Ordiziarrock-ek hiru eguneko musika eskaintza dakar, bihartik larunbatera
Ander Zubillaga bakarka ariko da bihar D’Elikatuzen. Ostiralean Rosie Ruiz, Lie Detectors eta Unidad Alaves izango dira. Larunbatean azkenik, Ibil Bedi, The Soulanders eta Nogen.
«Denontzako eta denon eskura» dagoen Ordiziarrock musika jaialdia antolatu du 21. aldiz, Ordiziarrock elkarteak. Musika estilo desberdineko taldeak eta musika gustu ezberdinetako zaleak elkartuko dira ostegunetik larunbatera bitartean Ordizian. Denentzat eskuragarria izango da gainera, dohainik direlako kontzertu guztiak. Goierritar artista ugariren eszenatokia izango da beste behin ere Ordiziako pilotalekua, Ordiziarrock-ek urtean antolatzen duen jaialdirik handienean.
Bihar, 19:00etan, Ordiziarrock-eko antolatzaileek hain gustuko duten D’Elikatuz aretoan izango da lehenengo kontzertua, Ander Zubillagaren eskutik. Gitarra jotzaile tolosarrak bere bakarkako ibilbideari ekin dio, Euskal Herriko hamaika talde ezagunetako kide izan ondoren.
Ordiziako talde berri bat
Ostirala Balins disko jartzailearekin hasiko da, 19:00etan. Kontzertuen saioa, Ordizian sortu berria den talde batek irekiko du, 20:30ean: Rosie Ruiz taldeak. «Ordiziako talde jaioberria da, herriko musikari ezagunek osatua… Onena, zuzenean ikustea eta deskubritzea», diote Ordiziarrock-ekoek.
Antolatzaileen oso gustukoa den beste talde baten txanda izango da hurrena: Lie Detectors. «Garage-a lantzen duen boskote donostiarraren zuzeneko indartsua».
Eta gauarekin amaitzeko, goierritar musikariz osatutako Unidad Alavesak hartuko du kanpoko frontoiko eszenatokia. Ordiziarrock-en errepikatuko duen talde bakarra da oraingoz Haritz Artola, Gurutz Bikuña, Iker Artza, Eneko Dorronsoro eta Unai Munduatek osatutakoa.
Ibil Bedi eta Nogen
Larunbata, azken eguna ere, indartsu dator, Monky Man disko jartzailearen laguntzarekin. Ibil Bedik irekiko du musika jaialdia. «Nafarroako boskote gaztearen pop doinu garaikidea, lehenengoz gurean». Jarraian, Goierriko hainbat musikarik osatutako The Soulanders taldea igoko da oholtzara. «Ordiziako, Lazkaoko eta Ataungo musikariek osatutako soul taldea». Eta Nogen taldeak emango dio amaiera 21. Ordiziarrock-i. «Ane Negueruela abeslari lazkaotarraren itzulerarekin etorriko da taldea».
Egitaraua:
Osteguna
- 19:00: Ander Zubillaga, D’Elikatuz aretoan.
Ostirala
- Balins Dj-a, gau osoan.
- 21:30: Rosie Ruiz.
- 23:00: Lie Detectors.
- 00:30: Unidad Alavesa.
Larunbata
- Monky Man Dj-a, gau osoan.
- 20:00: Ibil Bedi.
- 23:00: The Soulanders.
- 00:30: Nogen.