Beasaingo hegazti gripe kasuak ez du sektoreko jarduna aldatu
Hegaztiekin lan egiten duten ekoiztetxeen jarduna ez da aldatu duela astebete Matxinbenta inguruan hegazti gripe kasu bat baieztatu zenetik. Lehen egunetako urduritasunak pasata, «betiko moduan» lanean ari direla zehaztu dute ekoizleek.
Kasua baieztatu baino lehenago ere gaixotasuna inguruan zebilela jakitun ziren eta, ondorioz, hartu beharreko neurriak aplikatuta zituztela esan dute. Neurriok ez dituzte zorroztu kasuak baieztatu zirenean.
Eusko Jaurlaritzaren Ingurumen Sailak hegaztiak konfinatzea «gomendatzen» du, besteak beste. Behartu ez duenez egiten eta aire libreko hegaztien produktuak hobea direnez, kanpoan egiten dituzten orduak murriztu dituzte baina erabat ezabatu gabe, bien arteko oreka mantentzeko. Dena den, erne dabiltzala aipatu dute.
Ez da kasu gehiagorik baieztatu. Sektoreko ekoizleek diote horrek erakusten duela egoera kontrolpean dagoela. Ustiategientzat oso kaltegarria izan daiteke, kasuren bat baieztatuz gero hegazti denak hil egin behar baitituzte. Salerosketara bideratu gabe hegaztiak dituzten norbanakoei ere eragin diezaieke. Hegaztien artean oso kutsakorra eta hilkorra da gaitza.
Gizakiarentzat, arazorik ez
Gaixotasuna ez da arriskutsua gizakientzat, ordea. Hegaztien haragia, arrautzak, gibel-orea edo hegaztiz egindako edozein elikagai kontsumitu daiteke, hegaztia kutsatuta egonda ere
Jaurlaritzako Ingurumen sailak hegazti jatorria duten produktuak kontsumitzen jarraitzeko deia egin du.