Aberri Eguneko ekitaldiak egin dituzte Goierriko hainbat herritan
Euskal Herria Batera herri ekinbideak Aberri Eguneko ekitaldiak egin ditu gaur 12:30ean Euskal Herriko 129 hiri, auzo eta herritan, baita Goierriko hainbat herritan ere. Keinu bat batera goiburupean antolatutako ekitaldien oinarria, eta Txoriak txori, Gernikako arbola eta Ikusi mendizaleak kantuak izan dira.
Euskal Herria Batera herri ekinbideak Aberri Eguneko ekitaldiak egin ditu gaur 12:30ean Euskal Herriko 129 gora hiri, auzo eta herritan, baita Goierriko hainbat herritan ere. Keinu bat batera goiburupean antolatutako ekitaldien oinarria, eta Txoriak txori, Gernikako arbola eta Ikusi mendizaleak kantuak izan dira.
Beasaingo ekitaldiaren kasuan, dantzariaren agurra, Aitor Sarriegi bertsolariaren bertsoak eta Aitor Furundarena soinu jotzaileak gidatutako kantuak izan dituzte Zubimuzu plazan.
Euskal Herria Bateraren adierazpena irakurrita amaitu dute ekitaldia:
“Iaz bezala, aurten ere baldintza berezietan ospatu da Aberri Eguna. Dagoeneko urte bete duen pandemiak mugatu egin ditu berriro mugitzeko eta elkartzeko genituen aukerak. Gainera, denbora honetan metatu egin dira sufrimendua eta nekea. Ondorioz, gure aldarte kolektiboa ez zen inoizko egokiena ospakizunetarako.
Hala ere, iaz bezala, gure taldearen proposamenak berriro mugiarazi ditu milaka herritar Euskal Herri osoan, eta keinu bat egin dugu batera, komunitate sentitzen garela sentitu nahi dugula adierazteko.
Horrenbestez, gure iazko irakurketa berresten dugu aurten ere:
Mundu zabalean komunitarismoa ari da indartzen globalizazioaren arriskuei aurre egiteko, lurraldeak eta haien gainean trinkotzen diren komunitateak dira tresnarik egokiena pertsonei bizitza duina eta eskubide berdintasuna bermatzeko. Nahi genuke Euskal Herria izatea halako komunitate bat, erabakimena eta eskubide politiko guztiak izango dituena, duintasuna eta bermeak eskaini ahal izateko.
Aurrera begira, bateratasuna areagotuko duen herrigintza behar du Euskal Herriak, etorkizuneko proiektu politikoen oinarria izango den komunitatea trinkotzeko. Herrigintza horretan erabili beharko dugu eztabaida demokratikoa beti, konfrontazioa behar denean eta lankidetza ahal den guztietan, herritarron, eragileen eta erakundeen indarrak norabide bateratuan jartzeko. Herrigintzan batera jardunda garatuko baitugu euskal lurraldeen eta herritarren arteko lankidetza, gero eta indartsuago izango den komunitatearen eraginez lor dezan Euskal Herriak erabakimen osoa
Bide horretan, baliagarria izan daiteke Aberri Eguneko dinamika bateratzaile honi eustea eta urtean behin keinu bateratua proposatzea Euskal Herri osoko herritarrei, askotariko herritarrak protagonista kolektibo izan daitezen. Horrez gain, eta jarraipen hutsetik harago, uste dugu analisia zabaldu egin behar dela, eta aztertu ea nola lotu daitezkeen egun bateko keinua eta eguneroko herrigintza, zer nolako aliantzak eta erreferentziak eraiki behar diren hasitako bidean aitzinatuko gaituen dinamika sortzeko, eta Euskal Herri bateratua irudikatzen duen ikur, ereserki eta ekintzak sustatzeko.
Hausnarketa hori egiten saiatuko gara bihartik aurrera”.