Biharko manifestaziora joateko deia egin dute pentsiodunek
EHPM Euskal Herriko Pentsiodunen Mugimenduak, hainbat erakunde sindikal eta sozialen babesarekin, manifestazioak deitu ditu biharko Hego Euskal Herrriko lau hiriburuetan. Gipuzkoakoa Donostian izango da, 17:30ean, Alderdi Ederren. Goierriko Pentsiodunek bat egingo dute deialdiarekin eta eskualdeko herritarrak deitu ditu parte hartzera. «Oso garrantzitsua da gure parte-hartzea esanguratsua izatea, gure indarra agerian utzi behar dugu», esan dute.
1.080 euroko Gutxieneko Pentsioa 14 ordainsaritan izatea eskatzen dute, «KPI errealaren araberakoa» izatea, «erosteko ahalmena berreskuratzeko». Soldatak berreskuratzea eta kalitatezko zerbitzu publiko eta unibertsalak bermatzea ere sartzen da haien eskarietan. Goierriko Pentsiodunak 17:15ean elkartuko dira Alderdi Ederren, elkarrekin pankartaren atzetik joateko.
Besteak beste, EHPM, EHESK-Euskal Herriko Gizarte Eskubideen Batzordeak, ELAk, LABek, ESKk, Steilas-ek, Hiruk, Etxaldek, CGTk, CNTk, Ernaik, Ongi Etorri Errefuxiatuak-ek edota Euskal Herriko Neska Gazteek babestu dute manifestazioa.
Astelehenean, Ordizian
Gaur, berriz, Euskal Herriko Pentsiodunen Mugimenduko bigarren Emakumeen Batzarra egingo da Gasteizen. Goierriko Pentsiodunek gaur dute izena emateko azken eguna.
Azkenik, astelehenean, Ordiziako plazan elkartuko dira Goierriko pentsiodunak protestarako, 11:00etan.