Ordizian bakarrik ez, Palencian ere irabazi egin dio Garabi Ordiziak Physiorelax taldeari. Igoera faseko play offak jokatzen ari dira ordiziarrak, eta bueltako partida jokatu zuten larunbatean, La Bastera zelaian. Ordizian alde handiarekin (41-8) irabazi bazuten, bueltakoan are handiagoa izan zen alde hori, ordiziarrek 7-65 egurtu baitzuten etxeko taldea.
Behin finalera iritsita, azken erronka izango dute aurrean ordiziarrek. Izan ere, irabazleak Ohorezko B mailara edo “zilarrezko” ligara igotzeko zuzeneko txartela lortuko du. Galtzaileak berriz, bigarren aukera bat izango du, jaitsiera jokoan duen Ohorezko B Mailako talde baten aurka.
Finala, nafarren aurka
Finaleko data oraindik zehaztu gabe badago ere, Ordiziak dagoeneko badaki zein izango duen aurkaria: Iruñeko La Unica taldea. Nafarrek 25-10 galdu zuten joaneko partida Ferrolen, baina atzo jokatu zuten bueltakoa etxean, eta 28-0 nagusitu ziren.
