Ordizia Orainek herritarren "tresna" izan nahi du udalean
Maiatzaren 24ko udal hauteskundeei begira, Ordizia Orain hautesle elkarteak gaur aurkeztu ditu, Ordizian, 2015-2019 agintaldirako ildoak. “Herritarren arazoei eta herriaren planteamenduei erantzuteko” aurkeztu da bozetara. Herritarren “tresna eta ibilgailu” izan nahi du. “Gure betebeharra parte hartzea da, ez eskubidea bakarrik. Protagonista herritarrak izan behar du erakundeetan”, azaldu du Ordizia Orainen zerrendaburu Mila Sukiak.
Konfrontazioari uko egin, eta “elkarrizketa eta adostasuna” izango ditu lanerako filosofia. San Jose zahar egoitzako langileen grebari elkartasuna adierazi ondoren, hauteskundeetara “irabazteko asmoan” aurkeztu direla argitu du.
Arloka ideia nagusiak eta printzipioak azaldu ditu, jarraian. Udaleko ordezkariak aukeratzeko botoak, kasu honetan, “konfiantzazko botoa” izan behar duela esan die Sukiak Barrenako areto batean bildu diren hogei bat jarraitzaileri. Hurrengo hauteskundeetarako hautagaitza-zerrenda irekiak atera daitezen saiatuko dira. Estetika/etika kontraposizioan, etikaren arlotik lan egingo dutela aurreratu du.
Hona gai bakoitzeko Ordizia Orainen alkategaiak esan dituenak:
Ordizia Orainen hauteskunde aurkezpena, gaur, Ordizian./Aimar Maiz
Ordizia Orainen hautagaiak, Barrenan./Aimar Maiz
- Euskara. “Integratzeko gailua izan behar du. Gure identitatea eta arima da”.
- Udal kudeaketa. “Irekiagoa eta demokrazia gehiagorekin nahi dugu. Konfiantzazko botoa izan behar du, ez lau urtean behin soilik ematen den zerbait. Hurrengo bozetarako zerrenda irekien alde egingo dugu”.
- Lana. “Negoziazio kolektiboa. Lana enpresan bertan egitea bultzatuko dugu, ez kanpora bidaltzea. Prekarietateari, ez”.
- Hezkuntza. “Integratzailea. Baloreetan oinarritutakoa, eta ez kontzeptuetan edo edukietan”.
- Berdintasuna. “Horren alde lan egin beharra dago, ez hitz egin soilik. Lan berdinerako, soldata bera. Kontratuarekin, eta benetan kotizatuz. Emakumeen aurkako indarkeriaren aurrean, erabateko errefusa”.
- Eskubide zibilak. “Denak, denentzat. Hemengoak direnentzat zein ez direnentzat. Etxegabetzerik ez dugu onartuko, eta kasu bakoitzari erantzungo diogu. Denentzat etxebizitza eskubidea. Komunitate lagunkoiak sortu behar dira”.
- Gazteria. “Lanaren edo etxebizitzaren auzietan, independentzia irabazi behar dute. Aktiboagoak izan behar dute”.
- Adinekoak. “Asko daukate irakasteko, esateko. Menpekotasun Legerako baliabide gehiago behar dira”.
- Ingurumena. “Gure iturburuak berreskuratu beharra dago. Kutsadura mota guztien aurka neurriak hartuko ditugu. Herrian garapen kaxkarragoa daukaten eremuekiko diskriminazio positiboa behar da, han gehiago inbertituta eta lan eginda. Animalien eskubideen defentsa”.
- Kultura eta kriola. “Bizimodu bat da. Bizi egin behar da. Ez da denborapasa. Emakumeen kirola sustatu behar da, benetan. Emakumeek gure espazioa exijitzen dugu”.
- Ekonomia. “Diruarekin, gardentasuna ezinbestekoa da. Gobernu aldaketa bakoitzean auditoria bat eskatuko dugu. Gure herriko komertzioetan erosi , gure baserritarren produktuak kontsumitu. Jasangarritasuna, natura eta ingurumena da hori. Nekazaritzarena lan eremuko sektore babesgabeena da. Herriko ekonomiaren motoreetako bat bihurtu behar da baserria. Azokari buelta oso bat eman behar zaio, gure herrira nola erakarri asmatzeko”.
