Elkarretaratzea deitu du Autopista Elektrikorik Ez plataformak iganderako
Goierrin goi tentsioko beste 80 dorre eraiki nahi dituzte REE Red Electrica Españolak eta Forestaliak, bi linea paralelotan, Idiazabal, Segura, Zerain, Mutiloa, Gabiria eta Partzoneria artean
Nafarroa eta Gipuzkoa artean REE Red Electrica Españolak eta Forestalia enpresa pribatuak eraiki nahi dituzten goi tentsioko lineen proiektuen harira, elkarretaratzea deitu du Autopista Elektrikorik Ez plataformak iganderako, Etxarri Aranatzen. Bi linea eta proiektu ezberdin dira, paraleloan jarrita. Batetik, Muru Artederreta eta Castejonetik Itsasorako linea, REErena, eta bestetik, Zaragozatik Gatikara, Forestaliarena. Goierrin, Idiazabal, Segura, Zerain, Mutiloa, Ormaiztegi, Gabiria eta Itsaso zeharkatuko lukete. Idiazabalen 32, Seguran 10, Zerainen 4, Mutiloan 3, Gabirian 21 eta Gipuzkoako eta Arabako Partzoneriko lurretan 10 dorre eraikitzea aurreikusi da bi proiektuen artean, 80 guztira.
Horren kontra, Lurkide hitzarmena sinatu zuten aurreko astean lineen ibilbide osoko herrietako 192 elkartek, Autopista Elektrikorik Ez plataformaren barruan, proiektuak «asumitu ezinezko burugabekeria» eta ingurumenarentzako «mehatxu larria» direla salatuz. Herrien eta eskualdeen ondareari eta garapenari kalte egingo diela kritikatu dute, «funts putreen interes espekulatiboen mesedetan». Inguruko herrietako herritar eta eragileei dorreak eraikiko lituzketen eremuetan protesta modura argazkiak ateratzeko deia zabaldu diete.