Santa Lutzi feriak ere pandemia gainditu du
Datorren asteartean pandemiaren ondorengo lehen Santa Lutzi feria ospatuko da Urretxun eta Zumarragan. 311 salmenta postu eta hamaika ekitaldi egongo dira bi herrietako kaleetan.
Santa Lutzi feria bakarrik falta da pandemia gainditutzat emateko. Santa Isabel eta Santa Anastasia jaiak ospatu ziren eta datorren asteartean Santa Lutzi feria ospatuko da. Nola ez zuen ba Santa Lutzi feriak ere pandemia gaindituko? Feria hori Erdi Arotik egiten da eta ehunka urte hauetan denetik ikusi eta gainditu du: izurri beltza, karlistadak, 1936ko gerra… Hiru urteko etenaren ondoren, bueltan da. Beti bezala, baserritarrak, artisauak, ganadua, barazkiak eta sagarrak izango dira protagonista nagusiak. Urretxun 121 postu egongo dira eta Zumarragan 190. Aurreko edizioan baino gutxiago izango dira.
Feria asteartean izango da, baina aurreko egunetan ere ekitaldiak egongo dira. Igande eguerdian Zumarragako Euskadi plaza inauguratuko da. Egun berean, 19:00etan, Luzio Gabiriaren omenezko bertso jaialdia egingo dute Zumarragako Zelai Arizti aretoan. Maialen Lujanbiok, Sustrai Colinak, Txaber Altubek eta Amaia Iturriotz urretxuarrak abestuko dute.
Ardo azoka eta dastaketa
Astelehenean, berriz, Arabako Errioxako ardo azoka eta dastaketa egingo dituzte Urretxun. Azoka 18:00etatik 21:00etara izango da, Iparragirre plazan. Dastaketa 19:00etan izango da, udaletxeko portaloian. Dastaketarako tiketak bihar eta etzi jarriko dira salgai, kultur etxean, bost euroan.
Santa Lutzi eguneko ekitaldiei dagokienez, 08:00etan ganadu feria eta nekazaritzako tresneriena irekiko dira Urdaneta hiribidean eta La Salle-Legazpi ikastetxeko patioan. 09:00etan gainontzeko azokak irekiko dira: fruta, barazkiak eta errezil sagarrak Euskadi plazan eta Gernikako Arbola plazan, eskulanak Urretxuko Iparragirre kalean eta Zumarragako Euskadi plazan eta Zelai Arizti pilotalekuan, ardo azoka Iparragirre plazan eta oilasko, kapoi eta ezti lehiaketak Areizaga-Kalebarren plazan. Toki berean, 13:30ean, fruta, barazki, errezil sagar, ezti eta ganadu sariketetako sariak banatuko dira.
Musikariak kalez kale
Beti bezala, musika ere ez da faltako. 09:00etan Urretxuko Lizarriturri txistulari elkarteak eta Iratzarri taldeko dultzaineroek kalejira egingo dute. 10:30etik 12:30era, berriz, Secundino Esnaola musika eskolako trikitilariek kalejira egingo dute bi herrietan. Musikariekin bukatzeko, 11:30etik aurrera Zuma- rragako musika bandakoak eta Antxiñako Ama txistulari taldekoak izango dira kalejira egingo dutenak.
Kirol ekitaldiei dagokionez, 12:30ean herri kirol jaialdia egongo da Ederrena pilotalekuan eta 17:30etik aurrera profesionalen arteko pilota partidak jokatuko dira toki berean.
Artzain txakurrak
Gainera, 13:30ean artzain txakur erakustaldia egingo dute Zubimusu plazan (aurtengo ardiekin izango da) eta 18:00etan Urretxuko eta Zumarragako idi proba txapelketako finala jokatuko da Zumarragako plazan. Iker Zubillaga Igeldoren, Egoitz Armaolearen eta Asier Izagirre Ipeñarrietaren idiek parte hartuko dute.
Bi udalek herritar eta bisitarien parte hartzea sustatzen duten ekitaldiak ere antolatu dituzte: argazki rallya eta Non dago Wally? jolasa, hain zuzen ere. Argazki rallyan parte hartu nahi dutenek, egunean bertan eman beharko dute izena: 09:00etatik 10:00etara, Urretxuko udaletxean. Non dago Wally jolasari dagokionez, Wally eta bere hiru lagunak aurkitu eta argazkia ateratzen dietenek feriako produktuen zozketan parte hartuko dute.
Aurkezpen ekitaldia
Feria atzo aurkeztu zuten, Urretxuko udaletxean. Ekitaldian Mikel Serrano Zumarragako alkateak eta Maialen Fidalgo Urretxuko zinegotziak parte hartu zuten.
Biek feria bisitatzera eta erosketak egitera animatu zuten jendea. «Aurrez aurreko erosketa bultzatu behar da. Santa Lutzi ferian ekoizleen eta erosleen arteko harremana zuzena da eta erosleak erosi behar duen produktuaren istorioa ezagutzeko aukera du», esan zuen Fidalgok. Serranok bisitariei garraio publikoa erabiltzeko eskatu zien.