabiriako bertsoaren ekosistemari buruz eta erreferenteei buruz ere arituko da Oiarbide.

Eta nola ez, Gabiriako bertsozaletasunari buruz hitz egiteaz derrigorrean aipatu beharrekoa da Osinalde Saria: 1973an sortu zen, eta ordutik Gabiriari eta bertsolaritzari egiten dion ekarpenari buruz hitz egingo du Oiarbidek saioan. Joan den larunbatean jokatu zen 54. Osinalde saria, eta hango bertsoaldi onenak entzun ahal izango da larunbatean, 21:00etan, ETB1en.

Mirari Martiarena eta Eresti Oiarbide, Osinalde elkartean.Hitzetik Hortzera