Igarondo pilotalekua berritze lanetan
Idiazabalgo Igarondo pilotalekua berritzen ari dira, eta hilabete amaierarako lanak bukatuko dituztela espero dute. 72.000 euroko kostua izango dute berritze lanekAspalditik gai zerrendan zegoen kontua da Idiazabalgo Igarondo pilotalekua berritzea. 198...
Idiazabalgo Igarondo pilotalekua berritzen ari dira, eta hilabete amaierarako lanak bukatuko dituztela espero dute. 72.000 euroko kostua izango dute berritze lanek
Aspalditik gai zerrendan zegoen kontua da Idiazabalgo Igarondo pilotalekua berritzea. 1981. urtean inauguratu zen frontoia, eta azken urteetan nabarmena zen pilotalekuak kantxak ez, inguruak baizik hainbat aldaketa behar zituela. Hori horrela izanik, udalak iazko eginbehar moduan zuen pilotalekua berritzea, eta hala agertzen zen 2015eko aurrekontuetan. Berrikuntza obrak, guztira, 72.000 euroko kostua izango du. Duela ia bi hilabete hasi zituzten Igarondo berritzeko lanak, eta hilabete amaieran ospatuko diren sanblasetarako pilotaleku berritua prest egotea espero dute. Bertan jokatu ohi dira festatako pilota partidak, profesionalen partidak tartean. Iazko urtean, 2015ean, hasi zituzten obrak, eta orain buru-belarri dabiltza lanean. Lanak bi fasetan Egin beharreko lanak bi fasetan banatu dituzte. Lehenengo fasean egin dituzten berrikuntzak honakoak izan dira: aldagela berriak egin, komunak berritu, pilotalekuko sarrera gunea hobetu, elbarrientzako arrapala egin, eta larrialdietarako irteeran hainbat hobekuntza. Bukatzeko, guztia pintatu dute. Bigarren fasean, segurtasun eta irisgarritasun irizpideak hobetzeari ekin diote, eta horregatik Igarondo pilotalekuko sabaia eta ur kanalak konpontzeko lanetan dabiltza. Sanblasen atarian
Idiazabalgo Udalaren helburua hilabete honetan lanak amaituta egotea da. Laster izango dira San Blas jaiak Idiazabalen, eta ordurako guztia puntuan izango dutela aurreikusten dute. Oraindik ere ez daude egingo diren ekintza guztiak zehaztuta, baina bai festak noiztik nora izango diren: urtarrilaren 29an, ostirala, hasiko dira festak mozorro egunarekin. Astebete iraungo dute aurtengo sanblasek, eta bi asteburu hartuko dituzte. Axariaren igoera, berriz, otsailaren 4an egingo dute, San Blas txiki egunean. Orduan jokatuko dira pilota partida profesionalak. Honakoak izango dira partidak; alde batetik, Artola-Albisu eta Altuna III.a-Merino II.a eta, bestetik, Elezkano II.a-Imaz eta Arteaga II.a-Aretxabaleta elkarren aurka lehiatuko dira.
Gure Esku Dago eguna
Hala ere, ez da egun horretan festa amaituko Idiazabalen. Izan ere, otsailaren 5ean, ostirala, Gure Esku Dago eguna egingo dute. Herriko eragile ezberdinek antolatu dute, eta egun horretarako egitarau zabala prestatu dute; besteak beste, karaokea, musika zuzenean eta guatekea.
Gainera, dinamikak pilotalekuko taberna hartuko du festetan, eta boluntario bila dabiltza. Esku bat bota nahi duenak honakoa egin beharko du: lau pertsona elkartu, eta izena eman Odei edo Xumen tabernetan jarritako karteletan, edo bestela 669 292 759 zenbakira deitu. 
