Hunkigarria izan da Igartzako dantzarien Joseba Juarezen omenezko ikuskizuna
200 dantzarik baino gehiagok hartu dute parte. Aurten gauez egin dute saioa eta argiztapen bereziak apaindu du emanaldia eta ingurua.
Inoiz baino bereziagoa izan da aurtengo Igartzako dantzarien kofradiaren ikuskizuna. Hunkigarria. Joseba Juarez dantzari zena izan da protagonista nagusia, Igartzako dantzarien kofradiaren gidaria. “Kofradiaren sorreraz gero Josebak buru, oin, beso eta arima eskaini zizkion egun honi”, diote Aurtzaka dantza taldeko kideek. Dizdira berezia izan du aurtengo saioak gainera, gauez egitearekin batera, Igartzako monumentu multzoak argiztapen bereziz apaindu baitute. Beasaingo dantzariez gain, Goierri guztiko Juarezen lagunek ere parte hartu nahi izan dute. Eibar, Elgoibar, Andoain eta Donostiako ezpata-dantzariak ere izan dira gaur Beasainen.
Dolarea jatetxearen ondoan Joseba Juarezen omenez landatutako haritzaren ondoan lore sortak jarriz amaitu da gaurko ekitaldia, ehunka ikusleren txalo zaparrada lagun.
