Gorka Izagirre: «Lana ondo eginez gero, irabazteko aukerak sortzen direla ikusi dut»
Italiako Girotik itzuli berri da Izagirre (Ormaiztegi, 1987). Zortzigarren etapa irabazita bueltatu da Euskal Herrira. Astebeteko atsedenaldia hartzen ari da TeamMovistar taldeko txirrindularia.Gorka Izagirre txirrindulari ormaiztegiarra Euskal Herrian...
Gorka Izagirre irribarrez Peschiciko helmugan, Italiako Giroko etapa irabazi berritan. // Movistar Team
«Oraindik ez dakit zer egutegi izango dudan. Tourra ez dudala egingo badakit. Baliteke hurrengo lasterketa Ordiziako Klasika izatea»Giroa zinez gogorra da…
Espainiako Itzulia, Frantziako Tourra eta Italiako Giroa aintzat hartuta, Giroa gogorrena da ibilbideari dagokionez eta aurten ere hala izan da. Aurtengoan eguraldiak lagundu du; oso eguraldi ona izan dugu, epela eta beroa, eguzkia bidelagun izan dugu etapa guztietan.
Etapa bat garaitu izanak zein arrasto utzi dizu aurrera begira?
Lanean jarraitzeko gogo gehiago. Halako garaipenak lortzeko gaitasuna baduzula jabetzen zara. Pertsonalki aurretik ere egon naiz goiko postuetan, baina garaipenarekin, beste behin ere lortu dezakedala sentitu dut; alegia, lana ongi eginez gero, aukerak sortzen direla.
Aurtengo denboraldia hasi zenetik indartsu zabiltza.
Denboraldia Australian hasi nuen urtarrilean. Etapa batean bigarren postua lortu nuen han eta nire burua lasterketaren lehian ikusi nuen. Martxoan Paris-Niza proban laugarren egin nuen, Euskal Herriko Itzulian izan nintzen eta Zornotzan (Bizkaia) Udaberriko Saria irabazi nuen. Egia esateko, oso pozik nago denboraldiko lehenengo zatian egin dudan lanarekin.
Euskal Herrira itzuli berri zara. Atseden hartuko duzu orain.
Bai, aste honetan atseden hartzen ari naiz. Astebete egongo naiz txirrindua ukitu gabe.
Erraza egiten al zaizu hori?
Bai, bai, Girotik bueltan, egunero 170 kilometrotik gora bete ondoren erraza egiten da.
Zer da egiten duzuna atseden hartzen ari zarenean?
Egun asko ematen ditugu etxetik kanpo lasterketak direla eta kontzentrazioak direla. Aste honetan senideekin eta lagunekin egoteko denbora hartzen ari naiz.
Kontzentrazioak aipatu dituzu. Zer egiten duzue haietan?
Altuerako kontzentrazioak egiten ditugu bakarka, aklimatatzeko. Navacerrada (Madril), Sierra Nevada (Granada), Teide (Lanzarote) eta halako tokietara joaten gara. 2.000 metrotara lo egin eta bizimodu osasuntsua egiten dugu; hiru aste inguru ematen ditugu.
Halakorik egingo al duzu aurki?
Espainiako Itzulia egiten badut, bai.
Ba al dakizu denboraldiaren bigarren zatian egingo dituzun lasterketak zeintzuk izango diren?
Oraindik ez dakit egutegia zein izango den. Tourra ez dudala egingo badakit.
Eta Ordiziako Klasika? Hiru aldiz irabazia zara proba hori.
Baliteke bai hurrengo lasterketa Ordiziako Klasika izatea. 
