Sustraiak taldea grabatzen ari den dokumentalean parte hartzeko deia
Legazpiko dantza taldeak 50 urte beteko ditu 2025ean, eta urtemuga ospatzeko dokumental bat ari da prestatzen. Igandean grabaketak egingo ditu herriko hainbat tokitan, eta taldeko dantzari ohien eta legazpiarren laguntza eskatu du.
Sustraiak Dantza taldea dokumental bat ari da prestatzen datorren urtean ospatuko duen 50. urteurrenari begira, eta legazpiarren laguntza eskatu du igandean egingo dituzten grabazioetarako. Deialdia, haur edota helduen taldeetan, inauteri konpartsetan, kapela dantzan eta urtero antolatzen duten Larrain Dantza eta San Joan Surako ikastaroetan aritutako dantzari, figurante eta musikariei zuzenduta dago bereziki.
Grabaketak igandean, urriak 19, egingo dituzte, herriko hainbat tokitan eta ordutegi desberdinetan.
Hasteko, 12:30ean Azokan elkartuko dira Aurresku eta Soinu zaharren txapelketetan parte hartu duten dantzariak, eta baserritar jantziarekin dantzatuko dute.
Hurrengo hitzordua Olazabal institutuan izango da, 13:30ean. Han Agurra dantzatuko dute, baserritar jantziarekin, taldea sortu zuten dantzariek eta lehenengo haur taldeko dantzariek.
Ondoren, 15:00etan, Euskal Herria plazan elkartuko dira nahi duten legazpiar guztiak, fandangoa, arin arina eta kalejira dantzatzeko.
Amaitzeko, 16:30ean Kale Nagusia izango da topalekua, eta kalez jantzita, ikastaroetan aritu direnek Zortzikoa dantzatuko dute.
Entseguak
Grabaketetarako dantzak prestatzeko entseguak egiten ari da Sustraiak, eta gaur eta bihar izango dira azkenak, 20:15etik aurrera.
Zalantzarik izanez gero, sustraiakdt@gmail.com helbidera idatzi daiteke, edo taldeko kideren batekin harremanetan jarri