Oscar Valbuena: «Agenda sozial bat markatzea da euskal sozialiston lehentasuna»
HAUTESKUNDEETAKO ELKARRIZKETAK: Oscar Valbuena (PSE-EE)
Zumarragan jaio bazen ere, zazpi urte zituenez geroztik Legazpin bizi da Oscar Valbuena (1978), eta legazpiartzat du bere burua. PSE-EEko zinegotzia da 2011z geroztik, eta legebiltzarreko hauteskundeetako hautagaia da. Hamalaugarrena da Gipuzkoako zerrendan. Sozialisten programaren puntu nagusiak aletu dizkio GOIERRIKO HITZA-ri.
Noiz sartu zinen politikaren munduan?
Beti interesatu zait. Politikarekiko interesa denok izaten dugu pil-pilean. 2010. urtean PSE-EEra gerturatu nintzen, eta hortik aurrera harreman bat sortu zen. Urtearen amaieran, 2011ko udal hauteskundeetan Legazpiko alkategai gisa aurkeztea proposatu zidaten. Sorpresa bat izan zen niretzat. Ez zen erabaki erraza izan. Kontutan izan behar da garai hartan ETA oraindik aktibo zegoela, eta babes bat behar genuen. Hortaz, familiarekin eta ingurukoekin kontsultatu nuen, nire ingurukoengan ere eragin bat zuelako. Aldagai guztiak hartu nituen kontuan, baita lanarekin nola bateratu nezakeen ere. Eta azkenean baiezkoa eman nuen. 2011z geroztik zinegotzia naiz Legazpiko Udalean.
Inkesten arabera, laugarren indarra izango zarete sozialistak igandeko hauteskundeetan, eta 2012an baino eserleku gutxiago lortuko dituzue. Zein irakurketa egiten duzu?
Inkestek gutxiago ematen digute beti, geroko emaitzek baino. Ikusiko dugu zer gertatzen den. Oso gertu ditugu pasa diren hauteskunde orokorrak, eta etengabe aipatzen zen sorpasso-a. Eta, azkenean, sorpasso-a ez, sorpresa izan zen. 2012ko legebiltzarreko hauteskundeetan ere, inkestek hamabi edo hamairu eserleku ematen zizkiguten, eta gero hamasei lortu genituen. Bestalde, alderdi guztiontzat izango da zailagoa 2012an adina eserleku lortzea, aurten Elkarrekin Ahal Dugu ere aurkeztuko delako. Matematika hutsa da: hautagai gehiago dira, baina eserleku kopurua bera, hortaz, gutxiago tokatuko zaizkigu.
Zein dira PSE-EEren lehentasunak?
Agenda sozial bat markatzea da gure lehentasuna. Zerbitzu publikoak jartzen ditugu lehen mailan, eta ez agenda soberanista. Adostasunak lortzeko, beharrezkoa dugu indarra izatea legebiltzarrean. Gure lehentasuna ez da eserleku gutxiago edo gehiago lortzea, baizik eta indar politiko potente bat izatea. Giltzarria izan nahi dugu.
Inkestek diotena bete eta EAJk irabaziko balu, ikusten duzu aukerarik EAJk eta PSE-EEk batera gobernatzeko?
EAJren jarreraren arabera. Ez daukagu oso argi zein izango diren EAJren lehentasunak. Orain arte adostasun bat izan dugu, lehentasunak oso argi zeudelako: zerbitzu publikoak, murrizketarik ez, kopagoa orekatzea, Osakidetzan inbertsioak, enplegu planak sustatu… Lehentasun horiekin jarraitzen badute, posible izango da adostasunean jarraitzea. Lehentasunak aldatzen badira, ikusi egin beharko da. Gu ez gaude batere ados Ibarretxe plana berriz mahai gainean jartzearekin. Euskadik seriotasuna behar du.
Zer du PSE-EEk eskaintzeko, beste alderdiek ez dutena? Guk argi daukagu gure lehentasuna agenda soziala dela, eta beste alderdi batzuek ez dute hain argi. Adibidez, EH Bildurekin lortu ditugu adostasun batzuk legealdi honetan, baina batzuetan albo batera utzi dute agenda soziala, lehentasuna subiranotasunari emanez. Guk proiektu aurrerakoi bat eskaintzen dugu, lehentasuna emanez zerbitzu publikoei, enplegu planei, berrikuntzari… Oso argi ikusten dugu plan industrial bat martxan jarri behar dela, Euskadi mailan eta eskualdeka. Zein dira zuen programako puntu nagusiak? RGI-a aldatu nahi dugu, iruzur fiskalak saihesteko, eta laguntzak beste kolektibo batzuei zabaltzeko. Adibidez, guraso bakarreko familiei, jubilatuei… bideratu beharko litzaizkieke laguntza horiek. Horrez gain, eraginkorragoa izan beharko litzateke. Helburua da laguntza ematea, baina lan bat topatu ahal izateko. Seme-alabak izateagatik laguntza gehiago ere eskaintzen ditugu. Programa oso zabala da, baina puntu batzuk aipatzearren, horiek. Idoia Mendia da zuen lehendakarigaia, lehen aldiz. Zein dira Mendiaren dohainak? 2012az geroztik ezagutzen dut Idoia Mendia. Kontseilaria zen, eta udaletxearekin zerikusia zuen kontsulta bat egin nion. Oso gertuko tratua eskaini zidan. Adibide honekin esan nahi dut Mendiak gertutasuna eskaintzen duela. Horrez gain, seriotasuna eskaintzen du, eta ideiak oso argi izatea. Euskararen inguruan kaleratutako bideoak zeresan handia eman du. Zein iritzi duzu? Bideo elektoral bat da, eta horrela hartu behar da. Gaia ateratzea da helburua. PSE-EE euskararen normalizazioaren inguruko akordio guztietan egon da. Gobernuan egon ginenean ere euskara bultzatu zen eta plan berriak martxan jarri ziren. Bi- deoak ez du zalantzan jartzen euskararen normalizazioa edo erabilpena. Horretan ados gaude. Bideoak zalantzan jartzen duena eta agerian uzten duen arazoa administraziorako sarbidea da. Admistrazioan lan egiteko eskatzen diren hizkuntza perfilak berrikusteko eskatzen dugu guk. Hainbat profesional onek ez dute sarbiderik administrazioan, eskatzen zaion euskara maila minimoa oso altua delako. Uste dugu lanpostu batzuetan eskatzen diren perfil horiek moldatu egin behar direla, adibidez, jendearekin harreman zuzena ez duten lanpostutean. Baina beti euskara maila minimo bat izanda, noski. Otegiren inhabilitazioak ere piztu du polemika. Zein iritzi duzu? Gai konplikatua da. Erabaki judizialak beti errespetatu ditugu. Uste dugu Otegiren auzia beste era batera kudeatu behar zela hasieratik, baina legeak esaten duena errespetatzen dugu. Nolako herrialdea amesten duzu? Lehendabizi normaltasun politiko bat behar dugu, adostasun gehiago lortu behar dira. Gizartearen aldetik, Euskadi sozialago bat lortzea gustatuko litzaidake; gizarte zerbitzuak hobetu egin behar dira. Udalei dagokienez, udalek indar gehiago izatea da gure helburua, zerbitzu hobeak eman ahal izateko. Ekonomia aldetik, industria indartu behar da, eta berrikuntza bultzatu. Horrela ikusten dut Euskadi: bizikidetza, gizarte soziala eta ekonomia bultzatuz. Horretarako lan handia egin behar da legealdi honetan. Azkenik, Euskadi Espainia federal baten barruan egotea ikusten dugu egokiena. Formula egokiena da sentsibilitate guztiak bateragarriak izateko.«Idoia Mendiak seriotasuna, gertutasuna eta ideia argiak eskaintzen ditu» «Otegiren auzia beste modu batera kudeatu behar zen, baina legea errespetatzen dugu»
