Arratsaldean egingo dute Zegaman Kilometro Bertikala, baina aurrikusitakoa baino ibilbide motzagoa egingo dute, eguraldiagatik. Parte hartzaileak gogotsu agertu dira Kilometro Bertikalerako eta etziko maratoirako, eta "onena" ematera etorri direla jakinarazi dute.
Ezkerretik eskuinera: Marco De Gasperi, Maite Maiora, Edurne Albizu, Laura Orgue eta Aritz Egea. / Maialen Igartua
Gero eta gertuago dago. Bi egun egun baino ez dira falta Zegama-Aizkorri mendi maratoirako, eta parte hartuko dutenak Zegaman dira dagoeneko, zeruari eta Aizkorriko gainari begirik kendu gabe. Hori baino lehen, ordea, Kilometro Bertikala izango da, aurten lehen aldiz antolatu dutena. Gaur egingo dute proba, 16:00etan.
Zegama-Aizkorriko hiru probetan 80 goierritar izango dira, horietatik hamabi gaurko kilometro bertikalean.
Eguraldiagatik,
kilometro bertikalerako aurrikusitako ibilbidea aldatu egin dute, eta apur bat laburragoa izango da, segurtasunagatik. Kilometro batekoa beharrean, 889 metroko altuera izango du ibilbideak, eta 2.875 metroko luzera. “Aldaketa txikia” dela esan du Ainhoa Txurrukak, probaren zuzendariak.
Maratoiaren kasuan, aurten podiuma izango da aldatuko dena, ezbairik gabe.
Ez dira Zegaman izango ez Kilian Jornet eta ez Estevie Kremer, iazko irabazleak. Ondorioz denborak ere igo egingo direla uste du antolakuntzak, baina ikusi egin behar. Giroa, behintzat, izango da asteburuan Zegaman, hori ezin ukatu. Gaur goizerako, dagoeneko, musika entzuten zen plazaren inguruan jarritako bozgorailuetatik, eta txandal koloretsuz jantzitako kirolariak ikusten dira edonon.
Parte hartzaileen adierazpenak.
Aldaketak aldaketa, gogotsu agertu dira Zegama-Aizkorrin parte hartuko duten kirolariak. Zegamako alkate Edurne Albizurekin batera egin dute agerraldia goizean, Zegamako kultur etxean. Dai Matsumoto japoniarra, Marco De Gasperi italiarra, Maite Maiora, Laura Orgue kataluiniarra eta Aritz Egea izan dira agerraldian, eta beren sentsazioak partekatu dituzte. Albizuk, berriz, herritarren eta boluntarioen lana eskertu du.
Laura Orgue: [Kilometro bertikalean eta maratoian parte hartuko du]. “Orain arte kilometro bertikaletan aritu izan naiz. Lehenengo aldia izango da Zegama-Aizkorri mendi maratoian parte hartuko dudana. Maratoia egiteak ilusioa egiten dit, baina errespetu handia diot. Burua erabiltzea eta hotz mantentzea da nire helburua, indarrak ongi kudeatzeko”.
Aritz Egea: “Hasieratik egurrean aterako naiz, nire estiloari jarraituz. Aurreko urteko denbora hobetzea zaila ikusten dut (4.00.54, bederatzigarren postua). Indartsu sentitzen naiz, baina hori igandean erakutsi behar da”.
Marco De Gasperi: [Iaz bigarren egin zuen, lau orduz azpiko denborarekin]. “Aritz ez bezala, poliki hasiko naiz igandeko maratoian, eta bukaerarako utziko dut indarra. Ez dut uste iazko denbora hobetuko dudanik, aurten ez nago aurreko urteetan bezain indartsu, baina saiatuko naiz ondo egiten. Lokatza izango da gakoa”.
Dai Matsumoto: “Bigarren aldia dut Zegama-Aizkorri maratoian. Duela hiru urte parte hartu nuen, baina erretiratu egin behar izan nintzen lesio batengatik. Nire onena emango dut, eta irabaztea espero dut”.
Maite Maiora: “Zortzigarren, bosgarren eta hirugarren postuak lortuak ditut orain arte Zegaman. Postu horiek hobetzea posible da, baina nire helburua lasterketa amaitzea izango da. Lasterketan zehar ikusiko da irabazteko aukerarik dudan ala ez, biana ahal dudana emango dut. Espainiako eta Euskal Herriko txapelduna naiz egun, baina horrek ez dit presiorik eragiten. Bai, ordea, nire buruarekin konfiantza izatea, eta motibatuta egotea”.
