Zer da IBAN?
International Bank Account Number (IBAN) karaktere alfanumerikoen multzo bat da, munduko edozein finantza-erakundetako kontu jakin bat identifikatzen duena. Hau da, kontu bakoitzari IBAN bakarra dagokio, eta IBANaren bidez identifikatzen da herrialdea, erakundea, bulegoa eta kontua. Estandar bat da (EBS204) Banku Estandarren Europako Komitearena (www.ecbs.org), eta ISO 13616 estandarra ere betetzen du.
Zertarako balio du IBANak?
IBANaren helburua da mugaz gaindiko ordainketen eta kobrantzen tratamendua erraztea. Estandarrak datuak behar bezala igortzen direla bermatzen du, eta esku-hartzeak egiteko aukerak murrizten ditu. Horrenbestez, lagungarria da banku-kontuei buruzko datuak oker egiteak edo osorik ez adierazteak dakartzan kostu eta atzerapenik ez izateko.
Nolakoa da IBANa?
IBANak 34 karaktere alfanumeriko ditu, gehienez. Lehengo biak letrak dira eta herrialdea identifikatzen dute. Hurrengo biak kontrol-digituak dira, eta IBANa osorik baliozkotzen duten elementuak dira. Gainerakoak kontu-zenbakiari dagozkionak dira (kasurik gehienetan, erakundea eta bulegoa ere identifikatzen dute). Espainiako kasuan, lehenengo lau karaktereen atzetik egungo 20 zenbakiak doaz.
Hau da IBAN baten formatu egokia: PPXXnnnnnnnnnnn
Hor:
- PP: herrialdeari dagozkion bi letra dira (GB, FR, IT...)
- XX: kontrol-digituak dira, herrialdeari eta kontuari dagozkionak
- nnnnnnnnnnn: herrialdeko kontuari dagozkion digitu alfanumerikoak dira, eta ez du formatu jakinik, ez eta finkorik ere. Herrialdearen araberakoa da.
Zer da BIC eta zer egitura du?
Zenbatekoa jasoko duen bankuaren identifikazio-kodea da.
BIC kodeak egitura hau dauka:AAAABBCCDDD, non:
- AAAA: bankuaren kodea da (letrak)
- BB: herrialdearen kodea da (letrak)
- CC: zona geografikoaren kodea da (letrak eta/edo zenbakiak)
- DDD: bulegoaren kodea da
