Sasieta zabortegia urtarrilaren 31n itxiko dute, aldi baterako

Ane Arrieta

2014/11/26

Sasieta 2015eko urtarrilak 31n itxiko dute

Sasietaren itxiera. 2015eko urtarrilaren 31n. Iñaki Erauskin eta Ernike Enparantza. prentsaurrekoa. Iragazgaitzea. baimena,

Beasaingo Sasieta zabortegia aldi baterako itxiko dute 2015eko urtarrilaren 31n. Hala ere, itxialdi hau “aldi baterako” izango dela azpimarratu nahi izan dute Iñaki Erauskin Sasieta Mankomunitateko Zerbitzuburuak eta Enrike Enparantza Ingurumen Teknikariak. “2011 urteko maiatzean Ingurumen Baimen Bateratua eman zigun Eusko Jaurlaritzak” diote. “Baimen horretako eskakizunetako bat zabortegia iragazgaitzea zen. Bere garaian errekurtsoa jarri genuen Mankomunitatekoek, baina aurtengo ekainera arte ez dugu ezer jakin. Ekainean proiektu bat aurkezteko eskatu ziguten. Orain jakin dugu, guk aurkeztutako proiektua ez dutela onartu”, zioen Iñaki Erauskinek. Horregatik, Eusko Jaurlaritzak proposatzen duen iragazgaitzea posible den aztertzeko, Sasieta aldi baterako itxiko dutela erabaki zuten atzo iluntzean egin zuten bileran, Mankomunitateko kide guztiek aho batez. Aldi hau, gehienez ere bi urtez luza daiteke, baina ez dela behin betiko itxiera azpimarratu nahi izan dute. Gaur eguerdiko prentsaurrekoan azaldu dutenez, Eusko Jaurlaritzako Ingurumen Sailak, Ingurumen Baimen Bateratua bi fasetan ematen du: Lehen aldian baldintza batzuk betetzeko ematen da baimena, fase baldintzatu modura, eta bigarrenean behin betiko baimena ematen dute, baldintzak betetzen badira. Kasu honetan, fase baldintzatuko baimena zuten soilik, 2011ko maiatzean eman zietena. Iragazgaitzearen baldintza oraindik betetzen ez dutenez, zabortegia itxi eta iragazgaitzearen aukera aztertuko dute Sasietakoek. 1991 urtean ireki zen Sasieta zabortegia eta 40-45 tona zabor jasotzen ditu urteko, egungo erritmoan. Egungo erritmoan jarraituz gero, lau urte inguruko iraupena duela zabortegiak azaldu dute gaurko prentsaurrekoan, “urtean jasotzen duen zabor kantitateak aldaketarik jasango ez balu”. 1,5 milioi metro kubiko ditu Sasieta zabortegiak, eta horietako 1,3 milioi dagoeneko beteta daude. Urtarriletik aurrera Goierriko zaborrak nora joango diren, eta erabaki honek gainerako zabortegietan nola eragingo duen galdetutakoan, erabaki horiek GHKk hartu behar” dituela azaldu diote Goierriko Hitzari.

Azeari Andonegi Sasietaren itxieraz albistea. 2015eko urtarrilaren 31n itxiko dute.
Azeari Andonegik “tamalgarria” deritzo EAJren jarrera Behin itxieraren inguruko nondik norakoak azaldu dituztenean, Azeari Andonegi Sasieta Mankomunitateko lehendakariak gaur Gipuzkoako egunkari batean atera den itxieraren inguruko albisteaz duen iritzia eman du. Albiste horretan, itxiera aldi baterakoa denik ez duela nabarmen jartzen azaldu du, eta “itxiera hilabete batzuetarako” soilik dela azpimarratu du. “Bilera 21:00etan bukatu” zutela atzo eta “egunkari horretako lehen, bigarren eta hirugarren orriak itxieraren albistearekin” beteta egoteari, “atzean interesak daudenaren susmoa” hartzen diola azaldu du. Gainera, informazioa “akatsduna” dela dio. Egunkari horretako albiste honetako azken paragrafoan, Beasaingo EAJko Aitor Aldasororen izenean “Sasietaren inguruko leporaketak” daudela ere azaldu du Andonegik. Jarrera hau “tamalgarria” dela deritzo Andonegik, “batez ere, beraien proposamena erraustegia egitea delako: zepa (edo eskoria) toxikoa”. “EH Bilduk ahalegin handia egiten ari delako ingurunea errespetatzeko eta egituren jasangarritasuna bermatzeko” dio, eta “aukera denak aprobetxatu nahi izaten dituzte gureganako aurkakotasuna erakusteko”. Borroka politiko honekin “ingurunea eta gipuzkoarrak kaltetuta” ateratzen direla dio.

Era berean, gaur goizean Iñaki Errazkin Gipuzkoako Ingurumen eta Lurralde Antolaketa diputatuak Zestoako harrobiaren inguruan egin duen agerraldian Sasietaren itxieraren albiste hau ere izan du kontuan: Gipuzkoako komunikabide batek gaur plazaratutako informazioa dela-eta”, Iñaki Errazkinek esan du “ez dela egia Sasietako zabortegia urtarrilaren 31n itxiko denik behin betiko: geldialdi tekniko bat izango” dela, “behin-behinekoa, aurreko agintaldian egin gabe zeuden zenbait iragazgaizte lan egiteko, eta lan hauek sei hilabete inguruko iraupena izango dute”. Hori bai, aurrerago, “Gipuzkoako zabortegi kutsakor guztiak ixteko plagintzaren baitan, eta Eusko Jaurlaritzak Zubietako TMB planta egiteko baimena eman ondoren, Sasieta ere itxi” egingo dela azaldu du.

Azken elkarrizketak

Azken bideoak

Argitalpen bereziak