Goiargi abesbatzaren kontzertua hunkigarria bezain ederra izan da
Urretxuko eta Zumarragako abesbatzak berrogei urte bete ditu. Asteburuan meza eta emanaldi berezia egin dute. Jendetza batu da, eta txalo zaparradak etengabeak izan dira ekitaldian
Goiargi abesbatzako kideek 40. urteurrena ospatu dute asteburuan. Meza egin zuten mertzedarien elizan. Bertan, hildako kideak oroitu zituzte. Mezan, Goiargiko kideek abesbatzaren historian garrantzitsuak izan diren kantak abestu zituzten: God be with you (Tomer), Confetimini Domino (De Taize), Aita Gurea (Madina) eta Ave Verum (Mozart). Eliza bete egin zen.
Ondoren, kontzertua eskaini zutene: lehen zatian egungo kideek abestu zuten, bigarrenean ahots zuriek kantatu zuten eta hirugarrenean, egungo kideei garai batekoak batu zitzaizkien.
Lehen zatian egungo errepertorioko obrak abestu zituzten: Laudate Nomem Domini (Tye), Ave Verum (Stopford), Ama Eskual Herria (Lesbordes) eta Minoi Minoi (Marshall). Bigarren zatian emakumeek bakarrik abestu zuten, Xabier Barriolak zuzendaritzapean. Izan ere, Goiargi emakume talde batek sortu zuen. Barriola bigarren zuzendaria izan zen. Lehen zuzendaria Antonio Rey izan zen. Bigarren zati horretan Xagu Soinua (Rey), Txiribogin Andrea (De Santiago), Txeru (Almandoz) eta Izar Ederra (Escudero) abestu zituzten.
Hirugarren zatian, berriz, garai bateko kideak ere igo ziren oholtzara. Lau kanta abestu zituzten: Agur Maria (Azpiazu), Kaiku (Lesbordes), Txoria Txori (Laboa. Moldaketa: Busto) eta Maite (Sorozabal).
Hunkigarria
Kontzertua oso hunkigarria izan zen. Bi herrietako bizilagunek Goiargiri Urretxu eta Zumarragaren aldeko egindako lana eskertu zioten. Txalo zaparradak sekulakoak izan ziren. Antonio Reyrengana eta joan diren gainontzeko kideengana ere iritsi ziren, ziur.
Amaiera are hunkigarriagoa izan zen. Goiargiko kideek Barriolari eta Arratibeli lore sortak oparitu zizkieten. Arratibelek bere amari eman zion lore sorta. Mari Carmen Mendiari ere lore sorta oparitu zioten. Mendiak abesbatza Maite Palacios zenaren eta Bixi Garziandiaren ekimenez sortu zela gogoratu zuen. Mendiak Garziandia deitu du eta besarkada estua eman zioten elkarri. Talde argazkia atera zuten bukatzeko.