Urola Garaiko udal elkargoak diru laguntzak emango ditu kontrataziorako
Urola Garaiko Mankomunitateak langileen kontrataziorako zenbait laguntza emango ditu, Lanbideren bitartez, guztira 24.000 euro. Lanbidek diruz lagundutako enplegua sustatzeko tokiko ekintzen esparruan kokatzen dira laguntzak.
Laguntzak jasotzeko, kontratuak mugagabeak izan behar dira, eta lanaldi osokoak edo lanaldi partzialekoak, baina gutxienez lanaldiaren % 50ekoak badira. Lanaldi osorako kontratu mugagabe bakoitzeko 8.000 euro emango dituzte, eta lanaldi partzialeko kontratuetan diru laguntza lanaldiaren proportzionala izango da.
Lanaldi osoko kontratu mugagabeen kasuan, laguntza 10.000 eurokoa izango da, kontratatutakoak DSBEren titularrak edo onuradunak, 35 urtetik beherako pertsonak, luzaroko langabeak edo 55 urtetik gorakoak badira. Lanaldi partzialetan ere laguntza proportzionala izango da.
Kontratatutakoak emakumeak badira, laguntzak %10 haziko dira kasu guztietan.
Epea, abenduaren 12ra arte
Diru laguntzak eskatzeko epea abenduaren 12an amaituko da. Informazio gehiagorako edo eskariak egiteko Mankomunitateak Legazpiko Patrizio Etxeberria 3an duen bulegora jo behar da, 943 72 56 42 zenbakira deitu, edo mankomunitatea@urolagaraia.eus helbidera idatzi.