Lopezek eta Larreak jantzi dituzte txapelak Txindoki krosean

Leire Lopez eta Ibai Larrea izan dira garaile Txindoki kroseko lasterketa nagusietan. Jende ugari bildu da Ordiziako Oianguren parkean Gipuzkoako kros txapeleketak ikusteko.

Aitor Garmendia

Ordizia

2022/02/13

Gipuzkoako txapelak izan dira jokoan Txindoki krosean. Ordiziako Oianguren parkean zehar ibili dira maila ezberdinetako 300 korrikalari inguruak. Goizeko bederatzietan hasi da lehen lasterketa eta eguerdira arte iraun du atletismo festak.

Emakumezkoen maila nagusiko lasterketan, Atletico San Sebastian taldeko Leire Lopez jaun eta jabe izan da. Master eta 16 urtez azpiko mailakoekin batera irten dira maila nagusiko emakumeak. Masterrek eta gazteek ibilbide laburragoa izanik, indartsu ekin diote probari. Horien lasterketa amaitzerako, ordea, Lopezek tartea ireki eta bakarrik egin du helmugara arteko bidea. Bere atzetik, Goierri Garaia taldeko bost kide heldu dira; bigarren postuan, Ainhoa Unanue eta, hirugarren, Lourdes Oyarzabal.

Gizonezkoetan, lehia estuagoa izan da. Lehen itzuliaren ostean, taldetxo batek hartu du lasterketa burua eta horrela mantendu dira probaren bigarren erdira arte. Orduan jo du erasoa Goierri Garaia taldeko Ibai Larreak. Segituan utzi ditu aurkariak atzean, baina Ibai Makazagak ez du etsi eta lasterketa airean egon da azken metroetaraino. Azkenean, Orioko Atletismo taldeko Makazagak ezin izan du Larrea gaztea menderatu. Hirugarren Goierri Garaiko beste kide bat iritsi da, Endika Donnay. Txindoki Atletismo taldeko Alex Iraola ordiziarra zazpigarren sailkatu da eta Gari Bravo lazkaotarra bederatzigarren.

: Leire Lopez, emakumezkoen maila nagusian garailea. /A.Garmendia

: Ibai Larrea, gizonezkoen maila nagusian garailea. /A.Garmendia

Gainerako mailetan denetik egon da: lasterketa oso lehiatuak eta hasieratik sekulako tartea lortu dutenak. Goierritarrek ere paper txukuna egin dute zenbait garaipen eta podium eskuratuta. 16 urtez azpikoetan Alaitz Gonzalok eta Txindokiko Urko Etxebestek lortu dute garaipena, talde bereko Haitz Urrestarazu hirugarren iritsi da. 18 urtez azpikoetan, Nahia Iraola ordiziarra nagusitu da emakumezkoetan, eta Aramendi anaiek eskuratu dituzte lehen bi postuak gizonezkoetan. 20 urtez azpikoan, Kalaka Gonzalez izan da azkarrena gizonezkoetan eta bigarren postua lortu du Unax Garcia ordiziarrak. Emakumezkoetan, berriz, Goierri Garaiko Izaro Larrañaga nagusitu da. Beteranoen lasterketetan, garaileak Iker Manso eta Adelaida Rubio izan dira, Goierri Garaiko Iker Larrea eta Idoia Garderen aurretik.

Azken lasterketak eskolartekoenak izan dira. Infantil, alebin eta benjamin mailako korrikalari ugari bildu dira Oianguko belardietan. Maila horietan ere, Goierritarrek zenbait domina eskuratu dituzte. Eguraldi ona lagun, publikoak erantzun ona izan du eta, eguerdirako, jende asko bildu lasterketak ikustera.