Ataungo gau mitologikoa gauekoentzat eta 1.200 bisitarirentzat izango da
Hamargarren aldiz egingo dute etzi Gau Ibilaldi Mitologikoa. Seiehuna laguneko bi taldek osatuko dute ibilbidea, herri bidean. Ordu erdi bat lehenago dira irteerak, Barandiaran Museotik.
![](https://goierri.hitza.eus/site/files/2024/07/ix__gau_ibilaldi_mitologik.jpg)
Hamargarren ekitaldira iritsi da Ataungo Gau Ibilaldi Mitologikoa, bi urtean behin Jentilbaratza kultur elkarteak antolatzen duen antzezpen-esperientzia. Zapatuan, etzi iluntzean egingo dute, ohi bezala San Gregorio auzotik San Martingo plazaraino doan herri bide zaharrean barrena. VII. Mitoaldia egitarauaren azkeneko jarduera izango da, bestetik.
Dagoeneko aurkezpenik behar ez duten osagaiak edukiko ditu aurtengo ibilaldiak: gauaren iluntasuna, izaki magikoen eta mitologikoen presentzia benetakoa, eta mundu miragarri batetik sartu-irtena egin izanaren kilimak.
Ehunka bisitari eta ikusle hartzeko guztia prest daukate antolatzaileek, eta muntaketan ari dira egunotan. Eguraldi ateriaren iragarpenaren itxaropenarekin, ari ere. Biharko euria, baina zapaturako lehorra egingo duela esan dute.
Guztira, 1.200 lagun elkartuko dira Gau Ibilaldi Mitologikoan. Bi txandatan banatuko dituzte, seiehunako multzoetan. 19:30ean abiatuko da lehen taldea Barandiaran Museotik, eta 20:00etan bigarrena. Ordu erdi bat aurreratu dituzte irteera-orduak, ekitaldia bukatzerako berandutu egin ohi delako, eta Goierriz kanpotik etorri ohi diren bisitari ugariei itzulera erraztearren.
Aise agortu ziren sarrerak, eskuragarri jarri eta denbora gutxian. Erreserbak gauerdian zabaldu arren, lehen txandakoak 18 minutuan hartuta zeuden, eta bigarrenekoak goizeko seietarako.
Zortzi gune
Jentilbaratzak landu ohi duen mitologiaren osin agorrezinetik elikatuko dute etziko gaua ere. Kondaira zaharren pasarte desberdinak antzeztuko dituzte Ataungo aktoreek. «Sorpresa izango da; ezustekoz eta misterioz betetako ibilaldia izango da», aurreratu du Jentilbaratza elkarteko Santi Etxeberriak.
Herri bideko sei lekutan egingo dituzte antzerkiak, baina ohi baino gune gehiago prestatuko dituzte: zortzi. Nahiz denetan antzerkirik ez egin, ikustekoak eta ezustekoak egongo dira. Bukaeran, San Martingo plazan emango diote ibilbideari errematea, ikuskizun batekin. Mokadutxo bat ere aterako diete denei, sabel mitologikoa ez ezik fisikoa ere beteta joateko Ataundik.
Garraioaz gomendioak
Publiko guztiarentzat egokia izango da ibilaldia, lauzpabost kilometro oinez egin ditzaketenentzat. Garraioari dagokionez, norbere autoa San Martinen uzteko aholkatu dute, San Gregoriok ok egin ez dezan. Autobus zerbitzua 17:00etan hasiko da jendea San Gregorioraino eramaten. Bukatutakoan, hartara, bertan izango dute ibilgailua.
Larunbata, uztailak 13
- 17:00. Autobusa jendea San Martindik San Gregoriora eramaten hasiko da. Norbere autoa San Martinen utzi behar da.
- 19:30. X. Gau Ibilaldi Mitologikoaren hasiera, lehenengo taldearen (600 lagun) irteera Barandiaran Museotik.
- 20:00. Bigarren taldearen irteera
- 23:00. Inguruan azken ikuskizuna, San Martingo plazan.
- Ondoren. Mokadua eta bukaera.