EH Bilduk Beasainen egindako inkestak "emaitza onak" utzi ditu

'Hari gara' prozesuaren barruan egin dute galdeketa herritarren artean

Eskeine Legorburu

2015/02/03

EH Bilduren izenean hitz egin duten ordezkariak arratsaldeko agerraldian

EH Bilduren helburua “Beasain eraldatzea” da, eta horretarako herritarren laguntza eskatu du. Urte amaieran banatu zuten inkesta da horren eredu, eta orain emaitzak jakinarazi dituzte. EH Bilduk udal gobernuan egindako lanari buruzko iritziak jaso dituzte, eta emaitzak “argiak” direla jakinarazi dute: “Datuak ikusita Beasaingo herritar gehienek EH Bilduk gobernuan gutxiengoan egindako kudeaketa ontzat eman dute, eta era berean, aurreko gobernuek baino lan hobea egin duela ondorioztatu dezakegu”, adierazi dute. Hala, eta inkesten arabera, azken lau urteetan “Beasainek hobera egin duela” adierazi dute inkestek koalizioaren ustez. Emaitzak ikusita, EH Bilduko ordezkariek diote koalizioak martxan jarritako aldaketa babesten dutela herritarrek, eta bide hau, “hasi besterik egin ez den bidea” dela jakinarazi dute. Orain arteko kudeaketak jarraipena behar duela adierazi dute, “oraindik asko dagoelako egiteko eta aldatzeko”. Horretarako konpromisoa erakutsi du EH Bilduk Beasainen, “herritarrek aldaketa horiek babesten dituztelako. Hauek dira inkestak utzi dituen emaitzetako batzuk (koalizioak nabarmendu dituenak):

Inkesta erantzun dutenen %63,46ak Beasain egoera onean dagoela dio, %31,41ak erdi purdi eta %3,21ak egoera txarrean.
%71,34ak dio udalaren kudeaketak hobera egin duela azken urteetan, %22,29k berdin jarraitzen duela eta %3,82k okerrera egin duela.
Udal azpiegiturak: %65,19k dio kudeaketa ona dela, %24,50ak erdi purdikoa. Hoberen baloratuta dauden azpiegituren artean uraren hornikuntza eta parke zein lorategien mantenua eta kale garbiketa daude. Balorazioan pixka bat beherako daude hodankinen bilketa eta argiteria.
Udal eraikinen egoera eta instalazioen kudeaketa: ona izan da %59,75arentzako, erdi purdikoa %22,41arentzat eta txarra %6,08rentzat. Ikastetxeak eta kirol instalakuntzak dira ondoen baloratu dituztenak eta kultur azpiegiturak okerren.
Herritarrentzako arreta, informazioa eta parte hartzea: %58,21ak ondo baloratzen du, %20,13k erdizka eta %3,97k gaizki. Udal informazioaren kantitatea eta kalitatea izan da ondoen baloratu dena.
Kultur eta kirol ekintzak: %56,23ak ondo baloratzen ditu, erdizka %29,96ak eta gaizki %4,75ak. Kultur ekitaldiak eta haurrentzako ekintzak ondo baloratuta daude, baina hobetzeko puntu bezala identifikatu dituzte auzoetako jaiak eta euskaraz egiten diren ekintzak.
Berdintasuna, euskara, kirol ekintzak, osasuna, kultura, helduen alfabetatzea, merkataritzaren sustapena, asteko azoka, eta enpleguaren sustapena: %47,92ak ondo baloratzen du, erdizka %32,31ak eta gaizki %13,40ak.
Diru laguntzak: inkesta erantzun dutenen %35,86arentzat onak dira udalak ematen dituen diru laguntzak. Hala ere, gai honen inguruko iritzia eman ez dutenen edo/eta gaia ezagutzen ez duten beasaindarren kopurua altua da (%36,71).
Ingurumena: Agenda 21eko ekintzak, airearen kalitatea, energiaren aurreztea, oineztatzea, bidegorriak, erreka, eta mendien eta herri bideen garbiketa ondo baloratzen ditu erantzuleen %50ak, erdizka %20,26ak eta gaizki %7,91ak.
Kudeaketa orokorra: EH Bilduren udal gobernuaren kudeaketa orokorra ondo baloratzen dute 10etik 6k.

Azken elkarrizketak

Azken bideoak

Argitalpen bereziak