Goierriko Hitza

Txistu doinuekin hasi dituzte Santikutzak Legazpin

Goierriko Hitza — 2026-04-30 20:02:51

Hasi dira Santikutz jaiak. Jendetza bildu da arratsaldean herriko plazan, aurtengo festei hasiera emateko. Aurten Goiz Deia txistulari bandari egokitu zaio udaletxeko balkoitik pregoia egitea, txistu doinuaz lagunduta ondoren. Ondorengo txupinazoarekin lehertu da festa, eta kalean izan du segida jai giroak, erraldoi eta buruhandien ohiko kalejirarekin.

Txupinazo ofizialaren aurretik, gazteek ere egin dute jaiak hasteko ekitaldia Gaztetxean. Suziria bota ondoren, kalejiran jaitsi dira erdialdeko kaleetara.

Jaietako lehen txanpa igandera arte da, eta hurrengo asteburuan Kapela dantzarekin eta Mirandaola egunarekin amaituko dira.

Honela eman diete hasiera txistulariek aurtengo jaiei, Maider Apaolaza eta Iker Azpeitiaren hitzetan:

Arratsaldeon Legazpi!!

Ohituago gaude mikroa beharrean eskuan txistua edukitzera, baina herriko jaien hasiera iragartzeko aukera ez da urtero izaten eta aprobetxatu behar.

Jaiak gaur hasiko ditugun arren, errodajea egina ekartzen dugu batzuk, pasa den astean, beste urte batez, Korosti dantza taldeak antolatzen zuen Oin Puntetan asteburuan parte hartu genuelako. Horretaz gain, lehen aldiz, Gaztetxeak Gazte Festak antolatu zituen. Blusak soinean ekintza guztiek izan zuten arrera ikusita, ziur gaude datozen urteetan ere ekimen honekin jarraituko dutela, bejondeiela!!!

Bueno, eta aurten zer? Ba aurtengorako ere egitarau oparoa prestatu dute bai jai batzordeak, baita Txo!Esnako kideek ere. Txistulariak, urtero bezala egitarau horretako hainbat ekintzetan izango gara; kalejiretan, Olaria eta Ezpata dantza ekitaldian edo datorren astean ospatuko diren Kapela dantza edo Mirandaola egunean adibidez.

Hala ere egitarauak gutxi balio du herritarren parte hartzerik gabe. Bete dezagun Plaza, bete dezagun Azoka eta nola ez, bete ditzagun kaleak. Herritarrok gara festa guztien arima eta muina. Herritarrik gabe ez dago festarik, herritarrik gabe ez dago girorik. Egun zoragarri batzuk ditugu aurretik. Kanta dezagun, dantza dezagun, parte hartu dezagun eta nola ez, ondo pasa eta goza dezagun!!

Ondo pasa dezagun, ondo pasatzen utziz….

Ondo pasa dezagun ondoan daukaguna errespetatuz…

Ondo pasa dezagun, pasatu gabe….bueno…. sobre la martxa….

Bilakatu ditzagun kaleak espazio seguru eta eroso bat guztiontzat eta ospa ditzagun jaiak pozez, arduraz eta elkar zainduz.
Azken finean, bakoitzak bere nota eman dezala guztion artean musika eta armonia sortuz.

Eta gehiegi luzatu gabe mikroa utzi eta txistua hartuko dugu, erraldoiekin batera jaiei bals batekin hasiera emateko. Erraldoiak prest?

Ba besterik gabe, ondo pasa jaiak eta…

GORA LEGAZPI!

GORA SANTIKUTZAK!

GORA EUSKADI TXISTULARI!

Kepa Ormazabalek irabazi du Valladolideko Klasikoa

Goierriko Hitza — 2026-04-27 11:29:46

Kepa Ormazabal txirrindulari gabiriarrak irabazi du Valladolideko Klasikoa, ihesean. Atzo jokatu zen Espainiako Kopa proba, 158 kilometro ibilbidekoa eta zazpi mendaterekin. Ormazabal ihes eginda iritsi da helmugara eta garaipenarekin gozatzeko aukera izan zuen. Taldekako garaipena ere BBK-Euskadi taldearentzat izan da.

Mikel Gaztañaga BBK-Euskadi taldeko kirol zuzendariak honako adierazpenak egin ditu taldeak asteburuak lortutako emaitzen harira: “Hau da asteburu hau! Oso ausartak izan gara asteburu osoan eta garaipenak jaso dituzte ordainetan. Valladoliden oso adi egon gara hasieratik, eta amaieran mugitzen jakin dugu. Hanka onak genituen eta horrela erakutsi du Kepak helmugan. Natxituan, Marcok bere sasoi ona eta igotzaile bikaina dela erakutsi du, Lazkaon lortutako garaipena errepikatuz. Oro har, oso indartsu gaude. Une hau aprobetxatu behar dugu. Legazpi eta Balentziaga denboraldiko hitzordu nagusietako bi dira eta ezin hobeto iritsiko gara”.

Taldeko sailkapena ere BBK-Euskadi taldearentzat izan da.Sprint Cycling

Korrikalari goierritarrak indartsuen Gabiriako Leharrei mendi lasterketetan

Goierriko Hitza — 2026-04-18 14:22:41

Gabiriako IX. Leharrei Mendi Lasterketa gaur goizean jokatu da, ohi bezala 24 kilometroko trail distantzia luzeko ibilbidearekin eta 15eko esprint motzagoarekin. Izenemate kopuruan markak hautsi diren arren, azkenean korrikalari gutxiago bertaratu da Gabirian, antza denez futboleko Kopako finalaren eraginez. Luzean 146 korrikalari eta motzean 98 irten dira. Korrikarako giroa egokia iruditu zaie gehienei: 12-13 gradu zegoen goizeko bederatzietan, mendi goietan lanbroa, baina lokatzarik gabeko baldintza onak izan dituzte oro har, hezetasun handia, gora-behera.

Goierriko korrikalarien eguna izan da podiumetan. Trail luzean, Josu Urrestarazuk irabazi du proba (1:59:26). Bi ordutik behera jaitsi da bigarren sailkatua ere, Unai Martinez azpeitiarra (1:59:49). Otañura arte lehian ibili den Imanol Intza gabiriarra sailkatu da hirugarren (2:01:43). Learregi azken aldapa azkarren igo duena, ordea, Martin Diez segurarra izan da (5:17 minutuan), nahiz sailkapen nagusian 5. izan den, eta berak jaso du sari berezi hori.

Nesketan, Mayi Mujika urretxuarraren (2:26:09) eta Irati Zubizarreta beasaindarraren (2:27:14) arteko buruz burukoa ikusgarria izan da. Duela 10 urte lehenbiziko mendi lasterketan debutatu zuen Mujikak irabazi du. Hirugarren postua Eneritz Aramendi azpeitiarrarentzat izan da (2:30:06), eta hark eraman du Leharrei sari berezia ere, azken aldapa azkarren igota (7:21 minutuan).

Esprint distantzia motzean, berriz, Axier Artola amezketarra nagusitu da (1:13:04). Mattin Intxaurrondo berastegiarra izan da bigarren (1:13:37), eta Julen Balerdi idiazabaldarra hirugarren (1:14:07). Emakumeen artean, Maider Unanue aramarrak irabazi du (1:25:38), bigarren postuan Ariadna Somoza zumarragarra (1:31:41) eta hirugarren Amaia Intsausti idiazabaldarra (1:35:53) zirela. Unanuek Gabiriako eskolan egiten du lan, irakasle, eta helmugan zain zituen ikasle asko. Eskutik helduta gurutzatu du marra.

Goierri Kopako laugarren proba puntuagarria izan da Leharrei.Trail distantzian, mutiletan Arkaitz Elortza dago lider (254 puntu), Egoitz Arrieta (228) eta Jon Rodriguez (198) hurrena direla. Nesketan, Maite Murgia lider (268), eta ondoren Adirane Peñagarikano (194) eta Amagoia Iribar (184) daude. Esprint distantzian, mutiletan Bingen Erauskin da lehena (312 puntu), Iban Sanjuan (224) eta Aitor Garmendia (202) gero. Nesketan, Nora Anton lider (368), eta ondoren Intza Urrestarazu (292) eta Nerea Goikoetxea (268).

Luzea orokorra

Motza orokorra

Axier Artola, motzeko irabazlea, eskuinean.Aimar Maiz

Somoza, Unanue eta Intsausti, motzeko emakumeen podiuma.Aimar Maiz

Maider Unanue motzeko irabazlea, Gabiriako eskolako ikasleekin, helmugan.Aimar Maiz

Zubizarreta, Mujika eta Aramendi, luzeko hiru emakume onenak.Aimar Maiz

Intza, Urrestarazu eta Martinez, luzeko podiumekoak mutiletan.Aimar Maiz

Gabiriako bertsozaletasunaz ariko dira 'Hitzetik Hortzera' saioan

Goierriko Hitza — 2026-04-17 09:48:39

Herri bertsozalea da Gabiria. Gai horri helduta, herritar talde batek afizio horrek izan duen transmisioa ikertzeari ekin zion. Ikerketa horren emaitza da Gabiriako bertsolaritza eta bertsolaritza Gabirian liburua. Talde horretan aritu zen Eresti Oiarbide Murua, eta aste honetako Hitzetik Hortzera saioan aztertutako horien nondik norakoak ekarriko ditu pantailara.

2021ean Kilometroak Kultur Elkarteak eta Mintzola Ahozko Lantegiak esleitutako ikerketa beka eskuratu zuen Oiarbideren eta Maialen Akizu Bidegainen ikerketa proposamenak, eta horrela, ikertzeari bide eman zioten. Programan azalduko den moduan, Gabirian bertsozaletasuna noiz jaio zen ez dute topatu, baina hainbat gako bildu dituzte liburuan. Gako horiei buruz, Gabiriako bertsoaren ekosistemari buruz eta erreferenteei buruz ere arituko da Oiarbide.

Eta nola ez, Gabiriako bertsozaletasunari buruz hitz egiteaz derrigorrean aipatu beharrekoa da Osinalde Saria: 1973an sortu zen, eta ordutik Gabiriari eta bertsolaritzari egiten dion ekarpenari buruz hitz egingo du Oiarbidek saioan. Joan den larunbatean jokatu zen 54. Osinalde saria, eta hango bertsoaldi onenak entzun ahal izango da larunbatean, 21:00etan, ETB1en.

Mirari Martiarena eta Eresti Oiarbide, Osinalde elkartean.Hitzetik Hortzera

Leharrei mendi lasterketa jokatuko da etzi, Gabirian

Goierriko Hitza — 2026-04-16 11:17:32

Bederatzigarren Leharrei mendi lasterketa jokatuko da Gabirian, larunbatean, apirilaren 18an. Bi ibilbide egongo dira lasterketaren luzeraren arabera: 16km-koa eta 24km-koa. Proba luzea 09:30ean hasiko da, eta motza, 10:00etan.

Lasterketan 275 korrikalarik hartuko dute parte, orain arteko kopururik handiena: 115ek 16km-ko proba egingo dute, eta 160ek 24km-koa. Aurreko urteetan «250 dortsal» jartzen zituztela partaideentzat adierazi du Patxi Ormazabal lasterketako antolatzailetako batek: «Dortsal kopuru hori motz gelditzen zitzaigun, eta beti azken unean dortsal gehiago jartzen bukatzen genuen». Horregatik, aurten hasieratik «gehiago» jartzea erabaki zuten.

Leharreiko lasterketan hasieran, 2016an, «24km-koa bakarrik» egin zela adierazi du Ormazabalek. Baina, ibilbide laburrago bat gehitzeak jende gehiagoren parte-hartzea ekarri du.

Lasterketa horrek jendean mendiko kiroletara animatzera bultzatu nahi duela, eta Gabiria herria ezagutzera ematea duela helburu azpimarratu du antolatzaileak: «Zegama-Aizkorri bezalako lasterketa ezagunetan Leharreiko lasterketako kamisetak ikustea polita da».

Goierri Kopa Trail
Goierri Kopa Trail Goierriko lasterketa gogorrenetako batzuk elkartuta dauden txapelketa bat da. Urtean zeharreko 11 lasterketa dira, non, sailkapen bat dagoen: Leharrei horietako bat da. Gabiriakoa aurtengo Goierri Kopa Traileko laugarren lasterketa izango da. Beasaingo Garin Mendi Lasterketa, Ordiziako Mendi Lasterketa eta Urretxu-Zumarragako UZ Trail jokatu dira orain arte.

Amets Larrañaga gabiriarra Lapurdin txapeldun

Goierriko Hitza — 2026-04-15 09:57:51

Amets Larrañaga Aizpuru txirrindulari gabiriarrak Lapurdiko Itzulia proba irabazi zuen igandean. 97km-ko lasterketa Kanbon hasi eta Lizarrieta mendate gainean (Sara) bukatu zen.

Maddi Agirre Osinalden irabazle

Goierriko Hitza — 2026-04-13 16:29:36

Maddi Agirre Epelde gasteiztarrak irabazi du Gabiriako 54. Osinalde Saria. Bertso onenaren ere Agirrerentzat izan da. Bigarren postuan, Haira Aizpurua Ibargarai saratarra geratu da, iaz bezala. Epaimahaikideentzat bakarrik ez, entzuleen arabera ere, Agirre izan da onena Osinalden.

Finalean izan dira, aurreko biez gain, Iruri Altzerreka Martinez, Eki Mateorena Zozaia, Egiar Otegi Torres eta Janire Arrizabalaga Munduate. Hain zuzen ere, seiak, Ordiziako Argi Berri, Zaldibiako Osinberde eta Gabiriako Aztiri sarietatik sailkatutakoak.

Ane Etxezarreta gai jartzailearen esanetara jardun dira bertsolariak. Epaile lanetan, berriz, Eneko Araiztegi, Endika Igartzabal, Asier Iriondo, Alaitz Igartzabal eta Oihana Aranguren aritu dira.

Etxezarreta gai jartzailearen eta antolatzaile taldeko kidearen esanetan, bertso saio «oso txukuna» izan zen larunbatekoa. «Oso ale politak entzuteko aukera izan zen. Denetik kantatu zuten bertsolariek. Seiek ere saio txukuna egin zuten. Entzuleek ere gozatu zuten eta antolakuntzaren aldetik, gustura gelditu ginen entzun genituen bertsoekin eta orokorrean jendearengandik jaso genuen balorazio edo feedbackarekin».

Formatu berria

Ez ohiko garaian jokatu zen larunbatean Osinalde sariketako finala. Orain artekoetan, afal ondorenean aritu izan badira ere, aurten, bazkalondorenean jokatu da eta antolatzaileak gustura daude erantzunarekin. Bazkarian 116 lagun elkartu ziren eta saioa entzutera entzule gehiago sartu zen, arratsaldean. «Bertsolarientzat errazagoa bazkalondoren kantatzea, eta entzuleen aldetik ere ondo hartua izan zen. Erantzun ona izan zen».

Zenbaki sarituak

Errifako zenbaki sarituak ere jakinarazi dituzte: 656 (Aztiri jatetxeko otordua), 011 (Korta jatetxeko otordua), 771 (Ostatu jatetxeko otordua).

Ogiaren eguneroko bozina-hotsa isildu da

Goierriko Hitza — 2026-04-02 08:00:43

Goizeroko ordu bertsuan, furgoneta zuriarekin etxe aurre bakoitzean bozina joz iritsi da ogi banatzailea. Etxeetatik jendea atera zaio, adinekoak ia denak, eta eguneko ogia eta egunkaria hartu dizkiote; ez daudenen etxeetan, atarian zintzilikatutako poltsan sartu du eskatutakoa Jose Ramon Agirre okinak eta ogi-banatzaileak.

Baina bukatu da herri txikietan hain ohikoa izan den zerbitzu hori. Urretxuko Illargi okindegiak asteartean egin zuen azkeneko banaketa Ezkion, Itsason eta Gabirian. Zerbitzu hori etengo du, eta atzodanik jada herritarrek dendetara joan beharko dute ogia erostera.

Sei hilabete aritu da Agirre banaketan. Bere aurretik urte askoan ibilitako Antonio erretiratu zenetik. Agirre ere herenegun jubilatu zen, eta haren lanarekin batera bukatu da banatzea. Illargi 1971n sortu zuten, bailarako 11 okin batu zirenean. Harrezkero, herri txikietara egunero ogia eramateaz –azken urteetan asteburuetan ez– arduratu da, lehenago beste okin batzuek ematen zuten zerbitzuarekin jarraituta. Illargik Lazkaoko Errotaundi okindegia erosi zuen iaz, eta Lazkaon egiten dute orain ogia. Urretxuko lantokia, glutenik gabeko ogi birrindua ekoizteko birmoldatzen ari dira.

Etxe bakoitzekoa, buruan

Dirudiena baino lan nekezagoa da banatzailearena. Kilometro asko furgonetan, geldialdi ugari. Etxe bakoitzean zer utzi, buruz ikasia du. «Dena ondo apuntatu behar da hasieran. Akats batzuk ere beti izaten dira, oso nahasgarria delako. Baina jendearekin oso ondo moldatu naiz», aitortu du Agirrek.

Ogi handi bat hemen, txikia han, naturala hurrengoan, edo gatzik gabekoa, berezia, romanitoa… Egunkariekin ahaztu gabe. «Ezkion hasten dut banaketa-ibilbidea, Itsaso pasatzen dut ondoren, eta Gabirian bukatu. Hiru herri horietan aritu gara, azkeneko urteetan». Duela 6 edo 7 urte eten zuten beste banaketa-ibilbide bat, Brinkola, Telleriarte eta Aztiria hornitzen zituena.

Okintzan lanean 35 urte igaro ditu Agirrek, postu askotan. Gaztetan, banatzaile hasi zen, hain justu, udan, jaiegunetan eta igandeetan ordezkapenak eginez Mutiloan eta Gabirian. «Beste lanik ez zegoenez, bertan geratu nintzen. Urte haietan lan kontuak nahiko gaizki zeuden».

Gaur egun, 90 bat bezerorekin bukatu du zerbitzua. Buruan dauzka bakoitzaren ordainketa-moduak ere: «44ri esku-dirutan eta hilekoa kobratzen diet, biri astean behin, eta 45i kontu korronte bidez». Eta ia-ia beste horrenbeste geldialdi egin izan ditu, etorrera bozina joz abisatuta. «Etxe gehienetan ogi bakarra hartzen dute. Leku batean, ostiraletan lau egunkari ere bai. Izan ere, helduek batez ere esan didate ogia baietz, baina egunkari falta gehiago nabarituko dutela». Tartean, Goierriko Hitza eta Goiberri ere banatu dizkie harpidedunei.

Gizarte aldaketaren lekuko

Poz-tristurak nahasian dauzka Agirrek. Jubilatu delako, pozik da. Baina gustura ibili da banaketan, eta eten izanak penatzen du. Gizartea bere begien aurrean aldatzen ikusi du: «Azken 20 urteetan bai, baina gehien bat 10 urteotan asko aldatu da dena. Lehen, auzoan festak zirenean, 20 ogi gehiago eskatzen zizkiguten. Jendea joaten zen baserrietara, jaietara… Han bizi ziren zaharrak hil dira, eta kalera joan dira ondorengoak. Ez da ezer geratzen herri txikietan».

Brinkolako kasua aipatu du, txikitatik hango baserrirako joera zeukalako oporretan eta. Baina beste lekuetan ere antzera gertatu da. Herri txikietara kanpotik etorriak ere badaude, baina beste ohitura batzuk dituztela ohartu da. «Desberdina da. Bizimodua ez dute herrian egiten». Eta ogirik ere ez diote hartzen okinari.

Bozina hotsik ezak hutsune gehiago ere utziko du.

Aberri Egunarekin hasiko da Kulturaldia Gabirian

Goierriko Hitza — 2026-04-02 08:00:21

Kulturaldia agenda bateratua igande honetan hasiko da, Gabiriako Udalak Kultura Batzordearen bidez antolatuta. Maiatzaren 29ra arte, 14 egunetan garatuko dira ekitaldiak. Aberri Eguna ospatuko dute, igandean 12:30ean, plazan. Udalak etxeetan ikurrina jartzeko deialdia egin du. Udaletxean badaude salgai.

Osinaldeko 54. bertso sariketa apirilaren 11n jokatu ondoren, mendiari buruzko asteburua iritsiko da hurrena, 16tik 18ra, Leharrei mendi lasterketaren bueltan. Segurako Xirikara antzerki taldeak Ama begira zazu antzezlana egingo du 19an, eta Amaia Elizagoien Ameli ipuin kontalariak haurrentzat saioa 24an.

Alex Areizaga herritarrak zuzendu duen Hutsune handi bat dokumentala ikusteko aukera izango da, apirilaren 25ean. Urretxu-Zumarragan Hiesak eta heroinak eragindako kaltearen testigantzak jaso ditu Gattikenek, Anne Zufiaurrerekin batera.

Maiatzean jarraipena

Jubiatuen eguna maiatzaren 10ean ospatuko dute. Bazkaria Korta jatetxean da aurten, eta izena udaletxean eman daiteke dagoeneko.

Maiatzean, euskaraz eroso aritzeko mintegia (13an eta 20an), Eraman zutela Olaberriko oroimen historikoko dokumentalaren emanaldia (22), Felix Zubia medikuaren hitzaldia (27), eta Mikel Elustondo sukaldariarekin parrilla ikataroa (29) daude. Emanaldiak 18:00etan hasiko dira.

24. Korrika Goierrin. Ezkio-Itsaso-Ormaiztegi

Goierriko Hitza — 2026-04-01 08:22:46

Iruri Altzerreka eta Janire Arrizabalaga bertsolariak sailkatu dira Aztiriko sariketatik Osinaldera

Goierriko Hitza — 2026-03-28 20:30:55

Bertsolari gazteen Aztiriko sariketa gaur arratsaldean jokatu da, Aztiria auzoko (Gabiria) Aztiri-Bat elkartean. Lehenengo aldiz bazkariaren ondoren izan da bertso-saioa. Epaileen puntuz, Iruri Altzerreka garaitarrak lortu du lehenengo postua, eta Janire Arrizabalaga gernikarrak bigarrena. Bi bizkaitarrak sailkatu dira, horrenbestez, Gabirian apirilaren 11n jokatuko den 54. Osinalde Sariketaren finalera.

Aztiri-Bat elkartea entzulez ondo beteta zela garatu da saioa. Entzuleek euren gustukoenaren botoa emateko aukera izan dute bukaeran, ohitura den bezala. Mikel Etxezarreta olaberritarrak jaso du sari hori. Saritutako hiru horiekin batera, Joanes Azpillaga azpeitiarra, Jon Mendiluze irurarra eta Ekain Alegre altsasuarra aritu dira kantuan.

Sariketa afari ondorenetik bazkal ondorenera pasatzearen balorazio oso ona egin dute, bai antolatzaileek, bai entzuleek. Saioa 18:30a aldera bukatu da. Epaile Asier Iriondo, Nekane Gonzalez eta Joxe Arizkorreta legazpiarrak izan dira, eta aurkezle eta gai jartzaile, Eresti Oiarbide gabiriarra.

Ordiziako Argi-Berriko eta Zaldibiako Osinberdeko sariketen ondotik, Aztiriko gaurkoa zen Osinalderen aurretiko hiru kanporaketetako azkena. Hala, Osinalden apirilaren 11n (hori ere lehenbiziko aldiz bazkal ondoren egingo da) kantatuko duten sei bertsolarien zerrenda ere zehaztuta geratu da: Haira Aizpurua (Sara, 2006), Egiar Otegi (Oiartzun, 2007) –Argi-Berritik sailkatuak–, Maddi Agirre (Gasteiz, 2005), Eki Mateorena (Leitza, 2005) –Osinberdetik–, Iruri Altzerreka (Garai, 2000) eta Janire Arrizabalaga (Gernika, 2003) –Aztiritik–. Bost euskal herrialde egongo dira ordezkatuta.

Bertsolariak Aztiri-Bat elkartean.Jokin Matxinandiarena Mugertza

Aztiriko larunbateko bertso saioan, Osinalde Sarirako azken txartelak jokoan

Goierriko Hitza — 2026-03-27 09:00:53

Aztirian erabakiko dira bertsolari gazteen 54. Osinalde sariketaren finalean parte hartuko duten azken finalistak zeintzuk izango diren. Aztiri Bat elkartean 14:00etan hasita bazkaldu eta gero, oraindik zehaztu gabe dauden bi plazak eskuratzeko lehian hasiko dira Osinalderen hirugarren kanporaketa honetan parte hartuko duten bertsolariak.

Bertsolari horiek dira Iruri Altzerreka (Garai, 2000) eta Janire Arrizabalaga (Gernika, 2003) bizkaitarrak, Ekain Alegre (Altsasu, 2001) nafarra, Mikel Etxezarreta (Olaberria, 2003), Joanes Azpillaga (Azpeitia, 2007) eta Jon Mendiluze (Irura, 2005).

Finala Gabiriako Osinalde elkartean izango da, apirilaren 11n, eta lau bertsolarik ziurtatuta dute dagoeneko tokia. Lehen kanporaketan, Ordiziako Argi Berri saria irabazi zuen Haira Aizpurua (Sara, 2006) lapurtarra eta bigarren geratu zen Egia Otegi (Oiartzun, 2007) sailkatu ziren. Bigarren kanporaketatik, Zaldibiako Osinberde saritik, Maddi Agirre (Gasteiz, 2005) eta Eki Mateorena (Leitza, 2005) nafarra atera ziren finalista.

Etxezarreta, «gogotsu»
Aurtengo Osinalde sariketako 18 bertsolarietatik, hiru bakarrik ziren goierritarrak. Lazkaoko Sustrai Goenagak eta June Aiestaran beasaindarrak galdu zuten finalerako txartela, eta bihar Mikel Etxezarretak du berea eskuratzeko aukera.

Etxezarreta «gogotsu eta ilusioz» dago biharko saioari begira. Helburu argirik gabe doala aitortu du, «azkenaldian ez naiz gehiegi fokatu bertsotan, baina saio eder bat egin nahiko nuke, zorroztasunari baino gehiago freskotasunari begiratu, eta niretik kantatu, nire ale batzuk utzi, eta entzulearengana iristea nahiko nuke». Hain zuzen, iaz entzulearen saria eskuratu zuen Aztirian, eta aurten errepikatzen ez bada, «publikoarekin konektatu dudala eta nire aldetik dena eman dudala ikusiz gero, ni konforme».

Aurkarien gainean, berriz, «ezer gutxi» du esateko, «Osinalden kantatzeak maila oneko bertsolaria dela esan nahi du, eta nire bertsokideak ere horrelakoak dira. Edonork dauka maila susto bat emateko». Biharkoari begira, «gozatzera joan nahiko nuke, freskura bilatuz, niretik kantatuz eta saio eder bat eginez».

Larunbatean hasiko da Osinalderako bidea, Ordiziako Argi Berri sariketarekin

Goierriko Hitza — 2026-03-12 09:38:19

Bertsolari gazteentzako Osinalde sariketak ikusmin handia sortu ohi du urtero, eta aurtengoan ere heldu da 54. finalerako bideari ekiteko garaia. Pazko asteko oporraldiarekin batera jokatuko da finala, eta aurrez, ohiko hiru kanporaketek erabakiko dute nortzuk ariko diren Gabiriako azken saioan.

Aurtengoan ere hemezortzi bertsolari gazte ariko dira lehian, Argi-Berri, Osinberde eta Aztiria sarietan banatuta; kanporaketa bakoitzean sei bertsolarik kantatuko dute. Saio bakoitzean sailkatzen diren lehen bi bertsolariek eskuratuko dute finalerako txartela, eta horiek arituko dira kantuan Gabirian, Osinalde elkartean, jokatuko den finalean.

Lehen kanporaketa larunbatean jokatuko da Ordiziako Buztuntza auzoko Argi-Berri elkartean. Aurtengoa 28. edizioa izango da, eta Irantzu Idoate (Hazparne, 2005), Haira Aizpurua (Sara, 2006), Danel Etxeberria (Tolosa, 2007), Naia Arrizabalaga (Azkoitia, 2004), Maite Sarasola (Deustu, 2001) eta Araitz Katarain (Mallabia, 2004) bertsolariak arituko dira kantuan. Igor Egurenek jarriko ditu gaiak.

Bi goierritar

Lehen kanporaketa honetan Goierriko bertsolaririk ariko ez bada ere, eskualdeko bi ordezkari izango dira sariketan: June Aiestaran beasaindarra eta Mikel Etxezarreta olaberritarra. Aiestaranek martxoaren 21ean Zaldibian kantatuko du, eta Etxezarretak, berriz, martxoaren 28an Aztirian.

Iaz egindako aldaketari eustea erabaki dute Argi-Berriko antolatzaileek: kanporaketa bazkari giroan egitea. Orain arte, Osinalderako baliagarriak diren hiru sariketak eta Gabiriako finala bertso-afari moduan jokatu izan dira. Iaz, ordea, Ordiziako saioa bertso-bazkari gisa antolatu zuten lehen aldiz, eta formula bera mantenduko dute aurten ere. Gainera, aurten Aztiriako eta Gabiriako saioek ere molde bera hartuko dute. Zaldibiakoa izango da orain arteko formatuan –bertso-afari gisa– egingo den bakarra.

Argi Berrin, bazkari giroan

Ordizian egun osoko plana antolatu dute: 13:00etan trikipoteoa egingo dute auzoan zehar, Argi Berritik abiatuta. 14:00etan, bazkaria egingo dute, eta ondorenean, bertsoaren lehia hasiko dute sei bertsolari gaztek. Bazkarian dagoeneko ez dago izena emateko aukera, baina bertso saiora soilik joateko aukera egongo da. Doakoa izango da.

Osinaldera begira

Hiru kanporaketetan parte hartuko duten 18 bertsolarietatik sei iritsiko dira apirilaren 11n Gabiriako Osinalde elkartean jokatuko den Osinalde sariko finalera. Sari nagusiaz gain, publikoaren saria eta bertso onenaren saria ere banatuko dituzte. Finalerako bidean, bi goierritarrek izango dute sailkatzeko aukera: June Aiestaranek eta Mikel Etxezarretak.

Ekain Ibarguren komikoak ikuskizuna egingo du Gabirian

Goierriko Hitza — 2026-03-10 15:23:50

Martxoaren 13an, 18:00etan, Ekain Ibarguren komiko azpeitiarrak Arlote bat hautsak harrotzen ikuskizuna egingo du Gabiriako kultur etxean.

Arlote baten istorioa du ikuskizunak ardatz, umorea, antzerkia eta keinu bidezko lana uztartuz. Ibarguren pailazo malabarista ere bada Gure Zirkuan, euskarazko lehen zirku ibiltarian.

Emaneurreren afariko bertsoaldi onenak ikusgai

Goierriko Hitza — 2026-03-02 14:41:57

Umorea nagusitu zen otsailaren 6an Emaneurrek Ordiziako Tximista sagardotegian antolatu zuen bertso afarian. Maialen Lujanbio hernaniarra, Iker Zubeldia zegamarra eta Aratz Igartzabal Potto gabiriarrak aritu ziren kantuan, Igor Egurenen esanetara. Joan den larunbatean Hitzetik Hortzera telebista saioan eman zituzten hainbat pasarte, eta gaur Bertsoa.eus webgunean zabaldu dituzte gau hartako bertsoaldi aipagarrienak. Saio osoa ere ikus daiteke.

Apalantza eta Rodriguez izan dira azkarrenak

Goierriko Hitza — 2026-02-28 20:44:04

Aitzol Apalantza eta Rakel Rodriguez azkarrenak, Gabiria eta Legazpi artean.

Amaitu da aurtengo ekinaldia. Aitzol Apalantza-Rakel Rodriguez, Gorka Idigoras-Nerea Campos eta Xabier Lujua-Jesus Estrada pilotu-kopilotuak igo dira podiumera.

Goizean Gabiria eta Legazpi artean, eta arratsaldean Legazpi eta Gabiria artean, abiada bizian ibili dira Gabiria-Legazpi rallysprinteko pilotu-kopilotuak. Rallysprint denboraldiko lehenengoa izan da, Bosteko eskuderiak antolatutakoa.

Sari banaketa ekitaldia Legazpiko plazan egin da.

Motor hotsez bete da Gabiria eta Legazpi arteko errepidea

Goierriko Hitza — 2026-02-28 14:31:39

Dagoeneko hasi da euskal automobilismo denboraldia. Abiadurak hartu du Gabiria eta Legazpi arteko errepidea, eta motor hotsak dira nagusi. Bosteko eskuderiak antolatuta, abiatu da 28. Gabiria-Legazpi Rallysprinta, euskal automobilismo denboraldiko aurreneko proba. Ohi bezala, ikusmin handia sortu du gaur ere bi udalerrietan erroturik dagoen ekimenak, eta goizean goizetik, ikusleak han-hemen dabiltza, bazterreko altuerak aprobetxatuta, luxuzko ikuskizunaz gozatzen. Legazpi eta Gabiriako zaleez gain, izan da inguruko herrietatik ere gerturatu denik.

Aurreneko ordutik pilotu-kopilotu eta zaletuen arteko elkargune izan da Legazpiko plaza; jendetza elkartu da bertan, eta azken egiaztapen administratiboak zein teknikoak egin dituzte 146 partaideek.

12:00etan abiatu da Gabiriatik aurreneko kotxea, eta bi txanda egin dituzte norabide bakoitzean: goizean Gabiria-Legazpi noranzkoan egin dituzte bi erlojupeko, eta arratsaldean beste bi egingo dituzte, baina kontrako noranzkoan. 146 partaideetatik 22 goierritarrak dira aurtengoan, eta emakumeen presentzia ere gero eta handiagoa izaten ari da.

Legazpiko plazan amaituko dute proba, eta bertan egingo dute sari banaketa, 20:00ak aldera.

Sagarrondo inausketa eta txertaketa ikastaroa Gabirian

Goierriko Hitza — 2026-02-16 16:23:10

Inausketa eta txertaketa ikastaroa antolatu dute Gabirian, urtero bezala. Saio honetan parte hartzeko izena emateko 679972372 telefono zenbakira deitu behar da. Gabino Muruak emango du ikastaroa. Otsailaren azken astean izango da eta eguraldiaren arabera erabakiko da zein egunetan egingo den.

Aurten Gabiriako Oñatibi Txikiko sailetan egingo dute ikastaroa. Bi mila sagarrondo baino gehiago dituzte M9 eta Geneva mentu-oinetan txertatuak. Gehienak erdiko ardatzeko eta bi ardatzeko formazioa dute.

Korrikaren aurkezpena, gaur Lazkaon

Goierriko Hitza — 2026-01-26 10:01:58

24. Korrika aurkezteko eta batzordeak sortzeko bilerak egingo ditu AEK-k aste honetan ere.

Lazkaon, gaur, hilak 26, 18:30ean, kultur etxeko erakusketa gelan.
Itsason, bihar, hilak 27, 18:30ean, udaletxean.
Ezkion, hilaren 28an, 17:30ean, udaletxean.
Ormaiztegi-Gabiria dagokiona, hilaren 29an, 18:00etan, Ormaiztegiko Gizarte Etxean.

Yoga edo pilatesen izen emateko aukera udaletxean, bihar arte

Goierriko Hitza — 2025-09-04 08:50:16

Ikasturte berria martxan da eta Gabiriako Udalak ere kirol eskaintza zabala prestatu du aurtengo ikasturterako. Urteroko moduan, yoga, zumba eta pilates/gap ikastaroak antolatuko dituzte aurtengoan ere, iazko irakasleak saioak eskaintzen jarraitzeko prest baitaude. Horretarako, baina, aurrez izena ematea beharrezkoa izango da, ikasle kopuruaren araberako saioak antolatzeko. Interesa duenak, beraz, ostirala baino lehen izena eman beharko du udaletxera deituta (943 88 07 34) edota WhatsApp mezua bidalita (670 364 718 Maialen).

Auzolanean garbitu dute herria Gabirian jaien biharamunean

Goierriko Hitza — 2025-08-19 12:29:11

Andra Mari eta San Roke jaiak amaitu eta biharamunean, atzo, herritar talde mardula elkartu zen Gabirian herria auzolanean txukuntzeko. Plazan eta inguruan egon zituzten garbiketa lanak, eta parte hartu zutenak taldeko argazkia egiteko elkartu ziren udaletxe azpi aldean.