Aldiriko trenen kudeaketaren transferentzia, «gertuago»
Denis Itxasok Bizkaia Irratian jakinarazi du «inoiz baino gertuago» dagoela eskumenaren eskualdaketa. Goierrin Brinkola-Legorreta zatiari eragingo lioke
Espainiako Gobernuak Araban, Bizkaian eta Gipuzkoan duen ordezkari Denis Itxasok jakinarazi duenez, Renferen aldiriko trenen eskumena Espainiako Gobernutik Eusko Jaurlaritzara pasatzeko aukera «inoiz baino gertuago» dago. Espainiako Gobernuko Lurralde Politikarako Ministerioak eskualdaketa egiteko azken proposamena bidali dio Eusko Jaurlaritzari, eta Jaurlaritzak proposamena aztertu beharko du orain.
«Azkeneko hilabeteetan lantzen ari garen eskumen baten transferentziari buruz ari gara. Autogobernurako garapen lanak ez dira eten, ekipo teknikoek zorrotz jardun dute lanean aldiriko trenen zerbitzua Jaurlaritzaren esku jarri ahal izateko. Azkenekoa atzo bidali genion eta orain Jaurlaritzak ondo aztertu behar du», azaldu dio Itxasok Bizkaia Irratiari.
Brinkola-Irun eremuko eskumena transferituko litzateke, baina ez du xehetasun teknikorik eman nahi izan, «oraindik negoziaketetan» daudelako: «Egia da linea ez dela hor bukatzen, Kantabriara doa. Aurreratu nahiko nuke Autonomia Erkidego barruan eskaintzen diren aldiriko tren zerbitzuak transferituko liratekeela eta beste autonomia erkidegoak zeharkatzen dituen lineak Espainiako Estatuaren esku geratuko liratekela», gehitu du.
Brinkola-Legorreta
El Correo-k argitaratutakoaren arabera, kudeaketa Renferena litzateke 2028ra arte, martxan dauden kontratuengatik. Goierrin, Brinkolatik Legorretara doan zatiari eragingo lioke.