Jon Ander Insausti: «Errendimenduaren arabera egutegi bat ala bestea izango dut»
Txirrindularitzako ibilbidean goren mailara igotzea lortu du Jon Ander Insaustik (Mutiloa, 1992) Barhain-Merida taldearekin urtebeterako kontratua sinatu ondoren. Ion Izagirre lehengusuari laguntzea du egiteko nagusia; ilusioz bizi du bizitzako etapa b...
Txirrindularitzako ibilbidean goren mailara igotzea lortu du Jon Ander Insaustik (Mutiloa, 1992) Barhain-Merida taldearekin urtebeterako kontratua sinatu ondoren. Ion Izagirre lehengusuari laguntzea du egiteko nagusia; ilusioz bizi du bizitzako etapa berria.
Txirrindularitza mailan beste urrats bat egin duzu aurrera Barhain-Meridarekin fitxatuta. World Tourren ariko zara.
Egia esan, salto handia izan da. Profesional mailan txirrindularitzako mailarik baxuenean aritzetik, lehenengo mailara igo naiz. Errespetu handia ematen dit, baina espero dut gauzak ondo egitea eta postu bat irabaztea, ahalik eta ondoen joatea.
Neurri handi batean, Ion Izagirre lehengusuari esker lortu duzu fitxaketa.
Fitxatu taldeak egiten du, baina Ionen bultzadarekin noa. Ionek konfiantzazko norbait nahi zuen, eta ni aukeratu ninduen. Taldeak ere baiezkoa eman zuen. Ez da ahaztu behar ni zertara natorren eta noren eskutik natorren; espero dut emaitzekin erantzutea.
Ion Izagirrez gain, Nibali, Purito Rodriguez… dituzu taldekide.
Ion ondo ezagutzen dut, baina Joaquim Rodriguez Purito, Nibali… telebistatik ikusi eta orain aurrez aurre mahaian elkarrekin gosaltzen, bazkaltzen eta afaltzen egotea, arratsaldean futbol partida jolasten aritzea… ikaragarria da. Oso gustura nago.
Kroazian astebeteko kontzentrazioa egin berri duzue. Ametsetan zeundela ere uste izango zenuen momenturen batean…
Bai, pentsatu nuen bai. Puritorekin futbolean, bestearekin txiste kontari… Hau egia ote da? galdetzen nion nire buruari. Nork esango zidan orain hilabete bat hau bizitzen egongo nintzela, munduko txirrindulari onenekin mahaiaren inguruan elkartuta egongo nintzela.
Mundu mailako lasterketa garrantzitsuenetan parte hartzeko aukera izango duzu orain.
Momentu honetan hori ez da nire helburua. Ni Ioni laguntzeko nago, ez nago exijitzeko postu batean. Errealista izanda, Frantziako Tourrean eta Italiako Giroan badaukat parte hartzeko aukera, baina maila handia dago taldean, postu hori irabazi egin beharko da errendimenduarekin. Oso maila altuko txirrindulariak daude eta horiekin lehiatzea oso zaila izango da, baina nire helburua ikastea da, lana ondo egitea eta maila honetan finkatzea. Errendimendu ona baldin badago lasterketak etorriko dira.
Egutegia zehaztuta duzu? Otsailean Murtzia-Almeria egingo dut, gero Portugalen Algarveko Itzulia, eta handik bueltan Belgikako klasikatara joango naiz. Hortik aurrera, errendimenduaren arabera, egutegi bat edo bestea jarriko zidatela esan zidan taldeak. Hasiera bateko egutegia eman didate, eta ondo baldin banabil lasterketa batzuk edukiko ditut, eta ondo ez banabil, beste batzuk. Orain lana egitea tokatzen da. Euskal Herriko Itzulian izango zara? Ion eta taldea bai. Ni ez dakit, postua irabazi egin beharko da. Gustatuko litzaidake, baina ikusiko dugu. Zein ezaugarritako txirrindularia zara? Lauan ondo ibiltzen den txirrindularia naiz, igoera motzak ondo egin ditzaket, luzeetan penalizatuta nago pixka bat. Lauan laguntzeko, gizon azkarrei esprintetan esku bat botatzeko, erlojupekoetan ondo moldatzen naizen txirrindularia naiz. Haizea kentzeko ona, liderra ahalik eta erosoen eramateko. Egia esanda, lan gogorra da baina gustura egiten dudana. Egun bateko lasterketak ondo joaten zaizkit, indarra behar den lasterketetan. Entrenamenduetan aldaketarik izango duzu? Entrenamenduak egiteko gure betiko taldeak segituko dugu: Gorka eta Ion Izagirre, Pello Olaberria eta lauok. Aldaketa lasterketetan izango dut. Beste lasterketa batzuetan parte hartuko dut, beste egoera batean, beste baldintza batzuetan. Baina berez oinarria ez da aldatzen; etxean jarraituko dut, gero taldearekin kontzentrazioetara eta lasterketetara joango naiz. Urtebeterako fitxatu duzu. Bai, kontratua berritzea irabazi egin beharko da. Baina orain aukera hori edukitzea bera, loteria tokatzea bezalakoa da niretzat. Izan beharrekoa izango da. Exijentzia handiko urtea izango da; momentu onekin batera momentu txarrak ere egongo dira, baina espero dut momentu on horiek merezi izatea. Eta Mutiloako Iturriotz baserrian ospatzea. Hori da. Eta nik uste dut ospatuko dugula. Ez dakit nigatik izango den, baina Gorkak edo Ionek egingo dute akzioren bat aurten ere, eta ospatuko dugu. Aurten Ionek Tourreko etapa irabazi zuen. Ospatu zenuten? Ondo ospatu genuen bai. Telebistari begira negar batean egon nintzen, emozioarekin. Egia esan, momentuan hunkitu egin nintzen. Bizi guztian berarekin nago eta momentu hori bizitzea eta ikusteak, hunkitu egin ninduen. Ez litzateke txarra izango berriro errepikatzea. Zu ondoan bazeunden hobeto. Hori da! Lasterketan egongo banintz… kategorian!. Zer dago Mutiloan hainbeste txirrindulari ateratzeko? Ion eta Gorka bezalako txirrindulariak izatea bultzada handi bat da, ispilu bat da. Horrek zaletasun asko sortzen du eta txirrindularitzagatik apustu egin duen belaunaldi bat badago eta ondo ateratzen ari da. Espero dut, gainera, ondo segitzea. Txirrindularitzaren egoera ez da onena. Ez. Egia esanda, Goierrin txirrindularitza jaitsi da, baina oso indartsu segitzen du Euskal Herriko beste alde batzuekin alderatuta. Euskal Herrian krisia nabaritzen da. Geroz eta talde gutxiago daude, eta talde gutxiagok txirrindulari gutxiago esan nahi du. Baina azkenean kalitatea kantitatetik egiten da.ESANAK: «Ion Izagirrek konfiantzazko norbait nahi zuen, eta ni aukeratu ninduen» «Gustatuko litzaidake Euskal Herriko Itzulian parte hartzea baina ikusiko dugu»
