Berasategi eta Hailemichael, asteburuko izenak Goierriko lasterketetan
Afrikako Adarreko txirrindularitza ernetzen ari den seinalea afizionatuen eremura iritsi da. Goierrin aldaba jo du asteburuan Mulu Kinfe Hailemichaelek (Adigrat, Etiopia, 1999). Larunbatean Beasaingo jaietako Loinatz proban hirugarren egin zuen, eta igandean Ataungo 57. San Martin Proba irabazi zuen.
Caja Rural taldeak menperatu du San Martingo lasterketa, atzera plazara ekarria. Ia sari guztiak eraman dituzte nafarrek: sailkapeneko lehenarenaz gain, Hailmichaelek irabazi ditu tarteko helmugena eta mendikoa ere. Nagusian bigarren postua Joseba Lopezekin lortu du Caja Ruralek, eta talde onenarena ere bai; hirugarren Laboral Kutxako Enekoitz Azparren izan da. Lehen ataundarraren saria Adur Barandiaranek (Ampo) jaso du.
Beasainen, Berasategi
Larunbatean, Beasainen, 71. Loinatz proban izan ziren eliteko eta 23 urtez azpiko txirrindulariak. Ataungoa bezalaxe, Euskaldun txapelketarako balio zuen.
Eguraldiagatik ibilbidea moldatu behar izan dute. Olaberriko gaina zen epaile, eta Xabier Berasategi olaberritarrak (Laboral Kutxa) bikain baliatu du, Beasaingo proba irabazteko. Unai Aznar (Lizarte) eta Hailemichael (C.Rural) igo dira podiumera. Taldekakoa Caja Ruralek, mendia Alex Diazek (Baque) eta tarteko helmugak Gorka Sorarrainek (Baque) eraman dituzte.