Feria gogoa asetzeko eguna
Erakusketan 193 abelburu izan dira, eta horietatik, 25 saldu dituzte. Bi urteko etenaren ondoren, jendea feria gogoz ikusi da, baina aurreko edizioetan baino gutxiago ibili da
Iluna eta hezea izan arren, ateri eutsi zion egunak atzo Urretxun eta Zumarragan Santa Lutzia feriaren itzuleran. Bi urteko hutsunearen ondoren, jendea feria eta festa gogoz zegoen, eta goiz eta arratsalderako antolatuko erakusketa, salmenta gune, erakustaldi, kirol saio, lehiaketa eta bestelako ekintzekin asetu ahal izan zuten gogo hori.
Jende faltarik ez zen izan, eta bi herrietako kaleak majo bete ziren eguerdi alderako, giro paregabea sortuz, nahiz eta beste urteetan baino gutxiago zebilen, saltzaileak bezala.
193 abere eta salmenta gutxi
Saltzaile eta postu gutxiago izango ziren, baina denetarik erosteko aukera zegoen: barazkiak eta frutak, taloak, odolkiak, gozo kontuak, gazta, eztia, ardoa, patea, ogia, arropa, kinkileroek eta artisauek eskaintzen zuten produktu aukera zabala, traktoreak eta bestelako nekazaritza tresnak… Musikarik ez zen falta herriko musikariei esker, Wally ere jende artean zebilen argazkien zain, eta argazkilari ugari ere bai lanean, Argazkia elkarteak antolatutako rallyan parte hartzen.
Abereak ere besteetan baino gutxiago ikusi ziren Urdaneta kalean, guztira 193 buru: 23 zaldi, 34 moxal, 59 behor, 19 pottoka, 20 asto, mando bat, 35 ahuntz eta bi poni jarri zituzten ikusgai eta salgai, guztira 186 buru. Horietatik, 25 buru saldu ziren: bi zaldi, hamar moxal, bi behor, sei asto eta bi poniak.
Feriako protagonistak
Urdaneta kaleko abere horietako batzuen kargu zegoen Iñaki Urrestarazu 19 urteko idiazabaldarra. «Urtero etortzen gara feria honetara, aurten aita, arreba eta ni. Bi behor, moxala eta zaldia ekarri ditugu. Saritarako ekarri ditugu, ez ditugu salduko», azaldu zuen. Bi urtetan huts egin ondoren, gogoz zeuden itzultzeko, «feriak asko gustatzen zaizkigu, ikusteko ere bai. Aguraingora ere joaten gara, Kataluniara ere bai…». Santa Lutzikoa ere gustuko du Idiazabalgoak, eta bere ustez «osasuntsu» dago, baina lehiaketarengatik, «salmentengatik galduta egongo litzateke, ez da saltzen, salmentako feriak bukatzen ari dira».
Iñaki Perurena leitzar ospetsua, berriz, publiko artean zebilen. Ez omen da askotan etorri, eta aspaldi etorri gabe zegoen «orain dela urte asko harria altxatzera etortzen nintzen, baina gaur, lagun batek etorri behar zuela animaliekin, eta harekin etorri naiz», zioen. Gustura zebilen Perurena abereen artean, eta jendea ikusten zela zioen arren, lehengo ferietan tratu gehiago egiten zela esan zuen, «gaur hori ia bukatuta dago, sarietarako animalia ederrak daude, baina traturako asuntu hori ez dago».
Perurena bezala, kanpotik iritsi zen baita ere Igor Lete, Ispasterreko (Bizkaia) barazki eta fruta saltzailea. Gustura zegoen, bi sari irabazi zituelako. «Ez da asko saltzen, baina pozik nago bi sariekin. Banuen gogoa berriz ere etortzeko bi urte eta gero, baina jende gutxi dabil gaur, eta ekoizle gutxiago ere etorri gara». Postuan denetik zuen, hemen oso ohikoak ez diren ahuakatea eta laranja bezala, baina gehiena barazkiak zituen, ohikoak.