Goierriko Hitza

Txistu doinuekin hasi dituzte Santikutzak Legazpin

Goierriko Hitza — 2026-04-30 20:02:51

Hasi dira Santikutz jaiak. Jendetza bildu da arratsaldean herriko plazan, aurtengo festei hasiera emateko. Aurten Goiz Deia txistulari bandari egokitu zaio udaletxeko balkoitik pregoia egitea, txistu doinuaz lagunduta ondoren. Ondorengo txupinazoarekin lehertu da festa, eta kalean izan du segida jai giroak, erraldoi eta buruhandien ohiko kalejirarekin.

Txupinazo ofizialaren aurretik, gazteek ere egin dute jaiak hasteko ekitaldia Gaztetxean. Suziria bota ondoren, kalejiran jaitsi dira erdialdeko kaleetara.

Jaietako lehen txanpa igandera arte da, eta hurrengo asteburuan Kapela dantzarekin eta Mirandaola egunarekin amaituko dira.

Honela eman diete hasiera txistulariek aurtengo jaiei, Maider Apaolaza eta Iker Azpeitiaren hitzetan:

Arratsaldeon Legazpi!!

Ohituago gaude mikroa beharrean eskuan txistua edukitzera, baina herriko jaien hasiera iragartzeko aukera ez da urtero izaten eta aprobetxatu behar.

Jaiak gaur hasiko ditugun arren, errodajea egina ekartzen dugu batzuk, pasa den astean, beste urte batez, Korosti dantza taldeak antolatzen zuen Oin Puntetan asteburuan parte hartu genuelako. Horretaz gain, lehen aldiz, Gaztetxeak Gazte Festak antolatu zituen. Blusak soinean ekintza guztiek izan zuten arrera ikusita, ziur gaude datozen urteetan ere ekimen honekin jarraituko dutela, bejondeiela!!!

Bueno, eta aurten zer? Ba aurtengorako ere egitarau oparoa prestatu dute bai jai batzordeak, baita Txo!Esnako kideek ere. Txistulariak, urtero bezala egitarau horretako hainbat ekintzetan izango gara; kalejiretan, Olaria eta Ezpata dantza ekitaldian edo datorren astean ospatuko diren Kapela dantza edo Mirandaola egunean adibidez.

Hala ere egitarauak gutxi balio du herritarren parte hartzerik gabe. Bete dezagun Plaza, bete dezagun Azoka eta nola ez, bete ditzagun kaleak. Herritarrok gara festa guztien arima eta muina. Herritarrik gabe ez dago festarik, herritarrik gabe ez dago girorik. Egun zoragarri batzuk ditugu aurretik. Kanta dezagun, dantza dezagun, parte hartu dezagun eta nola ez, ondo pasa eta goza dezagun!!

Ondo pasa dezagun, ondo pasatzen utziz….

Ondo pasa dezagun ondoan daukaguna errespetatuz…

Ondo pasa dezagun, pasatu gabe….bueno…. sobre la martxa….

Bilakatu ditzagun kaleak espazio seguru eta eroso bat guztiontzat eta ospa ditzagun jaiak pozez, arduraz eta elkar zainduz.
Azken finean, bakoitzak bere nota eman dezala guztion artean musika eta armonia sortuz.

Eta gehiegi luzatu gabe mikroa utzi eta txistua hartuko dugu, erraldoiekin batera jaiei bals batekin hasiera emateko. Erraldoiak prest?

Ba besterik gabe, ondo pasa jaiak eta…

GORA LEGAZPI!

GORA SANTIKUTZAK!

GORA EUSKADI TXISTULARI!

Ion Izagirrek Frantziako Tourrean parte hartuko du

Goierriko Hitza — 2026-04-29 10:31:36

Ion Izagirrek (Ormaiztegi, 1989) Frantziako Tourrean parte hartuko duela iragarri du Team Cofidis taldeak. 37 urte bete berritan, profesionaletako azken denboraldia hau izango zuela jakinarazi zuen iaz. 12. aldiz ariko da itzulirik handienean. Bartzelonatik abiatuko da aurtengo Tourra, uztailaren 4an.

Denboraldi hasiera bikaina egiten ari da ormaiztegiarra. Apirilaren 4an Miguel Indurain-Lizarrako Sari Nagusia irabazi zuen, eta hurrengo astean bikain aritu zen Euskal Herriko Itzulian. Laugarren bukatu zuen sailkapen orokorrean. Paris-Nizan 7. amaitu zuen eta Ardenatako Klasikoetan lehiakor aritu da.

Frantziako Tourren bi etapa irabazitakoa da Izagirre, lehena 2016an eta bigarrena 2023an.

Literatur solasaldia asteartean, Liburuaren astearen baitan

Goierriko Hitza — 2026-04-27 12:51:47

Apirilaren 22an hasita, Liburuaren astea ari dira ospatzen Ormaiztegin, Liburuaren Egunaren harira. Pasa den astean, haur eta familien arteko ipuin kontaketa arrakastatsua eta San Andres herri eskolako ikasleen arteko kontakizunak izan zituzten. Ostiralean, Ormaiztegin bizi den Maite R. Otxotorena idazleak Lo nuestro bere azken eleberria aurkeztu zuen herritarrei aurrean, gizarte etxeko aretoa beteta zela.

Liburuaren nazioarteko eguneko egitarauaren hurrengo geltokia bihar izango da, herriko irakurle taldearen literatura solasaldiarekin, 18:00etan. Ane Zubeldiaren Kontra poesia liburua landuko dute bertan, Miriam Lukik gidatuta. Asteazkenean emango diote amaiera Liburuaren asteari, Ameli taldearen Udaberriko istorioak ipuin kontaketa musikatuarekin. 4 urtetik gorako haurrak dituzten familiei zuzendutako saioa da, liburutegian 17:00etan egingo dena. Saio hauetara bertaratzen diren lagunen artean hainbat libururen zozketa egingo da.

‘Soinua ak zeinu ak soinu’ lana aurkeztu du Maialen Lujanbiok

Goierriko Hitza — 2026-04-23 13:58:09

Zumalakarregi museoaren Artxibo praktikak proiektuaren baitan, Soinua ak zeinu ak soinu erakusketa ondu du Maialen Lujanbiok. Goizean egin dute erakusketaren aurkezpen ekitaldia eta arratsaldeko 19:00etan izango da inaugurazioa, gaur. Aldi baterako erakusketa izango da eta abendura bitartean egongo da ikusgai.

Artxibo praktikak programaren bitartez, «Zumalakarregi museoaren XIX. mendeko artxiboa beste begirada batetik aztertzea da helburua» Mikel Alberdi Zumalakarregi museoko artxibo arduradunak azaldu duenez; historialarien ikuspuntutik harago, artisten begiradatik «berrinterpretatzeko». Pedro G. Romero artista andaluziarrak egin zuen iaz programa honetako lehendabiziko azterlana eta atzo aurkeztu zutena, bigarrena da. Zumalakarregi museoarentzat horrelako artistekin lan egitea «sekulako pribilegioa» dela azpimarratu du Alberdik.

XIX. mendean kokatuta, garai hartako gainbegiratu bat egiten du erakusketak komunikazioaren parametroen barruan. Erakusketa bihurtu den proposamen hau «ahotsak idazteari buruz da, edo mezuak irudikatzeari buruz edo soinuak zeinu bihurtzeari buruz», azaldu du Lujanbiok aurkezpen ekitaldian. Erakusketak bidaia bat proposatzen du «ahotsezko edo ahozko mundu bat bizi duen garai batetik, komunikazio teknologikoetan barrena gaur eguna iradoki arte». Lujanbiok begiratu «subjektiboa, literarioa, poetikoa eta artistikoa» egin du XIX. mendeari buruz; ez da «historikoki milimetrikoa izan nahi duen begiratu bat. Irakurketa librea da».

Hizkuntza kodetua

Artxiboetan bila zebilela, hizkuntza kodetuan idatzita zegoen eskuizkribu bat izan zen erakusketarako «txinparta» piztu ziona. «Izatez bat baino gehiago zeuden eta kode ezberdinetan idatziak», gehitu du. Gutun zifratu horien bitartez, «ahotsa idatzi beharraren ideia horrek eraman ninduen automatikoki ahozko mundura eta ahozko mundutik idatzizko mundura doan pauso horretara».

Udarregi bertsolariaren figurak segituan egin zuen bat Lujanbioren hasierako ideia harekin, «Udarregik, garaiko biztanle xehearen gehiengoak bezala, ez zekin ez irakurtzen ezta idazten ere. Baina kode propio bat asmatu zuen —ganbarako zutabeetan marrak eginez— berak sortutako bertso haiek gordetzeko eta berriz ikusten zituenean berari gogora ekartzeko». Udarregi XIX. mendean jaio eta bizi zen bertsolaria izan zen eta gerren eta karlistaldien bertsoak, besteak beste, ere jarri zituen.

Udarregi jaio zen urte berean sortu zen braille hizkuntza, mende horretan morsea; «eta zalantzarik gabe kodeen hizkuntza honetan arakatzen hasi nintzen, hizkuntza guztiak direlako finean kode adostuak. Eta hizkuntzak erabiltzen direlako bai komunikatzeko, baina baita ezkutatzeko ere», zehaztu du egileak. Erakusketa binomio horretan, agerikoa eta ezkutukoa, oinarrituta dago bere osotasunean: «Dena da esaten denaren eta esan nahi ez denaren arteko zerbait». Karlistaldien testuinguruan kokatuta, kode hizkuntza hau zuzenean dago lotuta gerrarekin.

Hiru lengoia

Erakusketa hiru lengoaia ezberdinetan dago aurkeztuta: irudiak, zeinu idatzia, «alfabeto propio bat sortu dugu erakusketako mezuak helarazteko» eta ahotsa —bertsoak—. «Hiruetako bat ere ez da osoa, denei puskak falta zaizkio. Hiru bideak kordatuz osotasun bat jasoko dugu, ikusiz, irakurriz eta entzunez», zehaztu du. Marmol Estudiok egin ditu erakusketarako diseinu lanak soinuaren edizioaz Xabier Erkizia arduratu da. Erakusketa Irizarrek babesarekin egin da.

«Iluntasuna eta gaua ageri dira liburuan, baita mitoak eta kondairak ere»

Goierriko Hitza — 2026-04-22 07:33:07

Maite R. Otxotorena (Donostia, 1970) Ormaiztegin bizi da azken hamar urtetan. Zinemako eta telebistako gidoigintzako ikasketak egin zituen eta bideojokoen munduan lan egin zuen urte askotan, sortzaile gisa. Idaztea izan da, dena den, haurra zenetik gehien gustatu zaiona, eta 2007an argitaratu zuen bere lehendabiziko eleberria: El secreto de la Belle Nuit. Ordutik beste hainbat nobela idatzi ditu eta azken hau, Lo nuestro 11. da.

2023an argitaratu zenuen Planeta argitaletxearekin Un desierto de hielo. Eko-thriller bezala definitu zenuen eleberri hura. Oraingo hau ere genero berekoa al da?
Misterioa badago, baina oso ezberdina da. Azken lau urte hauetan nire bizitzan oinarrizkoak ziren lau pertsona galdu ditut, aita eta ama tartean. Nobela hau galera horiek eragin dizkidaten emozioez josita dago: amorrua, inpotentzia, zurztasun sentimendua… Asko kostatu zait eleberri hau idaztea, baina era berean lagungarria ere izan da. Eleberri intimistagoa da, limurtzaileagoa, puntu magiko bat ere badauka oso musikala bizi izan ditudan emozio guzti horiekin bat datorrena.

Non kokatuta dago istorioa?
Goierrin kokatuta dago, Zerainen zehazkiago. Eleberrian ez diot Zerain izena eman nahi izan, ez delako zehazki Zerain, baina Zeraingo auzo baten izena erabili dut: Barbari. Hasiera batean meategien gaiaz aritu behar nuen, baina azkenean atera denak ez du zerikusirik, ez baitzuen nik kontatu nahi nuen istorioarekin bat egiten.

Baserriaren mundua oso presente dago eleberrian.
XVIII. mendean girotuta dago eleberria. Baserriaren mundua da hari nagusia, baserriaren kultura, erroak, gizarte hartan baserriak zuen garrantzia ageri dira. Jendea ez zen abizenaz ezagutzen, baserriaren izenaz baizik, Aranekoak, Otatzakoak… ziren. Orduko gizarteak baserriarekin zuen loturan ere egiten dut azpimarra.

Sineskeriak eta mitologiak ere pisu handia dute istorioan.
Landa inguru batean garatzen da istorioa, ezaguna ez zen orori beldurra zioten leku batean. Iluntasuna, gaua ageri dira, baita mitoak eta kondairak ere. Sineskeria horiek eguneroko bizitzan erabateko eragina zuten eta horien arabera bizi ziren.

«Istorioa Goierrin kokatuta dago, Zerainen zehazkiago; baina eleberrian Barbari deitu diot»

Zein da hari nagusia?
Barbari izeneko herrian neska gazteak euren etxeetatik desagertzen hasiko dira, nahiz eta etxeak babesteko Eguzkiloreak jarri edo errituak egin gaizkia barrura sartzea eragozteko. Hori horrela, apaiz gazte bat iritsiko da herrira adinean aurrera doan Barbariko parrokoari laguntzeko. Egoera konplexu batean aurrean aurkituko du bere burua eta misterioa argitzeko zailtasunak izango ditu herritarren aldetik, arazoak etxe barruan konpontzera ohituta dagoen gizarte baten aurrean.

Oso istorio korala dela diozu.
Bai, Martin protagonista dago batetik, —apaiz gaztea— baina beste pertsonai asko ere badaude, bakoitza bere istorio propioarekin. Nire eleberri gehienak pertsonaia askokoak izan ohi dira, baina honetan are gehiago. Pertsonaia guzti hauek baliatu ditut baserriko bizitza bere horretan kontatzeko eta sineskeria eta mito guzti horiek hobeto erretratatu ahal izateko.

Ordu asko sartu al dituzu Zerainen idazten hasi aurretik?
Asko. Zeraingo turismo bulegoko Aloña Aranburuk Zeraingo ohiturei eta baserrien egiturei buruzko liburu bat utzi zidan eta oso baliagarria izan zait idazterako orduan. Mitologia gaiei buruz, Joxe Miel Barandiaranen ikerketak izan dira inspirazio iturri nagusiak. Ikerketa lan handia suposatu dit, hiru urte kostatu zait liburua amaitzea.

Lo nuestro autoeditatua izan da, zergatik?
Planeta agentziak guztiz bestelako eleberri bat nahi zuen; nire istorioa editorialek gaur egun dituzten exijentzietara egokitzea nahi zuten. Beste eko-thriller bat egitea nahi zuten, baina nik ez ditut inoiz istorioak errepikatzen. Ez daramat batere ondo literatur genero bakarrean lerrokatzea edo agentziek horrenbeste zuzentzea, are gutxiago liburu honekin. Errespetu bat zor nion eleberri honi; aldatzea nire buruari traizioa egitea litzatekeela pentsatu nuen eta horregatik autoeditatu dut. Amazon plataforman dago salgai paperean eta bertsio elektronikoan.

Kubarako oinarrizko produktuen bilketa, apirilaren 25ean

Goierriko Hitza — 2026-04-20 14:56:35

Goierriko Ikasle Antolakunde Sozialistak eta Goierriko Kontseilu Sozialistak Kubarako bilketa solidarioa antolatu dute Euskadi-Cuba elkartearekin elkarlanean eskualdeko beste hainbat puntutan, ikastetxeetan egindako deialdiaz gain. Goierriko sei herritan antolatu dituzte Kubara bidaltzeko oinarrizko produktuen bilketak apirilaren 25erako.

Euskal herritarrei Kubako herriari elkartasuna adieraztea dagokie erakundeen esanetan, eta “inperialismoaren aurka mobilizatzeko eta gizatasunez jarduteko” deia egin dute: “Kubako herria muturreko egoeran dago AEBen blokeo kriminala dela eta. Trump presidente faxistaren genozidio saiakera egiten ari da: erregaiak ez dira iristen, itzalaldiak orokortzen ari dira, oinarrizko produktu gehienen eskasia dago… Kuba elkartasun internazionalistaren eredu izan da hamarkadetan zehar, modu guztiz desinteresatuan. Sozialismoan oinarritutako elkartasuna erakutsi dio Kubak munduari. Orain guri dagokigu Kubako herriari elkartasuna adieraztea”, aldarrikatu dute.

Apirilaren 25ean 10:00etatik 13:00etara egongo dira produktuak jasotzen. Hauek dira bilketa puntuak:

Beasain

Erosky City (Zaldizurreta kalea)
Senpere Merkatal Zentroa
Eroski (Nafarroa Etorbidea 45)
Kale Nagusia
Eroski (Mariarats Kalea 4)

Ordizia

Eroski (Filipinak kalea 10)
Kale Nagusia

Zaldibia

Plaza

Ormaiztegi

Erosle

Legazpi

Kale Nagusia
Laubide

Urretxu

Zumarragako Eroski City (Urdaneta Hiribidea 2)

Hodei Fernandez Espainiako txapeldun, Torreviejan

Goierriko Hitza — 2026-04-20 11:54:09

Hodei Fernandez Fajardo atleta ormaiztegiarrak asteburu honetan Torreviejan (Valentziako Erkidegoa) jokatu den Espainiako txapelketan bi domina eskuratu ditu 18 urtez apizkoen mailako T20 mailan, Espainiako txapeldun izendatuta.

Fernandez FEDDI mailan —Desgaitasun intelektuala duten kirolarien mailan— aritzen da lasterka Basauriko (Bizkaia) Club Paralimpico Ascensores Bertako Javi Conde taldearekin. Garaipenak batzen dabil korrikalari ormaiztegiarra, azkenak asteburu honetan Espainiako txapeldun izan baita 1.500 metro eta 400 metroko lasterketetan.

Ion Izagirrek Migel Indurain saria irabazi du

Goierriko Hitza — 2026-04-04 17:33:51

Lizarran (Nafarroa) jokatu den Migel Indurain Saria Cofidis taldeko Ion Izagirre ormaiztegiarrak irabazi du. Laugarren postuan sailkatu da bere taldekide den Alex Aranburu ezkiotarra. Mendiko sailkapena ere, Izagirrerentzat izan da.

Izagirrek hirugarren aldiz irabazi du Indurain saria, bere txirrindularitza ibilbidea agurtuko duen urtean.

Astelehenean, Itzulian parte hartuko dute bi goierritarrek.

24. Korrika Goierrin. Ezkio-Itsaso-Ormaiztegi

Goierriko Hitza — 2026-04-01 08:22:46

Xirikararen ‘Ama begira zazu’ bihar, Ormaiztegin

Goierriko Hitza — 2026-03-26 15:34:36

Ama begira zazu antzezlana eskainiko dute bihar, 24. Korrikaren harira. Segurako Xirikara antzerki taldeak berreskuratu du antzezlan mitikoa eta hasita dago herriz herri saioak eskaintzen. Ormaiztegin 19:30ean egongo da ikusteko aukera bihar, San Andres herri eskolako Karramarro gunean. Korrika bihar, 9:22an iritsiko da Ormaiztegira. Ondoren, txokolatea eta bizkotxoa egongo da parte hartzaile guztientzat herriko plazan.

Urmaizen kontzertua, igandean

Goierriko Hitza — 2026-03-25 17:15:53

Urmaiz abesbatzak kontzertua eskainiko du igandean, San andres elizan, Erramu igandeko meza nagusiaren ondoren (12:00). Javier Alberdik zuzenduko du emankizuna eta Alberto Saez Puente arituko da pianoan. Kantakako lagunek ere hartuko dute parte kontzertuan.

‘Por amor se ve’ erakusketa ireki dute Ormaiztegin

Goierriko Hitza — 2026-03-17 13:44:40

Emakumearen egunaren harira egitarau zabala prestatu dute Ormaiztegin. Horren harira, pasa den ostiralean Por amor se ve erakusketa ireki zuten gizarte etxean. Erakusketa Maria Pilar Horrego artista kubatarrarena da eta apirilaren 12ra arte egongo da ikusgai.

Ostiraleko irekiera ekitaldian jende ugari elkartu zen gizarte etxean eta bertaratu zirenek Horregoren azalpenak entzuteko aukera izan zuten.

Egitarauari irakurle taldeak emango dio itxiera. Martxoaren 24an elkartuko dira El encaje roto: antologia de cuentos de violencia contra las mujeres eleberriaren inguruan mintzatzeko. Ohi bezala Monica Leiva kazeriariak gidatuko du saioa, 18:00etatik aurrera gizarte etxean.

Legazpiko Goiherri jatetxekoa eta Ormaiztegiko Arantxa tabernakoa, Euskadiko patata tortilla onenen artean

Goierriko Hitza — 2026-03-11 14:48:22

Euskadiko Erkidegoko tortilla onenen artean Goierriko bi daude, bata Legazpikoa eta bestea Ormaiztegikoa. Hala erabaki zuten atzo Gasteizen, Euskadiko Patata Tortilla txapelketaren hirugarren edizioan.

Legazpiko Goiherri jatetxeko Jon Agirrek bigarren saria irabazi zuen atzo tortilla berezien artean, aparteko osagai gisa plantxan erretako a feira txerri-belarria erabilita. Agirrek Amaia Estalayo eta Imanol Gonzalez de Audikana izan zituen laguntzaile sukaldean.

Ormaiztegiko Arantxa tabernako Ane Etxeberriak, berriz, hirugarren saria jaso zuen ex aequo, Getxoko El Atrio tabernarekin batera, betiko tortillarekin.

Sari horiekin, bi establezimenduek txartela eskuratu dute urriaren 2tik 5era bitartean Alacanten jokatutako den Espainiako txapelketarako.

Goierritik ere izan ziren ordezkari gehiago Gasteizko atzoko saioan, Urretxuko Berit eta Aitube Berri tabernak, hain zuzen.

Guztira 35 partaide izan zituen Euskadiko txapelketak: Gipuzkoako hamar, Arabako hamaika eta Bizkaiko hamalau. Tortilla tradizionalaren saria Gasteizko Sagartokik irabazi zuen, eta tortilla bereziarena, Donostiako La Taberna de Egiak.

Ane Etxeberria Ormaiztegiko sukaldaria.

Belaunaldi arteko Ttipi-ttapa morea egin dute Ormaiztegin, Martxoaren 8ko egitarauren baitan

Goierriko Hitza — 2026-03-11 11:56:36

Ormaiztegiko Oin-harriak jubilatu elkarteak eta San Andres herri eskolak elkarlanean Ttipi ttapa morea egin dute gaur goizean, belaunaldiartekoa eta musikatua. Azken urteetako ohiturari jarraituz, Martxoaren 8a dela eta, kontzientziazio eta sentsibilizazioa egitea da topaketaren asmoa, ikasturte osoan zehar jarraipena duen belaunaldi desberdinak elkartu eta batak besteagandik ikasteko ibilaldia aitzakia hartuta.

Aurretik Martxoaren 8an, igandean, Ordizian egin zen eskualdeko mailako manifestazioan parte hartu ondotik, emakumeen eguneko txokolate jana egin zuten ormaiztegiarrek arratsaldean, gizarte etxean. 50 bat herritar inguru bildu ziren, eta Zumalakarregi museoko komunikazio eta hezkuntza arduradunaren eskutik, Eulalia Borboikoa printzesaren bizitza ezagutzeko aukera izan zuten bertan.

Gaur ipuin kontaketa

Egitarauarekin jarraituz, gaur arratsaldean Lili eta herensugea ipuin kontaketa egingo du Maider Altzelaik, 6 urtetik gora haurrei eskainia. 16:45ean izango da udal liburutegian.

Emakumearen egunaren harira antolatutako egitarauak ostiralean izango du jarraipena. Maria Pilar Horrego artista kubatarraren Por amor se ve erakusketa irekiko dute gizarte etxean 18:30ean. Erakusketa apirilaren 12ra arte egongo da ikusgai.

Larunbatean, 7 eta 12 urte arteko haurrei zuzendutako Herriko sekretuaren bila ihes gela izango da 17:00etatik 19:00etara gizarte etxean B:ATUk gidatuta. Amaitzeko, herritar guztiei irekita, Eskailerapekoa bakarrizketa saioa egingo dute Idoia Torregaraik eta Mirari Martirenak martxiaren 15ean, 18:30ean gizarte etxean.

Paris-Niza lasterketa, Izagirreren hurrengo hitzordu nagusia

Goierriko Hitza — 2026-03-04 10:01:15

Ion Izagirre txirrindulari ormaiztegiarrak Paris-Niza (Frantzia) lasterketan du denboraldi hasierako hurrengo hitzordu garrantzitsua. Martxoaren 8tik 15era jokatuko da txirrindularitzako World Tour egutegiko lasterketa entzutetsuenetakoa. Acherezen (Yvelines) hasi eta Nizan amaituko da aurten 84. edizioa beteko duen lasterketa. Guztira 22 taldek hartuko dute parte eta lehia ziurtatuta egongo dela aurreratu dute.

Nazioarte mailako txirrindulari onenak bilduko ditu beste behin lasterketak. Jonas Vingegaard danimarkarra da faboritoa eta harekin batera azpimarratu ditu antolakuntzak Joao Almeida (UAE Emirates XRG) portugaldarra, Daniel Felipe Martinez (Red Bull-Bora-Hansgrohe) kolonbiarra edo Juan Ayuso (Lidl-Trek) katalana.

Ormaiztegiko irakurleak Itziar Otegi idazlearekin

Goierriko Hitza — 2026-03-02 13:31:55

Pasa den asteartean Itziar Otegi idazlearen bisita jaso zuen Ormaiztegiko irakurle taldeak. Irakurle taldeko zazpi kide hurbildu ziren hitzordura. Oraingoan, gizarte etxeko areto nagusian elkartu ziren eta landutako liburua ‘Ezer ez dago utzi nuen tokian’ izan zen. Ohi bezala, Miriam Luki idazle eta kazetariak gidatu zuen saioa.

Sahararen alde egin dute korrika Ormaiztegin

Goierriko Hitza — 2026-02-22 14:24:30

Giro paregabea izan dute ormaiztegiarrek 17. Sahararen aldeko krossean. Kirol hitzordua izan den arren, elkartasuna eta aldarrikapena ardatz hartuta, Sahararen aldeko jaialdi bilakatu da beste behin.

Ohi bezala, haurrentzako eta helduentzako lasterketak egin dituzte: 11:00etan haurrena eta 12:00etan helduena. Udaletxe aurretik hasita herri barruan zeharreko ibilbidea osatu dute haurrek, adinka banatuta. Ondoren, kategoria bakoitzeko sari banaketa egin dituzte, eta 12:00etan helduak abiatu dira bi distantziatan: 5km eta 10km-tan. Lasterketa ohiko formatuan egin dute eta iazko ibilbide bera mantendu dute.

SAILKAPENA:

5km

Gizonezkoak:

Haritz Garin
Jon de la Cuesta
Hodei Fernandez

Emakumezkoak:

Amaia Aristu
June Azpiazu
Euri Yurrita

Lehenengo herritarrak: Hodei Fernandez eta June Azpiazu

10km

Gizonezkoak:

Adrian Pajares
Mikel Fernandez
Xabier Sanchez

Emakumezkoak:

Enara Agote
Miren Josune Dia Caneja
Ainhoa Urteaga

Herritarrak: Iban Iturri eta Asun Jauregi

Literatur solasaldia Ormaiztegin, asteartean

Goierriko Hitza — 2026-02-20 13:04:26

Ormaiztegiko irakurle taldeak literatur tertulia egingo du otsailaren 24an, asteartea. Itziar Otegiren (Oiartzun, 1972) Ezer ez dago utzi nuen lekuan eleberria izango dute mintzagai, idazlea bertan dela, Miriam Lukiren gidaritzapean. Solasaldirako hitzordua 18:00etan da liburutegian.

Elkartasunaren lasterketa

Goierriko Hitza — 2026-02-18 13:42:45

Sahara Kros elkartasunezko lasterketaren 17. edizioa jokatuko dute datorren igandean Ormaiztegin, eta aurkezpen ekitaldia egin dute gaur goizean, Sahara Kros elkarte antolatzaileko Garazi Hach Embarek eta Ibai Gerenabarrenak. Otsailaren 27an, Mendebaldeko Saharako Errepublikaren aldarrikapen eguna ospatuko dute, aurten bere 50. urteurrenean. Egun horretan maratoia egin ohi da errefuxiatuen kanpalekuetan eta ekimen horri keinu egiteko asmoz sortu zuten Sahara Kros lasterketa Ormaiztegin.

Ohi bezala, haurrentzako eta helduentzako lasterketak antolatu dituzte aurten ere. Ibilbidean eta antolaketari dagokionean ez da aldaketarik izango, «iazko ibilbide bera izango da, jendeari asko gustatu zitzaion eta», esan du Gerenabarrenak. Ordutegiari dagokionez, ordu betez atzeratu dituzte bi lasterketak «parte hartzea errazteko» helburuz. Hala, haurren lasterketak 11:00etan hasiko dituzte eta helduenak 12:00etan, biak udaletxe paretik irtenda.

Haurren lasterketak adinaren arabera sailkatuta jokatuko dira, lau guztira. Amaieran, txupete lasterketa irekia ere egingo dute, «familiei haur txikiekin parte hartzeko aukera» eskainiz. Helduek 5 edo 10 kilometroko lasterketak izango dituzte aukeran. Izen ematea dagoeneko irekita dago kirolprobak.com web gunean; eta egunean bertan ere aukera izango da 9:45etik aurrera. Izen emateak 20 euroko prezioa du eta korrikalariek dortsala eta kamiseta jasoko dituzte opari. Ohi bezala, bildutako diruaren zati bat Saharan elkartasun proiektuak bultzatzeko bideratuko da. Izena ematerako orduan, haurrei eskolako materiala eramateko deia egin diete berriz. Bildutakoa saharar errefuxiatuen kanpalekuetako haurrei emango zaio gero.

Borrokak aurrera darrai

Lasterketa bat baino gehiago da Sahara Kros, saharar herriaren borrokaren bozgorailu ere baden neurrian. Mendebaldeko Saharar Errepublika aldarrikatu zela 50 urte betetzen diren honetan, «orain inoiz baino beharrezkoagoa da gogoraraztea arazoak bere horretan jarraitzen duela; Fronte Polisarioaren eta Maroko armadaren arteko gerrak bizirik dirauela lurralde liberatuetan, nahiz eta Maroko estatuak onartu ez», esan du Hach Embarekek.

Nazioarteko politikari dagokionean AEBetako Trump presidenteari ere egin dio erreferentzia, «ezin da onartu Trumpek Marokori eman nahi dion subirotasuna», esan du, eta gogorarazi du, Europako Nazio Batuen erresoluzioaren arabera, Espainiako kolonia izaten jarraitzen duela eta ondorioz «berari dagokio saharar herriari dagozkion eskubideak ematea».

Lasterketaren aurretik, ostiralean, Sahara eguna egingo dute San Andres herri eskolan, «haurrei, bakoitzaren adinaren arabera, gatazkaren nondik norakoak azaltzeko». Iaz hasitako bideari jarraituz, lasterketan bildutako dirua Mendebaldeko Saharako lurralde okupatuetara bideratuko dute, bertan bizi diren emakumeen beharrei erantzuteko helbuarekin.

Ramon Oleaga Paramo bildumagileak solasaldia egingo du Zumalakarregi museoan

Goierriko Hitza — 2026-02-16 13:08:20

Gipuzkoa behin betiko: Lurraldea XIX. mendean aldi baterako erakusketaren baitan, Gipuzkoako kartografian sakontzeko saioa antolatu dute Ormaiztegiko Zumakalakarregi museoan. Ramon Oleaga Paramo, “Euskal Herriko kartografia bildumagilerik handienetako bat” gonbidatu dute oraingoan eta solasaldia eskainiko du gazteleraz, Cartografía: Gipuzkoa en Euskal Herria izenburupean.

Bildumagilea Oleaga-Pont bildumaren arduraduna da eta Gipuzkoako hainbat mapa erakutsi eta azalduko ditu solasaldian zehar. Datorren ostegunean izango da, otsailak 19, 19:00etatik aurrera.

Aranguren Txiki, Ormaiztegiko bilakaeraren testigu isila

Goierriko Hitza — 2026-02-12 08:05:14

Ormaiztegiko historiaren eta bilakaeraren testigu isila izan da mendeetan Aranguren Txiki baserria. 1755ean eraikia, —271 urte bete zituen iaz— XIX. mendearen erdialdetik, Elorza sendiaren bizitokia izan da bost belaunaldiz. Beheko auzoa izenez ezagutzen den eremuan kokatua, —AP-636 autobideak GI-2632 errepidearekin bat egiten duen gunetik gertu—, geratzen zen azkenetariko baserrietako bat zen Aranguren Txiki. Urtarrilaren amaieran hasi zituzten baserria botatzeko lanak eta haren desagerpenak herriko ondarearen eta memoriaren zati baten galera ere suposatu du.

Angel Elorza Aranguren Txiki baserrian jaio zen eta bere desagerpena «kolpe handia» izan da, beretzat ez ezik, baita familia osoarentzat ere. Elorzatarrak 1800 urtea pasatxoan iritsi ziren Aranguren Txikira, Seguratik joanda. «Nik aitona eta izeba-amona ezagutu nituen baserrian. Gure amona gazterik hil zen eta haren ahizpa bat etorri zen familiaz arduratzera», kontatu du. Angelen aita baserrian jaio zen eta ama Oñatikoa zuen.

Baserri auzoa
Elorzatarrak beti bizi izan ziren baserritik, Angelen aita izan zen fabrikako lana eta baserrikoa uztartu zituen lehena: «Baserritik gertu zegoen Zelaikoa teila fabrikan hasi zen lanean. Geroago, Irizarrera joan zen eta han jubilatu zen», kontatu du. Anaia zaharrena ez zen arren, Angelen aita geratu zen Aranguren Txikin eta bertan jaio ziren, gero, bost anai-arrebak, Angel tartean.

«Sanjoanetan festa handia egiten genuen. Orain autobidea dagoen lekuan, erdi-erdian egiten genuen sua. Auzoko umeen jolaslekua ere bazen hura»

«Arrebak asko borrokatu zuen ezponda hori segurua izateko bermeak eskatzen. Beheko auzoarekin komunikazioa errazteko tunel bat egitea ere bere ahaleginaren emaitza izan zen»

Angel Elortza. Arangure Txiki baserrian jaioa

29 urte zituela joan zen «kalera» bizitzera Angel, baina inoiz ez du baserriarekiko harremana eten. Baserri auzoa zen garai hartan Beheko auzoa: «Sanjoanetan festa handia egiten genuen. Orain autobidea dagoen lekuan, erdi-erdian egiten genuen sua. Auzoko umeen jolaslekua ere bazen hura». Kanpotik etorkizun hobeago baten esperantzan zetozen horientzako habia ere izan zen auzoa, «teila fabrikara eta Iberdrolako zentralera» lan egitera etorritako familiena.

Lehenengo, autobidea
90eko hamarkadak ere, arrastoa utzi zuen baserriaren historian eta auzoa eraldatzen hasi zen. 1994-95 urteen artean hasi zituzten AP-636 autobidea egiteko lanak eta 1997an amaitu zituzten. Aranguren Erdikoa eta Aranguren Goikoa baserriak bota zituzten errepideari lekua egiteko eta Aranguren Erdikoa «bakartuta eta zintzilik» geratu zen, ezponda handi baten gainean. «Arrebak asko borrokatu zuen ezponda hori segurua izateko bermeak eskatzen. Beheko auzoarekin komunikazioa errazteko tunel bat egitea ere bere ahaleginaren emaitza izan zen», dio.

Geroago, 2009an, baserritik gertu luizi bat gertatu zen eta «harri-lubeta handi bat» egin behar izan zuten eremua egonkortzeko. «Gure baserriari ez zion eragin, baina hura izan zen lehendabiziko abisua», dio Elorzak. Izan ere, 2024ko urtarrilaren 6tik 7rako goizaldean luizi handiago bat gertatu zen, oraingo honetan baserritik 10 metro eskasera, «gogoan dut euri asko egin zuela aurreko egunetan. Ikaragarrizko lur jauzia etorri zen goitik behera». Urtarrilaren 7an Ormaiztegiko ziklo krosa ospatzen zen herrian, Elorza koordinatzaile lanetan zebilen orduan eta proba amaitu arte ez zioten berririk eman: «Ezbeharra gertatu zen momentuan koinatua eta iloba zeuden bertan. Ez zitzaien ezer gertatu. Eskerrak».

Hortik aurrerakoa jakina da. Lurraren desegonkortasun handia dela eta, Bidegiko teknikariek baserria botatzeko erabakia hartu zuten, segurtasuna bermatze aldera. Urtarrilaren erdialdean entregatu zituzten baserriko giltzak Elorzatarrek eta urtarrilaren 28an hasi zituzten eraisteko lanak. Familiarentzat «gogorra» izaten ari dela aitortu du Elorzak, eta nahiz eta jakin beste biderik ez zegoela, «inpotentziaz» bizi dute egoera.

Etapa baten amaiera
Baserriaren eraiste lanak amaituta, baserriaren azpian eta errepidearen alboan dagoen ezponda egonkortzeko lanekin jarraituko dute, luizi berriak gertatzea saihesteko. Esku hartze garrantzitsua da eta egonkortze lan hauek 488.947,93 euroko aurrekontua dute, BEZ gabe. Lanak lau hilabetetan amaitzea aurreikusi dute.

Etapa bat itxi da Elorzatarrentzat eta beste bati hasiera eman beharko diote etorkizunean; baina momentuz, kaxatan gordeta dituzte familiako bost belaunaldiren historia osatzen duten baliozko gauzak. Baserria ez dago jada, baina Elorzatarrentzat «leku kuttuna» izaten jarraituko du beti Beheko auzoak.

1996an, AP-636 autobidea egiteko lanak. ANGEL ELORZA

Beheko auzoa 1993an —goiko argazkian— eta 2020an —behekoan—. ANGEL ELORZA

Aranguren Txiki baserria, bota aurretik. ANGEL ELORZA

Urtarrilaren 28an, baserria botatzen hasi ziren egunean. ANGEL ELORZA