CAFeko langileek ez dute erregulazioa babestu eta lanuzteak egingo dituzte
CAF enpresako langileek ez dute zuzendaritzak aurkeztutako lan erregulazio espedientea babestu, eta lanuzteak egingo dituzte egunotan. Gaur egindako batzarretan, gehiengo osoz hartu dute erabakia. Hala, bihar, etzi eta astelehenean, launa orduz geldi...
CAF enpresako langileek ez dute zuzendaritzak aurkeztutako lan erregulazio espedientea babestu, eta lanuzteak egingo dituzte egunotan. Gaur egindako batzarretan, gehiengo osoz hartu dute erabakia. Hala, bihar, etzi eta astelehenean, launa orduz geldituko dira, protesta moduan. Horrez gain, manifestaziorako deia egin dute etzirako. Langileen eskakizunen artean, lan karga jaisten den garaian, langileak kaleratu ordez, epe hori formaziorako erabiltzea dago. Gainera, enpresak 100 milioi euroko irabaziak izan dituela azaldu dute.
Enpresako zuzendaritzak astelehenean azaldu zien proposamena sindikatuei. Sei hilabeteko iraupena izango duen lan erregulazio espedientea aurkezteko asmoa dute. Erregulazio horrek, gutxienez, 750 langileri eragingo lieke. Erregulazioa, ordea, errotazio bidez aplikatuko lukete, aldiko 300 edo 350 langileri eraginez. Langile horiek guztiak, trenen akaberaz arduratzen den 4. sektorekoak izango lirateke.
Gaur goizean, enpresaren proposamena aztertzeko batzarra egin dute langileek. 1.386 langilek eman dute botoa, eta horietatik 1.295, erreformaren kontra eta «presio neurriak» hartzearen alde agertu dira. LAB sindikatuak azaldu duenez, «mobilizazio horien helburua, enpresak EREa aplikatzeko hartu duen erabaki unilateralean atzera» egitea da, eta era berean, «sortu den egoerari irtenbidea bilatzeko eta alternatibak lantzeko komitearekin eseri dadila» eskatzea.
Hartu dituzten protesta neurrien artean, launa orduko lanuzteak daude batetik; bihar, etzi eta astelehenean egingo dituzte geldialdiak. Bestetik, manifestazioa egingo dute etzi, 11:30ean hasita, Beasaingo kaleetan.
