EH Bilduk uste du arazoaren muinera jo behar dela
Enirio-Aralarko Mankomunitateko EH Bilduko ordezkariek, lehen sektoreak bizi duen egoeraren irakurketa egin dute. «Sektoreak bizi duen krisia ez da gauza berria», eta azken hilabeteetako gertaerek «zaurgarritasun hori azaleratu» egin dutela adierazi du Zelai Amenabarrok. Krisi hau, «urteetako kudeaketa desegokiaren ondorio zuzena» dela azaldu zuen: «Gure lurraldeko instituzioek azken hamarkadetan bultzatutako politiken ondorio da egoera hau, eta argi dago irtenbide bakarra sakoneko neurrien eskutik etorriko dela».
Momentuko larrialdiari erantzuteko neurriek, «tenkatuta dagoen soka momentuan» lasaitzeko balio dute, baina EH Bilduren ustez, «sektorearen arazo nagusiek bizirik» jarraitzen dute. «Bada garaia herri honetan arazoen muinari begiratu eta beharrezko eztabaida eta neurri estrukturalen gainean hitz egiteko».
Enirio-Aralarko kasua ez da salbuespena, eta gainera, «batzuek etekin politikoak lortzeko tresna gisa» darabiltela salatu dute, «bestela ezin da ulertu». EH Bildutik «ahal dugun guztia» egiten ari direla diote, «gure eskumenen baitan, gure lurraldeko baserritarrek etorkizuna» izan dezaten.
Mankomunitatea osatzen duten 15 udalei dagokionean ere, haien esku dagoen guztia egiten ari direla azaldu du, «udalen ahalegin ekonomikoari esker beharrei erantzuten» zaie. Amenabarroren ustez, «beste eragile eta erakunde batzuena da lehen sektoreari zein Enirio-Aralarko egoerari irtenbide integralak ez ematearen ardura. Herri honetan lehen sektorea bizirik nahi badugu, berandu baino lehen arazoen oinarrira jo behar dugu eta neurri sakonak hartu».
Bestalde, agerraldian babesa adierazi nahi izan diote Iñaki Aizpuru mankomunitateko kide eta Itsasondoko alkateari, «maiatzaren 1aren harira jasan duen jazarpenaren aurrean».