Inoiz baino boto gehiagorekin irabazi du Bertsomovieda 'Txakile' lanak

Helduen mailako lehen sariaz gain, publikoaren saria ere irabazi du Ibon Iza, Joseba Rodrigez eta Urtzi Uriarteren lanak. Arratsaldean egin dute sari banaketa, Igartzako jauregian.

Maialen Igartua

Beasain

2015/05/08

Bertsomovieda lehiaketako sarituak, Igartzako jauregian. / Maialen Igartua

Gustura agertu dira gaur Bertsomovieda lehiaketako antolatzaileak, Beasaingo Igartzako jauregian egindako sari banaketan. Parte hartzaile kopurua “egonkor” matendu bada ere, inoiz baino jende gehiagok egin dio bisita Bertsomoviedako webguneari. Eta horren erakusle da irabazleek jaso duten boto kopurua ere: 1.234, orain arteko errekorra. Izar Sarriegi antolatzailearen hitzetan, zaila izan da aukera. Dena den, badirudi epaimahaikideak eta boto emaileak ados jarri direla aurten. Lehen aldiz, lan berberak jaso ditu lehenengo saria eta publikoarena: Txakile lanak. Ibon Iza, Joseba Rodrigez eta Urtzi Uriarte dira Txakile bideoaren egileak, eta 1.500 euro jaso dituzte bi sariengatik. “Lan osoena izan da, gidoia ona da, eta erabilitako baliabide teknikoak ere bai; zinemako formatura gehien hurbildu dena da”, adierazi du Sarriegik. Saritutako bost bideoak jarri dituzte sari banaketan, eta mokadutxoa ere egin dute. Antolatzaileez gain, bertan izan dira, besteak beste, Koldo Agirre alkatea eta Aitor Larburu eta Garbiñe Zurutuza zinegotziak. “Egitasmo berritzailea da Bertsomovieda, eta Beasaindik harago doan egitasmoa bihurtu da, beraz, udaletik laguntza ematen jarraituko dugu”, esan du Zurutuzak. Saritutako lanak:

Sari nagusia: ‘Txakile‘. 1.000 euro.
Bigarren saria: ‘Etzinen zu’. 300 euro. Egilea: Gero Pentzauku Produkxions. “Parodia eder bat” da epaimahaiaren ustez.
Gazteen lehenengo saria: ‘Tantak’. 300 euro. Egilea: Etxebeltz bertso eskola. Bideoak transmititzen duen “sentsazio positiboa” baloratu dute.
Gazteen bigarren saria: ‘Garoña bertsomovieda’. 150 euro.Egileak: Iker Loidi, Amaiur Mendiaraz, Ainara Minguez, Miriam Ojenbarrena eta Garazi Elejalde. “Umorea” eta gidoia baloratu ditu epaimahaiak.
Publikoaren saria: ‘Txakile’. 500 euro.
Bertsorik onenaren saria: ‘Aita heriotza’. 250 euro. Egileak: Javi Zorroza, Hegoa Alvarez eta Olazti Landa. Bertsoen teknikotasuna baloratu du epaimahaiak.

Irabazleen hitzak: “Poz pozik gauz”
‘Txakile’-ren egileak saria jasotzen. / Maialen Igartua
Arratia eskualdean egindako lana da Txakile. “Poz-pozik gauz”, azpimarratu du behin eta berriz Ibon Iza egileak. 10 minutuko dokumental laburra da. Bola jokotik ideia hartu eta garatu dute istorioa. “Txakilea bola jokoko txirlorik txikerrena da. Txikerrena baina inportanteena da, puntu gehien ematen dituena delako”. Txakilearen metaforarekin belaunaldi desberdinetako ehun bat herritar inguru elkartu dituzte. Metafora horretatik abiatuta, bide batez, Arratia eta arratiera ezagutaraztea ere izan dute helburua. “Gure euskalkia, hitanoa nola erabiltzen dugun… erakutsi nahi izan dugu”, gaineratu du. Urtebeteko lanak fruitua ikusi du. Editatzeko arazo bat baino gehiago izan dutela aitortu du Izak. “Kosta zitzaigun forma ematea”. Arratiarrak ere pozik daude lanarekin eta sariarekin. “Dimako jendea ere pozik dago. Asko eta asko harritu egin dira. Emaitzagaz pozik gauz”. Dagoeneko beste ideia bat buruan darabilkitela aurreratu du Izak. “Datorren urtean ez bada, hurrengoan izango duzue gure berri”.

Azken elkarrizketak

Azken bideoak

Argitalpen bereziak