Larunbat honetan lor lezake Garabi Ordiziak Ohorezko B Mailarako igoera. Etxean jokatuko dute, La Unica talde nafarraren kontra, eta ezusteko handirik ezean, ordiziarren alde dago dena. Izan ere, joaneko partidan 5-37 irabazi zuten Iruñean. Finala irabaziko balu, Estatu mailako Ipar-Mendebaldeko Play Off-a irabaziko luke, eta horrenbestez, zuzenean igoko litzateke Ohorezko B mailara.
Hori lortzeko, ordea, ezinbestekoa da larunbateko azken langa gainditzea. Perlinesek eta Otamendik zuzendutako taldeak sekulako denboraldia egin du orain arte, eta play offetan ere maila handia erakusten ari dira. Hala ere, badakite nafarrak “dena ematera” aterako direla, eta beste behin ere, zaleen babesa eskatu dute. Partida 18:30ean izango da, Altamira zelaian.
