Zaldibiako gazte festetan hiru egun ekitaldiz hornitu dituzte, gaurtik larunbatera
Berritasun batzuk badakartzate XIX. Gazte Festek, gintonik lehiaketa, adibidez. Pilota txapelketa herrikoiko finala eta sagardo dastaketa bihar dira. Herriko film bat emango dute gaur
Zaldibiako 19. Gazte Festak gaurtik larunbatera ospatuko dituzte, herriko gazte asanbladak antolatutako egitarauarekin. Berritasun batzuk sartu dituzte aurten, ohiko ekitaldi sustraituez gain. Gaur gauean, adibidez, zaldibiarrek egindako film labur bat ikusi ahalko da. Aurten ETBk Zaldibian grabatu duen Herri txiki, infernu handi saioa oinarri hartuta, herria 2050ean nolakoa izango litzatekeen irudikatu dute, ikus-entzunezkoan.
Bihar iluntzean, bestetik, jende parrasta erakartzen duten bi ekitaldi izango dira: herriko pilotarien Sasipilotari txapelketaren finalak, eta sagardo dastaketa jarraian. Pilotan, mutiletan Aritz Oriak eta Mikel Gantzarainek jokatuko dute, buruz buru. Nesketan, binaka, Maren Mendizabal-Intza Olano, eta Uxue Zumalde-Maialen Mendizabal ariko dira.
Sagardo dastaketarako, berriz, hamabost sagardotegitatik ekarriko dute edaria. Nola bihar, hala etzi, gauetan musika kontzertuak izango dira. Altxa Gudari talde zaldibiar-ordiziarrak ere joko du, tartean.
Paella eta gintonik egitea
Azken jardunaldian, larunbatean, paella lehiaketarekin batera berritasun bat asmatu dute: gintonik lehiaketa. Bazkal ondoren Eneko Araiztegi, Maialen Akizu eta Jon Gurrutxaga bertsolariak ariko dira.
Arratsean, Paxkualirrock deituriko saioan, herriko Gureran musika taldekoak Pasquali traktore baten gurdian ibiliko dira, musika joz, tabernarik taberna.
EGITARAUA Gaur, osteguna · 16:30. Haurrentzako tailerrak · 18:00. Koroa. · 19:00. Arkakusoaren jaitsiera. Ondoren, poteoa trikitilariekin. · 21:00. Afaria (ogitartekoak). · Ondoren. Film laburren emanaldia. Bihar, ostirala · 11:00. Errekan bainatzera. · 16:30. ‘Gazteak eta homosexualitatea’ hitzaldia. · 18:30. Sasipilotari pilotari txapelketaren finala. · 20:00. Sagardo dastaketa. · 23:00. Kontzertuak: Altxa Gudari eta Gabenara. Larunbata · 14:30. Paella eta gintonik lehiaketa. Goizetik, mozorrotuta. · Ondoren. Bertsolariak. · 19:00. ‘Paxkualirrock’. · 23:00. Kontzertuak: 2Zio eta Kalera taldeak.
