Goierriko Hitza

Errigora sustraiak ahaztu gabe espaziora begira

Goierriko Hitza — 2026-10-24 17:40:58

Errigorak herri ekimenak hasierako boluntarioei omenaldia egin diete Lazkaon. Eguna hasteko Errigora sustraietatik espaziora dokumentala estreinatu dute Areria zineman. Jende asko hurbildu Euskal Herriko hainbat txokotatik, hori horrela zinema jendez bete da.

Dokumentalaren estreinaldiaren ondoren, Lazkaoko frontoira inguratu dira denak, hamaiketako egin ostean, omenaldi ekitaldia egiteko. Erramun Amundarain, hasierako boluntario izan zena eta lehengo urtean zendu zena, gogoratu dute bere argazki bat ipiniz oholtza gainean. Egunean zehar Kuxkuxtu txaranga urruñarra ere badabil giroa alaitzen. Behin omenaldia amaituta bazkaria egon da frontoiean bertan.

Omenaldiko argazkiak eta bideoa.

Bola, Ondarean Europako Jardunaldietan

Goierriko Hitza — 2026-10-15 13:36:33

Ondarean Europako Jardunaldien baitan, bola jokoa erdigunean jarriko dute Zerainen, «zeraindarren usadioa ezagutu eta berreskuratzeko» helburuarekin. Doako saio bat egingo dute urriaren 17an, 11:00etan Zeraingo bolatokian. Parte hartzeko: 943 80 15 05 edo turismobulegoa@zerain.eus.

Herriko proiektuak ezagutzera emateko saioa

Goierriko Hitza — 2026-10-14 12:05:43

Zeraingo Udalak azken hilabeteetan herrian aurrera eramandako proiektuen berri emango die herritarrei igande honetan. Errementeri etxean ate irekien jardunaldia egingo dute 12:30ean hasita. Frontoiko eguzki plaken proiektuaz arituko dira bertan eta udaletxe aurretik pasatzen den Gi-2620 errepidearen trazatua hobetzeko egingo diren lanei buruzko informazioa ere eskainiko zaie bertaratzen direnei.

Mutiloako eta Zeraingo udalen proposamenak, ikasturte berrirako

Goierriko Hitza — 2026-09-29 11:03:38

Mutiloako eta Zeraingo udalek ikasturte berrirako hainbat ikastaro antolatu dituzte elkarrekin, bi herrietako bizilagunei zuzenduta. Ikastaroei urrian emango diete hasiera eta oraindik izena emateko epea irekita dago. Izena saioetara bertara gerturatuta edo bi herrietako udaletxeren batean eman daiteke: 943 80 04 50 (Mutiloa) eta 943 80 17 24 (Zerain).

Antolatutako ikastaroen artean, yoga saioak Zeraingo kultur etxean izango dira, asteartetan 16:30etik 18:00etara. Trikiti ikastaroa ere Zerainen eskainiko dute, asteazkenetan 17:00etatik 19:00etara, liburutegian.

Euskal dantzak ikasteko hiru talde sortu dituzte: haurrena, helduena eta gaztetxoena. Saio guztiak Zerainen eskainiko dira, adinaren arabera egun eta ordutegi ezberdinetan antolatuta. Haurren saioak astelehenetan izango dira 17:00etatik 18:00etara kultur etxeko diaporama gelan. Helduenak, asteazkenetan 18:30etik 20:00etara pilotalekuan; eta gaztetxoenak, ostiraletan 17:00etatik 18:00etara kultur etxeko diaporama gelan.

Gimnasia eta eskulanak

Mutiloan eskainiko dituzten bi saioen artean gimnasiakoa eta eskulanena daude. Gimnasia saioak astearte eta ostegunetan izango dira 19:00etatik 20:00etara udaletxeko ganbaran. Eskulanenak, aldiz, ostegunetan 16:00etatik aurrera leku berean.

Tomate dastaketan parte hartzeko deia, zeraindarrei

Goierriko Hitza — 2026-09-24 15:50:28

Martxoan hazien trukea egin ondotik, gaur herriko baserri eta etxeetako tomateak dastatzeko aukera izango da Zerainen, ZerainLabek antolatutako topaketan. Barietate, tamaina eta bizitasun ezberdineko tomateak probatzeko aukera izango da aurten ere, Liztormendi elkartean, 19:00etatik aurrera.

Uzta jaso ahala, Zeraingo zenbait etxetan haziak gordetzeko ohitura dago. Haziak behar bezala jaso eta gordetzeak bere garrantzia du, hurrengo urtean ere berriz erein eta uzta jaso ahal izateko. Zerainen, baratzeak emandako produktuak partekatzeaz gain, jakintzaren elkartrukea ere egiten dute topaketa hauetan.

Primerako giroa Zeraingo Azoka Ekologikoan

Goierriko Hitza — 2026-09-20 13:38:39

Azoka Ekologikoa ospatzen ari dira Zerainen. Gipuzkoako azoka ekologiko zaharrenaren 32. edizioa da. Biolurrek, Zerain Dezagun Fundazioak, ENEEK-Ekolurrak eta Biziolak Zeraingo Udalaren laguntzarekin antolatu dute, beste behin. Aurten urriaren 24a arte luzatuko den Goierriko 17. Hamabostaldi Ekologikoa ireki du.

Aurten, Biolurreko hogei bat inguru ekoizlek jarri dituzte euren postuak Zerainen. Gehienak, urteroko hitzordura hutsik egiten ez duten goierritarrak dira. Barazkiak, gaztak, marmeladak, haziak, ogia, fruta… daude aukeran, besteak beste.

Artisaurik ere ez da falta. Aurten hamabost inguru elkartu dira. Saskigintza tradizionalari txokoa egin zaio, Jose Luis Etxeberria eta Arrate Lizarralderen eskutik.

Itsasoko Hariztizabal baserriko Itsaso Olabiderekin gailetak egiteko aukera ere bada, eta azken urteetan bezala, Osoa Cooking-eko Anne Otegi itsasondoarra azokan erositako produktuekin errezeta goxoak egiten ari da.

Bestalde, aurten lehen aldiz, Zeraingo museo etnografikoko ateak ireki dituzte gerturatzen den edonork bisitatu dezan. Bertan, Pirinioetako Burdin Bidearen argazki erakusketa dago ikusgai.

Azoka jai giroan amaitzeko, herri bazkari ekologikoa ere antolatu dute. Biziolak egindako paella izango da aukeran.

Giro bikaina Aizkorpeko bost herrien arteko ibilaldian

Goierriko Hitza — 2026-09-19 10:55:57

Aizkorpe bailarako bost herriak urteroko ibilaldia egiten ari dira, aurtengoan Segurako mendi elkarteak antolatuta. Segura inguruko txoko ez hain ezagunak erakustea da aurtengo helburua. Ekimena bailarako mendizaleen arteko hartu-emanak sendotzeko baliagarria da eta Segura, Idiazabal eta Zegamako mendi elkarteetako eta Zeraingo Liztormendi eta Mutiloako Txerri Gorri kultur elkarteetako kideek hartzen dute parte. Aurtengo edizioan 45 lagun inguru elkartu dira. Behin ibilaldia burututa, elkarrekin bazkalduko dute Seguran.

Mendizaleak, Segurako irteeran.

Zozketa Zeraingo Museo etnografikoan

Goierriko Hitza — 2026-09-18 12:07:35

Zeraingo museo Etnografikoan Pirinioetako Burdinaren Ibilbidearen elkarteak sustatutako Burdinaren eta burdinaren arkitektura arkitekturan izeneko erakusketa ikusgai dago datorren urriaren 1era bitartean. Aurten, igandean egingo den Zeraingo 32. Azoka Ekologikoaren baitan, museoa doan bisitatzeko eta erakusketa bertatik bertara ikusteko aukera izango da goiz osoan zehar.

Erakusketa aurrez deitutako argazki lehiaketa baten emaitza da, eta Europako burdinaren ibilbidearen ondare siderurgikoaren ezagutza sustatzea, sormena bultzatzea eta herritarren arteko trukeak erraztea izan du helburu Pirinioetako Burdinaren Ibilbidearen elkarteak.

Argazki lehiaketa

Argazki lehiaketa 2025eko irailean deitu zuten eta Pirinioetako Burdinaren Ibilbidea osatzen duten hainbat herrialdetako argazkilariek hartu zuten parte bertan, “Pirinioetako paisaian burdinaren eta arkitekturaren arteko harremanari buruzko begirada” islatu zutelarik beraien lanetan.

Lehenengo saria Jean-Luc Bobin argazkilari frantsesari eman zioten Le four à griller minerai de fer concesión Escaró nord lanarengatik. Lan irabazlearekin batera beste hamaika argazki finalista ere aukeratu dituzte erakusketa ibiltari hau osatzeko. Zeraingo Museo Etnografikoan dago ikusgai oarin erakusketa eta aurreratu dutenez, urriaren 1era bitartean bisitariek erakusketan ikusgai dauden lanetako baten zozketan parte hartzeko aukera izango dute.

Pirinioetako Burdinaren Ibilbidea

Zeraingo Aizpea meatze guneak, Gipuzkoako, Andorrako, Herrialde Katalanetako eta Frantziako beste hainbat ondare elementurekin batera osatzen dute Pirinioetako Burdinaren Ibilbidea. Burdinaren Ibilbideak lurraldeak, museoak, meategiak, burdinolak eta paisaiak lotzen ditu, eta burdinaren erabilerak eta haren inguruan sortutako industriak mendeetan zehar izan duen funtsezko papera balioan jartzen ditu. Pirinioetako Burdinaren Ibilbidearen eguna ere urtero ospatzen dute urtero maiatzean, tokian tokiko ondarea ezagutzera emateko helburuarekin. Zerainen, Aizpitta meatze gunean ospatzen dute egun hori, herri eskolako ikasleekin batera.

Erosleak eta ekoizleak batzen dituen azoka

Goierriko Hitza — 2026-09-18 11:23:48

Hiru hamarkadatako mugarria gaindituta eta Gipuzkoako azoka ekologiko zaharrenaren tituluarekin ospatuko da aurten ere Zeraingo 32. Azoka Ekologikoa igande honetan. Biolurrek, Zerain Dezagun Fundazioak, ENEEK-Ekolurrak eta Biziolak Zeraingo Udalaren laguntzarekin antolatuko dute azoka, beste behin. Hain zuzen, azokak irekiko du aurten urriaren 24 arte luzatzen den Goierriko 17. Hamabostaldi Ekologikoa.

Goierrin ez ezik, Gipuzkoan ere erreferente izaten jarraitzen du Zeraingo azoka ekologikoak, «bizimodu eta kontsumo kontzienteago» bat aldarrikatuz. Azokak, Goierriko Hamabostaldiak bezala, «nekazaritza ekologikoa eta kontsumo eredu iraunkorrak» bultzatzen ditu, «tokiko ekoizpena eta elikadura osasuntsu eta jasangarria» sustatzeko beharrari ere azpimarra eginez.

Gaur egungo krisi ekosozialaren testuinguruan, «lurrarekin eta bere mugekin bat datozen bizitzeko moduak» ere azaleratu nahi ditu.

Azoka bat baino gehiago

Zeraingo azoka ekologikoa kontsumitzaileen eta bertako ekoizleen arteko topagune izango da berriz. Egitarauak ekintza praktikoak eta hausnarketarako espazioak uztartuko ditu, «komunitatea indartuz herritartasun kritikoa sustatuz eta bizimodu iraunkorragoak josten lagunduz».

Aurten, Biolurreko hogei bat inguru ekoizlek jarriko dituzte euren postuak Zerainen. Gehienak, urteroko hitzordura hutsik egiten ez duten goierritarrak dira. Barazkiak, gaztak, marmeladak, haziak, ogia, fruta… izango dira aukeran, besteak beste, igandean. «Ekoizleen lana ezagutu eta bertakoa eta ekologikoa erosteko aukera paregabea da Zeraingo azoka», adierazi dute antolatzaileek.

Igandeko azoka artisauen eskaintzak osatuko du; aurten hamabost bat inguru izango dira. Lehengaien artean, aurten saskigintza tradizionalari egingo zaio txoko bat. Jose Luis Etxeberria eta Arrate Lizarralderen eskutik.

Itsasoko Hariztizabal baserriko Itsaso Olabiderekin gailetak egiteko aukera izango da herriko egurrezko labean, eta azken urteetan bezala, Osoa Cooking-eko Anne Otegi itsasondoarrak azokan erositako produktuekin «errezeta goxoak» egingo ditu.

Eta aurten lehen aldiz, azokak dirauen bitartean Zeraingo museo etnografikoko ateak zabalik izango dira, gerturatzen den edonork bisitatu dezan. Bertan, Pirinioetako Burdin Bidearen argazki erakusteka izango da ikusgai.

Zeraindarren babesarekin

Azoka ekologikoa zeraindarren azoka kuttuna da eta herritarren auzolanik gabe «azoka ez litzatekeela errealitate bat izango» nabarmendu dute antolatzaileek. Azoka jai giroan amaitzeko, herri bazkari ekologikoa ere antolatu dute. Biziolak egindako paella izango da aukeran, eta txartelak dagoeneko salgai daude 15 eurotan Zeraingo turismo bulegoan, Goierriko Baratzan eta Biziolan.

Andramaritako balorazio bilera ostegunean, Zerainen

Goierriko Hitza — 2026-09-16 10:52:45

Abuztuaren 14tik 16ra bitartean ospatu zituzten aurten zeraindarrek Andra Mari jaiak; hirugarren urtez Zeraingo gazte taldeak antolatuta. Behin jaiak pasata eta ikasturte berriari hasiera emanda, jaietako balorazio bilera egiteko deialdia luzatu dute gazte taldeko kideek. Bilera kultur etxean izango da ostegun honetan, 18:30ean, kultur etxean. Gazteek herritar guztiak animatu dituzte parte hartzera, denon iritzia “garrantzitsua” dela iritzita.

Bost herrien arteko ibilbideko bazkarian izena emateko azken egunak

Goierriko Hitza — 2026-09-11 12:00:13

Irailaren 19an egingo dute Aizkorpe bailarako bost herriek urteroko ibilaldia, aurten Segurako mendi elkarteak antolatuta. Elkartetik aurreratu dutenez, “Segura inguruko txoko ez hain ezagunak” erakusteko helburuarekin antolatu dute aurtengo ibilbidea. Bailarako mendizaleen arteko hartu-emanak sendotzeko baliagarria da ekimena eta Segura, Idiazabal eta Zegamako mendi elkarteetako eta Zeraingo Liztormendi eta Mutiloako Txerri Gorri kultur elkarteetako kideek hartzen dute parte.

Behin ibilaldia burututa elkarrekin bazkalduko dute Seguran. Bazkarira joan nahi duenak irailaren 13ra arteko epea du izena emateko. 660 791 623 telefonora deitu daiteke horretarako. Bazkariaren prezioa 30 eurokoa izango da.

Kontsumo ereduak aldatzeko, Goierriko Hamabostaldi Ekologikoa

Goierriko Hitza — 2026-09-10 14:36:36

Zeraingo 32. Azoka Ekologikoak irekiko du irailaren 20an Goierriko Hamabostaldi ekologikoa. Tokiko ekoizpen eta kontsumo ereduak eraldatzen izenburupean egingo dute aurten, 17. urtea beteko duen ekimena. Gaur eguerdian egin dute zikloaren aurkezpena Zeraingo kultur etxean. Judit Garzia, Biolur eta EHKolektiboko kideak eta ENEEk-Ekolurrako lehendakariak; Aloña Aranburu, Zeraingo turismo bulegoko teknikariak eta Intza Barandiaran, Biziolako kideak hartu zuten parte bertan.

Urriaren 24ra arte luzatuko da egitaraua «nekazaritza ekologikoa, tokiko ekoizpena eta kontsumo arduratsua herritarrengana gerturatzeko» helburuarekin. Bide batez, Goierriko elikadura sistemaren inguruan hausnartzeko ere baliatuko dute zikloa.

Zeraingo azoka, lehena

Egitarauak «alderdi praktikoa eta dibulgatiboa» uztartuko ditu, hala, azoka ekologikoak, sukaldaritz eta elikadurarekin lotutako saioak, dastaketak, jardunaldi teknikoak, bisitak eta jai giroko ekimenak bat egging dude aurtengo proposamenean.

Zeraingo 32. Azoka Ekologikoak irekiko du hamabostaldia irailaren 20an. Herriko plazan egingo dute, 10:00etatik 14:00etara, lurraldeko 35 ekoizle ekologiko eta artisauen parte hartzearekin. Azokarekin batera, hainbat saio izango dira: ekogaileten tailerra Itsasoko Hariztizabalen eskutik; saskigintza tradizionalaren saioa eta Sukaldean kontu kontari Osoa cooking-eko Anne Otegirekin.

Goiz osoan zehar, tolarean zuzenean egindako sagarra dastatzeko aukera izango da eta aurten lehen aldız, Zeraingo Museo Etnografikoa doan bisitatzeko aukera egongo da. 14:30ean, bazkari agroekologikoa egongo da Biziolaren eskutik. Txartelak 15 euroan daude salgai Biziolan, Goierriko Baratzan eta Zeraingo turismo bulegoan.

Hamabostaldi Ekologikoa Biolur, EHKolektiboa, Zerain Dezagun Fundazioa eta Biziolak antolatu dute eta ekimenak ENEEk, Orkli, aldundia eta jaurlaritzaren laguntza jaso du. Aurtengo kartelak Ania Saenz de Buruaga ilustratzaile gasteiztarrarenak dira.

Arantzazura erromesaldia egin dute, eguraldia lagun

Goierriko Hitza — 2026-09-07 12:20:56

Segura, Zerain eta Mutiloako herritarrek Arantzazura erromesaldia egin dute asteburuan. Larunbatean, nor bere herritik irtenda, Urbiara oinez igo ziren erromesak —irudian—. Elkarrekin bazkaldu eta Arantzazura jaitsi ziren arratsaldean. Igandean, Hospederian elkartu ziren bazkaritara.

Argazkiak: PELLO AGIRREZABAL

Segurak antolatuko du aurten Bost herrien arteko ibilbidea

Goierriko Hitza — 2026-09-04 12:08:27

Irailaren 19an egingo dute aurten Bost herrien arteko ibilaldia Aizkorpe bailara osatzen duten bost herriek. “Bailarako mendizaleen arteko hartu-emanak sendotzeko” baliagarria da ekimena antolatzaileek azpimarratu dutenez. Segura, Idiazabal eta Zegamako mendi elkarteetako eta Zeraingo Liztormendi eta Mutiloako Txerri Gorri kultur elkarteetako kideek hartzen dute parte. Txandan-txandan antolatzen dute jarduera eta aurtengoa, 11.ena, Segurako mendi elkarteak antolatuko du, “Segura inguruko txoko ez hain ezagunak” erakusteko helburuarekin.

Seguran barrena 11 kilometro inguruko ibilbidea prest dute dagoeneko, “8:00etan Segurako plazatik abiatu eta 14:00ak inguruan amaituko da” aurreratu dute.

Ibilbidea

Segurako plazatik abiatuta Laiotz auzora joango dira. Pagamuñoandi ingurutik pasatu eta ondoren, Txarako haitzera iristea izango da helburua. Ondoren, Segura eta Zegama artean dagoen Segurako Kortaberria auzora joango dira. Auzoan, uraren depositua, ganadua babesteko saletxeak eta bertan zegoen teileria zaharra bere labe eta guzti ikusteko parada hartuko dute. Handik Zorroztarriko trikuharrira gerturatuko dira. Eguraldiak lagunduz gero bertan egingo dute hamaiketakoa —norberak berea eramanda—; eguraldi txarrarekin Santa Barbara ermitan izango da.

Unamendi gaina igoko dute ibilbidearen azken txanpan. Hortik aurrera, Santa Barbara ermita ingurutik behera Segurako plazan emango diote amaiera irteerari.

Bazkaria Seguran

Ibilaldiaren ondoren, bazkaria egingo dute elkarrekin. Bazkarira joan nahi duenak izena eman beharko du irailaren 13rako, 660 791 623 telefonoan. Bazkariaren prezioa 30 eurokoa izango da.

Datorren astean ekingo dio ikasturte berriari Toberak

Goierriko Hitza — 2026-09-02 12:43:36

Mutiloako, Segurako, Zegamako eta Zeraingo Tobera musika eta dantza eskolak 40. ikasturtea hasiko du datorren irailaren 8an. Egun horretan ordutegiak banatuko zaizkie musika tresnetan izena eman dute ikasleei Zegamako kultur etxean (17:30) eta Segurako Laiotz herri eskolan (19:00). Eskolak hurrengo egunean, irailaren 9an hasiko dituzte, 11 profesionaleko lan taldearekin.

Urteroko moduan aukera zabala dago eskaintzari dagokionean; askotariko musika tresnak jotzen ikasteko eskolak, musika hizkuntza eta dantzaz gain. Gainera, musika taldeetan parte hartzeko aukerak ugariak dira, helduentzat zein gazteentzat. Ildo horretan, urtarriletik aurrera, helduentzako eta jubilatuentzako euskal dantzen ikastaroak abiatuko direla aurreratu du eskolak.

Ekintzak ikasturtean zehar

Eskolez gain, ikasturtean zehar 30 ekintzatik gora egiten ditu Toberak. Azkenak Zegamako San Bartolome jaietan; zaindariaren prozesioan eta arku egitean parte hartu dute ikasleek, agitarien soka dantzan eta azken urtean jaiotako haurren zapi janztean. Musika ikasleek osatzen duten Norabide erromeria taldearen dantzaldia ere izan da jaietan. Ikasturteari hasiera emateko, irailaren 27an Zegaman egingo den Adinekoen egunean ere parte hartuko du Toberak.

Arantzazura erromesaldia

Goierriko Hitza — 2026-09-01 13:10:28

Urteetako ohiturari jarraituz, Arantzazura erromesaldia egingo dute asteburuan Segura, Zerain eta Mutiloako bizilagunek. Irailaren 5ean eta 6an emango diote jarraipena usadio zaharrari eta parte hartzaileek hainbat aukera izango dituzte Arantzazura gerturatzeko, oinez zein autobusez.

Irailaren 5ean, larunbata bi aukera izango dira Arantzazura joateko. Batetik, Arantzazura oinez joango diren segurarrak 6:00etan irtengo dira herriko plazatik eta bidea Aldaolan hasiko dutenak, 9:00etan hartuko dute autobusa plazan eta 10:00ak inguruan elkartuko dira oinezkoekin San Adrianen. Zerainen, 8:00etan egin dute hitzordua oinezkoentzat, plazan eta 9:00etan kotxez Aldaolaraino joango direnentzat. Ohar batean adierazi dute, Aldaolara joateko kotxea eramateko boluntarioak behar direla.

Itzulera arratsaldean

Segura, Zerain eta Mutiloako erromesak Urbiara bidean elkartuko dira eta bertan bazkaria egingo dute elkarrekin. Aurten fonda itxita dagoenez, norberak eraman beharko du bere bazkaria. Elkarrekin egingo dute baita ere Arantzazura arteko bidea jaisterakoan(16:30) eta ohiko elizkizunaren ondoren, 19:00etan hartuko dute Arantzazun etxera itzultzeko Segurako, Zeraingo eta Mutiloako udalek bigarren urtez batera antolatu duten autobusa.

Irailaren 6an, igandean egingo dute erromesaldiaren bigarren zatia. Kasu honetan, 10:00etan irtengo da Segurako plazan Arantzazurako autobusa, zeraindarrek eta mutiloarrek ere bertan hartuko beharko dute. Goiza Arantzazun igarota Hospederian bazkaltzeko aukera izango da eta itzultzeko autobusa 18:00etan abiatuko da Arantzazutik.

Izen emateak

Seguran asteazkena izango da erromesaldian parte hartu nahi dutenentzako izena emateko azken eguna, estankoan. Autobuseko joan etorriak 7 euroko prezioa du eta estankoan ordaindu beharko da aldez aurretik. Hospederiako bazkaria —bertan ordaindu beharko da— 25 eta 30 euro ingurukoa izango da. Zeraindarrek Mari Karmen Mendizabali deituta (676 447 680) eman ahal izango dute izena eta Mutiloan, udaletxean.

Toberak 40. ikasturtea abiatuko du irailean

Goierriko Hitza — 2026-08-18 15:14:04

Mutiloako, Segurako, Zegamako eta Zeraingo Tobera Musika- eta Dantza-eskolak 40. ikasturtea abiatuko du irailean. Ikasturte berria irailaren 8an hasiko da, eta egun horretan banatuko dizkiete instrumentuetan izena eman duten ikasleei ordutegiak. Horretarako, bi hitzordu izango dituzte: 17:30ean Zegamako Jabier Otaegi kultura-etxean eta 19:00etan Segurako Laiotz herri-eskolan.

Taldeetako irakaskuntzaren ordutegien berri, berriz, abuztuaren 31n emango dute. Eskolak irailaren 9an hasiko dira, eta 11 profesionaleko lantaldea izango du Toberak ikasturte honetan.

Musika eta dantza, adin guztientzat

Toberaren eskaintza zabala da. Musika-hizkuntza eta dantzaz gain, gitarra elektrikoa eta klasikoa, baxu elektrikoa, pianoa, trikitia, panderoa, organoa, txistua eta danbolina, bateria eta zeharkako txirula ikasteko aukera izango dute ikasleek.

Horrez gain, musika-taldeetan parte hartzeko hainbat aukera eskaintzen ditu eskolak, bai gazteentzat, bai helduentzat. Urtarriletik aurrera, esaterako, helduentzako eta jubilatuentzako euskal dantzen ikastaroak jarriko dituzte martxan.

Kuotei dagokienez, musika-hizkuntza eta helduen euskal dantzak hilean 20,2 euro dira; gainerako dantza-taldeak, 13,5 euro. Musika-tresnen kasuan, hileko kuota 38,5 eurokoa da, pandero-taldearen kasuan izan ezik, 20,2 eurokoa baita. Musika-taldeetan parte hartzeak, berriz, 7,3 euroko kostua du ikasleentzat eta 16,6 eurokoa ikasle ez direnentzat.

30 ekintza baino gehiago ikasturtean

Irakaskuntzaz gain, Toberak 30 ekintza baino gehiago egiten ditu ikasturtean zehar. Zegamako San Bartolome jaietan, esaterako, hainbat ekintzatan hartuko dute parte: zaindariaren prozesioan eta arku-egitean, agintarien soka-dantzan, azken urtean jaiotako haurren zapi-janztean Agurra dantzatuz, dantza-saioan eta trikitilarien kalejiran. Horrez gain, musika-ikasleek osatutako Norabide erromeria-taldeak ere dantzaldia eskainiko du.

Ikasturteko aurreneko jendaurreko ekintza, berriz, irailaren 27an izango da, Zegamako Adinekoen egunean.

Informazio gehiago nahi dutenek tobera@tobera.eus helbidera jo dezakete.

Amaitu dira aurtengo Zeraingo festak

Goierriko Hitza — 2026-08-17 14:53:28

Hirugarren urtez jarraian, herriko gazteak izan dira Andra Mari jaiak abiaraztearen arduradunak. Pasa den ostegunean ekin zieten hasiera jaiei, finalaurreko pilota partidekin eta gibel-jatearekin. Hala ere, abuztuaren 14a, ostirala, izan zen festei hasiera ofizialeko eguna.

Haurrei zuzendutako ekintzekin ekin zioten egunari zeraindarrek, eta 19:30ean kanpai bueltakoa eta pregoia izan ziren, festei ofizialki hasiera emateko. Ondoren, giro ederra nagusitu zen sagardo dastaketaren bueltan, eta gauera arte luzatu zen festa, Mirua eta Balantza erromeriaren kontzertuekin.

Asteburuko kronika

Larunbatean, kirolak izan zuen protagonismoa herrian. 12:00etan jokatu zen pelota partiduen finala, eta Unai Eguren eta Aetz Elorza izan ziren txapeldunak.

Arratsaldean, berriz, Andra Mari bola txapelketa jokatu zuten, eta Mikel Oria nagusitu zen. Jarraian, herritarren arteko herri kirolen eta aizkora desafioaren txanda izan zen. Herri kiroletan gazteak izan ziren nagusi.

Atzo, berriz, aurtengo jaiei agur esateko eguna izan zen. Dantza, jan-edana, musika eta bertsoak gailendu ziren herrian. Arratsalde partean herritarrek mozorro koloretsu zein originalak atera zituzten kalera eta festa giroa izan zen protagonista. Egunari eta jaiei amaiera emateko, herri afaria eta mozorro desfilea egin zituzten plazan.

Urbiara mendi irteera Oamendirekin

Goierriko Hitza — 2026-07-29 12:25:49

Zeraindarrek ere Urbian ospatuko dute San Inazio eguna. Oamendi kirol kluba antolatuta, Urbiara oinez joateko mendi irteera antolatu dute ostiral honetarako. 9:30ean Aldaolako parkinean egin dute hitzordua handik, Urbiara joateko. Izena emateko oamendikirolkluba@gmail.com-era idatzi daiteke.