Idiazabalgo eta Zegamako gaztelekuek asteburuan ekingo diote jardunari
Zegamako Bele Gazte gaztelekuak ostiralean zabalduko ditu ateak; Idiazabalgoak, larunbatean. Merienda bana egingo dute, ospatzeko. Izena emateko aukera zabalik dago bi kasuetan
Idiazabalgo eta Zegamako gaztelekuek etzi eta etzidamu ekingo diote 2022/2023 ikasturteari.
Zegamarrak izango dira goiztiarrenak. Ostiralean zabalduko dituzte ateak, 18:00etan. Meriendatxoa egingo dute, eta nerabeekin batera, urritik abendura egingo dituzten ekintzen programazioa osatuko dute. Azken urteetako ordutegi bera izango du gaztelekuak: ostiraletan 17:00etatik 20:00etara, eta larunbatetan 16:30etik 20:30era.
Idiazabaldarren txanda biharamunean izango da. Meriendatxoa egingo dute hauek ere, baina adinka banatuta. Lehen Hezkuntzako 6. mailakoek 16:30etik 17:30era egingo dute; Derrigorrezko Bigarren Hezkuntzako lehen mailakoek, 17:30etik 18:30era; eta Derrigorrezko Bigarren Hezkuntzako bigarren mailakoek, 18:30etik 19:30era.
Izena emateko aukera
Bi kasuetan izena emateko epea zabalik dago. Zegamarrek belegaztegaztelekua@gmail.com helbidera idatzi behar dute edo 690 26 48 43 telefono zenbakira, deitu. Idiazabaldarrek, berriz, liburutegira edo gaztelekura jo behar dute, udaletxe zaharrera.