Aurreko asteburuan Ordizian gertatutako eraso sexistak salatzeko elkarretaratzea egin dute Plaza Nagusian. Jaien hasieraren atarian elkartu dira, eta “eraso sexistarik ez, erasotzaileak kanpora!” idatzita duen pankartaren aurrean. Kimetz elkarteko kideak, eta udal korporazioko zein alderdi politikoetako ordezkariak egon dira, besteak beste, herritarrekin batera pankartaren atzean.
Plazara iristeko iskilaren aurrean elkartu dira, eta aurreko asteburuko erasoak salatu eta erasotuak izan ziren emakumeei babesa adierazi diete herritarrek. Elkarretaratzean aipatu dutenez, erasotzaileen jarrera ez ezik, “horiei babesa ematen dietenen jarrera” ere salatu dute, “egoeraren aurrean ezer ez egin eta gainera barre egiten dutenak ere erasoen konplize” direlako.
Horregatik, “erasoen aurrean tolerantzia zero” edukitzeko eskatu dute, eta “hori guztion ardura” dela esan dute. “Jaiak jendarte aske eta parekide baterako gune” izan behar dutela eskatu dute, eta halako egoerei “aski da” esateko unea iritsi dela azpimarratu.
Ordiziako Udalak ere festak erasorik gabeko gunea izatea nahi duela eskatu du, “emakumeak jaiak askatasun osoz gozatzeko eskubidea” duela gogoratuz.
Goierriko albisteak euskaraz, libre eta kalitatez jaso nahi dituzu? Horretarako zure babesa ezinbestekoa zaigu. Egin zaitez harpidedun, izan HITZAkide! Zure ekarpenari esker, euskaratik eginda dagoen tokiko informazio profesionala garatzen eta indartzen lagunduko duzu.
Tokiko informazioa profesionaltasunez eta euskaratik, modu librean kontatzea da gure eginkizuna. Horretarako zure ekarpena beharrezkoa da, eta ongi maitatzeko modurik zintzoena da HITZAkide egitea.
Ezagutu HITZAkide izatearen abantailak eta aukeratu HITZAkide izateko gustuko modalitatea.
